Luˉka‸ li‸ 22
22
Yeˍsuˆ hta‸ tiˇ pehˍ tuˬ shu jeh‸ da‸ ve
1Oˇ htaˇ, Paˍsaˍhkaˍ pawehˇ meh ve, Hkaoˍmonˇ awˬ hkʼaw lo diˇ maˇ keu ve pawehˇ gaˬ la paˇ neˇ ve yoˬ. 2paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ lehˬ, hkʼaˬ hkʼe te leh yawˇ hta‸ gʼa tiˇ pehˍ tuˬ ca ve yoˬ. Awˬ lawn kʼo, yawˇ hui lehˬ chaw chi ma ve hta‸ kawˆ ve yoˬ.
3Oˇ htaˇ, awˬ la‸ gʼawˇ teˇ chi nyiˇ gʼaˇ awˬ hkʼaw lo Iˉsaˍkaˍriˍoˆ meh ve Yuˇda‸ teˇ gʼaˇ ve nyi ma awˬ hkʼaw lo Saˍtanˍ lo‸-e ve yoˬ. 4Yawˇ tawˆ kʼai leh, paw hkuˇ lonˉ teˇ hpaˍ leh bon yehˬ lonˉ ve ma‸ poˍ teˇ hpaˍ geh kʼai leh, Yeˍsuˆ hta‸ yawˇ hui ve la‸ sheh awˬ hkʼaw lo hkʼaˬ hkʼe te gʼa chiˇ a‸ piˇ tuˬ, yawˇ yawˇ hui geh jehˬ da‸ ve yoˬ. 5Yawˇ hui ha lehˬ jaˇ leh, yawˇ hta‸ hpu piˇ tuˬ yoˬ teh‸ hkanˍ taˍ ve yoˬ. 6Yawˇ htawˇ hkanˍ yuˬ leh, chaw awˬ moˍ lonˉ maˇ chehˇ ve teˇ yanˇ Yeˍsuˆ hta‸ yawˇ hui ve la‸ sheh awˬ hkʼaw lo chiˇ a‸ piˇ tuˬ, da‸ ve awˬ yanˇ hta‸ yawˇ ca chehˇ ve yoˬ.
Yeˍsuˆ yawˇ ve awˬ la‸ gʼawˇ hui geh Paˍsaˍhkaˍ pawehˇ caˇ ve
7Paˍsaˍhkaˍ yawˬ ehˉ hta‸ tiˇ pehˍ ve awˬ nyi, Hkaoˍmonˇ awˬ hkʼaw lo diˇ maˇ keu ve awˬ nyi teˇ nyi gaˬ la ve yoˬ. 8Oˇ htaˇ, Yeˍsuˆ lehˬ Peˍtruˆ leh Yoˇhanˬ hta‸ kʼai tcuh leh, Ngaˬ hui Paˍsaˍhkaˍ pawehˇ hta‸ gʼa caˇ tuˬ, ngaˬ hui awˬ pon ca gu-o teh‸ kʼoˆ piˇ ve yoˬ.
9Yawˇ huiˉ maˬ lehˬ, Hkʼaˬ ve teˇ kaˬ lo nawˬ gu tcuh laˇ gaˇ ve le teh‸ yawˇ hta‸ na nyi ve yoˬ.
