Romiko lạgitʼ Pạul Apostolakʼ ciṭhi 4
4
Abrahamakʼ jion khon sikhạuna
1Enḍekhan aboren hapṛam Abraham reaṅ do cetʼ bon menkea? Noa babotre uni do cetʼe ńelleda? 2Abraham do kạmiko iạte dhorom menteye ataṅ ocoakan khan enḍekhan uniyakʼ gorbokʼ reakʼ do menakʼgetaea. Menkhan Isor samaṅre do acʼakʼ gorbokʼ reaṅ cetʼge bạnukʼtaea. 3#Gen 15.6; Gal 3.6 Sonot sostorre olakana; “Abraham do Isorakʼ kathareye pạtiạuena ar onate Isor do dhorom menteye ataṅkedea.” 4Kạmikate okaṭakʼ kuṛại ńamokʼ, ona do dan do baṅkana, menkhan paona kana. 5Menkhan okoe acʼakʼ kạmire bhorsa baṅkate eken Isorreye pạtiạukʼkan, Isor do uniyakʼ biswạs iạte dhorom menteye lekhayea, ente unige kại hoṛ do dhorom menteye lekha daṛeaea. 6Dạud hõ onkan hoṛ do bhạganicʼe metaekana one okoe Isor do begor kạmitege dhorom menteye lekhayede; enkathae,
7 #
Ser 32.1,2 bhạgangeako onko do, one okoekoakʼ bedhoromakʼko ikạ akantako,
ar okoeyakʼ kạiko do dapal akantako.
8Bhạgangeae uni hoṛ do,
one okoeyakʼ kạiko Probhu Isor doe ikạ akatʼtae.
9Nonḍe do cetʼ eken khatna ocoakankoge bhạganko men ocoakana? Ar bin khatna akanko lạgitʼ do cetʼ baṅ men akana? Hẽ, onko hõ bhạgankoko men ocoakangea, ente bon meneda, “Abraham do biswạs iạte dhorom menteye lekha akana.” 10Ar uni do oka oktere lekhayentaea? Khatna tayom se khatna ạurire? Khatna tayom do baṅ menkhan ạuriye khatnakʼrege. 11#Gen 17.10 Khatna ạurire biswạs iạtege Isor do dhorom menteye lekhakedea ar onage tahẽkana uniyakʼ sạbudokʼ reakʼ cinhạ do. Enḍekhan ńelokʼkana, khatna begorte okoe do eken biswạs hotete dhorom menteko ataṅ ocokʼkan, onko sanamkoren hõ Abraham doe baba kana. 12Ona chaḍa, khatnakʼ lahare Abraham do cetʼleka biswạs reakʼ horreye taṛametʼ tahẽkan, onkage khatna akan okoeko calakʼkan onkoren hõ Abraham doe baba kana.
Isorakʼ gokʼakʼ purạu
13 #
Gen 17.4-6; 22.17,18; Gal 3.29 Abraham ar uniren bõsko ṭhen Isor doe gokʼleda je, noa dhạrti do Abrahamakʼge hoyokʼa. Ạn-ạriko pańjaete do baṅ, menkhan biswạs hotete uni do dhorom menteye lekhayena ar onatege ona gokʼakʼ do doholena. 14#Gal 3.18 Ạn-ạriko pańjaete jãhãe dhạrti reakʼ ạidạriye ńam khan, enḍekhan pạtiạu do okạjuwạgea ar Isorakʼ ona gokʼakʼ reakʼ hõ jãhãn damge baṅ tahena. 15Ente ạn-ạri do Isorakʼ sạjạiye ạguiya. Sạri katha do noage, okare ạnko baṅ tahen onḍe do ạn bemanot reakʼ kukli hõ baṅ rakapʼlena.
16 #
Gal 3.7
Onate manwakoakʼ biswạste noa gokʼakʼ do purạuakana, jemon noa do Isorakʼ daya reakʼ dan hoyokʼ. Onate Abraham bõsrenko lạgitʼ noa gokʼakʼ do khạṭige purạukʼa. Noa gokʼakʼ do eken ạn-tạriren hoṛko lạgitʼ purạukʼa ona do baṅ, menkhan okoeko hoṛ do Abraham leka inạ mitʼ pạtiạureko pạtiạu akan onko lạgitʼ hõ noa gokʼakʼ do khạṭige purạukʼa. 17#Gen 17.5 Sonot sostorre olakan leka, “Iń do ạḍi utạr jạtkoren babageń hoyoco akatʼmea,” Ona lekate Isor samaṅre Abraham do abo sanamkoren baba kanae. Okoe gocʼkoe jiwetʼetʼko ar bạnukʼakʼko hõ menakʼakʼko lekae metakʼkan uni Isorrege Abraham doe pạtiạulena.
18 #
Gen 15.5
Abraham do baba hoyokʼ reakʼ jãhãn asge baṅ tahẽkantaere hõ uni do Isorre askate pạtiạu akane tahẽkana. Isor do uniye metade tahẽkana, “Amren bõsko do sermaren ipil leka saṅgeko hoyokʼa.” Ar ona katha lekage Abraham do ạḍi utạr jạtkoren babageye hoylena. 19#Gen 17.17 Mitʼ sae umerren haṛam Abraham doe bujhạu daṛeatʼ tahẽkana je, hoṛmo do okạjuwạ akantaea mente ar Sara hõ gidrạ hoyokʼ reakʼ umer do bạnukʼtaea, ar enrehõ uni do biswạsre nijor bae tahẽkana. 20Isorakʼ gokʼakʼre uniyakʼ monre tishõ jãhãn digdhạge baṅ hecʼ akawade tahẽkana, bickom pạtiạure arhõ keṭecʼe tahẽyente uni do Isore sarhaoede tahẽkana. 21Abraham do purạte noae pạtiạukʼkan tahẽkana je, Isor okaṭakʼe gokʼakawade ona purạu lạgitʼ daṛe do menakʼgetaea mente. 22Onate Abrahamakʼ biswạs do dhorom mente lekhayentaea. 23“Dhorom menteye lekhayena,” Noa katha do eken Abraham moto lạgitʼ do baṅ olakana, 24aboko lạgitʼ hõ olakana. Biswạs iạte Isor do abo hõ dhorom menteye lekha bona, ente aboren Probhu Jisu gocʼko khon okoeye jiwetʼ beretʼkede, abo do unirege bon pạtiạu akana. 25#Jes 53.4,5 Aboakʼ kạiko iạte Jisu do gujukʼ tireye soprotʼlena ar dhorom menteye ataṅ bon lạgitʼ uni do gocʼko khone jiwetʼ beretʼ ocoyena.
Obecnie wybrane:
Romiko lạgitʼ Pạul Apostolakʼ ciṭhi 4: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.
