मर्कुस् 1
1
बप्तीस्मा पीन्बे युहन्नाइ प्रचार
(मत्ती ३:१-१२; लुका ३:१-१८; युहन्ना १:१९-२८)
1पर्मेस्वर्की ज येसु ख्रीस्ट्की बारेरी ज्यबे सम्तर् चोले तीप्प तब। 2यसैया अगम्बक्तइ छ्येरी पर्मेस्वर्चे सुङ्बल चोले ब्रीबल मुब,
“च्यागो, ङ ङइ चवत एइ ङोन्ग्यम् पीत्स्ये मुब।
थेचे एइ ग्यम् तयार स्य्हेङ्स्ये मुब। #मलाकी ३:१
3उजाड-ग्लारी म्ही गीःचे केत् ङ्हच्छ्यङ् तेत्ज्यीम् चोले पङ्टीब मुब,
‘परमप्रभुइ ग्यम् तयार स्य्हेङो,
थेङ् ब्रबे ग्यम् तङ्-तङ् स्य्हेङो!’” #यसैया ४०:३
4ओसेम् बप्तीस्मा पीन्बे युहन्ना उजाड-ग्लारी खज्यीम् म्हीमात, “एङ्यीमाचे पस्चताप स्य्हेङ्ज्यीम् बप्तीस्मा कीनो। ओसेम् पर्मेस्वर्चे एङ्यीमाकी पापमा क्षमा न्हङ्स्ये मुब” बी प्रचार स्य्हेङ्ज्यी। 5यहुदीया प्रदेस्की य्हक्को ग्लामाचे ओसेम् यरुसलेम सहर्की य्हक्को म्हीमा युहन्नाज खज्यी। ओसेम् थेङ्यीमाचे र्हङ्-र्हङ्की पाप स्वीकार स्य्हेङ्ज्यीम् युहन्ना ग्यम्चे यर्दन गेन्दीरी बप्तीस्मा कीन्ज्यी। 6युहन्नाचे ऊँटकी पेइचे राबे येन् येन्ज्यीम् केप्परी डीइ पेटी खीःब मुबल। ओसेम् थेचे तीरीतेङ् र्हीइ सीङ्सुरकी खुदु चब मुबल।#२ ग्यल्बो १:८ 7युहन्नाचे चोले प्रचार स्य्हेङ्ज्यी, “ङइ लीप्चे ङ बीम ङ्हच्छ्यङ् गी ब्योन्खटीब मुब। ङ थेङ्की पनेइ तन फ्रेन्बरीएनो जेःबल अरे। 8ङचे एङ्यीमात कीचे बप्तीस्मा पीन्ब। तर थेङ्चेम् एङ्यीमात पबीत्र आत्माचे बप्तीस्मा न्हङ्स्ये मुब।”
येसुचे बप्तीस्मा कीन्जेत्पल
(मत्ती ३:१३-४:११; लुका ३:२१-२२; ४:१-१३)
9युहन्नाचे चोले प्रचार स्य्हेङ्टीबे बेलोरी येसु गालील प्रदेस्की नासरत पङ्बे सहरसे ब्योन्खज्यी। ओसेम् थेङ्चेएनो यर्दन गेन्दीरी युहन्ना ग्यम्से बप्तीस्मा कीन्जेत्ज्यी। 10येसु यीन्हङ्चे डोङ्खजेत्प साच्चेनो थेङ्चे स्वर्ग ठोङ्बलतेङ् पबीत्र आत्मात ढुकुर र्हङ्ले थेङ्की जोरी युटीबल स्हीःजेत्ज्यी। 11ओसेम् स्वर्ग ग्यम्से, “ए ङइ खोबे ज य्हीन्ब। ङ एतेङ् य्हक्को तङ्बल मुब” बी पङ्बे फ्रोइ थ्येःज्यी।#ठुङ्ब २२:२; भजनसंग्रह २:७; यसैया ४२:१; मत्ती ३:१७; १२:१८; मर्कुस् ९:७; लुका ३:२२
12होले तब साच्चेनो थेङ्त पबीत्र आत्माचे उजाड-ग्लारी स्येःनलज्यी। 13ओसेम् हुजुरी येसु दीन् खल् ङही सम्म स्य्हुबे बेलोरी थेङ्त सैतान्चे परीक्ष स्य्हेङ्ज्यी। थेङ् र्हीइ जन्तुमातेङ् स्य्हुजेत्ज्यी, ओसेम् स्वर्गदुत्माचे थेङ्त स्य्हप्तो स्य्हेङ्ज्यी।
येसुचे ङोन्ग्यम्की डबमा दम्जेत्पल
(मत्ती ४:१२-२२; लुका ४:१४-१५; ५:१-११)
14बप्तीस्मा पीन्बे युहन्नात जेल्री च्युप्प बीसेम् येसु पर्मेस्वर्की ज्यबे सम्तर् स्येत्जेत्ज्यीम् गालील सम्म ब्योन्खजेत्ज्यी। 15थेङ्चे, “देरेम् बेलो खज्यीन्बल मुब, पर्मेस्वर्की य्हुल् ज्यदङ् खज्यीन्बल मुब। एङ्यीमाचे पस्चताप स्य्हेङज्यीम् ज्यबे सम्तर्त बीस्वास् स्य्हेङो।” बी सुङ्ज्यी। #मत्ती ३:२