10Yeˍsuˆ kʼaw‸ kʼoˆ ve, Nawˬ huiˉ maˬ venˇ hkʼaw gaˬ ve teˇ yanˇ, iˉ kaˆ mu‸ hkʼu taˆ ve chaw teˇ gʼaˇ hta‸ gʼa hpuˇ da‸ tuˬ yoˬ. Yawˇ awˬ hkʼaˇ suh kʼai leh, yawˇ lo‸-e ve yehˬ hkʼaw nawˬ huiˉ maˬ lo‸-e peuˬ hkʼaw‸ nawˉ, 11yehˬ shehˍ hpaˇ hta‸ chi hkʼe kʼoˆ piˇ-oˆ, Saˍ la‸ nawˬ hta‸ kʼoˆ laˇ ve, Ngaˬ leh ngaˬ ve awˬ la‸ gʼawˇ hui geh teˇ geh Paˍsaˍhkaˍ pawehˇ caˇ tuˬ, hkehˉ chaw bawehˇ hkʼaˬ lo le teh‸, yawˇ hta‸ na nyi-o. 12Oˇ htaˇ, gu taˍ peuˬ ve, awˬ hta‸ teˇ htai‸ bawehˇ uiˍ ve teˇ bawehˇ yawˇ nawˬ huiˉ maˬ hta‸ maˍ laˇ tuˬ yoˬ. Oˇ kaˬ lo gu taˍ-o‸ teh‸, yawˇ huiˉ maˬ hta‸ kʼoˆ piˇ ve yoˬ.
13Yawˇ huiˉ maˬ kʼai ve teˇ yanˇ, Yeˍsuˆ kʼoˆ ve hkʼe gʼa mawˬ leh, Paˍsaˍhkaˍ pawehˇ caˇ tuˬ awˬ pon gu taˍ ve yoˬ.
Jawˇmawˇ Yeˍsuˆ ve pawehˇ caˇ ve
14Awˬ yanˇ gaˬ la ve teˇ yanˇ, yawˇ hpui lawˇ paˇ lo mui leh, tcuh yaˇ teˇ hpaˍ htawˇ yawˇ geh teˇ geh mui ve yoˬ. 15Oˇ htaˇ yawˇ kʼoˆ ve, Tu‸ ve hkanˍ ve hta‸ ngaˬ maˇ gʼa hkanˍ sheˍ htaˇ, naw hui geh teˇ geh ngaˬ Paˍsaˍhkaˍ pawehˇ chi hta‸ caˇ gaˇ jaˇ ve yoˬ. 16Awˬ lawn kʼo, ngaˬ nawˬ hui hta‸ kʼoˆ laˇ ve, Gʼuiˬsha ve mvuhˇmiˬ awˬ hkʼaw lo pawehˇ chi teˇ maˬ maˇ biˇ la sheˍ ve ceh ceh, pawehˇ chi hta‸ ngaˬ maˇ kʼaw‸ caˇ teh‸ yawˇ hui hta‸ kʼoˆ piˇ ve yoˬ.
17Oˇ htaˇ, yawˇ kawˆ hta‸ yuˬ leh bon hta‸ chiˇ mvuh peuˬ hkʼaw‸ nawˉ yawˇ kʼoˆ ve, Kawˆ chi hta‸ yuˬ leh nawˬ hui pehˬ dawˬ-o‸. 18Ngaˬ nawˬ hui hta‸ kʼoˆ laˇ ve, Gʼuiˬsha ve mvuhˇmiˬ maˇ gaˬ la sheˍ ve ceh ceh, ya‸ nyi hkʼaw‸ nawˉ kʼo, ngaˬ a pehˉ meuˇ gʼuiˬ hta‸ maˇ kʼaw‸ dawˬ teh‸ kʼoˆ ve yoˬ.
19Hkaoˍmonˇ hta‸ htawˇ yawˇ yuˬ leh bon hta‸ chiˇ mvuh ve yoˬ. Peuˬ leh yawˇ hkaoˍ monˇ hta‸ hkʼeh‸ leh, awˬ la‸ gʼawˇ hui hta‸ piˇ leh kʼoˆ ve, Chi lehˬ, nawˬ hui awˬ pon tanˇ piˇ ve ngaˬ ve awˬ to yoˬ. Ngaˬ hta‸ dawˇ nawˇ tuˬ chi hkʼe te-o teh‸ kʼoˆ ve yoˬ. 20Oˇ ve hkʼa shuˍ shuˍ mvuhˇ haˉ awˍ caˇ peuˬ hkʼaw‸ nawˉ, kawˆ hta‸ htawˇ yawˇ yuˬ leh kʼoˆ ve, Kawˆ chi lehˬ, nawˬ hui awˬ pon ngeuˍ pfuhˍ ve, ngaˬ ve awˬ suhˍ awˬ hkʼaw lo te taˍ ve ka ti‸ shaˉ caˆ awˬ suhˉ hpeh‸ ve yoˬ. #22:20 Li‸ hpu teˇ hpaˍ hpaˍ awˬ hk’aw lo, ka nanˉ ehˉ chi teˇ maˬ maˇ cawˬ.
