Luke 9
9
Jesu aa asi ani ujiphantey tang takat aa
(Matthew 10:5–15; Mark 6:7–13)
1Jesu aa wasi wani ujiphantey tang tha hal eq ning thima thaji thangwa tang phan ma etho atakasa tang taqhal ma tarong kota. 2Ethi jio piq aa ning ma Shkewa mungtan raaq phanchan ma etho atakasa tang tha taqhal ma takat ta. 3Piq aa ning ma batta, “Nim lam qhing ma chamtho nak som inn: qhingthil tho nak som inn, khak tho nak som inn, phaksat tho nak som inn, lik angin tho nak som inn etho adak kho akhat tho nak som inn. 4Ashey samhaq náng ka inn jo chamtey him wang nim wangphin ta halphin jo eshi samhaq sha shingchak wey min nángduk eshi him shina hun tong inn. 5Etho, bari samhaq wang miqtang aa nim ma hal moq ang ajo, eshi samhaq sha shingchak rangham o ning ma tasam ma nim jaa wang bukshi thalnak shing inn.”
6Ujiphantey tang aa eshi haq tha shing eq thaji qhim náng thu eq, etho tungtang qhal phanchan ta etho eshi qhim wang thaji ataksa tha taqhal ta.
Herod tha tungnung aa
(Matthew 14:1–12; Mark 6:14–29)
7Galilee lungwang Herod aa iri tang thaji tha tat eq, piq rapney tungnung tita chammatakoi chamtey tey miq eq batta John jungthalam teywa tha wey lun angta. 8Aral aa batta Elijah thuta etho chamtey tey batta jakho tok aa rangsamal tang wang ashey ang atha weyjey eq wey thuta pha. 9Herod aa batta, “Nga hun John kho tha thaduk chak táng; irimal ang ajo nga kap tat ang iri miqwa ri utang aa?” Etho piq aa Jesu tha siin ma tathin ta.
Jesu hayat bang aa miqwa tang ma taphaksat aa
(Matthew 14:13–21; Mark 6:30–44; John 6:1–14)
10Apostle tang tha wel eq ning aa chamlang somlo ta tang thaji tha Jesu ma batta. Etho Jesu aa ning tha hotshu eq piq jamoq sol eq Bethsaida tamiing aa ashey samhaq náng katta. 11Miqtang aa eshi tung aa raaq tha tat eq ning ji tha phan ta. Jesu aa ning thaji tha wangphin ta halta, ning ma Shkewa Mungtan tung aa raaq batta, etho utang uqhal ma raa ta, ning tha taqhal ta.
12Rangja sey angma ta tho, ujiphantey wasi wani Jesu relnáng thu eq batta, “Miqtang ri phaksat nia nángtong ma arel qhim tang nia palmong tang náng takat u chammatakoi hiqtang raa kitshik shit haqna.”
13Etharin Jesu aa ning ma batta, “Nim aa ning ma chamli phaksat eq ma kot inn.”
Ning aa thawel batta, “Í ching na banlo banga etho ngaqsa ani dang. Iri miqtang thaji rima phaksat rikma í raa katching ta nang aa tathin u i?” 14Esho hayat bang aa miqwa tang angta.
Jesu aa ujiphantey tang ma batta, “Miqtang ri rokbanga rokbanga tatong inn.”
15Ujiphantey tang aa irimal somlo ta etho ning tha tong ta. 16Jesu aa banlo banga etho ngaqsa ani tha som eq, mungtan konáng siin eq Shkewa ma kechu ajong ta ko eq pin ta etho miqtang thima kotma piq aa ujiphantey tang thima kota. 17Thaji miqtang aa wokphut la phaksat jio, udak tha ujiphantey tang aa qhong asi qhong ni wey tun ta.
Jesu utang aa
(Matthew 16:13–19; Mark 8:27–29)
18Saalshey Jesu aa piq chen romtam chu ma kata tho, ujiphantey tang ujamnáng thuta. Piq aa ning thima pitta, “Miqtang aa nga utang aa ta bat aa?”
19Ning aa thawel batta, “Chamtey eq bat aa nang raa John jung thalamtey. Adak tang eq bat aa nang raa Elijah ta, etho adak miqtang aa rong bat aa nang raa aking rangsamal ashey angta tha weyjey ta.”
