Yoˇhanˬ li‸ 5

Gʼuiˬ po paˇ lo chaw naˬ teˇ gʼaˇ hta‸ gu na-e piˇ ve

1Oˇ ve awˬ hkʼaw‸ nawˉ, Yuˇda‸ chaw hui pawehˇ te ve awˬ yanˇ gaˬ la leh, Yeˍsuˆ Yeˍruˆsaˍlehnˍ venˇ lo taˆ-e ve yoˬ. 2Yeˍruˆsaˍlehnˍ venˇ awˬ hkʼaw, yawˬ taˍ meu‸ hpe‸ awˬ paˇ lo, Heˍbrehˇ hkawˇ Beˍteˍsaˍdaˆ teh‸ kʼoˆ ve gʼuiˬ po teˇ maˬ cawˬ ve yoˬ. Gʼuiˬ po oˇ ve awˬ jaˇ lo aˉ po kʼo ngaˇ maˬ cawˬ ve yoˬ. 3Aˉ po kʼo oˇ ve teˇ hpaˍ awˬ hkʼaw lo naˬ ve chaw, mehˆ cuˉ ve chaw, hkui luˬ ve chaw leh hkui sheh la‸ sheh suh ve chaw maˇ maˇ zuh‸ chehˇ taˍ ve yoˬ. #5:3 Li‸ hpu teˇ hpaˍ hpaˍ awˬ hkʼaw lo, ka nanˉ ehˉ chi teˇ maˬ cawˬ ve yoˬ. -4 Awˬ yanˇ awˬ yanˇ kʼo, mvuhˇ naw ma tcuh yaˇ gʼuiˬ po awˬ hkʼaw lo ya‸ la leh iˉ kaˆ hta‸ hiˆ piˇ ve yoˬ. Iˉ kaˆ hiˆ la ve teˇ yanˇ, awˉ lawˉ peuˇ gʼa lo‸-e ve chaw teˇ gʼaˇ lehˬ, yawˇ naˬ ve a naˍ hkʼaˬ ve teˇ ceuˬ maˇ kʼoˆ, na-e la ve yoˬ. 5Shehˆ chi hiˉ hkʼaw‸ hkʼa gaˬ naˬ ve chaw teˇ gʼaˇ lehˬ, oˇ kaˬ lo chehˇ taˍ ve yoˬ. 6Yeˍsuˆ lehˬ, chaw oˇ ve hta‸ gʼa mawˬ leh, yawˇ naˬ maw jaˇ peuˬ ve hta‸ gʼa shiˍ ve teˇ yanˇ, Nawˬ chehˇ sha la gaˇ laˇ teh‸, yawˇ hta‸ na nyi ve yoˬ.

7Chaw naˬ oˇ ve teˇ gʼaˇ kʼoˆ ve, Jawˇmawˇ-oˬ, iˉ kaˆ hiˆ la ve teˇ yanˇ, gʼuiˬ po awˬ hkʼaw lo ngaˬ hta‸ yuˬ keu laˇ tuˬ ve chaw maˇ cawˬ. Ngaˬ ya‸-e chehˇ ve teˇ yanˇ, awˬ kaˍ awˬ nu chaw teˇ gʼaˇ ngaˬ awˬ gʼuˇ suhˍ lo‸-e ve yoˬ teh‸, yawˇ hta‸ kʼoˆ piˇ ve yoˬ.

8Yeˍsuˆ kʼoˆ ve, Tu loˬ. Nawˬ ve zuh‸ hpui hta‸ yuˬ leh kʼai-o teh‸, yawˇ hta‸ kʼoˆ piˇ ve yoˬ. 9Chaw oˇ ve teˇ gʼaˇ lehˬ, teˇ cawˬ haˉ na-e la leh, yawˇ ve zuh‸ hpui hta‸ yuˬ leh kʼai ve yoˬ.

