Luˉka‸ li‸ 21

Mehˇchawˇma hpu tanˇ keu ve

1Oˇ htaˇ, Yeˍsuˆ chiˇ nyi leh, hpu tanˇ keu kuiˬ lo paw sha paˍ teˇ hpaˍ hpu keu chehˇ ve hta‸ yawˇ gʼa mawˬ ve yoˬ. 2Haˍ gʼawˇ ve mehˇchawˇma teˇ gʼaˇ peh‸ shanˍ nyiˇ peh‸ keu ve hta‸ ka‸ yawˇ gʼa mawˬ ve yoˬ. 3Oˇ htaˇ yawˇ kʼoˆ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, haˍ gʼawˇ ve mehˇchawˇma chi teˇ gʼaˇ lehˬ, chaw hkʼa peu-eˬ a‸ kehˉ leuˉ leh keu maˇ ve yoˬ. 4Awˬ lawn kʼo, yawˇ hui hkʼa peu-eˬ lehˬ cawˬ maˇ jaˇ ve awˬ hkʼaw lo yuˬ tawˆ leh keu ve yoˬ. Ya‸ hkʼaˇ, yaˇ miˇ chi teˇ gʼaˇ lehˬ, haˍ gʼawˇ jaˇ ve awˬ hkʼaw lo yawˇ a sha‸ hu tuˬ ve hkʼa peu-eˬ hta‸ yuˬ tawˆ leh keu ve yoˬ teh‸ kʼoˆ ve yoˬ.

Bon yehˬ lonˉ gʼa luˬ tuˬ ve awˬ lawn Yeˍsuˆ hto piˇ ve

5Bon yehˬ lonˉ awˬ hkʼaw lo nyi sha jaˇ ve haˉ pui shiˍ teˇ hpaˍ leh, tanˇ taˍ ve awˬ hpfuhˇ hkʼaˆ jaˇ ve mawˇ jeˬ teˇ hpaˍ hkʼa deh‸ gu taˍ ve awˬ lawn shu kʼoˆ ve teˇ yanˇ Yeˍsuˆ kʼoˆ ve, 6Nawˬ hui gʼa mawˬ ve chi teˇ hpaˍ hta‸ shu te luˬ ve awˬ nyi gaˬ la tuˬ yoˬ. Oˇ htaˇ, haˉ pui teˇ shiˍ awˬ hkʼoˆ teˇ shiˍ maˇ cawˬ htaˇ hkʼa gaˬ luˬ kʼai tuˬ yoˬ teh‸ kʼoˆ ve yoˬ.

7Yawˇ hui kʼaw‸ kʼoˆ ve, Saˍ la‸-oˬ, hkʼe te kʼo, awˬ ceuˬ oˇ ve teˇ hpaˍ hkʼaˬ htaˆ hpeh‸ la tuˬ le. Hpeh‸ la paˇ neˇ ve teˇ yanˇ, awˬ heˆ hkʼaˬ hkʼe hpeh‸ tawˆ la tuˬ ve le teh‸ na nyi ve yoˬ.

8Yeˍsuˆ yawˇ hui hta‸ kʼaw‸ kʼoˆ piˇ ve, Shu nawˬ hui hta‸ maˇ gʼa heˍ yuˬ beˬ yuˬ tuˬ, shaˍ ti‸ taˍ-o‸. Awˬ lawn kʼo, chaw maˇ maˇ ngaˬ ve awˬ meh hta‸ pfuhˇ laˬ leh, Ngaˬ lehˬ yawˇ yoˬ. Awˬ yanˇ gaˬ la peuˬ teh‸ kʼoˆ tuˬ yoˬ. Yawˇ hui awˬ hkʼaˇ suh taˇ kʼai. 9Nawˬ hui lehˬ, ma‸ bawˆ ve leh mvuhˇmiˬ hta‸ hpfuhˆ kʼai ve awˬ lawn hta‸ gʼa kaˇ ve teˇ yanˇ, kawˆ ve cheˇ ve taˇ cawˬ piˇ. Awˬ lawn kʼo, awˬ ceuˬ chi teˇ hpaˍ awˉ lawˉ gʼa hpeh‸ la tuˬ yoˬ. Ya‸ hkʼaˇ, teˇ cawˬ haˉ awˬ leh meuˇ gaˬ la tuˬ ve maˇ heˆ teh‸ kʼoˆ ve yoˬ.

