Matiyò 25
25
Ŋmàna mò lìyòme là mèyɔ̀mbɔ̀ mè ŋgɔ̀ndɔ̀
1Yerzù à mà kpɛɛ mɔ̀ hvɛhvɛ ŋmàna ò lì òhwa nanù ema, “Ò eŋge hvònda ema è Ŋmanà wà è Mòtò wà Hwènàmà à ò jɛ̀ɛ̀, lìkànèyà là ŋmanyu lì ò hwɛ ndi nàa lìyòmɛ̀ là mèyɔ̀mbɔ̀ mè ŋgɔ̀ndɔ̀ ema hwa mà wòwà hwètùlù hwe awu ò lì ɛ̀ndɛ lì ambɛlɛlɛ è mòhwayèlì ò lì ɛndɛ lì mò lìyɛlɛ. 2Ò ìtììtènì jà lìŋgi lìyòme là hwàna hwa ŋgɔ̀ndɔ̀ hwata hwa mà hwɛ èèti, hwanɛ̀yi hwàtànɛ̀ wɔ̀ hwa mà hwɛnɛ lìhwiyè. 3Hweŋge hwèèti hwe hwàna hwa ŋgɔ̀ndɔ̀ hwe mà wòwa hwètùlù hwe awu ndi hwa rzìi òhve mà hvɛhvɛ mànyàŋga màŋgele. 4Ndi hwaŋga hwa lìhwiyè hwa mà awòmbɛlɛ mahvɛhvɛ mànyàŋga màŋgele ò hwèhvòrzì ò lì gbeyàna ò hwètùlù hwe awu. 5È mòhwayèlì à mà tɔ̀ɔ̀lɛ̀ hwèjèelì, ò èŋgànɛ̀lɛ̀ rzɔ hwaŋga hwàna hwa ŋgɔ̀ndɔ̀ hwa mà wòteyà lì rzìirza nà lì naŋga ijɔ. 6Ò kɔ̀rzi yà awu jòŋgii, rzìi mòrzeya mò tɛ̀ɛ̀hwɛ̀ nanù ema, ‘È mòhwayèlì à mà jà! È wurze è jèe è mò ùŋma.’ 7Mèyɔ̀mbɔ̀ me ŋgɔ̀ndɔ̀ mè arzɛ mè tɛ̀mɛ̀nɛ mè agbɛlɛ hwètùlù hwe awu. 8Iŋgi ŋgɔ̀ndɔ̀ jà èèti rzìi jò òhweyà è hwa lìhwiyè nanù ema, ‘Hwètùlù hwe arzu hwe à lìma è jò ŋgbè hwàànà mànyàŋga màŋgele.’ 9Hwàŋga hwa lìhwiyè rzìi hwa hwà alàhwɛ̀ nanù ema, ‘Jàyɛ̀! Mamɛ ema jò òhvi, è rza ò jò tànɛ, irzɔ nà inyɔ. È ɛ̀ndɛ ò ndawò jà nyòŋga, è andelɛ mànyàŋga màŋgele.’ 10Ndi nà òma hwa mà ɛ̀ndɛ lì anda mànyàŋga màŋgele, è mòhwayèlì à mà jà. Rzìi hwaŋga hwàna hwa ŋgɔ̀ndɔ̀ hwààtànɛ̀ ema hwa mà wòŋgirzɛnɛ hwa ɛ̀ndɛ nà mɔ̀ ò è ndèma yà lìhwa, rzìi lìyòhva lì umbahwa. 11Ò mburzà hvònda è wɔ̀ ema hwa mà ɛ̀ndɛ ò lì anda manyàŋgà maŋgele nà òma hwa mà timbe, hwa mà tɛɛ nanù ema, ‘Rzàŋgò, rzaŋgò ò jò lìhvòweya lìyòhva!’ 12Rzìi è mòhwayèlì à hwa timbirzɛlɛ nanù ema, ‘Nà è jɔ̀kɛ̀, nà rza è hwi.’” 13Yerzù rzìi à umba mònò ŋmàna ò lì òhwa nanù ema, “È wòwe hvònda, èhwanja è rza hwi wùùnya tɔ̀ è hvònda ema è Ŋmanà wà è Mòtò wà Hwènàmà à ò jɛ̀ɛ.”