10Oˇ ve teˇ nyi lehˬ, shinˉ nyi hpeh‸ ve yoˬ. Hkʼe te leh, na-e la ve chaw oˇ ve teˇ gʼaˇ hta‸ Yuˇda‸ chaw teˇ hpaˍ kʼoˆ piˇ ve, Ya‸ nyi lehˬ shinˉ nyi yoˬ. Nawˬ ve zuh‸ hpui hta‸ yuˬ kʼai ve lehˬ maˇ cawˇ teh‸ kʼoˆ ve yoˬ.

11Oˇ htaˇ yawˇ kʼoˆ ve, Ngaˬ hta‸ gu na-e laˇ ve chaw teˇ gʼaˇ lehˬ, Nawˬ ve zuh‸ hpui hta‸ yuˬ leh kʼai-o teh‸ ngaˬ hta‸ kʼoˆ laˇ ve yoˬ teh‸, yawˇ hui hta‸ kʼoˆ piˇ ve yoˬ.

12Yawˇ hui kʼaw‸ kʼoˆ ve, Nawˬ ve zuh‸ hpui hta‸ yuˬ leh kʼai-o teh‸ kʼoˆ laˇ ve chaw a shu le teh‸ yawˇ hta‸ na nyi ve yoˬ.

13Na-e la ve chaw oˇ ve teˇ gʼaˇ lehˬ, yawˇ hta‸ gu na-e laˇ ve chaw teˇ gʼaˇ a shu leh naˍ maˇ shiˍ. Awˬ lawn kʼo, oˇ kaˬ lo chaw chehˇ maˇ jaˇ ve pa taw, Yeˍsuˆ tawˆ kʼai peuˬ.

14Oˇ ve awˬ hkʼaw‸ nawˉ, bon yehˬ lonˉ awˬ hkʼaw lo Yeˍsuˆ yawˇ hta‸ gʼa mawˬ htaˇ, Nawˬ chehˇ sha la peuˬ. Chi a‸ kehˉ leuˉ leh tu‸ ve hkanˍ ve hta‸ nawˬ maˇ gʼa hkanˍ tuˬ, venˇbaˆ taˇ kʼaw‸ te teh‸, yawˇ hta‸ kʼoˆ piˇ ve yoˬ.

15Chaw oˇ ve teˇ gʼaˇ kʼai leh, Ngaˬ hta‸ gu na-e laˇ ve chaw teˇ gʼaˇ lehˬ Yeˍsuˆ yoˬ teh‸, Yuˇda‸ chaw hui hta‸ ca hto piˇ ve yoˬ. 16Shinˉ nyi teˇ nyi htaˇ Yeˍsuˆ oˇ hkʼe te ve pa taw, Yuˇda‸ chaw teˇ hpaˍ yawˇ hta‸ fawˉ mehˍ ve yoˬ. 17Oˇ htaˇ Yeˍsuˆ kʼoˆ ve, Ngaˬ Awˬ pa lehˬ, chi beu‸ hkʼa gaˬ kanˉ te chehˇ ve yoˬ. Ngaˬ htawˇ kanˉ te chehˇ ve yoˬ teh‸, yawˇ hui hta‸ kʼaw‸ kʼoˆ piˇ ve yoˬ.

18Hkʼe te leh, yawˇ shinˉ nyi hta‸ te luˬ ve awˬ hkʼoˆ ka‸ Gʼuiˬsha hta‸ yawˇ ve Awˬ pa teh‸ kʼoˆ leh, yawˇ awˬ to hta‸ Gʼuiˬsha hkʼa shuˍ shuˍ taˍ ve pa taw, Yuˇda‸ chaw teˇ hpaˍ yawˇ hta‸ hkʼaˬ hkʼe te leh gʼa tiˇ pehˍ tuˬ leuˉ leh ca ve yoˬ.

