1 Korinthiko 3
3
Isorren gutiko
1E boehako, jiutenko ṭhen cetʼleka katha roroṛ hoyokʼ, onka do bạń galmarao daṛeakatʼpea, menkhan jel gobolrenko ṭhen cetʼleka roroṛ lek kan onkageń galmarao akatʼpea. Mạsire ape do bale gidrạko leka kanape, onate onkageń galmarao akatʼpea. 2#Ibr 5.12,13 Iń do keṭecʼ jomakʼ bạń ematʼpea, bickom toageń ńũatʼpea, ente unre ona keṭecʼ jomakʼ hajam lạgitʼ daṛe do baṅ tahẽkantapea. Ar ńit hõ ape do onkage menakʼpea, 3ente ńit hõ jel gobolrege menakʼpea. Ape talare hiskạ ar reṭha reṭhiko menakʼ khan enḍekhan cetʼ jelrenko dope baṅkana? Manwako leka do cetʼ bape coloneda? 4#1 Kor 1.12 Ape modre mitʼ hoṛ do Pạulren, ar mitʼ hoṛ do Apollossrene menetʼ khan enḍekhan unre cetʼ manwako leka dope baṅkana?
5Apolloss doe celekana? Ar Pạul baṅe celekan? Unkin makin sapʼ dapʼkin kan, one unkin hotetepe pạtiạu akan, ar Probhu Isorge mimitʼ hoṛ apan ạpin kạmiye em akawatʼkinạ. 6#Apos 18.4-11; Apos 18.24-28 Iń doń rohoekeda, ar Apolloss do dakʼe emada, menkhan Isor do onae hara ocokeda. 7Onate rohoeyicʼ hõ cele hoẽ baṅkana ar dakʼ emakʼicʼ hõ baṅ, menkhan okoeye hara ocoyetʼ uni do Isorge. 8Rohoeyicʼ ar dakʼe emokʼicʼ unkinakʼ monsubạ do mitʼgea, menkhan unkin do apan ạpin kạmi leka kuṛạikin ńama, 9ente ale do Isor tulucʼle kạmikana. Ar ape do Isorakʼ goḍa kanape, Isorakʼ benao akan oṛakʼge.
10Isor ṭhen khon oka dayań ńamakatʼ ona hotetege iń do gạkhuṛ kạrigol leka rehetʼ iń bạisạu akada, ar eṭakʼko do ona cetanre oṛakʼko benaoeda. Menkhan okoe okalekae benaoetʼkan ona reaṅ uni doe sontorokʼma. 11Okaṭakʼ rehetʼ do lahare bạisạu akan ona chaḍa ar jãhãn rehetʼ do okoe hõ bako bạisạu daṛeakʼa. Jisu Mạsigeye hoyokʼ kana ona reakʼ rehetʼ do. 12Ona rehetʼ cetanre sona, rupạ, damanakʼ dhiri, kaṭ, ghãs, lanḍha se busupʼ reakʼakʼe benao rakab, 13enḍekhan okoe oka lekae kạmi akatʼ ona do mońjte ńelokʼtaea. Ar bicạr dinre sodorokʼa, ente ona din reakʼ sodorokʼ do seṅgel talatege hoyokʼa. Ar okoeyakʼ kạmi oka lekan ona do seṅgelgeye biḍạu aṭkara. 14Okoe okaṭakʼe benao akatʼ onage ṭikạu tahentae khan enḍekhan uni do kuṛạiye ńama; 15ar ona kạmiyakʼ atar giḍilentae khan enḍekhan uni do lokshan hoyokʼtaea. Acʼtetʼ doe bańcaokʼa, menkhan uniyakʼ dosa do nonkan hoṛleka hoyokʼtaea one okoe do seṅgel talateye parom hecʼakan.
16 #
1 Kor 6.19; 2 Kor 6.16 Ape do cetʼ bape baḍaea, ape do Isorakʼ mundil kanape ar Isorren Jiu do apeakʼ ontorreye girobasokʼ kana mente? 17Jãhãege Isorakʼ mundile bạṛij enḍekhan Isor hõ uniye bạṛijea, ente uniyakʼ mundil do sonotgea, ar ona mundil dope ape kangea.
18Okoe hõ apnarte aloe bulạukʼ ma. Ape modren jãhãe niạ jugren akelanicʼ menteye hudisokʼkan khan, enḍekhan uni do lelhayicʼ lekae hoyokʼma, jemon sạri akelanicʼe hoydaṛeakʼ, 19#Job 5.13 ente Isor samaṅre noa dhạrti reakʼ akel do eken lelhawakʼ kana. Sonot sostorre ol menakʼa, “Isor do akelanko akoakʼ seantetʼreye sapʼetʼkoa.” 20#Ser 94.11 Arhõ olakana, “Probhu Isor doe baḍaegea, ạkilankoakʼ sanam hudis bundisko do ạuṛiyakʼgetakoa mente.” 21Onate okoe hõ jãhãe manwa iạte alope sarhaokʼa, ente jotoge coṅ apeakʼkan; 22baṅ do Pạul, baṅ do Apolloss, baṅ do Kephas, baṅ do dhạrti, baṅ do jion, baṅ do moron, baṅ do ńit menakʼakʼko, ar baṅ do tayom daramakʼko, onako sanamakʼge apeakʼkana; 23ar ape do Mạsiren, ar Mạsi do Isorren kanae.
Obecnie wybrane:
1 Korinthiko 3: SBT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Santali Bible © Bangladesh Bible Society, 2021.