Makòrzì 1
1
Hwèyòhwèlì hwe ama Yòwanìrzɛ̀ è Mòlùhwìrzelì
(Mat 3.1-12; Luk 3.1-18; Yòw 1.19-28)
1Hwewòtelì hwe Ŋmɛ̀ndì mò Gbamù lì hvòmɛ̀nɛ̀ Yerzù Krirztò, è Ŋmanà wà ama Lohwɛ̀. 2Nà òma è tìlàhwì ò kààtì yà ama è mòòhwèlì wà èlìŋgɛ̀ Àyìrzayà nanù ema,
“Lohwɛ̀ à òhwi nanù ema,
‘Nà ò òma mèèrzènjà mè ami ò wòrzò ò lì ò rzèkeyà è njiya.’
Mòrzeya mò mà hweyàhwà ò mòrzanjɛ̀ nanù ema,
È rzèkeyà hwèjèelì hwe ama è Rzàŋgò,
3‘È tɛ̀nɛ̀nɛ̀ injìya jà hweyàkèlì hwe eni.’”
4Yòwanìrzɛ̀ à mà jà ò mòrzanjɛ̀ lì lùhwìrzɛ̀ hwatò, nà lì hwa òhweyà Eyà yà Lohwà nanù ema, “È rzɔ̀njɛlɛ hwègbèèlì hwe anyu hwe wòhwe, è lùhwìrzɛ̀hwɛ̀. Aŋga nanù Lohwɛ̀ à è làkìrzɛ̀ wòhwe wò anyu.” 5Hwatò hwa mà uhwɛlɛlɛ ò erzòòkà yà arzɛ yà Jùdeyà, nà ò mbòwà ndɛ̀ɛ̀ndɛ̀ yà Jèrurzalɛ̀mù, hwa mà wurza lì mò òkànèyà. Nà òma hwaŋga hwatò hwa mà purzɛ̀lɛ̀ wòhwe wò awu, rzìi Yòwanìrzɛ̀ à hwa lùhwìrzɛ̀ ò mòrzò mò Jɔdànì. 6Liwɔ̀ti là ama Yòwanìrzɛ̀ lì mà gbèyahwana ndi nà majùmbu mà nyàmà ema è hwɛ̀lɛ̀hwɛ̀ Kamɛ̀lì. È ŋgòlì yà eni hvɛ ema gbèyahwana ndi nà meyòwò mè nyàmà yà waŋga. Mòleli mò eni mò mà hwɛ ndi mègbambembe nà wòò. 7È njàmbɛ yà eni è mà hwɛ ndi nanù ema, “O ò jà mɔ̀kɔ ò mburzà yà ami ema à nò akayi. È mà tɔ̀ mèèrzìŋgà mè eni mè hwètambi, imba nà rza ukì tɔ̀ mòtò ò lì ujama lì mè wulùwà. 8Imba nà è lùhwìrzɛ̀ nà malìhwa, ndi mɔ̀ à ò è lùhwìrzɛ̀ ndi nà Èlìŋgɛ̀ yà Wòtani.”
Lìlùhwìrzɛ̀ nà lì kèkirzɛ̀hwɛ̀ là ama Yerzù
(Mat 3.13–4.11; Luk 3.21-22; 4.1-13)
9Èŋge hvònda Yerzù mɔ̀ à mà uhwɛlɛlɛ ndi ò mbòwà yà Nàrzàrɛ̀tì ò erzòòkà yà Galìlì, rzìi à lùhwìrzɛ̀hwɛ̀ nà Yòwanìrzɛ̀ è Mòlùhwìrzèlì, ò mòrzò mò Jɔdànì. 10Ò wòtɛmɛ̀tɛmɛ̀ nà òmà Yerzù à mà lùhwìrzɛ̀hwɛ̀, rzìi à anjiyà ò tenì yà màlìhwa, à mà ɛnɛ lòòhwà lì lìhvòhwèlì. Rziì Èlìŋgɛ̀ yà Wòtani è mà uhwɛlɛlɛ ò ŋmanyu nàa mbèŋga è mò rzihweyà ò mòhvò mò èni. 11Lìlò lì uwɛ̀lɛ̀lɛ̀ ò ŋmanyu yà lohwà rzìi lì òhwa nanù ema, “O wà ndì ò hwèlì è Ŋmanà wà amì wà ndìŋgɛ yà màlìŋgò, nà òki mɔ̀nyɛ̀ŋgì nà ò wà rzayì-rzayì.” 12Lìwòkimɛnɛ Èlìŋgɛ̀ yà Wòtani è tìmba Yerzù ò mòrzanjɛ̀. 13Yerzù à mà lìya ò mòrzanjɛ̀ menìmenì mè mènya, à mà kèkirzɛhwɛ nà Mòkarzɛ̀. À mà hwɛ aŋga nà inyàmà ja arzɛ ja waŋga. I aŋgèlì jà ama Lohwɛ̀ ì mà jà lì mò òŋgòwànà.
