Yoˇhanˬ li‸ 4

Yeˍsuˆ Saˍmaˍriˆ yaˇ miˇ hta‸ maˍ piˇ ve

1Jawˇmawˇ Yeˍsuˆ shu hta‸ yawˇ ve awˬ la‸ gʼawˇ hpeh‸ la piˇ leh baˆtiˆsaˬ piˇ ve lehˬ, Yoˇhanˬ shu hta‸ awˬ la‸ gʼawˇ hpeh‸ la piˇ leh baˆtiˆsaˬ piˇ ve a‸ kehˉ maˇ ve hta‸ Hpaˍriˍsehˇ hui gʼa kaˇ ve yoˬ. 2(Ya‸ hkʼaˇ, Yeˍsuˆ awˬ to shu hta‸ baˆtiˆsaˬ piˇ ve maˇ heˆ. Yawˇ ve awˬ la‸ gʼawˇ hui ceh tiˉ piˇ ve yoˬ.) 3Hpaˍriˍsehˇ hui gʼa kaˇ peuˬ teh‸ Jawˇmawˇ Yeˍsuˆ gʼa shiˍ ve teˇ yanˇ, Yuˇda‸ mvuhˇmiˬ lo yawˇ tawˆ kʼai leh, Gaˍliˍlehˇ mvuhˇmiˬ lo teˇ pawˆ kʼaw‸ kʼai ve yoˬ. 4Yawˇ lehˬ Saˍmaˍriˆ mvuhˇmiˬ hta‸ gʼa hpanˍ kʼai cawˇ ve yoˬ.

5Hkʼe te leh, Saˍmaˍriˆ mvuhˇmiˬ awˬ hkʼaw lo cawˬ ve Suˇhkaˍ meh ve venˇ teˇ venˇ lo yawˇ gaˬ ve yoˬ. Venˇ oˇ ve lehˬ, Yaˍkoˆ yawˇ ve yaˇ paˍ Yoˇseh‸ hta‸ piˇ taˉ ve miˬguiˬ teˇ peˆ hta‸ neˇ ve yoˬ. 6Oˇ kaˬ lo Yaˍkoˆ ve nanˬ bawˍ cawˬ ve yoˬ. Yeˍsuˆ ya‸ kʼaw toˇ heuˬ ve pa taw, nanˬ bawˍ awˬ paˇ lo mui taˍ ve yoˬ. Awˬ yanˇ oˇ ve lehˬ, mvuhˇ law‸ kʼaw tcuhˆ teˇ yanˇ hpeh‸ ve yoˬ.

7Saˍmaˍriˆ yaˇ miˇ teˇ gʼaˇ iˉ kaˆ ca hkʼo la ve yoˬ. Yeˍsuˆ lehˬ, Ngaˬ hta‸ iˉ kaˆ a ciˉ taw laˇ-oˆ teh‸ yawˇ hta‸ kʼoˆ piˇ ve yoˬ. 8Oˇ ve teˇ hkui yawˇ ve awˬ la‸ gʼawˇ teˇ hpaˍ lehˬ, venˇ hkʼaw lo caˇ tuˬ ca vuiˬ kʼai peuˬ.

9Saˍmaˍriˆ yaˇ miˇ kʼaw‸ kʼoˆ ve, Nawˬ Yuˇda‸ chaw hpeh‸ ve ka‸, aˬ hto‸ ma te ngaˬ Saˍmaˍriˆ yaˇ miˇ geh iˉ kaˆ lawˬ dawˬ ve le teh‸ yawˇ hta‸ kʼoˆ piˇ ve yoˬ. Awˬ lawn kʼo, Yuˇda‸ chaw leh Saˍmaˍriˆ chaw hui awˬ chawˇ maˇ te da‸ ve pa taw chi hkʼe kʼoˆ ve yoˬ.