21Ya‸ hkʼaˇ, ngaˬ hta‸ chiˇ a‸ piˇ tuˬ ve teˇ gʼaˇ lehˬ, ngaˬ geh teˇ hkehˇ tiˉ hkaˆ caˇ chehˇ ve yoˬ. 22Chaw yaˇ ve Yaˇ hpu lehˬ, yawˇ ve awˬ lawn Gʼuiˬsha dawˇ cheˆ taˍ ve hkʼe yawˇ gʼa kʼo‸-e tuˬ yoˬ. Ya‸ hkʼaˇ, yawˇ hta‸ chiˇ a‸ ve chaw teˇ gʼaˇ lehˬ, gʼa dawˇ haˍ jaˇ tuˬ yoˬ teh‸ kʼoˆ ve yoˬ.
23Oˇ htaˇ, awˬ la‸ gʼawˇ teˇ hpaˍ lehˬ, Ngaˬ hui awˬ hkʼaw lo a shu teˇ gʼaˇ chi hkʼe te tuˬ le teh‸, teˇ gʼaˇ leh teˇ gʼa na nyi da‸ ve yoˬ.
A shu uiˍ tuˬ le teh‸ tawˇ gʼawˬ da‸ ve
24Chi hkʼoˆ ka‸, yawˇ hui awˬ hkʼaw lo hkʼaˬ ve teˇ gʼaˇ shu a‸ kehˉ gʼa uiˍ tuˬ le teh‸, teˇ gʼaˇ leh teˇ gʼaˇ gʼawˬ da‸ ve yoˬ. 25Hkʼe te leh Yeˍsuˆ kʼoˆ ve, Buiˇ shaˆ aˉ naˆ chaw hui ve hkunˉ hawˉ hkanˇ teˇ hpaˍ lehˬ, yawˇ hui awˬ hkʼoˆ hta‸ uˉ peunˍ ve yoˬ. Yawˇ hui awˬ hkʼoˆ hta‸ kanˇ paˆ cawˬ ve chaw teˇ hpaˍ hta‸ bon shehˍ hpaˇ teh‸ yawˇ hui kʼoˆ ve yoˬ. 26Ya‸ hkʼaˇ, nawˬ hui awˬ hkʼaw lo chi hkʼe maˇ gʼa te. Nawˬ hui awˬ hkʼaw lo shu a‸ kehˉ uiˍ ve teˇ gʼaˇ lehˬ, shu a‸ kehˉ i ve teˇ gʼaˇ hkʼe te-o, Awˬ hoˉ teˇ gʼaˇ htawˇ, awˬ ceˬ teˇ gʼaˇ hkʼe te-o. 27Awˬ lawn kʼo, hkʼaˬ ve teˇ gʼaˇ shu a‸ kehˉ uiˍ ve le. Hpui lawˇ lo mui caˇ ve chaw teˇ gʼaˇ laˇ. Maˇ heˆ kʼo, te caˍ te taw ve chaw teˇ gʼaˇ laˇ. Hpui lawˇ lo mui caˇ ve chaw teˇ gʼaˇ uiˍ ve yoˬ maˇ heˆ laˇ. Ya‸ hkʼaˇ, ngaˬ lehˬ nawˬ hui awˬ hkʼaw lo te caˍ te taw shehˍ hpaˇ hkʼe hpeh‸ ve yoˬ.