Yerzù à hvɔ̀rzì hwà-òkòwèlì hwa wòrzò
(Mat 4.12-22; Luk 4.14-15; 5.1-11)
14O mburzà hvònda Yòwanìrzɛ̀ à mà aŋgɛ̀hwɛ̀ ò hwèwòwà. Ò mburzà hvònda ema Yòwanìrzɛ̀ à mà aŋgɛ̀hwɛ̀ ò hwèwòwà, Yerzù rziì à ɛ̀ndɛ ò erzòòkà yà Galìlì, rzìi à òhweyà hwatò Ŋmɛ̀ndì mò Gbamù mò ama Lohwɛ̀, à hwa òhweyà nanù ema, 15“È hvònda è mà uka, Lìkànèyà là ama Lohwɛ̀ lì mà kòmbɛ̀nɛ̀. È rzɔnjɛ̀lɛ̀ hwègbèèlì hwe anyu hwe wòhwe, è lòkɛ̀ Ŋmɛ̀ndì mò Gbamù mò amà Lohwɛ̀.” 16Nà òmà Yerzù à mà hwɛ lì ɛndeya ò rzààwà yà yùlu yà Galìlì, rzìi à ɛnɛ Rzìmɔ̀nì nà ŋmanyàŋgò wà eni Àndèlè, hwa kòmà è mbunja ò yùlu èhwanja hwa mà hwɛ ndi hwatò hwa mòrzòmbò. 17Yerzù rzìi à hwa òhweyà nanù ema, “È jèe è nò nɔ̀ŋge. Nà òma inyɔ è lɛ̀mbɛ inyàmà jà màlihwa naŋgɛ, nà è òkòlɛ nɛ inyɔ è tanɛyi lì rzèkeya mèèmà mè hwatò ò lì nò òŋgama.” 18O wòtɛmɛ̀tɛmɛ̀ wɔ̀ hwa mà rzɔnjɛ̀lɛ̀ imbunja jà awu rzi hwa òŋgamà Yerzù. 19Nà òma hwa mà ɛ̀ndɛ ŋmanà hvòkà yɔ̀ndɔ̀, à mà ɛnɛ hwàanà hwa ama Rzɛ̀bɛ̀dì, Yòwanìrzɛ̀ nà ŋmanyàŋgò wà eni Jèmìrzì, ò tenì yà wɔ̀lɔ̀, hwa rzɛ̀ŋgɛ̀nɛ̀ ìmbunja ja awu. 20Nà òmà à mà hwa ɛnɛ, à mà hwa hwɛlɛ. Hwa mà hwɛmɛ è rzàŋgò yà awu Rzɛ̀bɛ̀dì nà hwàgbèèlì ò wɔ̀lɔ̀, rzìi hwa nɔ̀ŋgɔ̀ Yerzù.
