Luke 10
10
Jesu aa wa roksanat wani tha takat aa
1Iri jio Teyhungwa aa warok sanat wani tha talta etho miqwa tang tha ani ni phal eq adak dak samhaq etho haq tang náng takatta, bari haq ro piq tho ukat ang ching angta. 2Piq aa ning ma batta, “Cham ukhan eq ching daqhan ang aa, etharin jaksom lottey miq rapney akum. Ahan jak somlot tey miqtang thok rangma cham taqhantey tangteywa ching wang chu inn. 3Ka inn, nga nim raa inkaku tang jakho o kelwut sa mal takat phang. 4Ngin khak tho nak som inn, khak tho nak som inn, jaaqhong tho nak som inn, tol aa lamna o raaqwan eq naklang inn. 5Bari him náng nim wang inn jo tho phang raaq shi irimal raaq inn, ‘Iri him rima nungmay cham ang aa.’ 6Eshi him sho nungmay miq atha ang ajo, nim nungmay shi piq jamna cham ang aa; ang moq ang ajo nungmay sha nim ching náng wey wel na. 7Eshi him shiwang nim ma phakshat ma chamlang kot aa shi phaksat shing eq eshi him sho hun tong inn, chammatakoi jaksomtey tang ma ning jakthang kot ching. Him ashey shingchak eq adak him náng nak wey ka inn. 8Bari samhaq náng ka inn jo esho miqtang aa tinshit wang nim ma chamlang kophu shi hun phaksat inn, 9Eshi samhaq wang atakasa tang shi taqhal inn, etho eshiwang miqtang shima bat inn, ‘Shkewa mungtan nim relna sey thupha.’ 10Etharin nim ashey samhaq náng ka nin etho eshiwang miqtang aa nim thawan pha min ang inn jo, lam náng ka eq bat inn, 11Nim samhaq buk sha hun bara ija na rap aa sha tho hiqtang aa ning jakho o thalnak inn. Etharin tin na shing inn Shkewa mungtan nim relna sey thuchey pha! 12Nga nim ma batphang khaphung saal o Shkewa eshi samhaq wang náng eq tho Sodom ma rapney tinshit takhina!”
Han moq samhaq tang
(Matthew 11:20–24)
13 “Chorazin samhaq, nim ma rapney tsamnang angna! Bethsaida samhaq nim ma tho rapney tsamnang angna! Bara patja nim khom o angta eshi patja sha Tyre nia Sidon samhaq na ang ajo, ning sha ning ngarey wang wey welta ta takhima, jakho wangduk jin kaley ang wangta, etho thola khat sam eq etho ning kho o botkhi won wangta! 14Shkewa khaphung saal o Tyre nia Sidon ma nim wang ahan tinshit takhina. 15Etho Capernaum samhaq, nim aa nim ni nim rangma mungtan náng thula aluk tathin shing tin i? Nim raa walmungtan náng sey bichak phanin!”
16Jesu aa ujiphantey tang thima batta, “Barey nim raaq tat aa shey i raaq tat na etho utang eq nim chikphin sha nga chik aa; etho barey nga chikphang nga takatteywa sha tho chik eq na.”
Wa rok shanat wani wel aa
17Warok sanat wani rapney sungti rangmaq welta. Ning aa batta, “Teyhungwa í aa ba miing wang raaqkhat som eq thangwa tang ma bat i tho ning aa í raaq tatta!”
18Jesu aa ning thima thawel batta, “Nga Thangwa tha rangkang wang ranglip mal ang eq qhat aa tha khi táng. 19Tat inn! Nga nim ma tarong kotaphang, nim pu nia qhíngqhong kho otho ruk qhing ang nin etho nim ralwa tarong wang tho ujin eq nin etho chamlang eq tho nim tunglang phamin ang phanin. 20Etharin anaan tsija tang eq nim raaq tat aa ta nak sungrang inn; etha otho mungtan na nim miing taka ang aa ta sungrang inn!”
Jesu sungrang
(Matthew 11:25–27; 13:16,17)
21Ethi rangham tho Jesu Asang Tsija wang sungrang ta etho batta, “Iwa, mungtan nia mingkang Teyhungwa; nga nang ma kechu ajong kophang chammatakoi nang aa iri tang thaji raa rapney samtey etho asam atol miqtang wang tapu eq nijangsa mal miqtang ma tasam ma kotu. Ang ang aa, Iwa, nang aa irimal angma hun nuk tu.”