10Yeˍsuˆ kʼaw‸ kʼoˆ ve, Gʼuiˬsha piˇ ve la‸ shawnˍ hta‸ maˇ kʼoˆ, Ngaˬ hta‸ iˉ kaˆ a ciˉ taw laˇ-oˆ teh‸ nawˬ hta‸ kʼoˆ laˇ ve chaw hta‸ maˇ kʼoˆ, nawˬ shiˍ ve hkʼe kʼo, nawˬ yawˇ geh lawˬ tuˬ yoˬ. Yawˇ htawˇ nawˬ hta‸ co ha te‸ piˇ lawˬ ve iˉ kaˆ taw laˇ tuˬ yoˬ teh‸, yawˇ hta‸ kʼoˆ piˇ ve yoˬ.

11Yaˇ miˇ oˇ ve kʼaw‸ kʼoˆ ve, Jawˇmawˇ-oˬ, nawˬ iˉ kaˆ nyiˉ tuˬ te‸ chiˉ ka‸ maˇ cawˬ. Nanˬbawˍ chi naˉ jaˇ ve yoˬ. Co ha te‸ piˇ lawˬ ve iˉ kaˆ hta‸ nawˬ hkʼaˬ lo gʼa tuˬ le. 12Ngaˬ hui ve awˬ pa Yaˍkoˆ lehˬ, nanˬ bawˍ chi ngaˬ hui hta‸ pe‸ laˇ ve yoˬ. Yawˇ awˬ to ka‸, yawˇ ve awˬ yaˇ awˬ duˬ teˇ hpaˍ ka‸, yawˇ ve ceˇ caˬ teˇ hpaˍ ka‸, nanˬ bawˍ chi hta‸ dawˬ ve yoˬ. Nawˬ lehˬ yawˇ a‸ kehˉ uiˍ ve leh laˇ teh‸, yawˇ hta‸ kʼoˆ piˇ ve yoˬ.

13Yeˍsuˆ kʼaw‸ kʼoˆ ve, Iˉ kaˆ chi hta‸ hkʼa dawˬ ve chaw lehˬ, iˉ kaˆ kʼaw‸ shiˉ tuˬ yoˬ. 14Ya‸ hkʼaˇ, ngaˬ piˇ ve iˉ kaˆ hta‸ hkʼa dawˬ ve chaw lehˬ, hkʼaˬ htaˆ ka‸ iˉ kaˆ maˇ kʼaw‸ shiˉ. Ngaˬ yawˇ hta‸ piˇ ve iˉ kaˆ lehˬ, yawˇ awˬ hkʼaw lo co ti‸ ha ti‸ awˬ pon tawˆ la chehˇ ve gʼuiˬ tuˇ hpeh‸ tuˬ yoˬ teh‸, yawˇ hta‸ kʼoˆ piˇ ve yoˬ.

15Yaˇ miˇ kʼaw‸ kʼoˆ ve, Jawˇmawˇ-oˬ, ngaˬ iˉ kaˆ maˇ gʼa kʼaw‸ shiˉ tuˬ leh, choˬ kaˬ lo iˉ kaˆ maˇ gʼa kʼaw‸ hkʼo la tuˬ, iˉ kaˆ oˇ ve teˇ ceuˬ ngaˬ hta‸ a ciˉ pe‸ laˇ-oˆ teh‸, yawˇ hta‸ kʼoˆ piˇ ve yoˬ.

16Yeˍsuˆ lehˬ, Nawˬ ve awˬ hpawˇ hta‸ ca kuˬ leh choˬ kaˬ kʼaw‸ laˬ-o‸ teh‸ yawˇ hta‸ kʼoˆ piˇ ve teˇ yanˇ,

17Ngaˬ awˬ hpawˇ maˇ cawˬ teh‸, yaˇ miˇ oˇ ve yawˇ hta‸ kʼaw‸ kʼoˆ piˇ ve yoˬ.

Yeˍsuˆ kʼaw‸ kʼoˆ ve, Nawˬ awˬ hpawˇ maˇ cawˬ teh‸ nawˬ kʼoˆ ve lehˬ cawˇ ve yoˬ. 18Awˬ lawn kʼo, nawˬ awˬ hpawˇ ngaˇ gʼaˇ cawˬ jaw peuˬ leh, chi beu‸ nawˬ geh chehˇ taˍ ve teˇ gʼaˇ lehˬ nawˬ ve awˬ hpawˇ maˇ heˆ. Nawˬ chi hkʼe kʼoˆ ve lehˬ, cawˇ jaˇ ve yoˬ teh‸ yawˇ hta‸ kʼoˆ piˇ ve yoˬ.