Awˬ leh meuˇ gaˬ paˇ neˇ htaˇ ve awˬ heˆ teˇ hpaˍ

10Chi hkʼoˆ ka‸ yawˇ kʼaw‸ kʼoˆ ve, Chaw teˇ ceuˬ leh teˇ ceuˬ, mvuhˇmiˬ teˇ peˆ leh teˇ peˆ ya‸ da‸ jiˆ da‸ tuˬ yoˬ. 11Miˬ gʼaˇ hte‸ hiˆ ve, chehˇ kuiˬ teˇ kaˬ peuˬ teˇ kaˬ awˬ hkʼaw lo meu‸ ve kaˆ ve leh naˬ beuˬ gaˬ la tuˬ yoˬ. Mvuhˇ naw ma hkʼoˆ lo kawˆ tuˬ uiˍ jaˇ ve teˇ hpaˍ leh, uiˍ jaˬ ve awˬ heˆ teˇ hpaˍ tawˆ la tuˬ yoˬ. 12Ya‸ hkʼaˇ, chi hkʼa peu-eˬ maˇ hpeh‸ la sheˍ awˬ gʼuˇ suhˍ, shu nawˬ hui hta‸ hpeh yuˬ leh fawˉ mehˍ laˇ tuˬ yoˬ. Bon yehˬ teˇ hpaˍ awˬ hkʼaw lo leh htawnˍ teˇ hpaˍ awˬ hkʼaw lo shu nawˬ hui hta‸ chiˇ a‸ tuˬ yoˬ. Ngaˬ ve awˬ meh hta‸ pa taw, hkunˉ hawˉ hkanˇ teˇ hpaˍ leh mvuhˇmiˬ jawˇmawˇ lonˉ teˇ hpaˍ mehˆ gʼuˇ suhˍ shu nawˬ hui hta‸ yuˬ kʼai tuˬ yoˬ. 13Chi hkʼe te ve awˬ hkʼaw lo, nawˬ hui shaˉ hkiˆ gʼa hkanˍ ve awˬ yanˇ hpeh‸ la tuˬ yoˬ. 14Hkʼe te leh, hkʼaˬ hkʼe kʼaw‸ kʼoˆ hkʼaw‸ piˇ tuˬ ve, awˉ lawˉ htaˇ ka‸ ngaˬ maˇ dawˇ nyi teh‸, a shu yawˇ ve nyi ma hkʼaw lo dawˇ cheˆ taˍ-o‸. 15Awˬ lawn kʼo, nawˬ hui ve canˇ paˍ hkʼa peu-eˬ gʼawˬ hkʼaˆ maˇ gʼa leh tawˍ taˍ maˇ gʼa ve tawˇ hkawˇ leh cuˇ yiˍ maˍ yiˍ ngaˬ nawˬ hui hta‸ pe‸ laˇ tuˬ yoˬ. 16Awˬ pa awˬ e, awˬ viˉ awˬ nyi awˬ ceuˬ awˬ hkʼaˇ leh awˬ chawˇ awˬ paˆ teˇ hpaˍ nawˬ hui hta‸ chiˇ a‸ piˇ tuˬ yoˬ. Yawˇ hui lehˬ, nawˬ hui teˇ hpaˍ hpaˍ hta‸ tiˇ pehˍ tuˬ yoˬ. 17Ngaˬ ve awˬ meh hta‸ pa taw chaw hkʼa peu-eˬ nawˬ hui hta‸ canˇ tuˬ yoˬ. 18Ya‸ hkʼaˇ, nawˬ hui ve uˉ hkeh mvuh teˇ mvuh ka‸ maˇ gʼa luˬ. 19Nawˬ hui nyi ma yeˬ puiˉ ve hta‸ pa taw, nawˬ hui ve co ha gʼa te‸ tuˬ yoˬ.

