MATIYO 13
13
Mufano wa mutru ayelao ha utsanya
(Mar 4:1-9; Luk 8:4-8)
1Suku ɗe wiyo ile, Insa alawa ɗagoni, andre aketsi wangoni na iɓahari#13:1 iɓahari: Yaãni, iƁahari ya Galilaya, au liDzia la Maji la Galilaya.. 2Dunia nyengi ya watru ija ingulidzana kariɓu na waye, ata angia moni na djahazi, aketsi, na piya idunia ihimi wangoni na yamaji. 3Ɓas v̄ale akowasomedza trongo nyengi ha urumia mifano. Awaambia: «Suku, mutsanyizi-maela alawa, akondrotsanya. 4Utsanya yahe v̄ale, ɓaãdhwi za maela zipuliha ndziani; zinyunyi zija, ziyaɗyi. 5Ɓaãdhwi yangina ipuliha hari mwa shiv̄andre ya tsi kawe, kav̄waka trotro nyengi. Mbia zile zimea kamwe, mana trotro kayaka nyengi. 6Ɓadi jua uhea yalo, livudzu mimea yile, yija yihumu, mana kayakana mizi mihodari. 7Ɓaãdhwi yangina ipuliha hari mwa malavu yendza miɓa. Malavu yale yahea, yayifinikia. 8Zasalia zipuliha hari mwa trotro ndjema. Ɓas, zitowo mavuna: v̄wa zatoa miya, zasalia sitini, iv̄o zangina thalathini. 9Mutru aliona makio ya ukia, nakiye.»
iMana ata Insa asomedzao ha urumia mifano
(Mar 4:10-12; Luk 8:9-10)
10Amwesa yamaswihaɓa yamujilia, yamudzisa: «Manatrini ulaguao na wao ha mifano?»
11Insa awadjiɓu: «Mana wanyu mudjaãliwa ujua zisiri za Utawalizi wa Monyewe ziMbingu, ɓadi wao kawadjaãliwayo. 12Mana mutru aliona, atsov̄olwa, ata atsokana ha uwengi; ɓadi uwo kasina, ata ipav̄i alionayo, ne atsotolewayo. 13iMana nirongoao na wao ha mifano, ɗe ini: wamoangalia, wao kawaono, na wamovulishia, wao kawakia, wala kawaelewa. 14Na hawoju urongozi unu washukidziwa mutrume Izaya, usutsimidziha:
‹Mutsokia ha makio yanyu, ne kamutsoelewa;
mutsoangalia ha matso yanyu, ne kamutsoona.
15Mana umo wa umati unu ufanyiha mudziro,
wadziulu yamakio, amwesa wadziɓala yamatso,
ile wasuone ha matso yawo,
wasukiye ha makio yawo, wasuelewe ha umo wawo,
wala wasuzinge hangu wandra toɓa,
ne nawav̄onesa.›
16Wanyu v̄anyu, yaɓarikishiha matso yanyu, mana yasuona, na makio yanyu, mana yasukia. 17Nisumuambiani ha kweli, wengi wa mitrume na watuĩvu watamani waone izo muzionao, ne kawaziona, wakiye izo muzikiao, ne kawazikia.»
Insa asueledza umufano wa umutsanyizi
(Mar 4:13-20; Luk 8:11-15)
18«Ɓas namuvulishiye imana ya umufano wa umutsanyizi-maela ule. 19Mutru akiao urongozi wa Utawalizi wala kauelewa, uMovu|Movu uja utoa izo aka atrilwazo rohoni hahe: uwo ɗe umufano wa ule apara yamaela wangoni na indzia. 20Na uwo apara yamaela v̄ahanu kawe, isurongoa ɗe uwo alio amba amokia uurongozi, uurenga ha furaha. 21Ɓadi kasina mizi hahe monyewe, waye kausiki neka tsi mwana muda. Wakati v̄ujao ãdhaɓu au matreso ha siɓaɓu ya urongozi ule, sa ile kamwe waye uuparia siɓaɓu ya ukwala. 22Na uwo apara yamaela hari mwa malavu yendza miɓa, ɗe uwo akiao uurongozi, ɓadi mifikirisho ya lidunia lini na uv̄endza-mali uɓala pumu urongozi ule, ata kaudza mavuna. 23Na uwo apara yamaela hari mwa trotro ndjema, isurongoa ɗe uwo akiao uurongozi, auelewao. Waye utoa mavuna: mbia moja udza miya, yangina sitini, na yangina thalathini.»