19Yaˇ miˇ oˇ ve kʼaw‸ kʼoˆ ve, Jawˇmawˇ-oˬ, nawˬ lehˬ Gʼuiˬsha ve tcuh kaˍ paˍ hpeh‸ ve yoˬ teh‸ ngaˬ shiˍ ve yoˬ. 20Ngaˬ hui ve awˬ puˍ awˬ pi teˇ hpaˍ lehˬ, hkʼaw pui chi awˬ hkʼoˆ lo oˉ kʼoˍ pui ve yoˬ. Ya‸ hkʼaˇ, Yeˍruˆsaˍlehnˍ venˇ awˬ hkʼaw lo ceh tiˉ oˉ kʼoˍ gʼa pui tuˬ nawˬ hui kʼoˆ ve yoˬ teh‸ yawˇ hta‸ kʼoˆ piˇ ve yoˬ.

21Yeˍsuˆ kʼoˆ ve, Yaˇ miˇ-oˬ, ngaˬ kʼoˆ ve tawˇ hkawˇ hta‸ yonˍ-o‸, Hkʼaw pui chi teˇ shiˍ awˬ hkʼoˆ lo maˇ kʼoˆ, Yeˍruˆsaˍlehnˍ venˇ awˬ hkʼaw lo htawˇ maˇ kʼoˆ, Awˬ pa hta‸ nawˬ hui oˉ kʼoˍ maˇ gʼa ca kʼaw‸ pui tuˬ ve awˬ yanˇ gaˬ la paˇ neˇ ve yoˬ. 22Nawˬ hui lehˬ, nawˬ hui maˇ shiˍ ve hta‸ oˉ kʼoˍ pui ve yoˬ. Ngaˬ hui lehˬ, ngaˬ hui shiˍ taˍ ve hta‸ oˉ kʼoˍ pui ve yoˬ. Awˬ lawn kʼo, htaiˍ hkʼaw‸ ve teˇ ceuˬ lehˬ, Yuˇda‸ chaw hui awˬ hkʼaw lo tawˆ la ve yoˬ. 23Awˬ tehˬ awˬ na oˉ kʼoˍ pui ve chaw teˇ hpaˍ lehˬ, nyi ma awˬ hkʼaw leh hteˇ ve cawˇ ve awˬ hkʼaw lo Awˬ pa hta‸ oˉ kʼoˍ gʼa pui tuˬ ve awˬ yanˇ gaˬ la chehˇ leh, chi beu‸ ka‸ gaˬ la peuˬ. Awˬ lawn kʼo, Awˬ pa lehˬ yawˇ hta‸ oˉ kʼoˍ pui tuˬ oˇ hkʼe ve chaw teˇ hpaˍ hta‸ heuˆ gaˇ ve yoˬ. 24Gʼuiˬsha lehˬ awˬ ha hpeh‸ ve yoˬ. Yawˇ hta‸ oˉ kʼoˍ pui ve chaw hui lehˬ, nyi ma awˬ hkʼaw leh hteˇ ve cawˇ ve awˬ hkʼaw lo oˉ kʼoˍ gʼa pui ve yoˬ teh‸ kʼoˆ piˇ ve yoˬ.

25Yaˇ miˇ kʼaw‸ kʼoˆ ve, Meˍsiˉya‸ laˬ tuˬ ve hta‸ ngaˬ shiˍ ve yoˬ. Yawˇ gaˬ la ve teˇ yanˇ, yawˇ ngaˬ hui hta‸ teˇ ceuˬ le le kʼoˆ maˍ laˇ tuˬ yoˬ teh‸, yawˇ hta‸ kʼoˆ piˇ ve yoˬ. (Meˍsiˉya‸ teh‸ kʼoˆ ve lehˬ, Hkri‸ teh‸ kʼoˆ ve yoˬ.)

