Romiko lạgitʼ Pạul Apostolakʼ ciṭhi 14
14
Boehawakʼ dos alom sabtaea
1 #
Kol 2.16
Pạtiạure okoeye nijorge uni do ataṅ sãohãyepe; uniyakʼ hudis bundis joṅre uni tulucʼ alope reṭe peṭekʼa. 2Jãhãeye hudiskea uni do jotowakʼe jom daṛeakʼa, menkhan okoe pạtiạureye nijorge uni do eken aṛakʼ sakamgeye jomeda. 3Jel jojom hoṛ do jel baṅ jojomicʼ hoṛ aloe nisṛạuema ar jel jojomicʼ hõ jel baṅ jojomicʼakʼ dos aloe sabtaema, ente Isor do unkin bana hoṛgeye ataṅ sãohã akatʼkinạ. 4Am dom celekante, eṭakʼ hoṛren gutim bicạrede kana? Uni doe teṅgo ṭahraokʼa, seye ńurocokʼa, ona do uniren kisạ̃ṛgeye bujhạua. Menkhan uni doe teṅgo ṭahraokʼa, Probhu Isorge uni doe teṅgo ṭahrao ocoyea.
5Mitʼ hoṛ do mitʼ din eṭakʼ din khon sorose bujhạueda. Arhõ eṭakʼ hoṛ do joto dinge somangeye bujhạueda. Noa babotre okoe cetʼe cekae ar bae cekae, ona do monreye khạṭi joṅma. 6Din okoeye manaoetʼkan uni do Probhu Isor kusi ocoye lạgitʼgeye onkayeda. Ar okoe sanamakʼe jometʼkan uni do Probhu Isor kusi ocoye lạgitʼgeye jomeda, ente uni do Isore gunmanao joharae kana. Okoe sanamakʼ bae jometʼkan uni hõ Probhu Isor kusi ocoye lạgitʼge bae jomeda, ar uni hõ Isore gun manao joharae kana. 7Aboko modre okoe hõ apnar lạgitʼ jiwetʼ babon tahenkana ar apnar lạgitʼ okoe hõ babon gujukʼ kana. 8Abo jiwetʼ bon tahen khan abo do Probhu lạgitʼge jiwetʼ bon tahenkana, ar bon gujukʼkan khan Probhu lạgitʼge bon gujukʼkana. Enḍekhan jiwetʼ bon tahen se bon gujukʼ, abo do Probhu Isorren kangea bon.
9Mạsi doe gocʼlena are jiwetʼ beretʼena jemon uni do jiwetʼko ar gocʼkoren Probhui hoydaṛeakʼ. 10#2 Kor 5.10 Enḍekhan cedakʼ am do amren boehamakʼ dosem sapʼeda? Ar cedakʼ amren boeha dom nihạ̃t edekana? Bicạr lạgitʼ ma sanamkoge coṅ Isor samaṅre teṅgokʼ hoyokʼ tabon. 11#Jes 45.23 (LXX) Sonot sostorre olakana,
“Probhu Isore meneda, ‘ińiń jiwetʼge iạte
mitʼke mitʼ gunṭhi do iń samaṅre ikhṛumokʼa,
ar mitʼke mitʼ alaṅ do Isore sarhaoea.’ ”
12Enḍekhan ńelokʼ kana, abo mimitʼ hoṛ do apnar reaṅ lekha jokha Isor emae hoyokʼ tabona.
Boeha kại horte alom idiyea
13Onate abo do mimitʼ hoṛakʼ dosko alo bon sabtakoma, ar nonkanakʼ alo bon kạmima one ona ńelte jãhãe boeha monreye tạkijokʼ se kạireye ńur botecʼkokʼ. 14Probhu Jisu tulucʼ bon kolom mitʼ akante iń do bes okocʼteń baḍaea je, okaṭakʼ jomakʼ hõ besaphawakʼ do baṅkana, menkhan jãhãe jãhãn jomakʼ besaphagea menteye hudisetʼ khan enḍekhan uni lạgitʼ ona jomakʼ do besaphagea. 15Jãhãn jomakʼ iạte amren boeham duk ocoyedekan khan am do bam dulạṛede kana. Okoe lạgitʼ Mạsiye gocʼlen, jomakʼ karonte uni do alom nasao ocoyea. 16Apeakʼ bhageakʼ do okoe hõ alo jemonko neṅghaotape. 17Isorakʼ rajre jom ar ńũ do maraṅakʼ do baṅkana; maraṅ katha do hoyokʼkana, dhorom ar suluk ar rạskạge Sonot Jiure tahen. 18Okoe nonkate Mạsi ṭhen golame khaṭaokʼkan, Isor do unireye kusikʼkana ar hoṛko hõ uni do bhageko metaekana.
19Onate okaṭakʼ kạmile khan suluk hoyokʼ ar okaṭakʼte sanamko bon gopoṛo daṛeakʼ, ona reakʼ bon kurumuṭuima. 20Jãhãn jomakʼ khạtirte Isorakʼ kạmiko do alope nosṭoea. Joto jomakʼge sonotgea, menkhan jãhãe jãhãnakʼ jomte eṭagicʼakʼ monre tạkicʼakʼe janam ocoyetʼ khan uni lạgitʼ ona jom do baṅ ṭhika. 21Jel jom, se darkha rasa ńũi se nonkanakʼ kạmi lek do baṅkana one okaṭakʼte amren boehae tạkicʼ botecʼkokʼ. 22Noa reaṅ am okaṭakʼ bhage mentem pạtiạukʼkan ona do Isor ar am talarege dohoyme. Ar bhageakʼ menkate jãhãnakʼ kạmi jokhecʼ jãhãeakʼ bibek hõ uni bako dusiye khan enḍekhan uni doe bhạgangea. 23Menkhan jãhãe digdhạkate jãhãnakʼe jom khan enḍekhan uni do dusiye hoyokʼa, ente uni do acʼakʼ biswạs leka bae kạmiyeda. Ente biswạs upạrte jãhãnakʼ kạmige kại kana.
Obecnie wybrane:
Romiko lạgitʼ Pạul Apostolakʼ ciṭhi 14: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.