20Piq aa ning thima pitta, “Etharin nim aa nga raa utang aa ta batphin aa?”
Peter aa batta, “Nang raa Shkewa Khristo tha.”
Jesu piq tsamnang etho utik tha battan kot aa
(Matthew 16:20–28; Mark 8:30—9:1)
21Etho Jesu aa ning thima iri raaq ri utang ma tho bat ching ang moq ta arong eq batta. 22Piq aa ning ma batta, “Miqna Sa shima tsamnang ukap eq ching etho miqlang tang, ajong tingwa tang etho thong tataltey tang aa piq sha chik eq ching, etho piq sha tatik chak na, etharin saltom o piq sha rollung náng wey lunna.”
23Etho piq aa ning thima batta, Utang ijamnáng katma nuk aa sha, piq ni piq sha lakchak eq ching, etho salwet piq bólq sha som eq iji phanching. 24Utang eq urollung thalun ma tathin tey sha urollung sha thamat eq na, etharin utang eq iráng ma urollung thamat aa ethi tang sha lunna. 25Miq ashey aa iri thaji mingkang raa kapta etharin piq ni piq sha thamat chak etha ang moq ang ajo tashit chak ajo chamlang kapna? Chamtho ahung! 26Utang nga ma etho iraaq ma rakri ajo, Miqna Sa uphun amun jamoq etho uwa nia asang rangkamwa tang phun amun jamoq kapha rangham tho piq sha tharakri na. 27Nga nim ma asing hun batphang, nim jaktung na irimal miq tho atha barey Shkewa Mungtan khi wey moq jakho timoq angna.
Haan kaley
(Matthew 17:1–8; Mark 9:2–8)
28Iri tang raaq bat sha saal ashat tan jio, Jesu aa Peter, John etho James tha ujamoq romtam chuk ma haqkan khonáng sol qhan ta. 29Romtam chuk kam tho, piq sham tha kaley angta, etho piq khat tha rapney pung eq lip ta. 30Rikla wani tha Jesu jam tho wanchey ta. Eshi ni sha Moses nia Elijah angta. 31Ningni sha phun amun jamoq thu eq Jesu jamoq wan ta. Ning Jesu tik sha bara Jerusalem na angna ta wan ta. 32Peter ni unokwa ni ujib ang chey ta etharin ning sey shat atho ning aa Jesu phun amun etho ujamna wani lang atha khita. 33Ethi ni they Jesu tha shingchak eq kat ma ang atho, Peter aa Jesu ma batta, “Tangteywa, í irina tong raa aqhal! Í aa atom bulang taap hunni, ashey barang ma, ashey Moses rangma etho ashey Elijah rangma.” Piq aa chamta bat atha sam moq angta.
34Piq aa irimal bat chey aa kamtho phun thu eq ning thaji tha timchak ta etho phun eq timchak atho ujiphantey watom tha rapney chota. 35Phun thiwang raaq tatat ta, “Ira i Miqwasa, bara nga tal táng piq raaq ri tat inn!”
36Phun wang raaq tatat atha màng atho, esho Jesu tha chen sey angta. Ujiphantey tang aa iri raaq tang raa tin o shing ta etho ning aa chamlang khita tha eshi rangham tho utang ma tho bat moq angta.
Jesu aa jarosa haan wang thangwa taqhal aa
(Matthew 17:14–18; Mark 9:14–27)
37Saalji tho, Jesu nia ujiphantey watom tha haqkan wang haqja náng juta, etho daqhan miqtang tha Jesu jamoq tachong ta. 38Eshi miqtang thajoq aa tang mong wang ashey miq ang aa tha jajong aa ring eq batta, “Tatalteywa, tinshit eq isa ri siin kophu; nga ma isa washey dang hun! 39Anaan tsija eq lo eq ka jin tharing aa etho rapney jajong aa taphil shal aa etho piq nung wang thuk chen thalat aa; piq rapney tasamnáng aa etho piq raa achol eq qhaap moq! 40Nga ba jiphantey tang ma bat táng tinshit eq iri phanchak inn etharin ning aa ruk phan moq angta.”
41Jesu aa thawel batta, “Nim kam ahung jashit miqtang! Nga nim jamoq chamtan nángduk tong náng? Nim jamoq nga chamtan nángduk thoktong phanáng?” Etho piq aa ethiwa thima batta, “Ba sa thi ináng solkat phu.”
