Romiko lạgitʼ Pạul Apostolakʼ ciṭhi 5
5
Dhorom mente ataṅ ocokʼ reakʼ jo
1Biswạs hotetege bon dhorom ocoakana ar ona iạtege Probhu Jisu Mạsi hotete Isor ar abo talare suluk do hoyakana. 2Ńitokʼ Isorakʼ daya reakʼ oka horte bon calakʼkan onḍe do Mạsire pạtiạu iạte bon seṭerakana. Ar Isorakʼ ṭhonok ńam reakʼ aste bon rạskạkʼ kana. 3Eken ona do baṅ, harkhet sasetre hõ bon rạskạkʼ kana, ente bon baḍaea harkhet saset reakʼ jo do soboriye hoeocoya, 4ar sobori reakʼ jo do bhage colon ar bhage colon reakʼ jo do asge. 5Noa as do bae lajao ocobona, ente Isore emakan sonot Jiu hotete aboakʼ ontor do acʼakʼ dulạṛteye perecʼ akada.
6Nijor bon tahẽkanre Mạsi do ṭhik okterege bedhorom manwako lạgitʼ, metakʼme abon lạgitʼgeye gocʼlena. Jãhãe dhorom hoṛ lạgitʼ okoehõ jiwi do bako em lạgidokʼa. 7Okoe eṭakʼkoe bhạlạiyetʼko onkan hoṛ lạgitʼ hoedaṛeakʼa jãhãe dilkate jiwi emreye em daṛekea. 8Menkhan Isor aboe dulạṛetʼ bon ona reakʼ cinhạ do noage, kại hoṛ bon tahẽkanrege Mạsi do abo lạgitʼ jiwiye emkeda.
9Enḍekhan Mạsiyakʼ mãyãm hotete tinre abo do dhorom mente bon ataṅ ocoakana unre abon do Mạsi hotetege Isorakʼ sạjại khon khạṭige rukhiyạ bon ńama. 10Abo do Isorren bạiri bon tahẽkanre acʼren Hoponakʼ gujukʼte uni tulucʼ bon samge ocoakana. Ar nonkage bon samge ocoakante Mạsiyakʼ jionte khạṭige kại khon bańcao bon ńama. 11Eken ona do baṅ, okoe hotete Isor tulucʼ bon samge ocoakan uni Probhu Jisu Mạsi hotete abo do Isor tulucʼ bon rạskạ midokʼkana.
Adam ar Mạsi
12 #
Gen 3.6
Mitʼṭen manwa hotete dhạrtire do kại boloyena ar ona kại hotete gujukʼ hõ boloyena. Ente sanam manwako kại akatʼte sanamko ṭhenge gujukʼ hõ boloyena. 13Moseyakʼ ạn ạuri tahen khonge dhạrtire do kại tahẽkana, menkhan ạn baṅ tahẽlen khan kại do kại mente ohoge lekha lena. 14Enrehõ Adam khon ehopʼkate Mose hạbicʼ sanamko cetanrege gujukʼ do raje calaoleda. Isorakʼ hukum manao baṅkate okoe do Adam leka bako kại akatʼ onko cetanre hõ gujukʼ do raje calaoleda.
Ar okoeyakʼ hijukʼ reakʼ katha tahẽkan, uni Jisu Mạsiren nạmunage Adam doe tahẽkana. 15Menkhan Adamakʼ kại ghạṭko oka lekakan, Isorakʼ bin damanakʼ dan do onka baṅkana. Tinre mitʼṭen hoṛakʼ kại iạte aema doko gocʼena, unre Isorakʼ daya ar mitʼṭen manwa hotete oka dan hecʼen, ona do artetʼ aemako lạgitʼge sareṛena! Ar uni mitʼṭen manwa doe hoyokʼkana Jisu Mạsi. 16Isorakʼ dan do Adamakʼ kại reakʼ jo leka do baṅkana, ente mitʼṭecʼ kại reaṅ bicạr lekate sanam manwakoge sạjại lek kanako menteko lekha ocoakana, menkhan dhorom mente Isor ṭhen ataṅokʼ reakʼ nokʼoe noa daya dan, ona do ạḍi utạr kạiko iạte hecʼakana. 17Mitʼṭen manwawakʼ kại gunạkʼte gujukʼ ar uni mitʼ hoṛ hotetege rajokʼe ehopʼleda. Menkhan okoe do Isorakʼ asambheṛ daya ar dhorom menteko ataṅ ocokʼ, onko do uni mitʼ hoṛ, metakʼme Jisu Mạsi hotete sạri jion reakʼ perecʼtetʼ iạte khạṭigeko rajokʼa.
18Enḍekhan mitʼṭecʼ kại hotete cetʼleka sanam manwako sạjại ńam lek kanako menteko lekhakʼ kan, onkage mitʼṭen dhorom kạmi hotete sanam manwakoge dhorom mente aṅgocko lạgitʼ bondobos hõ dohoakana ar ona reakʼ jo do hoyokʼkana jaejug jion. 19Cetʼleka mitʼṭen manwawakʼ bebakʼtao hotete ḍherkoge kại hoṛ menteko lekhayen, onkage mitʼṭen manwawakʼ batao iạte ḍher hoṛ do dhorom menteko ataṅ ocokʼa. 20Ạn-ạriko emena jemon behokakʼko ḍherokʼ, menkhan okare behokakʼ ḍherena onḍege Isorakʼ daya hõ artetʼge bạ̃ṛtiyena. 21Ona daya do noa iạtege ḍherena jemon gujukʼ talate cetʼleka kại do raje calaoetʼ tahẽkan, onkage manwa hõ dhorom menteye aṅgocokʼte ńitokʼ uniyakʼ daya do rajokʼa: ar ona reakʼ jo do hoyokʼ kana aboren Probhu Jisu Mạsi hotete jaejug jion hameṭjoṅ.
Obecnie wybrane:
Romiko lạgitʼ Pạul Apostolakʼ ciṭhi 5: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.