28Beˬ ve lawˇ ve hta‸ ngaˬ gʼa hkanˍ ve teˇ yanˇ, nawˬ hui lehˬ ngaˬ geh hkʼa geh hkʼaˬ htaˆ ka‸ chehˇ taˍ ve chaw teˇ hpaˍ hpeh‸ ve yoˬ. 29Ngaˬ ve Awˬ pa ngaˬ hta‸ mvuhˇmiˬ pe‸ laˇ ve hkʼe, ngaˬ htawˇ nawˬ hui hta‸ mvuhˇ miˬ pe‸ laˇ ve yoˬ. 30Hkʼe te leh, ngaˬ ve mvuhˇmiˬ awˬ hkʼaw lo ngaˬ ve hpui lawˇ lo nawˬ hui gʼa caˇ gʼa dawˬ tuˬ yoˬ. Nawˬ hui lehˬ, kʼaw jaw hkʼoˆ mui leh, Iˉsaˍreˍlaˆ chaw teˇ chi nyiˇ ceuˬ hta‸ suhˉ gʼa jehˬ tuˬ yoˬ.
Peˍtruˆ Yeˍsuˆ hta‸ chiˇ baˬ tuˬ ve awˬ lawn Yeˍsuˆ kʼoˆ piˇ ve
31Siˉmonˍ-oˬ, Siˉmonˍ-oˬ, caˬ shiˍ caˬ hkʼa htaˬ hkeunˉ ve hkʼe, Saˍtanˍ nawˬ hui hta‸ hkeunˉ tuˬ yawˇ lawˬ gʼa ve yoˬ. 32Ya‸ hkʼaˇ, nawˬ yonˍ ve teˇ ceuˬ maˇ gʼa luˬ kʼai tuˬ, ngaˬ nawˬ awˬ pon bon lawˬ peuˬ. Nawˬ kʼaw‸ hpfuhˆ kʼaw‸ la ve teˇ yanˇ, nawˬ ve awˬ viˉ awˬ nyi teˇ hpaˍ hta‸ awˬ gʼaˇ piˇ-oˆ teh‸ kʼoˆ ve yoˬ.
33Oˇ htaˇ Siˉmonˍ kʼaw‸ kʼoˆ ve, Jawˇmawˇ-oˬ, htawnˍ hkʼaw lo maˇ kʼoˆ, suh kuiˬ lo maˇ kʼoˆ, ngaˬ nawˬ geh hkʼa geh kʼai tuˬ gu taˍ peuˬ teh‸, yawˇ hta‸ kʼoˆ piˇ ve yoˬ.
34Yeˍsuˆ kʼaw‸ kʼoˆ ve, Peˍtruˆ-oˬ, ngaˬ nawˬ hta‸ kʼoˆ laˇ ve, ya‸ puiˉ gʼaˆ hpfuh maˇ bvuhˬ sheˍ htaˇ, nawˬ ngaˬ hta‸ maˇ shiˍ teh‸ shehˆ pawˆ hkʼa gaˬ gʼawˬ hkʼaˆ tuˬ yoˬ teh‸ kʼoˆ ve yoˬ.
Hpu guˉ pi, miˉ chaw leh aˉ htaw awˬ lawn
35Peuˬ leh, yawˇ yawˇ hui hta‸ kʼoˆ piˇ ve, Ngaˬ nawˬ hui hta‸ kʼai tcuh leh, hpu guˉ pi, miˉ chaw leh hkuiˉ nuˆ maˇ yuˬ kʼai tcuh laˇ ve teˇ yanˇ, nawˬ hui loˍ ve cuˆ ve teˇ ceuˬ ceuˬ cawˬ laˇ teh‸ Yeˍsuˆ na nyi htaˇ,
Loˍ ve cuˆ ve teˇ ceuˬ ka‸ maˇ cawˬ teh‸, yawˇ hui kʼaw‸ kʼoˆ piˇ ve yoˬ.