16येसु गालील ग्येइ य-यचे स्येःजेत्टीबे बेलोरी थेङ्चे सीमोनतेङ् थेइ अले अन्द्रीयासत ग्येरी ग्यङ् ल्हीःटीबल म्रङ्जेत्ज्यी, तलेपङ्सम् थेङ्यीमा तर्ङ सेत्पे म्हीमा मुबल। 17येसुचे थेङ्यीमात, “ङइ लीप्चे ब्रऊ, ङ एङ्यीमात तर्ङ अय्हीन्, म्हीमात ङइज बबे म्ही स्य्हेङ्स्ये मुब” बी सुङ्ज्यी। 18ओसेम् येसुचे चोले सुङ्ब साच्चेनो थेङ्यीमा ग्यङ्मा ख्लेथेन्ज्यीम् थेङ्की लीप्चे ब्रज्यी।
19येसु तोव क्योर् स्येजेत्मम् थेङ्चे जब्दीयाकी ज याकुबतेङ् युहन्नात दोङ्गरी टीज्यीम् ग्यङ् डुप्ज्यीम् क्योन्टीबल म्रङ्जेत्ज्यी।
20येसुचे थेङ्यीमात म्रङ्जेत्प साच्चेनो, “ङइ लीप्चे खोउ” बी सुङ्ज्यी। ओसेम् थेङ्य्हीचे र्हङ्की अप जब्दीयात नङ्बोमातेङ् दोङ्गरी ख्लेथेन्ज्यीम् थेङ्की लीप्चे ब्रज्यी।
येसुचे म्हङ् स्यप्पे म्हीत फेन्न लजेत्पल
(लुका ४:३१-३७)
21हुजु लीप्चे येसुतेङ् डबमा कफर्नहुम् पङ्बे ज्यीद सहर्री स्येःज्यी। ओसेम् थेङ्चे दुःब न्हबे दीन्री यहुदीमा र्हुप् तबे दीम्री स्येःज्यीम् लोप्प थाल्दीजेत्ज्यी। 22येसुचे लोप्पल म्रङज्यीम् म्हीमा जम्मनो तेङेन् तज्यी। तलेपङ्सम् थेङ्चे धर्म लोप्पोन्माचे र्हङ्ले अयीन, तर अधीकार् लज्यीम् लोप्जेत्ज्यी।#मत्ती ७:२८,२९ 23हुजु बेलोरीनो यहुदीमा र्हुप् तबे दीम्न्हङ् म्हङ् स्यप्पे म्ही गीः वङ्खज्यी। हुजु म्हीचे चोले क्रीङ्ज्यीम् पङ्ज्यी, 24“ओ नासरत्की येसु थेङ्चे ङ्यीमात त स्य्हेङ्ब छ्येबल? थेङ् ङ्यीमात नास् स्य्हेङ्बरी ब्योन्खबल य्हीन्ब? थेङ् पर्मेस्वर्चे पीत्खजेत्पे पबीत्र म्ही य्हीन्ब बी ङत था मुब।” 25तर येसुचे हुजु म्हङ्त, “कुटी टीउ, चु म्ही ग्यम्से डोङ्ज्यीम् य्हरो!” बी कुल्जेत्ज्यी। 26ओसेम् म्हङ्चे हुजु म्हीत तोर्म्य्ह-मोर्म्य्ह लज्यीम् केत् ङ्हच्छ्यङ् तेत्ज्यीम् क्रीङ्ज्यीम् डोङ्य्हर्ज्यी। 27चु म्रङ्बे म्हीमा जम्मनो तेङेन् तज्यी। ओसेम् र्हङ-र्हङन्हङ् चोले पङ्ब थाल्दीज्यी, “चु त य्हीन्ब? थेङ्चेमी सक्ती मुबे छार् तम्क लोप्प टीम्, ओसेम् म्हङ्माचेएनो थेङ्चे कुल्बे तम्मा ङ्येन्ब टीम्।” 28ओसेम् य्हम्बगीरीनो येसुचे स्य्हेङजेत्पे लक्की बारेरी गालील प्रदेस्की खन बीबीनो थ्येःज्यी।
येसुचे नबे म्हीमा य्हक्कोत फेन्न लजेत्पल
(मत्ती ८:१४-१७; लुका ४:३८-४१)
29हुजु लीप्चे येसु यहुदीमा र्हुप् तबे दीम्चे डोङ्ज्यीम् सीमोन्तेङ् अन्द्रीयासकी दीम्री स्येःज्यी। थेङ्तेङ् बक्च्य याकुबतेङ् युहन्नाएनो ङ्यीज्यी। 30हुजु बेलोरी सीमोनकी स्युमे छव खज्यीम् नबल मुबल। ओसेम् येसु हुजुरी दोखब साच्चेनो हुजु तम् थेङ्यीमाचे येसुत स्येत्ज्यी। 31येसुचे सीमोनकी स्युमे मुबे ग्लारी स्येःज्यीम् थेइ या चुङज्यीम् सेन्जेत्ज्यी। ओसेम् थेत छवचे पीत्प बीसेम् थेचे थेङ्यीमात क्योङ्ज्यी।
