Romiko lạgitʼ Pạul Apostolakʼ ciṭhi 10
10
1E boehako, Israelko lạgitʼ ińakʼ ontor reakʼ sana ar Isor ṭhen ińakʼ koejoṅ do noage, onko jemon kại khon bańcaoko ńam. 2Onko reaṅ do noa gohań emokʼ kana je, onko do Isor lạgitʼ ahkaokʼ mon menakʼgetakoa, menkhan Isor ṭhen cetʼ lekateko ataṅ ocokʼa ona do bako baḍaea. 3Isor do manwako cetʼ lekate dhorom menteye ataṅkoa ona katha luturakʼ baṅkate onko do akoakʼ kurumuṭute dhorom udugokʼko menjoṅkan tahẽkana. Onatege Isor okaṭakʼ ponthate manwa dhorom menteye aṅgoce ona do bako manaoleda. 4Mạsige ạnkoe purạuketʼte ona reakʼ daṛe doe mạutạkeda, jemon acʼre okoeko pạtiạukʼ onko do Isor ṭhen dhorom menteko ataṅ ocokʼ.
Bańcaokʼ do sanamko lạgitʼge
5 #
Lev 18.5
Ạn-ạriko pańjaete dhorom ocokʼ babotre Moseye olakada, “Okoe hoṛ ạn-ạriko reakʼ katha lekae calakʼkan uni do ona hotetege jiwetʼe tahena.” 6#Bib 30.12-14 Menkhan biswạs hotete manwa do Isor ṭhen cetʼlekate dhorom menteye ataṅokʼa ona reaṅ sonot sostorreye menakada, “Mon monte noa do alom mena, ‘sermate do okoeye dejokʼa?’ ” Metakʼme, serma khon Mạsi pheḍ ạguiye lạgitʼ okoe sermate doe dejokʼa? 7“Se alom mena, ‘patalte gocʼko ṭhen do okoeye pheḍokʼa?’ ” Metakʼme gocʼko khon Mạsi rakapʼ ạguiye lạgitʼ patalte do okoeye pheḍokʼa? 8Isor ṭhen dhorom mente ataṅokʼ reaṅ sostorre arhõe meneda, “Isor okae menakatʼ ona do am sãorege menakʼa, metakʼme amakʼ moca ar amakʼ ontorre menakʼa.” Okaṭakʼ biswạs reakʼ katha bon porcaretʼkan ona do Isorakʼ katha kangea. 9Ona katha do hoyokʼ kana, Jisu do Probhu Isor kanae mente amakʼ mocatem aṅgoce ar ontortem pạtiạukʼ baṅma, Isor do gocʼko khone jiwetʼ beretʼ akadea enḍekhan am do kại khon bańcaoem ńama; 10ente ontorre biswạs iạte Isor do manwa dhorom menteye lekhayea ar mocateye aṅgocetʼkante kại khone bańcaoea. 11#Jes 28.16 (LXX) Sonot sostorreye meneda, “Jãhãege unireye pạtiạukʼ uni do bae lajao ocokʼa.” 12Jihudi ar boṅgan hoṛ jạtrenko talare jãhãn begar do bạnukʼa, ente sanamkorenge ini mitʼ Probhu Isor kanae. Okoe acʼko hohowaekan onkore uni do asambheṛ bhor dane dul akokana. 13#Joe 2.32 Sonot sostorre menakʼa, “Bańcao ńam lạgitʼ jãhãege Probhu Isore hohowae uni do bańcaoe ńama.”
14Menkhan okoere bako biswạs akan uni do cekateko hohoaea? Okoe reaṅ bako ańjomakatʼ unire cekateko pạtiạukʼa? Ar poporcaricʼ bae tahen khan onko do cekateko ańjoma? 15#Jes 52.7 Ona chaḍa jãhãe bako kol ocolen khan cekate poporcarko doko porcara? Sonot sostorre ol akana, “Bhạgangea onkoakʼ jaṅgako okoe do bhage sombat porcar lạgitʼko hijukʼkan.” 16#Jes 53.1 (LXX) Menkhan sanamko ona bhage sombat do bako luturada. Jesaea nạbiye menakada, “E Probhu Isor, alele porcarakatʼ bhage sombat do okoeye pạtiạuada?” 17Enḍekhan ńelokʼkana, Isorakʼ katha ańjom iạtege biswạs do hijukʼkana, ar Mạsi reaṅ do porcar talate ańjomokʼ kana.
18 #
Ser 19.4 (LXX) Menkhan ińiń mena, Israelko do cetʼ ona katha bako ańjom ńamleda? Khạṭigeko ańjom akada. Sonot sostore meneda,
Onkoakʼ aṛaṅ do goṭa dhạrtire ḍamḍahe akana,
ar kathako hõ pasnao akana
dhạrti reakʼ mucạtʼ hạbicʼge.
19 #
Bib 32.21
Iń do arhõń mena, Israelko do cetʼ ona katha bako bujhạu daṛeada? Pạhilre Moseye menakada,
“Okoe do jãhãn jạtrengeko baṅkan,
onko jạtrenko hotetege iń doń ãṭ ocopea;
ar mitʼṭen bebuj jạtrenko hotete apeakʼ pitiń caṛhao ocoytapea.”
20 #
Jes 65.1 (LXX) Ona tayom Jesaea do arhõ murukteye menakada, “Onko ṭhengeń tahẽkana, menkhan jãhãn goṛo ńam lạgitʼ iń ṭhen do bako hecʼlena. Iń do onko hoṛko nehõrokʼ lạgitʼ ạtiń ematʼko tahẽkana, menkhan iń ṭhen do cetʼge bako arojlakʼa.” 21#Jes 65.2 (LXX) Menkhan Israelko reaṅ doe meneda, “Bebatao ar ṭenḍosokʼ hoṛko secʼ ińakʼ ti do goṭa dingeń tiyạr akada.”
Obecnie wybrane:
Romiko lạgitʼ Pạul Apostolakʼ ciṭhi 10: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.