36Oˇ htaˇ yawˇ kʼaw‸ kʼoˆ ve, Ya‸ hkʼaˇ chi beu‸ lehˬ, hpu guˉpi cawˬ ve chaw kʼo, hpu guˉ pi yuˬ kʼai. Miˉ chaw cawˬ ve chaw kʼo, miˉ chaw pfuhˇ kʼai. Aˉ htaw maˇ cawˬ ve chaw kʼo, a shu yawˇ ve veu‸ kʼaˇ hawˇ leh aˉ htaw ca vuiˬ yuˬ-o‸. 37Awˬ lawn kʼo, ngaˬ nawˬ hui hta‸ kʼoˆ laˇ ve, Yawˇ hta‸ chaw haiˬ teˇ hpaˍ geh teˇ geh shu shawˍ keu tuˬ yoˬ teh‸ bvuh‸ taˍ ve tawˇ hkawˇ lehˬ, ngaˬ awˬ hkʼaw lo gʼa biˇ la ve yoˬ. Awˬ lawn kʼo, ngaˬ awˬ lawn bvuh‸ taˍ ve teˇ hpaˍ gʼa biˇ la ve yoˬ teh‸ kʼoˆ ve yoˬ. #Isy 53:12
38Yawˇ hui kʼaw‸ kʼoˆ ve, Jawˇmawˇ-oˬ, nyi loˬ, choˬ kaˬ aˉ htaw nyiˇ taˬ cawˬ ve yoˬ teh‸ kʼoˆ ve teˇ yanˇ, Hkʼe kʼo, law‸ peuˬ teh‸, yawˇ yawˇ hui hta‸ kʼaw‸ kʼoˆ piˇ ve yoˬ.
Geˍseˍmaˍniˆ hko hkʼaw lo Yeˍsuˆ bon ca lawˬ ve
39Oˇ ve hkʼaw‸ nawˉ yawˇ tawˆ kʼai leh, yawˇ awˬ liˇ cawˬ ve hkʼe Shaˍlonˍ hkʼaw lo kʼai ve yoˬ. Awˬ la‸ gʼawˇ teˇ hpaˍ htawˇ yawˇ awˬ hkʼaˇ suh kʼai ve yoˬ. 40Yawˇ oˇ kaˬ lo gaˬ ve teˇ yanˇ, Beˬ ve lawˇ ve awˬ hkʼaˇ suh nawˬ hui maˇ gʼa kʼai tuˬ bon lawˬ chehˇ-oˆ teh‸, yawˇ yawˇ hui hta‸ kʼoˆ piˇ ve yoˬ.
41Awˬ la‸ gʼawˇ hui chehˇ kuiˬ te leh, haˉ pui teˇ hkʼe baˬ gaˬ law‸ hkʼe fui yawˇ kʼai peuˬ hkʼaw‸ nawˉ, yawˇ hkui tcuhˉ teh leh kʼoˆ ve, 42A pa-oˬ, nawˬ nyi ma cawˇ ve kʼo, kawˆ chi hta‸ ngaˬ gʼa ponˬ kʼai tuˬ a ciˉ te laˇ-oˆ. Ya‸ hkʼaˇ, ngaˬ a loˍ cawˇ ve hkʼe taˇ hpeh‸ piˇ. Nawˬ a loˍ cawˇ ve hkʼe hpeh‸ piˇ-oˆ teh‸ bon lawˬ ve yoˬ. 43Oˇ htaˇ, mvuhˇ naw ma tcuh yaˇ teˇ gʼaˇ mvuhˇ naw ma lo tawˆ la leh yawˇ hta‸ awˬ gʼaˇ piˇ ve yoˬ. 44Yawˇ nyi ma hkʼaw tu‸ jaˇ hkanˍ jaˇ ve pa taw, yawˇ leuˉ leh gʼaˇ hte‸ bon lawˬ ve yoˬ. Yawˇ kuiˍ tawˆ la ve lehˬ, awˬ suhˍ diˬ hkʼe hpeh‸ leh miˬ chaˇ hkʼoˆ ce ve yoˬ.
