Romiko lạgitʼ Pạul Apostolakʼ ciṭhi 12
12
Isor lạgitʼ Jion khemao
1Enḍekhan E boehako, Isorakʼ noako daya iạtege iń do asokaeteń nehõrape kana, apeakʼ hoṛmo do jiwetʼ, sonot ar Isore kusiyakʼ dãṛẽ menkate uni ṭhen samaṅtape. Ar onage apeakʼ lek reakʼ sewa do hoyokʼa. 2Noa bạṛicʼ piṛhirenko leka do alope colona, bickom Isorge apeakʼ mon nãwãte tear ocowaepe ar purạte nãwã arokʼpe, jemon Isorakʼ monejoṅakʼpe baḍae daṛeakʼ. Isorakʼ monejoṅakʼko do bhagegea, ar purạ khạṭigea ar onate Isor doe kusikʼkana.
3Iń do Isor ṭhen khon oka dayań ńamakatʼ onate ape mimitʼkoń metapekana, apnar reaṅ okaṭakʼ lek kan ona khon bạ̃ṛti do alope hudisokʼa, bickom tinạkʼ lek mentepe bujhạukʼkan inạkʼge hudisokʼpe. Isor do okoe tinạkʼgan pạtiạukʼ reakʼ daṛeye emakawade ona khon bạ̃ṛti do okoe hõ jemon apnarte aloe hudisokʼma. 4#1 Kor 12.12 Abo mimitʼkoakʼ hoṛmore do aema hạṭińko menakʼa, menkhan joto hạṭińko do mitʼ leka bae kạmiya; 5ṭhik onkage abo do lekhare bon ḍhergere hõ Mạsire bon mitʼ akante mitʼ hoṛmoge bon hoyakana. Ar abo mimitʼko do eṭakʼkoakʼ hoṛmo hạṭińko kana bon. 6#1 Kor 12.4-11 Isorakʼ daya lekate abo do judạ judạ daya dan bon ńamakada. Ar ona daya dan do nạbi lekate katha roṛ reakʼ daṛe menakʼ khan enḍekhan biwạs lekate uni do Isorakʼ kathae lạima. 7Ar sapʼ dapʼ reakʼ daṛe hoyokʼ khan enḍekhan uni do sapʼ dapʼ giriye kạmi ma. Okoe cecetʼakʼ emokʼ reakʼ daṛeye ńamakatʼ uni doe cetʼakoma; 8okoe sikhạu paṛhao reakʼ daṛeye ńamakatʼ uni doe sikhạu paṛhaokoma; okoe eṭakʼko danako reakʼ daṛeye ńamakatʼ, uni do soṛa monteye emokʼma; okoe mukhiyạ hoyokʼ reakʼ daṛeye ńamakatʼ uni do jidkateye calaoma; ar okoe eṭakʼko goṛowako lạgitʼ daṛeye ńamakatʼ uni do kharsala monteye goṛowakoma.
Mạsire pạtiạu akankoakʼ jion
9Dulạṛre phạsiạra do alo tahenma. Okaṭakʼ bạṛicʼakʼkan ona do hirkhạwakʼpe; ar bhageakʼre jamaṛ akae tahenpe. 10Ape ape talare boeha leka dupulạṛpe. Ar apnar khon eṭakʼko bạ̃ṛti manotkope. 11Probhu Isor secʼ jao ghuṛi apeakʼ mon ahkaokʼtape ma. Apeakʼ ontor do bhoktite perecʼ tahen ma. Ar Probhu Isorakʼ kạmire lạgiyạ paṛao akan tahenpe. 12Apeakʼ okaṭakʼ as menakʼ, ona iạte rạskạkʼpe. Harkhet sasetre soboripe. Koejoṅre jamaṛ akan tahenpe. 13Isorren hoṛko reṅgejokʼ oktere goṛowakope. Ar peṛakʼ gun dohojoṅpe.
14 #
Mat 5.44; Luk 6.28 Okoeko khedetʼpe onko do alope sarapakoa bickom bhorakope. 15Okoeko rạskạkʼkan onko tulucʼ rạskạkʼpe; ar rakʼ joṅko tulucʼ do rakʼjoṅpe. 16#Kạh 3.7 Ape apere mitʼ mon tahentape ma. Usulakʼko do alope moneyakʼa bickom nindhạnko tulucʼ helmelokʼpe. Ar apnarte budanko mente do alope hudisokʼa.
17Bạṛicʼ bodol bạṛicʼ okoe hõ alope halawakoa. Sanam hoṛkoakʼ mẽtʼre okaṭakʼ bhageakʼkan ona reaṅ moneyakʼpe. 18Daṛeakʼ bhor sanam hoṛko sãote sulukte tahenpe. 19#Bib 32.35 Dulạṛiạ boehako, okoehõ alope hala ruạṛakoa, bickom Isorge sạjại lạgitʼ aṛakʼaepe. Sonot sostorre Probhu Isore meneda, “Hala ruạṛ reakʼ ektiạri do eken ińakʼge menakʼtińạ; ar ińgeń hala ruạṛa.” 20#Kạh 25.21,22 (LXX) Sostor reakʼ katha leka, “Amren bạiri reṅgecʼlere jomakʼ emaeme; ar tetaṅlere ńũiyakʼ emaeme. Entem nonkale khan am do uniyakʼ bohokʼre seṅgel aṅgram puńjiaea.” 21Bạṛicʼakʼte alom bhagao ocokʼa, bickom bhageakʼte bạṛicʼakʼ bhagaome.
Obecnie wybrane:
Romiko lạgitʼ Pạul Apostolakʼ ciṭhi 12: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.