Yerzù à hvayi èlìŋgɛ̀ yà wòhwe ò nyò yà mòtò
(Luk 4.31-37)
21Yerzù nà hwà-òkòwèlì hwa eni hwa ànìyɛ hwa mà ɛndɛ ò mbòwà yà Kàpɛ̀nàwɔ̀mì. À mà kpèeyà ò ndawò yà màkanɛ̀ yà wònyà Yudà ò Wùnya wò lì Arzìyòlɛ, rzìi à wòteyà lì òkòlɛ̀. 22Hwatò ema hwa mà hwɛ lì mò òkànèyà, hwa mà tàmeyà hwèyòkòlèlì hwe eni èhwanja a mà òkòlɛ̀nɛ̀ nà lìkànèyà, à rzi hwɛ lì òkòlɛ̀ nàa Hwà-òkòlèlì hwa mbenda. 23Mòtò mɔ̀kɔ ema à mà hwɛ̀nɛ̀ èlìŋgɛ̀ yà wòhwe a kpèeyà ò eŋge ndawò yà màkanɛ̀ rzìi à tɛ̀ɛ̀ nanù ema, 24“Jìyeyi! Ìi Yerzù wà Nàrzàrɛ̀tì, mamɛ ò jò àrzàna e? Ò jelì ndi lì jò hvàŋga e? Nà hwi njɛnɛ ò hwèlì, ò hwèlì ndi è mɔ̀ ema Lohwɛ̀ à òmi, ema à Tàni.” 25Yerzù à mà kànèyà èŋge èlìŋgɛ̀ yà wòhwe nanù ema, “Andama! Ò mò wurze ò nyò.” 26Èŋge èlìŋgɛ̀ yà wòhwe è rzòkòmɛ̀lɛ̀ òŋgò mòtò nà ŋginyà è tɛɛ rzìi è ànjiya ò nyò yà eni. 27Hwatò hwa arzɛ hwa mà tàmeya enè eyà rzayì-rzayì, rzìi hwa ijòwànɛ mɔ̀kɔ nà ɔnɛ̀yi nanù ema, “Ima tumba eyà ène! Hwèyòkòlelì hwe hvènya hwe ene e? Ònò mòtò à hwɛnì ŋginyà ò lì kànja hwèlìŋgɛ̀ hwe wòhwe natɛ̀ɛ hwe mò hweyànà!” 28Ŋmɛ̀ndì mò ama Yerzù, mò mà eyàlɛ̀nɛ̀ erzòòkà yà arzɛ yà Gàlìlì.
Yerzù à mà wɔ̀wìrzɛ̀ rzayì-rzayì ja hwatò
(Mat 8.14-17; Luk 4.38-41)
29Lìwòkimɛnɛ nà òmà hwa mà anjiye ò è ndawò yà Yudà yà màkanɛ̀, Yerzù, Jèmìrzì, nà Yòwanìrzɛ̀ hwa mà ɛ̀ndɛ ò ndawò yà àma Rzìmɔ̀nì nà Àndèlè. 30È nyàŋgò yà lìhwa yà àma Rzìmɔ̀nì è mà hwɛ nà lìyèti ò lìnɔ̀ŋgɔ̀. Nà òmà Yerzù à mà ùke aŋga, à mà òhwahwɛlɛ lì hvòmɛ̀nɛ̀ jòòkì ja ama òŋgò mòlanà. 31Yerzù rziì à ɛ̀ndɛ ò mà òŋgò mòlanà, à mò lɛ̀mbɛ̀ lìya. À mò òŋgòwànà ò lì tɛ̀mɛ̀. Liŋgi lìyètì lì mà wɔ̀wɔ̀ rzìi òŋgò mòlanà à hwa kàrzɛ̀. 32O èŋge ŋgòmbe nà òmà èlohwàlohwà è mà rzìhwe, hwatò hwa mà jàneyà Yerzù hwaŋga hwatò ema hwa mà ɔ̀kìrzɛ̀ nà hwaŋga ema hwa mà òhva hwèlìŋgɛ̀ hwe wòhwe. 33Hwatò hwa arzɛ hwa èŋge mbòwà hwa mà arzàŋganɛ ò èwòkà yà è ndawò yà àma Rzìmɔ̀nì. 34Yerzù à mà wɔ̀wìrzɛ̀ rzayì-rzayì jà hwatò ema hwa mà ɔ̀kìrzɛ̀ nyayi nà nyayi jà nyàmbɛ. À mà hvaya hvɛ hwèlìŋgɛ̀ hwe wòhwe ò inyò jà hwatò. À rzì ŋgbe hwèlìŋgɛ̀ hwe wòhwe ehvòlò ema hwe tɔ̀wu, èhwanja hwe mà hwiya njɛnɛ Yerzù à hwèlì.
