1 Korinthiko 4
4
Mạsiren Apostolko
1Hoṛ do nonka lekako bujhạule ma, ale do Mạsiren sapʼdapʼko kanale ar Isorakʼ sạri okoakʼko baḍae ocoko reakʼ bhar do alerege emakana. 2Ar okoere bhar emakan onko do udugokʼ hoyokʼtakoa je, pạtiạranko kanako mente. 3Ińakʼ bicạr do apege bicạrpe baṅ do bạisiren hoṛko hotete hoyokʼ, onate ińakʼ do jãhãnakʼ cetʼge baṅ cekakʼtińạ; metakʼme iń hõ apnarte do bạń bicạrokʼ kana. 4Ińakʼ bibek do saphagea, menkhan onate noa do baṅ sạbudokʼ kana, iń doń dhoromgea. Probhu Isorge ińakʼe bicạrtińạ. 5Onate Probhu Isore hijukʼ lahare, metakʼme ona niṭ akan din lahare okaṭakʼ hõ alope bicạra. Ńutre oka okoge menakʼ uni do unre ona marsalteye ạguya ar manwa ontor reakʼ okoakʼ monsubạkoe sodora. Unre mimitʼ hoṛ do Isor ṭhen khon sarhaoko ńama.
6E boehako, apeakʼ porho lạgitʼge iń do ińakʼ ar Apollossakʼ kathakoń roṛeda, jemon ạliń ṭhen khonpe cetʼ daṛeakʼ baṅma, oka olakan ona bahre calakʼ do baṅ ṭhika mente. Enḍekhan ape do mitʼ hoṛ bạgikate eṭagicʼ upạrte bape gorbokʼa. 7Am do eṭakʼko khonem begargea mente okoe hõ bako monejoṅ kana. Nonkanakʼ cetʼ menakʼtama one okaṭakʼ do dan lekate bam ńamakatʼ? Arem ńamakatʼ khan cedakʼ begor ńamicʼ leka dom sarhaokʼ kana?
8Ape ńelte ńelokʼ kana ape do laharege jotowakʼpe ńam akada, ar laharegepe kisạ̃ṛ akana, ar ale begortegepe raj akana. Arpe rajlen khan do bhagege hoykokʼa; enḍekhan ale hõ ape tulucʼle raj daṛekokʼa. 9Ińakʼ bujre Isor do ale apostolko ses utạrko menkateye udukʼ akatʼlea, gocʼ ocokʼ lạgitʼ ṭarhao akanko lekage. Ale do goṭa dhạrtirenko ṭhen, metakʼme sermaren goḍetko ar manwako ṭhen tamasa lekale hoyakana. 10Ale do Mạsi iạte lelhale hoyakana, menkhan ape do Mạsirepe mitʼakante budankope hoyakana. Ale do nijorkoge menkhan ape do joranko. Ape do sabasiankope hoyakana ar ale do bemanotkoge. 11Ale do ńit hạbicʼ hõ reṅgecʼ ar tetaṅtele loraokʼ kana. Ale do reṅgecʼ arle laṅgaṭgea, kilạu ocokʼ kanale ar aleakʼ oṛakʼ duạr do bạnukʼtalea; 12#Apos 18.3 ale do nij titele kạmikana arle khaṭaokʼ kana; ar hoṛkoko ruhetʼetʼlere hõ onko dole bhorako kana, arle khed ocokʼkanre hõ ale dole sahaoetʼ kana; 13arko bodnametʼlere hõ mạ̃hir seletʼle roṛ ruạṛako kana; ar ńit hạbicʼ hõ dhạrti reakʼ mạilạ ar sanamko reakʼ jobra lekagele hoyakana.
14Lajao ocope lạgitʼ do bạń oletʼ kana, bickom ińren dulạṛiạ gidrạko leka sontorpe lạgitʼgeń oleda. 15Mạsi reaṅ cetʼape lạgitʼ aperen do gel hajar gurukoko tahẽdaṛeakʼa; menkhan aema baba do bạnukʼkotapea; ińge bhage sombat hotete Mạsiyakʼ jionre aperen Babań hoyakana. 16#1 Kor 11.1; Php 3.17 Onateń nehõrape kana, iń okakoń cekae, ape hõ onako onkaepe; 17onate ape ṭhen Timothiń kolkedea; uni do Probhu Isorre ińren dulạṛiạ ar pạtiạr gidrạ kanae. Uni do Jisu Mạsire ińakʼ cạl-colonkoe disạ ocopea. Iń do nonkage sanam jaega ar mimitʼ manḍerkore onako reaṅiń cetʼako kana.
18Ape ṭhen bạń calakʼkante adom adomko do demagteko phulạu akana. 19Menkhan Probhu Isorakʼ sana hoylen khan ạḍi usạrage ape ṭheniń hijukʼa, ar onko phulạu akankoakʼ katha do baṅ, menkhan onkoakʼ daṛe hõ ńel lạgitʼgeń hijukʼa. 20Ente Isorakʼ raj do katha reakʼ do baṅkana, bickom daṛeteakʼge. Cetʼpe ńamkana? 21Ṭhengawante ape ṭheniń hijukʼa, se dulạṛ ar mạ̃hir monante?
Obecnie wybrane:
1 Korinthiko 4: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.