20Yeˍruˆsaˍlehnˍ venˇ hta‸ ma‸ moˍ ma‸ cuˇ hkʼa caw zuhˇ hoˆ taˍ ve hta‸ nawˬ hui gʼa mawˬ ve teˇ yanˇ, venˇ oˇ ve gʼa luˬ paˇ neˇ ve hta‸ nawˬ hui shiˍ-o‸. 21Oˇ htaˇ, Yuˇda‸ mvuhˇmiˬ awˬ hkʼaw lo chehˇ ve chaw hui hkʼaw hkʼoˆ lawˬ hkʼoˆ lo hpaw-e loˬ. Venˇ hkʼaw lo chehˇ ve chaw hui tawˆ kʼai-o. Venˇ awˬ baˬ lo chehˇ ve chaw hui venˇ hkʼaw lo taˇ lo‸-e. 22Awˬ lawn kʼo, Li‸ hpu hkʼaw bvuh‸ taˍ ve hkʼa peu-eˬ biˇ la tuˬ, awˬ nyi awˬ haˉ oˇ ve teˇ hpaˍ lehˬ, kʼaw‸ te hkʼaw‸ piˇ tuˬ ve awˬ nyi awˬ haˉ teˇ hpaˍ hpeh‸ ve yoˬ. #Hse 9:7 23Awˬ yanˇ oˇ ve awˬ hkʼaw lo, yaˇ hu ma leh cuˉ dawˬ ve yaˇ ehˉ cawˬ ve chaw hui lehˬ, gʼa dawˇ haˍ jaˇ tuˬ yoˬ. Awˬ lawn kʼo, chi miˬguiˬ hkʼoˆ lo dawˇ haˍ tuˬ uiˍ jaˇ ve gaˬ la tuˬ yoˬ. Chaw chi teˇ ceuˬ awˬ hkʼoˆ hta‸ nyi ma zuhˆ ve teˇ ceuˬ htawˇ gaˬ la tuˬ yoˬ. 24Yawˇ hui lehˬ, aˉ htaw chaw pehˍ ve hta‸ gʼa hkanˍ tuˬ yoˬ. Shu yawˇ hui hta‸ hpeh yuˬ leh, mvuhˇmiˬ hkʼa peu-eˬ awˬ hkʼaw lo yawˇ hui hta‸ sheh kʼai tuˬ yoˬ. Buiˇ shaˆ aˉ naˆ chaw hui lehˬ, yawˇ hui ve awˬ yanˇ biˇ la htaˇ hkʼa gaˬ Yeˍruˆsaˍlehnˍ venˇ hta‸ naˆ tiˍ taˍ tuˬ yoˬ.

Chaw yaˇ ve Yaˇ hpu kʼaw‸ ya‸ la tuˬ ve

25Oˇ ve teˇ yanˇ, mvuhˇ nyi, ha pa, meu‸ keu teˇ hpaˍ awˬ hkʼaw lo awˬ heˆ teˇ hpaˍ tawˆ la tuˬ yoˬ. Laˇ tsuhˇ gʼuiˬ leh gʼuiˬ baˇ teˇ hpaˍ awˬ hkawˇ bvuhˬ jaˇ ve pa taw, chaw ceuˬ teˇ hpaˍ anˇ jaˇ leh, dawˇ haˍ gaˇ haˍ jaˇ tuˬ yoˬ. 26Chaw teˇ hpaˍ lehˬ miˬguiˬ hkʼoˆ lo hpeh‸ la tuˬ ve awˬ ceuˬ teˇ hpaˍ hta‸ dawˇ nyi ve teˇ yanˇ, kawˆ jaˇ ve pa taw, maˇ nawˇ maˇ hteh kʼai tuˬ yoˬ. Awˬ lawn kʼo, mvuhˇ naw ma ve kanˇ paˆ teˇ hpaˍ hiˆ hiˆ naˇ naˇ hpeh‸ la tuˬ yoˬ. 27Oˇ htaˇ, chaw yaˇ ve Yaˇ hpu lehˬ, uiˍ ve awˬ me‸ awˬ hponˇ leh kanˇ paˆ cawˬ ve awˬ hkʼaw lo moˬ hta‸ ciˇ ya‸ la ve hta‸ yawˇ hui gʼa mawˬ tuˬ yoˬ. 28Awˬ ceuˬ oˇ ve teˇ hpaˍ tanˬ hpeh‸ la ve teˇ yanˇ, nawˬ hui oˉ kʼoˍ chiˇ leh nyi-o. Awˬ lawn kʼo, nawˬ hui hta‸ htaiˍ hkʼaw‸ laˇ tuˬ ve awˬ yanˇ neˇ la peuˬ teh‸ kʼoˆ ve yoˬ.

