Madiu 2
2
Naare ipula andasu nane aoma kimisu alinu ipisimiya ei
1Go naarena Erodi nipu kini ali ainyaloma Meari nipumi Bedeleeme ree anda rupara Diudia andasu nane Yesu mandisaya. Gupisayandare ongesi werepe nane kumba danganu yarepea andoma kone suaisimiya ali menda paranu so naare ipula andasu nane aoma mo Diurusaleme ree anda para popisimiya. 2Gupuma go alinu ipumare nimumi wenaali menda para angaa meala ara lalore, Monde Diu wenaalina kini ala pea nakisi a para ayapae, loma angaa misimiya. Naame nipuna kumba so naare ipula nane opa ei andoma naame nipu para panda punyada ara yainya pulame epama, lisimiya. 3Go einare Kini Erodi go ei pangoma nipu pange mo Diurusaleme ree anda para aisimiya wenaalinu raayome pange kone suma kendame waru komisimiya. 4Go einare Erodi nipumi mo yainya puaisimiya kalu alinu pange mo Mosesimi Rudule Angele waloaisimiya alinu raayo ipulupa loma lalore, Ande Kerisore a para mandiayapae, loma angaa misaya.
5Nimumi angele yango liada ara lalore, Wena mendame mo Bedeleeme ree anda Diudia andasu rupara mandia, lisimiya. Go angelere Godena poropedi alimi go angele wape pisaya. 6Go wape pulu arare gupi lisaya.
Neeme Bedeleeme ree anda nipuna andasu kuni
Diudia para go angele lalo, lisaya.
Bedeleeme neere Diudia andasu runanere
nee ora andaa anda meada ale ae.
Akepeare nee ruparare kalu ali menda opasialiae.
Go alimiri naa Isaraeli wenaali andere-aoma
pora walo aliae, lisaya.
7Go einare Kini Erodi nipumi mo naare ipula andasu nane aoma ipisimiya kimisu alinu nipu rapu kundiripu angele doame Ipulupa loma lalore, Go kumbare ora a naaresimi epa aripapae, loma andasiaisaya. 8Go loma Erodi nipumi mo alinu Bedeleeme ree anda nane penaya rapada ara mana lala ara lalore, Nimi raayome puma mo naki waru aisa pipape, lisaya. Gupuma andawilimindare gore neme pange nipu para rumu yaruaoma panda punyada ara yainya pulale nimi raayome ni ambe dapape, lisaya.
9-10Go einare nimumi go kini alina angele pangoma paisimiya. Gupuma nimu pula-ainyaloma so ambalande naare ipula nane opisiaisaya kumbare ambala lombai pupa puma mo naki mandu siamba pirisaya lena pua risaya. Nimu mo kumba pupula ara pi ei andoma nimuna pu para raname waru komala ara pu naeyale paisimiya. 11Sonde kumba pua aisaya anda para nimu puma pua konda pamboma mo naki nipuna ama Meari lapo andisimiya. Gupuma nimumi mo naki andala ara rumu yaruaoma piri yainya puma nimuna nunu rakuma golo pange epe roropo pi danga pange epe roropo pi wambala raayosi mendaa para aperaoma mo naki para alisimiya.
12Go pisimiyandare Gode nipumi upame mo alinu para kingi pula ara lalore, Nimi mo Erodi para wala na-lekeya pulupape, lisaya. Go au pumare nimuna anda polameyare nimuna epameya porana na-pere pa pora mendana paisimiya. Akepeare Godeme kingi angele lalo arare Erodi wala na-andola pulupape lisaya.
Idipi andasu nane pongola paisimiya ei
13Gupuma mo naare ipula nane andasu para aoma ipisimiya alinu go andasu giaoma paisimiyandare Reali nipuna eindiolo ali mendame ipuma Diosepa para upame penameyao lalore, Mo kini ali Erodi nipumi mo naki duame aisa piliale, nee pange go naki pange nipuna ama rapu rekoma mo Idipi andasu nane pongola pulupape, lisaya. Go para aomare neeme go andasu gialepa doanda gialepapee, lisaya.
14-15Go einare Diosepa nipumi go eindiolo alina angele pangoma golemele rimbala rekoma nipuna naki pange Meari lapo muma mo Idipi andasu nane pongola paisaya. Gupuma Erodi ambe na-kome-ainyalomare Diosepa Idipi andasu para aisaya. Go au pisaya eiri Reali nipuna poropedi ali repara lala ara lalore,
Na naki Idipi andasu para ainyaloma wi lawae, lisaya ei ora minyaya pisaya.
Kini Erodi nipumi nakinu raayo liisaya ei
16Gupisimiyandare Erodi reka meala ara andisayapare monde naare ipula nane ipisimiya kimisu alinumi ni makirarimi, kone suma rono ora andaai pangisaya eimi nipuna wilinu pange kou nane popa aisaya. Monde kimisu alinu ipisimiyandare Erodi monde kumba epa raya naare angaa misayandare la lisimiya. Nipumi go ei andasiaomare gore Erodi nipumi mo Bedeleeme ree anda para pange Bedeleeme andasu para ma-kopaliae andanu raayo para pange nipuna yanda puae alinu rapaoma mo ree anda rupara kuni gipa laapo ambe na-perelea nakinu raayosi nimumi lu komainyayanda rapaisaya.
17Go pisaya eiri mo ambala ririna Godena poropedi ali Dieremaya nipumi angele la wisaya eiri ora penameyao pisaya. Go alimi gupi lisaya.
18Mendalimi mo Rama ree anda rupara
e loma ree lo poainya pi ei pangeleme.
Resolo nipumi nipuna nongo nakinu raayosi
komeme eina ree lo pia.
Nipu wenaalimi nipuna pu ma-siainyape angele
damepare nipu kendame pa koma pia eimi
nipuna pu na-ma-siapeya.
Akepeare nipuna nongo nakinu raayosi
komemenda.
Idipi andasu nane aoma wala lekeya popisimiya ei
19-20Gupuma Erodi nipu komena lomare Reali nipuna eindiolo alimi Diosepa repara mo Idipi andasu nane pumare nipu para upame gupi lisaya. Ande nakinu duame paamende alinuri raayosi komamendele Meari niipimi rekoma go andasu giaoma Isaraeli andasu nane lekeya pula ara go naki karu pulupape, lisaya. 21Go einare Diosepa rekoma mo naki pange nipuna ama rapu wala lekeya Isaraeli andasu nane karu paisipiya.
22Go paayapare wala Erodi nipuna naki Akelasimi nipuna ara alona Diudia andasuna kini ali pia lisimiya ei pangomare Diosepa nipu wala gone pope paalame komisaya. Go einare Diosepa nipu upame Godeme mana angele lalala ara go para pulupae lisaya ei pangoma mo Galili andasu nane paisimiya. 23Go einare Diosepa mo Nasarere ree anda para pua ao-aisaya. Go pisaya eimiri mo Godena poropedi alinumi angele la siala ara lalore,
Nimumi nipuri Nasarere ali deme,
lisimiya ei ora misaya.
Obecnie wybrane:
Madiu 2: POLENT23
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