Yaˇ hpu lehˬ, kanˇ paˆ cawˬ ve awˬ lawn

19Yeˍsuˆ kʼoˆ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, Yaˇ hpu lehˬ yawˇ hkʼaˇ yawˇ a loˍ cawˇ ve hkʼe te‸ chiˉ ka‸ te maˇ gʼa. Awˬ pa te chehˇ ve hta‸ gʼa mawˬ ve hkʼe ceh tiˉ yawˇ te ve yoˬ. Awˬ pa hkʼa te ve teˇ ceuˬ le le hta‸ Yaˇ hpu htawˇ te ve yoˬ. 20Awˬ pa lehˬ, Yaˇ hpu hta‸ ha‸ leh, yawˇ awˬ to hkʼa te ve hkʼa peu-eˬ Yaˇ hpu hta‸ maˍ piˇ ve yoˬ. Nawˬ hui gʼa anˇ jaˇ tuˬ, chi teˇ hpaˍ a‸ kehˉ uiˍ ve kanˉ teˇ hpaˍ htawˇ Yaˇ hpu hta‸ yawˇ hpeu‸ maˍ piˇ tuˬ yoˬ. 21Awˬ lawn kʼo, Awˬ pa lehˬ suh taˍ ve chaw teˇ hpaˍ hta‸ kʼaw‸ te‸ tu la piˇ lawˬ ve hkʼe, Yaˇ hpu htawˇ yawˇ te‸ la piˇ gaˇ ve chaw teˇ hpaˍ hta‸ te‸ la piˇ lawˬ ve yoˬ. 22Chaw hkʼa peu-eˬ Awˬ pa hta‸ yawˆ yan ve hkʼe Yaˇ hpu hta‸ htawˇ yawˆ yan tuˬ, Awˬ pa lehˬ chaw teˇ gʼaˇ hta‸ ka‸ suhˉ maˇ jehˬ. Suhˉ jehˬ tuˬ hkʼa peu-eˬ Yaˇ hpu hta‸ chiˇ a‸ piˇ peuˬ. 23Yaˇ hpu hta‸ maˇ yawˆ yan ve chaw lehˬ, yawˇ hta‸ peu laˇ shehˍ hpaˇ, Awˬ pa hta‸ htawˇ maˇ yawˆ yan ve yoˬ.

24Ngaˬ nawˬ hui hta‸ awˬ tehˬ awˬ na kʼoˆ laˇ ve, ngaˬ ve tawˇ hkawˇ hta‸ na yuˬ leh, ngaˬ hta‸ peu laˇ shehˍ hpaˇ hta‸ yonˍ ve chaw teˇ gʼaˇ lehˬ, co ti‸ ha ti‸ cawˬ taˍ peuˬ. Suhˉ jehˬ ve hta‸ yawˇ maˇ gʼa hkanˍ. Suh ve awˬ hkʼaw lo yawˇ ponˬ tawˆ-e leh, te‸ ve awˬ hkʼaw lo gʼa lo‸-e peuˬ. 25Ngaˬ nawˬ hui hta‸ awˬ tehˬ awˬ na kʼoˆ laˇ ve, suh taˍ ve chaw teˇ hpaˍ lehˬ, Gʼuiˬsha ve Yaˇ hpu ve tawˇ hkawˇ hta‸ gʼa kaˇ tuˬ awˬ yanˇ gaˬ la chehˇ leh, chi beu‸ ka‸ gaˬ la peuˬ. Gʼa kaˇ ve chaw hui htawˇ co ha gʼa te‸ tuˬ yoˬ. 26Awˬ lawn kʼo, Awˬ pa awˬ hkʼaw lo co ha te‸ ve teˇ ceuˬ cawˬ ve hkʼa shuˍ shuˍ, Yaˇ hpu awˬ hkʼaw lo htawˇ co ha te‸ ve teˇ ceuˬ cawˬ tuˬ Awˬ pa a hkaw-anˬ piˇ ve yoˬ. 27Chi hkʼoˆ ka‸, yawˇ lehˬ chaw yaˇ ve Yaˇ hpu hpeh‸ ve pa taw, suhˉ jehˬ tuˬ ve kanˇ paˆ htawˇ yawˇ hta‸ piˇ taˍ ve yoˬ. 28Awˬ lawn chi hta‸ taˇ anˇ. Awˬ lawn kʼo, tuˍ hpfuh awˬ hkʼaw lo chehˇ ve chaw hkʼa peu-eˬ lehˬ, yawˇ ve tawˇ hkawˇ hta‸ gʼa kaˇ leh tawˆ la tuˬ ve awˬ yanˇ gaˬ la tuˬ yoˬ. 29Da‸ ve hta‸ te ve chaw teˇ hpaˍ lehˬ, co ha te‸ ve awˬ pon kʼaw‸ te‸ tu la tuˬ yoˬ. Haiˬ ve hta‸ te ve chaw teˇ hpaˍ lehˬ, suhˉ jehˬ tuˬ awˬ pon kʼaw‸ te‸ tu la tuˬ yoˬ.