29Yawˇ yawˇ hui hta‸ tawˇ pa haˉ te maˍ piˇ leh kʼoˆ ve, Maˉ nawˆ cehˬ leh suhˆ cehˬ hkʼa peu-eˬ hta‸ nyi-o. 30Awˬ caˍ caˍ la ve teˇ yanˇ, mvuhˇ cha hkui yanˇ gaˬ la paˇ neˇ peuˬ ve hta‸ nawˬ hui hkʼaˇ nawˬ hui mawˬ leh shiˍ ve yoˬ. 31Chi hkʼa shuˍ shuˍ awˬ ceuˬ chi teˇ hpaˍ hpeh‸ la chehˇ ve hta‸ nawˬ hui gʼa mawˬ ve teˇ yanˇ, Gʼuiˬsha ve mvuhˇmiˬ lehˬ awˬ paˇ lo gaˬ la peuˬ ve hta‸ nawˬ hui shiˍ-o‸.

32Ngaˬ nawˬ hui hta‸ awˬ tehˬ awˬ na kʼoˆ laˇ ve, chi teˇ co maˇ ponˬ kʼai sheˍ htaˇ, awˬ ceuˬ chi hkʼa peu-eˬ hpeh‸ la tuˬ yoˬ. 33Mvuhˇ naw ma leh miˬ naˆ ma mehˉ kʼai tuˬ yoˬ. Ya‸ hkʼaˇ, ngaˬ ve tawˇ hkawˇ lehˬ, maˇ mehˉ kʼai taˬ.

34Nawˬ hui lehˬ, a shu yawˇ awˬ to shaˍ ti‸ te-o. Hkʼe maˇ heˆ kʼo, caˇ leuˉ dawˬ leuˉ ve, tzuhˬ dawˬ bvuhˆ ve, miˬguiˬ dawˇ haˍ gaˇ haˍ tuˬ ve teˇ hpaˍ hta‸ pa taw nawˬ hui nyi ma hawˇ buiˬ lehˍ hpeh‸ chehˇ ve teˇ yanˇ, awˬ nyi oˇ ve lehˬ va yaw ve hkʼa shuˍ shuˍ teˇ cawˬ haˉ nawˬ hui aw‸ hkʼoˆ gaˬ la tuˬ yoˬ. 35Awˬ lawn kʼo, awˬ nyi oˇ ve lehˬ, miˬguiˬ hkʼoˆ chehˇ ve chaw hkʼa peu-eˬ awˬ hkʼoˆ gaˬ la tuˬ yoˬ. 36Hkʼe te leh, hpeh‸ la tuˬ ve awˬ ceuˬ oˇ ve hkʼa peu-eˬ awˬ hkʼaw lo nawˬ hui gʼa ponˬ leh, chaw yaˇ ve Yaˇ hpu mehˆ gʼuˇ suhˍ gʼa huˉ chehˇ hpeh‸ tuˬ hkʼaˬ htaˆ ka‸ bon lawˬ leh shaw taˍ-o‸ teh‸ kʼoˆ ve yoˬ.

37Yawˇ lehˬ, teˇ nyi le le bon yehˬ lonˉ awˬ hkʼaw lo maˍ piˇ leh, teˇ haˉ le le tawˆ kʼai leh Shaˍlonˍ meh ve hkʼaw lo ca haˉ-e ve yoˬ. 38Chaw hkʼa peu-eˬ yawˇ maˍ piˇ ve tawˇ hkawˇ hta‸ na tuˬ, mvuhˇ shawˉ teˇ na‸ htaˇ bon yehˬ lonˉ awˬ hkʼaw lo yawˇ geh hpawnˬ la ve yoˬ.

Obecnie wybrane:

Luˉka‸ li‸ 21: LHBE

Podkreślenie

Udostępnij

Kopiuj