Mufano wa mimea miovu
24Insa awatolea raha mufano wangina tsunu: «Utawalizi wa Monyewe ziMbingu ufana na mutru atsanya maela mema mundrani hahe. 25Ɓadi wakati watru waka walala, ãduwi yahe aja, atsanya mbia mbovu hari-hari na yimirama-mitsa v̄ale, amwesa andre dzahe. 26Wakati yimimea yile yamea ata yatoa make, mimea miovu yile yionehana wajau.
27Warumizi wa monyewe umuraɓa waja wamuambia: ‹Mutukufu, afa kwatsanya maela mema mundrani haho v̄ale mwa? Ɓasi mimea miovu yile yilawa hav̄i ata yangia v̄ale?›
28Awadjiɓu: ‹Uwo ãduwi ɗe afanya trongo iyo.›
Ɓas, warumizi wale wamuambia: ‹V̄av̄o watsov̄endza rendre rayirurumwe?›
29Ɓadi awadjiɓu: ‹Ãhã, mana mwamorurumwa yimimea miovu, nisurilia wanyu upua wajau yimimea mema. 30Namuyilishe yihuwe v̄umoja ata wakati wa mavuna. V̄av̄o nitsoambia wavunizi: «Namururumuwe raɓuzi yimimea miovu, muyingulidze maɓi ile yavudzwe, iv̄o mwamungulidze umurama-mutsa kanyani hangu.» › »
Mufano wa mbia titi rahana zititi
(Mar 4:30-32; Luk 13:18-19)
31Insa awatolea mufano wangina tsena ha urongoa: «Utawalizi wa Monyewe ziMbingu ufana na mbia titi rahana zititi#13:31 mbia titi rahana zititi: iShigiriki v̄anu isurongoa aina ya mbia titi rahana zititi. Shifarantsa iyo uhiriwa moutarde., mutru aitaɓu mundrani hahe. 32Na iyo ɗe imbia titi rahana piya zimbia. Ɓadi yamomea, iyo uka ɓole rahana piya yimimea ya feliki, ata ufanyiha muri amba nyunyi za hawani ufanya mahara yazo hari mwa marahi yawo.»
Mufano wa lalive ifumusao ngano
(Luk 13:20-21)
33Insa awatolea raha mufano wangina unu: «Utawalizi wa Monyewe ziMbingu ukiri ufanisiwa na lalive mutrumama airenga aitsanganisa na ziv̄imo traru#13:33 ziv̄imo traru: Yaãni, mukaɓala wa kilo shirini na tsano. za ngano, ata ifumuhe piya.»
iMana Insa akosomedza ha urumia mifano
(Mar 4:33-34)
34Trongo zini piya Insa aambiazo idunia yaka v̄ale ha urumia mifano, tsena kakolagua na wao neka tsi ha urumia mifano, 35ile trongo ini mutrume aka airongoa itsimidzihe:
«Nitsoɓua ihanyo nilaguwe ha urumia mifano,
nitsojudza trongo zadzamisiwa rangu lidunia laumbwa.»
Insa asueledza umufano wa yimimea miovu
36Ɓas alishi idunia ile, angia moni na inyumba. Maswihaɓa yahe yamujilia, yamuambia: «Rieledze roni umufano wa mimea miovu yile mundrani.»
