Romiko lạgitʼ Pạul Apostolakʼ ciṭhi 11
11
Israel jạtrenko cetanre Isorakʼ daya
1 #
Php 3.5
Adoń meneda, Isor do cetʼ acʼren hoṛkoe giḍisaeketʼ koa? Tisge baṅa. Ente iń hõ mitʼṭen Israel hoṛ kangeạń, Abraham bõsren ar Benjamin gusṭirenge. 2Isor do acʼren okoeko hoṛ laha khongeye bachao akatʼko tahẽkan onko do bae dea giḍiletʼkoa. Se bape baḍaea, sonot sostorre Eliạ nạbi reakʼ cetʼe meneda mente? Uni do Isor ṭhen Israel upạrteye roṛleda, 3#1 Raj 19.10,14 “E Probhu Isor, noko do amren nạbikoko gocʼ akatʼkoa ar amakʼ pinḍko rạputʼ giḍiakada. Eken iń eskarge sarecʼ minạńa, ar iń hõ gojeń reakʼko kurumuṭu kana.” 4#1 Raj 19.18 Menkhan Isor do Eliạ cetʼe roṛ ruạṛe emade tahẽkana? Uniye metade tahẽkana, “Eae hajar herel hoponkoń sarecʼ doho akawana, one onko do Bakʼal-deb ṭhen bako ikhṛum akan.” 5Isor do onkage ńit hõ Israelkoe daya akokanteye bachao doho akatʼkoa. 6Isor do dayategeye bachao dohoakatʼko khan, enḍekhan ona do jãhãn kạmi reakʼ jo do baṅkana. Ar onkage hoylen khan daya do daya mente baṅ tahẽkokʼa.
7Enḍekhan bujhạukʼ kana, Israelko okaṭakʼ ńam reakʼko kurumuṭuyetʼ tahẽkan ona do bako ńamleda, menkhan Isor okoekoe bachao doho akawan tahẽkan onkoge ona doko ńamakada, ar eṭakʼkoakʼ mon do dhiri leka keṭecʼ akantakoa. 8#Bib 29.4; Jes 29.10 Sonot sostorre olakana, “Isor do onkoakʼ ontor nonkae goṛdhoketʼ takoa, teheń hạbicʼ onko do ńeńel tulucʼ bako ńeńel kana ar luturte ańjom tulucʼ bako ańjomeda.” 9#Ser 69.22,23 (LXX) Dạud raj hõe menleda,
onkoakʼ jojom ar ńũńũakʼ do
pạsi ar jhampa leka hoyokʼ ma;
ona do jemon onkoakʼ tạkicʼakʼ hoyokʼtako,
ar oka kuṛại menakʼtako onage jemonko ńam.
10Onkoakʼ mẽtʼ do kãṛãkʼtako ma
jemon aloko ńeńel,
ar onkoakʼ dea do jaejug kubjạ akan tahentako ma.
11Enḍekhan Jihudikoko tohotʼente cetʼ jaejug hạbicʼko gurena? Ekalte baṅa, bickom onkoakʼ kại gunạkʼtege boṅgan hoṛ jạtrenko do bańcaokʼ lạgitʼ ạtko ńamkeda jemon Jihudiko gagoj hecʼako. 12Enḍekhan ńelokʼ kana, Jihudikoakʼ kại gunạkʼte dhạrtiren hoṛkoakʼ ḍher lab hoyakana, ar onkoakʼ loksan iạte boṅgan hoṛ jạtrenko do Isorakʼ bhorko ńamkeda. Onate Jihudiko cetanre Isorakʼ purạ bhor hijukʼre boṅgan hoṛ jạtrenko hõ artetʼ bạ̃ṛti bhor hecʼakoa!
Boṅgan hoṛkoakʼ bańcaokʼ reaṅ
13E boṅgan hoṛ jạtrenko, metape kạnạń, boṅgan hoṛ jạtrenko ṭhen apostol lekate ińakʼ kạmiko do ạḍi manot salakʼ iń ńeleda. 14Ar nonkate jemon apnar jạtren hoṛkoń gagoj ocokote onko mod khon thoṛa hoṛ iń bańcao daṛeako. 15Isor do Jihudiko bae bạsutako khan ar onkoakʼ giḍi ocokʼ do dhạrtirenkoakʼ samgeakʼkan khan enḍekhan Jihudikoe ataṅlekore do cetʼ hoyokʼa? Ona do cetʼ gocʼko jionko ńamakatʼ leka do baṅa? 16Sipiyakʼ holoṅ khon pạhil benaoakʼ piṭhạge sonotge khan enḍekhan ma sanam sipiyakʼ holoṅ hõ sonotge. Jạitun dare reakʼ rehetʼge sonotge khan ḍạrko hõ sonotgea.