26Yeˍsuˆ kʼaw‸ kʼoˆ ve, Nawˬ hta‸ tawˇ yaw chehˇ ve ngaˬ lehˬ, yawˇ yoˬ teh‸ yaˇ miˇ hta‸ kʼoˆ piˇ ve yoˬ.

27Oˇ ve teˇ hkui yawˇ ve awˬ la‸ gʼawˇ teˇ hpaˍ kʼaw‸ gaˬ la leh, yaˇ miˇ geh yawˇ tawˇ yaw chehˇ ve hta‸ yawˇ hui anˇ ve yoˬ. Ya‸ hkʼaˇ, Nawˬ aˬ hto‸ ma heuˆ gaˇ ve le. Aˬ hto‸ ma te yawˇ geh nawˬ tawˇ yaw chehˇ ve le teh‸, teˇ gʼaˇ ka‸ maˇ na nyi.

28Yaˇ miˇ oˇ ve lehˬ, yawˇ ve iˉ kaˆ mu‸ hkʼu hta‸ teh taˉ leh, venˇ awˬ hkʼaw lo kʼo‸-e leh venˇ yaˇ teˇ hpaˍ hta‸ kʼoˆ piˇ ve, 29Ngaˬ hkʼa te jaw ve awˬ lawn hkʼa peu-eˬ ngaˬ hta‸ hto laˇ ve chaw teˇ gʼaˇ hta‸ ca nyi la-o. Yawˇ lehˬ Hkri‸ hpeh‸ ve leh naˍ teh‸ kʼoˆ piˇ ve yoˬ. 30Yawˇ hui venˇ hkʼaw tawˆ kʼai leh Yeˍsuˆ geh laˬ ve yoˬ.

31Awˬ yanˇ oˇ ve awˬ hkʼaw lo awˬ la‸ gʼawˇ teˇ hpaˍ kʼoˆ ve, Raˍbiˆ-oˬ, caˇ tuˬ a ciˉ caˇ-oˆ teh‸, yawˇ hta‸ lawˬ hkawˉ ve yoˬ.

32Yawˇ lehˬ, Nawˬ hui maˇ shiˍ ve caˇ tuˬ ngaˬ geh cawˬ ve yoˬ teh‸, yawˇ hui hta‸ kʼoˆ piˇ ve yoˬ.

33Hkʼe te leh, awˬ la‸ gʼawˇ teˇ hpaˍ kʼoˆ ve, Chaw teˇ gʼaˇ gʼaˇ yawˇ hta‸ caˇ tuˬ laˬ caˍ piˇ leh naˍ teh‸, teˇ gʼaˇ leh teˇ gʼaˇ na da‸ ve yoˬ.

34Yeˍsuˆ kʼaw‸ kʼoˆ ve, Ngaˬ hta‸ peu laˇ shehˍ hpaˇ ve a loˍ hta‸ te leh, yawˇ ve kanˉ hta‸ te peuˬ tuˬ ve lehˬ, ngaˬ ve caˇ tuˬ hpeh‸ ve yoˬ. 35Ha pa awˍ lehˇ gaˬ kʼo, caˬ gʼeu‸ ve awˬ yanˇ gaˬ tuˬ yoˬ teh‸ nawˬ hui kʼoˆ ve maˇ heˆ laˇ. Ngaˬ nawˬ hui hta‸ kʼoˆ laˇ ve, heh teˇ hpaˍ hta‸ chiˇ nyi-o. Chi beuˬ ka‸ caˬ gʼeu‸ tuˬ caˬ meh la leh shiˉ-ehˍ hpeh‸ la peuˬ. 36Caˬ gʼeu‸ shehˍ hpaˇ lehˬ, gʼaˇ hpfuhˇ gʼa leh, co ti‸ ha ti‸ awˬ pon awˬ shiˍ shaw keu ve yoˬ. Hkʼe te leh, ti shehˍ hpaˇ leh gʼeu‸ shehˍ hpaˇ teˇ geh gʼa ha lehˬ tuˬ yoˬ. 37Teˇ gʼaˇ ti leh teˇ gʼaˇ gʼeu‸ ve yoˬ teh‸ kʼoˆ ve tawˇ teˇ hkawˇ lehˬ, chi hta‸ cawˇ da‸ jaˇ ve yoˬ. 38Nawˬ hui kanˉ maˇ te kuiˬ lo ngaˬ nawˬ hui hta‸ caˬ ca gʼeu‸ tcuh ve yoˬ. Shu kanˉ te taˍ leh, yawˇ hui te taˍ ve kanˉ awˬ hkʼaw lo nawˬ hui lo‸-e peuˬ teh‸, yawˇ hui hta‸ kʼoˆ piˇ ve yoˬ.