37Awadjiɓu: «Mutru ule atsanyao yamaela mema, ɗe uMwana wa Mwanadamu|Mwana wa Mwanadamu; 38umundra, uwo ɗe lidunia, yamaela mema, yao ɗe wana wa Utawalizi; yimimea miovu, yiyo ɗe uwana wa uMovu; 39na iãduwi ayitsanya, ɗe Iɓilisa; yamavuna yasurongoa umwiso wa lidunia, na yamavunizi, ɗe zimalayika.
40Ha izo, mauri ɗe inamuna malavu maovu yarurumulwao yavutswao moroju, ɗe inamuna itsokao mwisoni mwa lidunia; 41uMwana wa Mwanadamu atsov̄eleha malayika zahe zitowe hari mwa Utawalizi wahe piya zikwalisao watru, na uwafanyizi mbovu. 42Zitsowavutsa moni na lijenge la moro, v̄ahanu v̄utsokao shililo, na uv̄uhura manyo ha utungu. 43Wakati uwo watuĩvu watsowala mauri jua hari mwa Utawalizi wa Ɓaɓawo. Mutru aliona makio ya ukia, nakiye!»
uMufano wa dafine yadzamisiwa
44«Utawalizi wa Monyewe ziMbingu ujua ufanisiwe raha na dafine yadzamisiwa moni na shamba. Mutru aiparao, uitsitsa raha, na ha ifuraha yahe, waye uendra audze piya alionayo, pare anunuwe shamba lile.»
uMufano wa lulu yendza thamani
45«Utawalizi wa Monyewe ziMbingu ukiri ufanisiwa raha na muɓahazazi azunguhao lulu ndzuzuri. 46Amopara lulu yendza thamani ɓole, waye uendra audze piya alionayo, pare ainunuwe.»
uMufano wa wavu
47«Utawalizi wa Monyewe ziMbingu ujua ufanisiwe raha na wavu wavutswa ɓaharini, amba usike kula aina ya fi. 48Wamojaya, walozi uuhedza mutsangani, waketsi watsahua zindjema, wazitriye mahangani, amwesa walatsa kula kaisina mana. 49Itsoka ɗe namuna iyo mwisoni mwa lidunia. ziMalayika zitsoja ziɓause waovu na watuĩvu, 50ziwavutse moni na lijenge la moro, v̄ahanu v̄utsokao shililo na uv̄uhura manyo ha utungu.»
51Amwesa awadzisa: «Saɓu muelewa piya trongo izo?»
Wadjiɓu: «Ewa.»
52Ɓas awaambia: «Iyo ɗe imana, kula fundi wa Sharia asomedzewa zahusu Utawalizi wa Monyewe ziMbingu, ujua afanisiwe na monyewe nyumba arengao hari mwa dafine yahe zitru pia na za hale.»
Watru wa Nazareti kawasumuamini Insa
(Mar 6:1-6; Luk 4:16-30)
53Insa ɓaanda amalidza utolea watru mifano yile, alawa v̄ale. 54Andre hari mwa liɗago lahe, akosomedza moni na iNyumba ya Uswali yawo, ha namuna amba watru waka v̄ale, wakoshanga ata wakodzisana: «Imulawia hav̄i hikima ini na midjuza zini? 55Afa unu tsi ɗe umwana wa mufanyizi-hazi za miri ule? Na mayahe tsi ɗe Mariama? Wananyahe watruɓaɓa tsi ɗe Yakoɓu, Yusufu, Simoni na Yudasi? 56Na wananyahe watruwashe kawasi piya v̄umoja na wasi v̄anu? Ɓasi trongo zini piya zimulawia hav̄i?» 57Ɓas, hawoju aka siɓaɓu ya uka amba wasuamini.
Ɓadi Insa awaambia: «Mutrume kapulwa sheo, neka tsi hari mwa liɗago lahe, na muraɓa wahe.»
58Ɓas, kafanya midjuza nyengi v̄ale, iv̄o kawakana uaminifu.
Obecnie wybrane:
MATIYO 13: swb
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2021, Wycliffe Bible Translators, Inc. All rights reserved.