Yeˍsuˆ awˬ lawn shaˉ hkiˆ hkanˍ ve chaw teˇ hpaˍ

30Ngaˬ lehˬ, ngaˬ hkʼaˇ ngaˬ ngaˬ a loˍ cawˇ ve hkʼe te‸ chiˉ ka‸ te maˇ gʼa. Ngaˬ gʼa kaˇ ve hkʼe ceh ngaˬ suhˉ jehˬ ve yoˬ. Ngaˬ suhˉ jehˬ ve lehˬ cawˇ ve yoˬ. Awˬ lawn kʼo, ngaˬ ve a loˍ hta‸ ngaˬ maˇ te. Ngaˬ hta‸ peu laˇ shehˍ hpaˇ ve a loˍ hta‸ ceh tiˉ ngaˬ te ve yoˬ.

31Ngaˬ lehˬ, ngaˬ awˬ to awˬ lawn shaˉ hkiˆ hkanˍ ve kʼo, ngaˬ ve shaˉ hkiˆ lehˬ maˇ cawˇ. 32Ngaˬ ve awˬ lawn hta‸ shaˉ hkiˆ hkanˍ shehˍ hpaˇ awˬ kaˍ awˬ nu chaw teˇ gʼaˇ cawˬ ve yoˬ. Yawˇ ngaˬ awˬ lawn shaˉ hkiˆ hkanˍ ve lehˬ, cawˇ ve yoˬ teh‸ ngaˬ shiˍ ve yoˬ. 33Nawˬ hui lehˬ, Yoˇhanˬ geh shu hta‸ kʼai tcuh leh, hteˇ ve cawˇ ve awˬ lawn hta‸ yawˇ shaˉ hkiˆ hkanˍ taˍ ve yoˬ. 34Chaw yaˇ lo laˬ ve shaˉ hkiˆ hkanˍ ve hta‸ ngaˬ hkanˍ yuˬ ve maˇ heˆ. Ya‸ hkʼaˇ, nawˬ hui htaiˍ hkʼaw‸ ve hta‸ gʼa tuˬ, ngaˬ chi hkʼe kʼoˆ laˇ ve yoˬ. 35Yoˇhanˬ lehˬ, aˬ miˍ to‸ chehˇ leh awˬ gʼeuˆ ba chehˇ ve kawˆ faiˇ hpeh‸ ve yoˬ. Nawˬ hui lehˬ, yawˇ ve awˬ gʼeuˆ awˬ hkʼaw lo teˇ tcuhˉ teˇ yanˇ ha lehˬ tuˬ nyi ma cawˬ ve yoˬ. 36Ya‸ hkʼaˇ ngaˬ cawˬ taˍ ve shaˉ hkiˆ lehˬ, Yoˇhanˬ shaˉ hkiˆ hkanˍ ve a‸ kehˉ uiˍ ve yoˬ. Awˬ lawn kʼo, peuˬ htaˇ hkʼa gaˬ te tuˬ Awˬ pa ngaˬ hta‸ te tcuh laˇ ve kanˉ teˇ hpaˍ lehˬ, Awˬ pa ngaˬ hta‸ peu laˇ ve yoˬ teh‸ shaˉ hkiˆ hpeh‸ ve yoˬ. Chi beu‸ ka‸ kanˉ oˇ ve teˇ hpaˍ hta‸ ngaˬ te chehˇ taˍ ve yoˬ. 37Ngaˬ hta‸ peu laˇ shehˍ hpaˇ Awˬ pa htawˇ, ngaˬ awˬ pon shaˉ hkiˆ hkanˍ ve yoˬ. Nawˬ hui lehˬ, yawˇ tawˇ yaw ve awˬ hkawˇ hta‸ teˇ pawˆ ka‸ maˇ kaˇ jaw. Yawˇ ve awˬ ho‸ awˬ han hta‸ htawˇ nawˬ hui maˇ mawˬ jaw. 38Yawˇ ve tawˇ hkawˇ htawˇ nawˬ hui awˬ hkʼaw lo maˇ cawˬ. Awˬ lawn kʼo, yawˇ peu laˇ ve teˇ gʼaˇ hta‸ nawˬ hui maˇ yonˍ. 39Nawˬ hui lehˬ, Li‸ hpu awˬ hkʼaw lo co ti‸ ha ti‸ hta‸ gʼa tuˬ yoˬ teh‸ dawˇ ve pa taw, Li‸ hpu hta‸ nawˬ hui hkʼa deh‸ ca hpeu‸ nyi gʼaw nyi ve yoˬ. Li‸ hpu oˇ ve lehˬ, ngaˬ awˬ lawn shaˉ hkiˆ hkanˍ ve yoˬ. 40Ya‸ hkʼaˇ, nawˬ hui co ha te‸ ve hta‸ gʼa tuˬ, ngaˬ geh laˬ tuˬ nawˬ hui nyi ma maˇ cawˬ.