39Venˇ oˇ ve awˬ hkʼaw lo chehˇ ve Saˍmaˍriˆ chaw laiˉ gʼaˇ Yeˍsuˆ hta‸ yonˍ ve yoˬ. Awˬ lawn kʼo, yaˇ miˇ oˇ ve lehˬ, Ngaˬ hkʼa te jaw ve awˬ lawn hkʼa peu-eˬ yawˇ ngaˬ hta‸ hto laˇ ve yoˬ teh‸, shaˉ hkiˆ hkanˍ ve hta‸ pa taw yoˬ. 40Hkʼe te leh, Saˍmaˍriˆ chaw teˇ hpaˍ yawˇ geh gaˬ la htaˇ, yawˇ hui geh chehˇ tuˬ yawˇ hta‸ lawˬ hkawˉ ve pa taw, yawˇ oˇ kaˬ lo nyiˇ nyi chehˇ ve yoˬ.

41Yawˇ ve tawˇ hkawˇ hta‸ pa taw awˬ kaˍ awˬ nu chaw laiˉ gʼaˇ htawˇ yonˍ ve yoˬ. 42Yawˇ hui lehˬ yaˇ miˇ oˇ ve hta‸ kʼoˆ piˇ ve, Nawˬ ve tawˇ hkawˇ hta‸ pa taw ceh ngaˬ hui yonˍ ve maˇ heˆ. Ngaˬ hui awˬ to yawˇ ve tawˇ hkawˇ hta‸ gʼa kaˇ leh, chaw chi lehˬ miˬguiˬ yaˇ hui ve Htaiˍ hkʼaw‸ paˍ awˬ tehˬ awˬ na hpeh‸ ve hta‸ ngaˬ hui shiˍ ve yoˬ teh‸ kʼoˆ ve yoˬ.

Jawˇmawˇ ve yaˇ paˍ hta‸ Yeˍsuˆ gu na-e piˇ ve

43Yeˍsuˆ oˇ kaˬ lo nyiˇ nyi chehˇ peuˬ hkʼaw‸ nawˉ, Gaˍliˍlehˇ mvuhˇmiˬ lo kʼai ve yoˬ. 44Awˬ lawn kʼo, Gʼuiˬsha ve tcuh kaˍ paˍ lehˬ, a shu yawˇ ve mvuhˇmiˬ awˬ hkʼaw lo awˬ me‸ awˬ hponˇ maˇ cawˬ teh‸, Yeˍsuˆ yawˇ awˬ to shaˉ hkiˆ hkanˍ ve yoˬ. 45Hkʼe te leh, yawˇ Gaˍliˍlehˇ mvuhˇmiˬ lo gaˬ ve teˇ yanˇ, Gaˍliˍlehˇ chaw teˇ hpaˍ yawˇ hta‸ ha‸ yuˬ ve yoˬ. Awˬ lawn kʼo, chaw oˇ ve teˇ hpaˍ lehˬ, Yeˍruˆsaˍlehnˍ venˇ lo pawehˇ awˬ hkʼaw kʼai leh, pawehˇ oˇ ve awˬ hkʼaw lo yawˇ hkʼa te ve teˇ hpaˍ hta‸ gʼa mawˬ peuˬ ve pa taw yoˬ.