17Jodi ona jạitun dare reakʼ adom ḍạrko rạputʼ giḍikate onare am lekan bir jạitun dare reakʼ ḍạrko kolom mitʼlen khan am do asol jạitun dare reakʼ rehetʼ khon ros hatao joṅme, 18ar rạputʼ giḍiakatʼ ḍạrko khon apnar do maraṅ alom hudisokʼa. Arem hudisokʼkan khan enḍekhan disạime, rehetʼ do bam sapʼ ṭahraoetʼ kana bickom rehetʼge am doe sapʼ ṭahraoetʼmea.
19Am dom men botecʼkea, “Ińiń kolom mitʼ ocokʼ iạtege ḍạrko do rạputʼ giḍi ocoakana.” 20Bhagegea. Menkhan onkoko rạputʼ giḍi ocoakana onkoakʼ bepạtiạu iạte ar am dom kolom mitʼ akana amakʼ pạtiạu iạte. Onate alom usul monokʼa bickom botorokʼme, 21ente Isor do asol ḍạrkoge bae mãyãwakʼ kan khan enḍekhan am hõ ohoe mãyãlema.
22Onate Isor do tinạkʼ dayakʼicʼ ar tinạkʼ ajhãṭicʼ kanae ona baṛe hudisme. Okoeko ńurhạ akan onko lạgitʼ doe ajhãṭena, menkhan am lạgitʼ do dayawạnicʼge, khạjuk uniyakʼ daya latarrem tahen. Ar baṅ khan am hom makʼ giḍi ocokʼa. 23Onko do bepạtiạu khonko ạcur ruạṛlen khan enḍekhan akoakʼ dare sãote arhõko kolom mitʼ ocokʼa, ente noa kolom mitʼ reakʼ kạmi do Isorgeye daṛeakʼa. 24Am do mitʼṭecʼ bir jạitun dare reakʼ ḍạrem tahẽkana, ar ona dare khonem makʼ ạgu ocoyente bagwan reakʼ jạitun darerem kolom mitʼ ocoakana. Enḍekhan okoe ona dareren asol ḍạrkoko tahẽkan, onko do tinạkʼ algatege arhõ akoakʼ darereko kolom mitʼ ocokʼa!
Sanamko cetanre Isorakʼ daya
25E boehako, apnarte jemon budanko alope monejoṅ onate iń do mitʼṭecʼ sạri okowakʼ baḍae ocopeń menjoṅ kana. Ona sạriyakʼ do noage, boṅgan hoṛ jạtrenkoakʼ lekha ạuri purạukʼ hạbicʼ ḍher bhag Israelkoakʼ ontor do keṭecʼge tahena. 26#Jes 59.20,21 (LXX) Nonkate joto Israelko do bańcaoko ńama. Sonot sostorre olakana;
Sion khon babańcaoicʼe hijukʼa;
uni do Jakob bõsren hoṛko tala khon,
bedhoromkoe ocokʼ giḍiya.
27 #
Jes 27.9 (LXX) Iń do tinre onkoakʼ kạikoń meṭao giḍiytakoa unre onko tulucʼ noage ińakʼ bondobos do hoyokʼa.
28Bhage sombat secʼte apeakʼ bhạlại lạgitʼge onko do ńitokʼ Isorren bạiri kanako. Menkhan Isorakʼ bachao lekate onko do hapṛamko iạte Isorren dulạṛiạko kanako. 29Isor okae dan ar okoeye hohowae ona babotre acʼakʼ mon do bae bodoltaea. 30Mitʼ jokhecʼ ape do Isorakʼ bebataorepe tahẽkana, menkhan ńitokʼ do Jihudikoakʼ bebatao iạte Isorakʼ dayape ńamakada, 31ar onkaleka mãyãpe ńamakatʼte onko hõ ńitokʼ bebataokoko hoyakana jemonko mãyã ocokʼ. 32Isor jemon sanamkoe mãyãwako onate uni do sanamkoge bebataoreye aṭok dohoakatʼkoa.
33 #
Jes 55.8
Isorakʼ dhon do asambheṛgea. Uniyakʼ bud ar akel hõ khạndrińgea. Uniyakʼ bicạr ar sanam kạmiko do oho ḍunḍhạulena. 34#Jes 40.13 (LXX) Probhu Isorakʼ mon do okoe haleye baḍaeakada? Ar okoe baṅ uniren sosolhayicʼe hoyakan? 35#Job 41.11 Isor upạrte okoeyakʼ baṅ dạbiteakʼ menakʼtae, onate uniyakʼ dạbi do manao hoyokʼtaea mente? 36#1 Kor 8.6 Ente jotowakʼge coṅ uni khon ar uni hotetege hijukʼkan ar sanamakʼ do uni lạgitʼ kangea. Uniyakʼge jaejug ṭhonok hoyokʼtae ma. Amen.
Obecnie wybrane:
Romiko lạgitʼ Pạul Apostolakʼ ciṭhi 11: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.