42Ethi sa tha takat chey pha tho, thangwa aa piq tha taphil ma ko eq haq náng thawol ta. Jesu aa anaan tsija thima raaqkhat kota, ethi jarosa tha taqhal eq etho piq wa thima thawel kota. 43Shkewa tarong tha khi eq thaji miqtang tha patja ta.
Jesu utik tung aa raaq tha wey bat aa
(Matthew 17:22,23; Mark 9:30–32)
Jesu aa chamlang thaji somta tang tha khi eq miqtang tha rapney patja ta. Eshi tok o piq aa ujiphantey tang ma batta, 44“Nga nim ma chamta batma ang phang ri nak lakchak inn! Miqna Sa tha miqtang jaknáng kotchak ma ta.” 45Etharin piq aa chamta bat atha ujiphantey tang aa jin sammoq angta. Iri raaq raa ning wang tapu ta, req ning aa sammoq angta etho ning aa iri raaq raa pit ma ucho angta.
Thaji pheynáng eq ajong utang aa
(Matthew 18:1–5; Mark 9:33–37)
46Ujiphantey tang tha ning jaktung wang thaji pheynáng eq ajong utang aa ta thadanta. 47Jesu aa ning tinthin tha usam eq ta, req piq aa ashey nijang sa tha hal eq urel o thalang ta, 48etho ning thima batta, “Utang eq iri nijangsa raa i miing o wangphu ta hal aa, piq aa nga raa wangphu ta hal aa; etho utang eq nga wangphu ta hal aa, piq aa nga takattey wa sha wangphu ta hal aa. Nim jaktung wang utang aming aa sha thaji pheynáng eq ajong.”
Utang eq nim miiksuk moq sha nim jamna
(Mark 9:38–40)
49John aa batta, “Tangteywa, í aa ba miing o washey eq thangwa tang phan atha khiti, etho í aa thamàng eq ma bat ti, chammatakoi piq hiqtang jam wang ang moq.”
50Jesu aa piq ma etho ujiphantey tang ma batta, “Piq shi thamang ma nak tathin inn, chammatakoi utang eq nim ma miiksuk moq sha nim jamna.”
Samaria haqsong aa Jesu tha hanmoq ang aa
51Jesu mungtan náng wang ma rangham sey thu chey atho, piq Jerusalem náng katma rapney tathin ta. 52Piq aa jakho o thoksiltat tey tang tha piq rangma phanrip kacha shing ma Samaria qhim náng takat ta. 53Etharin eshiwang miqtang aa piq tha tathok ma nukmoq angta, chammatakoi ning aa usam eq ta piq Jerusalem náng ka aa. 54Ujiphantey tang wang James nia John piq thima batta, “Teyhungwa, nang aa chamta tathin u, í aa mungtan wang wal hal eq ning raa tathom chak i?”
55Jesu aa ngik lang eq ningni thima mol ta. 56Etho Jesu ni ujiphantey tang tha adak qhim náng kata.
Jesu jiphan ma chamlang uthang kot ching aa
(Matthew 8:19–22)
57Ning lam na qhing chey atho, washey ang aa tha Jesu ma batta, “Nang banáng ang u thináng nga tho ba jiji phan phanáng.”
58Jesu aa thawel batta, “Inkaku tang ma ubung atha, etho wo tang ma utip atha, etharin Miqna Sa ma uwol etho nángtong angma katáng ahung.”
59Piq aa adak washey thima batta, “I jiji kaphu.”
Etharin miqwa aa batta, “Tangteywa, jakho nga ka eq iwa shi rang bung kaphang.”
60Jesu aa batta, “Tsija o utiktey miqtang eq ning wang utiktey tang shi cham bung aa. Nang ka eq Shkewa Mungtan raaq shi phanchan u.”
61Etho adak washey they batta, “Tangteywa, nga ba jiji phan phang etharin ethi jakho ihimtey tang ma raaq thun bat shing kaphang.”
62Jesu aa piq ma batta, “Bari miq rey hal hum eq jináng chen ngiksiin aa eshi miq sha Shkewa Mungtan na chamtho jin somlo moq angna.”
Obecnie wybrane:
Luke 9: Mmmm
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
CC BY-NC-ND 4.0