Yerzù à mà òhwa Ŋmɛ̀ndì mò Gbamù ò Galìlì
(Luk 4.42-44)
35O ekpààrzɛ̀ è hvònda yà inyànyò, Yerzù à mà tɛ̀mɛ̀ rziì, à wurza ò ndawò, à ɛ̀ndɛ èki yà njuka yà ŋmɛ̀ɛ̀ ema à mà kanɛ̀. 36Hwatò ema hwa mà hwɛ nà Rzìmɔ̀nì hwa mà ɛ̀ndɛ lì àrza Yerzù. 37Hwa mà mò lùwè rzìi hwa mò òhweyà nà hwètamìrzelì nanù ema, “Hwatò hwa arzɛ hwa hwèlì hwa ò arza!” 38Yerzù rzìi à hwa alàhwɛ̀ nanù ema, “Inyɛ̀ jà ɛ̀ndɛ o èhvɛhvɛ èki ò màmbòwà ema mà kòmbɛ̀nɛ̀yi, ò lì arza nanù ema nà òhwe hvɛ Ŋmɛ̀ndì mò Gbamù aŋga èhwanja mòŋgò Ŋmɛ̀ndì mò Gbamù ndi nà jɛlɛlɛ̀ ò rze.” 39O èŋgànɛ̀lɛ̀ à mà ɛ̀ndɛ ò erzòòkà yà arzɛ yà Galìlì lì òhwa Ŋmɛ̀ndì mò Gbamù ò indawò jà màkanɛ̀ nà lì wùrzirzɛ̀ hvɛ hwèlìŋgɛ̀ hwe wòhwe ò hwatò.
Yerzù à mà wɔ̀wìrzɛ̀ mòtò wà è nyàmbɛ yà mɔ̀lɔ̀ŋgɔ
(Mat 8.1-4; Luk 5.12-16)
40Mòtò mɔ̀kɔ ema à mà òka è nyàmbɛ yà mɔ̀lɔ̀ŋgɔ à mà jèeyà Yerzù rzìi à mò rzùmeya màwɔ̀ŋgɔ̀ŋgɔ̀, à mò atɛ̀kɛ̀ nanù ema, “Ò lìŋganì tɛ ò nò tanìrzɛ̀.” 41Yerzù à mà òkeya òŋgò mòtò ììlì rzìi à enyòwa lìya là eni, à lì hwàkɛ òŋgò mòtò ò nyò yà eni, à òhwa nanù ema, “Nà lìŋgàni, rzàŋga!” 42Lìwòkìmɛnɛ rzìi èŋge nyàmbɛ yà mɔ̀lɔ̀ŋgɔ è mò hwɛ̀mɛ̀ rzìi à wɔ̀wɔ̀. 43Yerzù rzìi à mò òhweyà nanù ema à ɛ̀ndɛ, rzìi à mò kòkòwɛ̀lɛ̀ nɔ̀ke-nɔ̀ke nanù ema, 44“Ò rzìi òhweyà tɔ̀ mòtò, mamɛ ema è ò gbèyɛ̀nɛ̀ ndì ɛ̀ndɛ wà àwuŋmɛ̀lɛ̀ è Pìlìrzì, à ò injàneyà. Rzìi ò ŋgbe màhwèyà nà òma è mbenda yà ama Mòrzè è mà òhwe, ò lì uŋmɛ̀lɛ̀ nanù ema ò mà rzàŋga nà lì ŋgba Lohwɛ̀ jèeka.” 45Ndi ònò mòtò à mà ɛ̀ndɛ ò èki yà arzɛ ò lì òhwèyà hwatò mamɛ ema Yerzù à mà mò gbèeyà. O èŋgànɛ̀lɛ̀ è ŋgànèlì yà ama Yerzù è mà ɛ̀ndɛ ò èki yà arzɛ, ema Yerzù à rzi tanɛ̀ hvɛ lì kpèeyà e mbòwà ò mòte. Ndi Yerzù à mà hwɛ ndi lì lìya ò hwèki ema hwe rzi hwɛ̀ɛ hwatò rzayì-rzayì. Ndi tɔ̀ nanù hwatò hwa mà uhweyà hwèki hwe arzɛ ò lì jà lì mò ùŋma.
Obecnie wybrane:
Makòrzì 1: bri
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, CABTAL
