Romiko lạgitʼ Pạul Apostolakʼ ciṭhi 13
13
Disạm cakʼlaoko manaoko reakʼ
1Sanamkoge disạm cakʼlaoko tabereko tahenma; ente Isor okoeye hoeocoye uni chaḍa ar okoe hõ ektiạrianicʼ do bae hoedaṛeakʼa. Isorge disạm cakʼlaokoe bahal akatʼkoa; 2Onate ektiạrianko upạrte okoeye teṅgon, uni do Isorakʼ ḍanṭaoakʼko upạrtegeye teṅgon kana. Ar okoeko nonkayetʼkan onko do akotege sạjạiko ạgujoṅ kana. 3Okoe bhageakʼko kạmikan onko do ektiạrianko ohoko botorlekoa, menkhan okoe bạṛicʼakʼko kạmikan onkogeko botorokʼa. Ape do ektiạrianko begor botorakote senokʼpe khojkana? Enḍekhan bhageakʼko kạmipe, inạ khan onko ṭhen khon sabasipe ńama. 4Apeakʼ bhage lạgitʼge uni do Isorren sapʼdapʼicʼ lekae kạmiya. Ar bạṛicʼakʼpe kạmikan khan botorokʼpe, ente bạṛicʼakʼ kạmikanko sạjạiko reakʼ ektiạri do uniyakʼ menakʼtaea. Uni doe Isorren sapʼdapʼicʼ kana; ar okoe bạṛicʼakʼko kạmikan onko do Isor lekateye sạjạikoa. 5Onate ektiạrianko tabere tahen do jạruṛgetapea. Isorakʼ sạjại botorte onkoakʼ gobolre tahenpe aṅgoceda ona do baṅ, apeakʼ bibek sapha dohoy lạgitʼ hõ onape onkayeda.
6 #
Mat 22.21; Mrk 12.17; Luk 20.25 Onatege ape do raj bhejape emetʼ kana, ente mạsul uṭhạuko do akoakʼ kạmi hotete Isorakʼko kạmikana. 7Okoeyakʼ oka bakhrakan uni do ona emkataepe. Khajna hataoicʼ do khajna; mạsul uṭhạuicʼ do mạsul; botorae lekicʼ do botor; ar manot emae lekicʼ do manot emaepe.
8Okoe ṭhen hõ jãhãnakʼge alope dharaoa, eken dulạṛ chaḍa. Okoe eṭakʼkoko dulạṛetʼko onko do Moseyakʼ ạngeko pańja akada. 9#Exo 20.14; Bib 5.18; Exo 20.13; Bib 5.17; Exo 20.15; Bib 5.19; Exo 20.17; Bib 5.21; Lev 19.18 Hukum menakʼa, “Alom laṭghaṭa, alom khũna; alom kombṛoya, alom lalocakʼa.” Noako ar noa lekan arhõ eṭakʼ hukumko do niạ katharege guṭ mitʼkate noage roṛakana, “Am aḍepaseren hoṛ do apnar lekam dulạṛea.” 10Dulạṛ do okoeyakʼ hõ bạṛicʼ bae khoja. Enḍekhan ńelokʼ kana dulạṛ hotetege sanamakʼ ạnko purạukʼ kana.
11Un ghạṛicʼ okań roṛketʼ, ńit reakʼ okteko bujhạukate onka leka calakʼpe. Jạpitʼ khon ebhenokʼ reakʼ okte hoyakana, ente abo tinre bon pạtiạulen, unkhon boroṅ ńitokʼge bańcao ńam reakʼ okte do artetʼ sorakana. 12Ńindạ do caba hecʼena, aṅgakʼ lạgidokʼ kana; onate dela, ńut reakʼ kạmi bạgikate marsal reakʼ khanḍa banḍa bon horokʼ joṅma. 13Rij roṅ ar ńu bulokʼte do baṅ, loṭghuṭi ar lucạ lamoṭte do baṅ, reṭha reṭhi ar hiskạte do baṅ, menkhan siń marsalre dãṛãnkanko leka jion bon khemao ma. 14Ape do kicricʼ leka Probhu Jisu Mạsi horokʼjoṅpe; ar jel reakʼ sana purạu lạgitʼ do alope moneyakʼa.
Obecnie wybrane:
Romiko lạgitʼ Pạul Apostolakʼ ciṭhi 13: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.