46Hkʼe te leh, iˉ kaˆ hta‸ a pehˉ meuˇ gʼuiˬ hpeh‸ la piˇ lawˬ ve teˇ kaˬ, Gaˍliˍlehˇ mvuhˇmiˬ Kaˍnaˆ hkʼaˆ hkʼaw lo yawˇ teˇ pawˆ kʼaw‸ gaˬ ve yoˬ. Oˇ htaˇ, Kaˍpeˍneˍonˍ venˇ awˬ hkʼaw lo chehˇ ve jawˇmawˇ teˇ gʼaˇ ve yaˇ paˍ naˬ chehˇ ve yoˬ. 47Yeˍsuˆ lehˬ, Yuˇda‸ mvuhˇmiˬ lo tu leh Gaˍliˍlehˇ mvuhˇmiˬ lo gaˬ la ve awˬ lawn hta‸ jawˇmawˇ oˇ ve gʼa kaˇ htaˇ, yawˇ ve yaˇ paˍ suh la paˇ neˇ ve pa taw, Yeˍsuˆ laˬ leh yawˇ hta‸ gu na-e piˇ tuˬ, yawˇ Yeˍsuˆ hta‸ ca lawˬ hkawˉ ve yoˬ. 48Hkʼe te leh Yeˍsuˆ kʼoˆ ve, Nawˬ hui awˬ heˆ leh anˇ tuˬ teˇ hpaˍ hta‸ maˇ gʼa mawˬ ve kʼo, nawˬ hui te‸ chiˉ maˇ yonˍ teh‸ yawˇ hta‸ kʼoˆ piˇ ve yoˬ.

49Jawˇmawˇ-oˬ, ngaˬ ve yaˇ maˇ suh sheˍ htaˇ a ciˉ laˬ-o‸ teh‸, jawˇmawˇ oˇ ve yawˇ hta‸ kʼoˆ piˇ ve yoˬ. 50Yeˍsuˆ kʼoˆ ve, Kʼo‸-e loˬ. Nawˬ ve yaˇ pa na-e la peuˬ teh‸ yawˇ hta‸ kʼoˆ piˇ ve yoˬ.

Jawˇmawˇ oˇ ve lehˬ, Yeˍsuˆ kʼoˆ piˇ ve tawˇ hkawˇ hta‸ yonˍ leh kʼo‸-e ve yoˬ. 51Yawˇ kʼo‸-e chehˇ ve teˇ yanˇ, yawˇ ve awˬ ceˬ teˇ hpaˍ yawˇ hta‸ ca ha‸ la leh, Nawˬ ve yaˇ paˍ na-e la peuˬ teh‸ yawˇ hta‸ hto piˇ ve yoˬ.

52Hkʼe te leh, Yawˇ hkʼaˬ ve teˇ yanˇ tanˬ na-e la ve le teh‸ na nyi ve teˇ yanˇ, Aˉ nyi mvuhˇ hpeu‸ hpawˇ teˇ naˍ riˍ htaˇ, yawˇ kaˆ naˬ ve na-e la ve yoˬ teh‸, yawˇ hui yawˇ hta‸ kʼoˆ piˇ ve yoˬ. 53Awˬ yanˇ oˇ ve lehˬ, Nawˬ ve yaˇ paˍ na-e la peuˬ teh‸, Yeˍsuˆ yawˇ hta‸ kʼoˆ piˇ ve awˬ yanˇ hta‸ cawˇ ve yoˬ teh‸ awˬ pa shiˍ leh, yawˇ awˬ to ka‸ yehˬ yaˇ kʼa yaˇ hkʼa peu-eˬ ka‸ Yeˍsuˆ hta‸ yonˍ la ve yoˬ.

54Awˬ heˆ chi lehˬ, Yeˍsuˆ Yuˇda‸ mvuhˇmiˬ lo tu leh Gaˍliˍlehˇ mvuhˇmiˬ lo gaˬ la peuˬ hkʼaw‸ nawˉ, yawˇ te ve awˬ heˆ nyiˇ ceuˬ teˇ ceuˬ hpeh‸ ve yoˬ.

Obecnie wybrane:

Yoˇhanˬ li‸ 4: LHBE

Podkreślenie

Udostępnij

Kopiuj