22 Iwa nga ma phanrip kota phang. Wa tha shing chak eq utang eq tho Usa sam moq. Utang ma Sa aa uwa takhi aa, ning aa Wa sha sam aa. Ning nia Usa tha shingchak eq utang eq tho Wa sha sam moq.
23Ethi jio Jesu aa ujiphantey tang chingko náng ngik eq hutshu eq ning thima batta, “Nim aa chamlang khi inn iritang raa khi ma nim ma sunmaan! 24Nga nim ma batphang, nim aa chamlang khi tin esha siin ma rangsamal tang etho lungwang tang aa tathin ta, etharin ning aa kapkhi moq angta, etho nim aa chamlang tat tin, esha tat ma ning aa tathin ta, etharin ning aa tat moq angta.”
Miq qhal Samari miq raaqshiton
25Ashey thong tataltey thu eq Jesu tha tari eq pitta, “Tatalteywa, pattuk rolling kap ma nga chamlang somlot ching aa?”
26Jesu aa piq ma batta, “Asang likwit na chamta taka aa? Nang aa chamlang phat u?”
27Eshi miqwa aa batta, “Nim Shkewa Teyhungwa ma nim thaji tin wang, thaji tsija wang, thaji tarong wang etho thaji thung wang tinmat inn; etho nang aa nang ni nang ma chamal tinmat u himkhung thaktey ma tho eshimal tinmat u.”
28Jesu aa thawel batta, “Nang raa khakla; irimal somlo u etho nang utong angnu.”
29Etharin thong tatalteywa aa piq ni piq sha aqhal ta shing ma nuk ta. Ethirangma piq aa Jesu ma pitta, “I himkhung thaktey thi utang aa?”
30Jesu aa thawel batta, “Washey Jerusalem wang Jericho haq náng kachey atho urontey tang aa piq tha lota, etho piq tha haansang shingchak ta etho wat eq amáng tarang shingchak ta. 31Chomwey ang atho tingwa ashey ang atha eshi kowang ka chey ta; piq aa eshina ethiwa wol chey atha khita, etharin lamdak ko thináng qhing chuwang ta. 32Irimal hun ashey Levi phan eshiwang ka chey ta etho piq tha khi eq lamdak ko thináng qhing chuwang ta. 33Etharin ashey Samaria miq eshiwang ka chey ta etho piq aa eshiwa tha khi eq piq tin tha rapney shitta. 34Piq eshiwa rel thináng kata, piq ma umaa tho naman tha jik kota, khat eq, atakwa tha piq moktongchuk khona tatong eq, piq tha ashey nángtong tapnáng solkat ta etho piq tha jaqhal eq siintan ta. 35Saal dak tho piq aa nángtong him tangteywa thima jaan ngin ang atha ani kot eq batta, ‘Piq ri jaqhal eq siintan u etho nga baluk o iri náng wey thuphang etho nang aa piq haan o adak chamtan ngin wey wang aa sha nga nang ma uwel tok o kopha náng.’”
36Jesu aa wey pitta, “Ba tinthin wang iri watom wang eshi nol watta miq thima uhimkhung thaktey thi bariwa raa angta?”
37Thong tatalteywa aa batta, “Barey piq ma tinshit ta.”
Jesu aa piq thima batta, “Irimal ang ajo nang atho ka eq eshimal hun somlo u.”
Jesu Martha nia Mary jamoq tachong aa
38Jesu nia ujiphantey tang lam o kachey atho, ning tha ashey qhim náng thuta, esho Martha ta miing atha nushey ang aa they ning tha piq himnáng halta. 39Mary ta miing atha piq no ashey angta, bara Teyhungwa japhang rel o tong eq piq raaq tha tat chey ta. 40Martha somlot tungkang ma tathintak eq esho ka eq batta, “Teyhungwa, piq aa nga ma thaji somlot tha tasomlo eq piq irina ka eq tong chey aa iri khakla i? Ka eq roknong phu ta piq ma bat u!”
41Teyhungwa aa batta, “Martha, Martha! Nang aa phanrip somlo eq tinthin tathin tak u. 42Etharin ashey somlot ma tathin u. Mary aa aqhal tal aa etho piq wang ira som chuwan ching ang moq.”
Obecnie wybrane:
Luke 10: Mmmm
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
CC BY-NC-ND 4.0