45Yawˇ bon lawˬ peuˬ hkʼaw‸ nawˉ tu leh, awˬ la‸ gʼawˇ teˇ hpaˍ geh kʼo‸-e ve teˇ yanˇ, yawˇ hui dawˇ haˍ jaˇ ve awˬ hkʼaw lo zuh‸ muiˉ kʼa chehˇ ve hta‸ yawˇ gʼa mawˬ ve yoˬ. 46Yawˇ kʼoˆ ve, Aˬ hto‸ ma te nawˬ hui zuh‸ muiˉ kʼa chehˇ ve le. Tu-o. Beˬ ve lawˇ ve awˬ hkʼaˇ suh maˇ gʼa kʼai tuˬ bon lawˬ chehˇ-oˆ teh‸, yawˇ hui hta‸ kʼoˆ piˇ ve yoˬ.
Yeˍsuˆ hta‸ chiˇ a‸ piˇ leh hpeh yuˬ ve
47Yawˇ chi hkʼe kʼoˆ chehˇ ve teˇ yanˇ, tcuh yaˇ teˇ chi nyiˇ gʼaˇ awˬ hkʼaw lo Yuˇda‸ meh ve teˇ gʼaˇ lehˬ, chaw awˬ moˍ lonˉ hta‸ shiˍ veu laˇ leh laˬ ve yoˬ. Yeˍsuˆ hta‸ boˆ nu tuˬ, awˬ paˇ lo yawˇ jiˆ kʼai ve yoˬ. 48Oˇ htaˇ Yeˍsuˆ kʼoˆ ve, Yuˇda‸-oˬ, nawˬ boˆ nu ve hta‸ te leh chaw yaˇ ve Yaˇ hpu hta‸ chiˇ a‸ piˇ ve law leˇ teh‸ yawˇ hta‸ kʼoˆ piˇ ve yoˬ.
49Yeˍsuˆ geh hkʼa geh chehˇ ve chaw teˇ hpaˍ lehˬ, hkʼaˬ hkʼe hpeh‸ la tuˬ ve hta‸ gʼa mawˬ ve teˇ yanˇ, Jawˇmawˇ-oˬ, ngaˬ hui aˉ htaw gʼa chaw tuˬ ve laˇ teh‸ kʼoˆ piˇ ve yoˬ. 50Yawˇ hui awˬ hkʼaw lo teˇ gʼaˇ lehˬ, paw hkuˇ lonˉ vuiˬ taˍ ve awˬ ceˬ hta‸ chaw leh, la‸ sha paˉ ve naˍ paw cheˆ ve yoˬ.
51Yeˍsuˆ kʼoˆ ve, Pehˇ-o, taˇ kʼaw‸ te loˬ teh‸ kʼoˆ piˇ peuˬ hkʼaw‸ nawˉ, awˬ ceˬ oˇ ve teˇ gʼaˇ ve naˍ paw hta‸ htawˇ sheˬ leh gu na-e piˇ ve yoˬ.
52Oˇ htaˇ, Yeˍsuˆ lehˬ yawˇ geh gaˬ la ve paw hkuˇ lonˉ teˇ hpaˍ, bon yehˬ lonˉ ve ma‸ poˍ teˇ hpaˍ leh awˬ hoˉ chaw mawˇ teˇ hpaˍ hta‸ kʼoˆ piˇ ve, Nawˬ hui lehˬ, chaw hkʼawˇ hta‸ ca hpeh yuˬ ve hkʼe, aˉ htaw leh suhˆ taˬ teˇ hpaˍ yuˬ veu laˇ leh laˬ ve laˇ. 53Teˇ nyi le le bon yehˬ lonˉ awˬ hkʼaw lo ngaˬ nawˬ hui geh chehˇ ve teˇ yanˇ, nawˬ hui ngaˬ hta‸ maˇ hpeh yuˬ. Ya‸ hkʼaˇ, awˬ yanˇ chi ve lehˬ nawˬ hui ve awˬ yanˇ hpeh‸ leh, naˆ ho‸ ve kanˇ paˆ ve awˬ yanˇ hpeh‸ ve yoˬ teh‸ kʼoˆ ve yoˬ.