32हुजु ङ्येसेरी दीनी गल्ब बीसेम् म्हीमाचे नबे म्हीमातेङ् म्हङ् स्यप्पे म्हीमा जम्मनो येसु मुबे ग्लारी बज्यी। 33ओसेम् हुजु ज्यीद सहर्की य्हक्को म्हीमा दीम्की दोरी र्हुब् तज्यी। 34येसुचे य्हक्को थोइ रोग स्यप्पे म्हीमात फेन्न लजेत्ज्यी। ओसेम् य्हक्को म्हीमाकी ल्ही ग्यम्चे म्हङ्मा तेत्जेत्ज्यी। तर म्हङ्माचे येसु खल य्हीन्ब पङ्बे तम् स्येःबल तज्यीम् थेङ्चे म्हङमात तम् पङअबुङ्।
येसुचे गालीलरी लोप्जेत्पल
(लुका ४:४२-४४)
35येसु न्हम्स्य्होर्हङ् स्य्होरी मीः म्रङ्ब बीम ङोन्नो रेःजेत्ज्यी। ओसेम् थङ् तबे ग्लारी स्येःज्यीम् प्रार्थना स्य्हेङ्जेत्ज्यी। 36लीक्यम् सीमोनतेङ् थेइ र्होमा येसुत म्हइबरी ङ्यीज्यी। 37थेङ्त दोब बीसेम् थेङ्यीमाचे “म्हीमा जम्मचे थेङ्त म्हइटीब मुब” बी पङ्ज्यी। 38तर येसुचे थेङ्यीमात, “ब्रे य्हर्के, ङ्य्हङ्मा ल्हो-ल्हो नम्समारीएनो ङ्यीइ। ङचे हुजुमारीएनो प्रचार स्य्हेङ्थोब। तलेपङ्सम् चु लक्की लागीरीनो ङ खबल य्हीन्ब” बी सुङ्जेत्ज्यी। 39ओसेम् येसुचे गालील प्रदेस्की जम्म ग्लामारी यहुदीमा र्हुब् तबे दीम्मारी प्रचार् स्य्हेङ्जेत्ज्यी। ओसेम् म्हीमाकी ल्हीरी मुबे म्हङ्मात ल्हब्लाजेत्ज्यी।#मत्ती ४:२३; ९:३५
पुन् स्यप्पे म्ही फेन्बल
(मत्ती ८:१-४; लुका ५:१२-१६)
40पुन् स्यप्पे म्ही गीः येसु मुबे ग्लारी खज्यी। ओसेम् पुइ जुःज्यीम्, “थेङ्की थुः मुसम् ङत फेन्नलजेत्प खम्ब”#१:४० ग्रीक ग्योत्री “थेङ्की थुः मुसम् ङत सुद्द स्य्हेङ्जेत्ब खम्ब” बी ब्रीबल मुब। यहुदीमाकी पेठीम् अनुसार चोतेबे नेत् स्यप्पे म्ही असुद्द तब मुबल। ओसेम् थे ल्हो-ल्होकी रेइरी खब अतब मुबल। बी पङ्ज्यी। 41ओसेम् येसुचे तीङ् छज्यीम् थेत फ्याचे छुजेत्ज्यीम्, “एत फेन्न लबे सेम् ङल मुब, ए फेनो” बी सुङ्ज्यी। 42ओसेम् येसुचे होले सुङ्ब साच्चेनो हुजु म्ही पुन् ग्यम्चे फेन्ज्यीम् ज्यज्यी। 43होले फेन्ब साच्चेनो येसुचे हुजु म्हीत, 44“चु तम् खल्तेएनो थस्येतो, तर लम्बुज ङ्यीज्यीम् र्हङ्त ङोनो। ओसेम् ए फेन्ज्यी बी म्हीमात ङोन्बरी मोसाचे कुल्ब र्हङ्लेनो पर्मेस्वर्त ठा पीनो” बी कुल्जेत्ज्यी। #लेबी १४:१-३२
45तर हुजु म्ही य्हर्ज्यीम् चु तम् म्हीमा जम्मत स्येत्ज्यी। ओसेम् येसु म्हीमाचे था अयङ्नले सहर्री स्येःब अखम्। होत्तज्यीम् येसु थङ् तबे ग्लामारी स्येःज्यीम् स्य्हुजेत्ज्यी। तर हुजुरीएनो य्हक्को म्हीमा खन बीबी ग्लामाचे थेङ्ज खज्यी।
Obecnie wybrane:
मर्कुस् 1: WTDG
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2024 (Active), Wycliffe Bible Translators, Inc. All rights reserved.