41Chaw yaˇ piˇ ve awˬ me‸ awˬ hponˇ hta‸ ngaˬ maˇ ha‸ yuˬ. 42Gʼuiˬsha ve ha‸ pehnˇ ve nawˬ hui awˬ hkʼaw lo maˇ cawˬ ve hta‸ ngaˬ shiˍ ve yoˬ. 43Ngaˬ lehˬ, ngaˬ Awˬ pa ve awˬ meh awˬ hkʼaw lo laˬ ve htawˇ, nawˬ hui ngaˬ hta‸ maˇ ha‸ yuˬ. Awˬ kaˍ awˬ nu chaw teˇ gʼaˇ a shu yawˇ ve awˬ meh awˬ hkʼaw lo laˬ ve kʼo, yawˇ hta‸ nawˬ hui ha‸ yuˬ tuˬ yoˬ. 44Nawˬ hui teˇ gʼaˇ leh teˇ gʼaˇ piˇ ve awˬ me‸ awˬ hponˇ hta‸ ha‸ yuˬ leh, teˇ gʼaˇ tiˉ hpeh‸ ve Gʼuiˬsha piˇ ve awˬ me‸ awˬ hponˇ hta‸ maˇ ca ve nawˬ hui lehˬ, hkʼaˬ hkʼe te yonˍ hpeh‸ tuˬ le. 45Awˬ pa mehˆ gʼuˇ suhˍ ngaˬ nawˬ hui hta‸ venˇbaˆ taˍ laˇ tuˬ ve teh‸ taˇ dawˇ. Nawˬ hui hta‸ venˇbaˆ taˍ ve chaw teˇ gʼaˇ cawˬ ve yoˬ. Yawˇ lehˬ, nawˬ hui gʼaˇ va taˍ ve Moˉseˍ hpeh‸ ve yoˬ. 46Moˉseˍ hta‸ nawˬ hui yonˍ ve hkʼe kʼo, ngaˬ hta‸ htawˇ nawˬ hui yonˍ tuˬ yoˬ. Awˬ lawn kʼo, yawˇ ngaˬ ve awˬ lawn bvuh‸ taˍ ve yoˬ. 47Yawˇ bvuh‸ taˍ ve li‸ teˇ hpaˍ hta‸ nawˬ hui maˇ yonˍ ve kʼo, ngaˬ ve tawˇ hkawˇ hta‸ nawˬ hui hkʼaˬ hkʼe te yonˍ tuˬ le teh‸, yawˇ hui hta‸ kʼoˆ piˇ ve yoˬ.

Obecnie wybrane:

Yoˇhanˬ li‸ 5: LHBE

Podkreślenie

Udostępnij

Kopiuj