Peˍtruˆ Yeˍsuˆ hta‸ chiˇ baˬ ve
54Oˇ htaˇ, yawˇ hui yawˇ hta‸ hpeh yuˬ leh, paw hkuˇ lonˉ ve aˉ hkʼaw lo sheh kʼai ve yoˬ. Peˍtruˆ lehˬ, awˬ hkʼaˇ suh a ciˉ vuiˇ kuiˬ lo gʼa‸ kʼai ve yoˬ. 55Shaˉ nanˉ awˬ paˇ ko taˍ kuiˬ awˬ kʼaw ji lo chaw teˇ hpaˍ aˬ miˍ ceh leh teˇ geh mui lehˬ chehˇ ve teˇ yanˇ, Peˍtruˆ htawˇ yawˇ hui geh ca mui lehˬ ve yoˬ. 56Yawˇ aˬ miˍ gʼeuˆ ba kuiˬ lo mui chehˇ ve hta‸ awˬ ceˬ ma teˇ gʼaˇ gʼa mawˬ htaˇ, yawˇ hta‸ hkʼa deh‸ nyi leh, Chi hpaˇ htawˇ yawˇ geh chehˇ ve chaw hpeh‸ ve yoˬ teh‸ kʼoˆ ve yoˬ.
57Ya‸ hkʼaˇ Peˍtruˆ gʼawˬ hkʼaˆ leh, Yaˇ miˇ-oˬ, yawˇ hta‸ ngaˬ maˇ shiˍ teh‸ kʼoˆ ve yoˬ.
58Oˇ ve awˬ hkʼaw‸ nawˉ maˇ maw maw, awˬ kaˍ awˬ nu chaw teˇ gʼaˇ yawˇ hta‸ mawˬ leh, Nawˬ htawˇ yawˇ hui awˬ hkʼaw lo chehˇ ve chaw teˇ gʼaˇ hpeh‸ ve yoˬ teh‸ kʼoˆ piˇ ve teˇ yanˇ,
Peˍtruˆ kʼoˆ ve, Chi hpaˇ-oˬ, ngaˬ maˇ heˆ teh‸ kʼoˆ ve yoˬ.
59Teˇ naˍ riˍ hkʼe maw peuˬ hkʼaw‸ nawˉ, awˬ kaˍ awˬ nu chaw teˇ gʼaˇ htawˇ, Chi hpaˇ ka‸ awˬ tehˬ awˬ na yawˇ geh hkʼa geh chehˇ ve chaw yoˬ. Awˬ lawn kʼo, yawˇ Gaˍliˍlehˇ chaw hpeh‸ ve yoˬ teh‸, gʼaˇ hte‸ kʼoˆ tcuhˉ taˍ ve yoˬ.
60Peˍtruˆ kʼoˆ ve, Chi hpaˇ-oˬ, nawˬ kʼoˆ ve hta‸ ngaˬ maˇ shiˍ teh‸ kʼoˆ ve yoˬ.
Yawˇ chi hkʼe kʼoˆ chehˇ ve teˇ yanˇ, teˇ cawˬ haˉ gʼaˆ hpfuh bvuhˬ la ve yoˬ. 61Oˇ htaˇ Jawˇmawˇ Yeˍsuˆ lehˬ, Peˍtruˆ hta‸ hpfuhˆ nyi ve yoˬ. Ya‸ puiˉ gʼaˆ hpfuh maˇ bvuhˬ sheˍ htaˇ, nawˬ ngaˬ hta‸ shehˆ pawˆ hkʼa gaˬ chiˇ baˬ tuˬ yoˬ teh‸, Jawˇ mawˇ Yeˍsuˆ kʼoˆ piˇ taˍ ve hta‸ Peˍtruˆ dawˇ nawˇ la ve yoˬ. 62Oˇ htaˇ, yawˇ tawˆ kʼai leh gʼaˇ hte‸ hawˬ ve yoˬ.
Yeˍsuˆ hta‸ kʼoˆ guiˇ gʼuiˬ guiˇ leh dawˆ ve
63Yeˍsuˆ hta‸ yuˬ taˍ ve chaw teˇ hpaˍ lehˬ, yawˇ hta‸ kʼoˆ guiˇ gʼuiˬ guiˇ leh dawˆ ve yoˬ. 64Yawˇ ve mehˆ hpfuhˇ hta‸ beh taˍ peuˬ hkʼaw‸ nawˉ, Nawˬ hta‸ a shu dawˆ laˇ ve le. Gʼuiˬsha ve tcuh kaˍ paˍ hkʼe te leh ngaˬ hui hta‸ hto laˇ-oˆ teh‸, yawˇ hta‸ kʼoˆ piˇ ve yoˬ. 65Yawˇ hui yawˇ hta‸ awˬ kaˍ awˬ nu laiˉ ceuˬ kʼoˆ leh maˇ shawˍ maˇ caˆ kʼoˆ ve yoˬ.
Jehˬ da‸ shehˍ hpaˇ awˬ moˍ Yeˍsuˆ hta‸ suhˉ jehˬ ve
66Mvuhˇ htiˇ la ve teˇ yanˇ, Yuˇda‸ chaw hui ve awˬ hoˉ chaw mawˇ hpeh‸ ve paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ hpawnˬ da‸ ve yoˬ. Yawˇ hui yawˇ hta‸ jehˬ shehˍ hpaˇ awˬ moˍ mehˆ gʼuˇ suhˍ yuˬ kʼai leh, 67Nawˬ Hkri‸ hpeh‸ ve kʼo, ngaˬ hui hta‸ hto laˇ-oˆ teh‸ kʼoˆ ve yoˬ.
Yeˍsuˆ kʼaw‸ kʼoˆ ve, Ngaˬ hto laˇ ve htawˇ, nawˬ hui yonˍ tuˬ ve maˇ heˆ. 68Ngaˬ nawˬ hui hta‸ teˇ ceuˬ ceuˬ na nyi ve htawˇ, nawˬ hui kʼaw‸ kʼoˆ laˇ tuˬ ve maˇ heˆ. 69Ya‸ hkʼaˇ, chaw yaˇ ve Yaˇ hpu lehˬ, ya‸ nyi hkʼaw‸ nawˉ kʼo, Gʼuiˬsha ve kanˇ paˆ la‸ sha paˉ lo mui chehˇ tuˬ yoˬ teh‸, yawˇ hui hta‸ kʼoˆ piˇ ve yoˬ.
70Oˇ htaˇ yawˇ hui hkʼa peu-eˬ kʼoˆ ve, Hkʼe te kʼo, nawˬ Gʼuiˬsha ve Yaˇ hpu hpeh‸ ve leh laˇ teh‸ na nyi ve yoˬ.
Yoˬ, nawˬ hui kʼoˆ ve hkʼe yoˬ teh‸, yawˇ yawˇ hui hta‸ kʼaw‸ kʼoˆ piˇ ve yoˬ.
71Oˇ htaˇ yawˇ hui kʼoˆ ve, Ngaˬ hui aˬ hto‸ ma shaˉ hkiˆ kʼaw‸ loˍ sheˍ ve le. Awˬ lawn kʼo, yawˇ kʼoˆ ve tawˇ hkawˇ hta‸ ngaˬ hui awˬ to gʼa kaˇ peuˬ teh‸ kʼoˆ ve yoˬ.
Obecnie wybrane:
Luˉka‸ li‸ 22: LHBE
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Lahu Bible Edited © Thailand Bible Society and Bible Society of Myanmar, 2010, 2020.