Ŋmàna mò hwàgbèèlì hwàyàwò
(Luk 19.11-27)
14Yerzù rzìi à hwatɛ ò lì òhwa nanù ema, “Ò eŋge hvònda lìkànèyà là ŋmanyu lì ò hwɛ ndi nàa mòtò mɔ̀kɔ ema à mà wòŋgirzɛnɛ ò lì ɛndɛ yɔ̀ndɔ̀. À mà hwɛlɛ hwàgbèèlì hwa eni rzìi à hwa lììyà erzaŋgò yà eni. 15À ma ŋgba tɔ̀ ima mɔ̀ lì hvòmɛ̀nɛ̀ è hwɛ̀yìi yà eni. À mà ŋgba mɔ̀kɔ hwekòlì hweta hwe wòlì, à mà ŋgba òhvɛhvɛ hwekòlì hwe hwàkɛ hwe wòlì ndèŋgànà òhvɛhvɛ ikòlì jɔ̀kɔ jà wòlì. Nà òma à mà kùlɛ̀ lì ŋgba, rzìi à ɛndɛ è yà eni. 16È mògbèèlì ema à mà lùwa hwekòlì hweta hwe wòlì, à mà hwa ika ò nyòŋga rzìi à yàlɛ̀ hwehvɛhvɛ hwekòlì hweta hwe wòlì. 17Oŋgò mɔ̀ hvɛ wà hwekòlì hwehwakɛ hwe wòlì mɔ̀ hvɛ à mà gbeyà nyayi hvɔ̀kɔ nàa è wà wòrzò, rzìi à yàlɛ̀ mehvɛhvɛ hwekòlì hwehwakɛ hwe wòlì. 18Ndi òŋgò ema à mà òhva ikòlì jɔ̀kɔ ja wòlì à mà ɛ̀ndɛ lì ima èhvɔ̀ndì ò mɔ̀nyɛ̀, rzìi à uta wòŋgò wòlì wò ama rzaŋgɛ wà eni wà èwòlò ò tenì.
19“Ò mburzà yà hvòka hvònda e rzaŋgo yà awu ya èwòlò è mà tìmba, rzìi a kɔ̀kɔ̀ lìrzaŋgò na wɔ̀. 20È mɔ̀ ema à mà ŋgbààhwà hwekòlì hweta hwe wòlì à mà jànà hwehvɛhvɛ hwekòlì hweta hwe wòlì rzìi a òhweyà rzaŋgɛ wa eni wa èwòlò nanù ema, ‘O ma nò ŋgba hwekòlì hweta hwe wòlì. Nà ma hwe ika ò nyòŋga rzìi na yalɛ hwehvɛhvɛ hwekòlì hweta hwe wòlì.’ 21Rzaŋgɛ wà eni wa èwòlò à mà mò alàhwɛ̀ nanù ema, ‘O gbèyi gbamù, ò hwèlì ndi e mògbèèlì wa gbamù ema a tɛmi ehve-ehve. O awuŋmɛ̀lɛ̀ ò wà witi ò lì hwɛ e mògbèèlì wa gbamù na jɔ̀kɛ̀. Nà òma ò tanɛyi lì ɔ̀ŋgeya ŋmanà wòlì, ò èŋgànɛ̀lɛ̀ imba na ò ika ema ò kànèyà wòlì wò ndɛnɛ. Kpèeyà ònò i rzòmbìrzɛ̀ mɔ̀nyɛ̀ŋgì mò ami.’
22“Oŋgò mògbèèlì wa hwekòlì hwehwakɛ hwe wòlì mɔ̀ hvɛ rzìi a ja a òhwa nanù ema, ‘Rzàŋgò, ò ma nò ŋgba hwekòlì hwehwakɛ hwe wòlì, nà mà hwa ika ò nyòŋga rzìi nà yàlɛ hvɛ hwekòlì hwehwakɛ hwe wòlì.’ 23Rzàŋgò wa eni wa èwòlò rzìi a mò alàhwɛ̀ nanù ema, ‘O gbèyi gbamù, ò hwèlì ndi e mògbèèlì wa gbamù. Nà òma ò tanɛ lì ɔŋgeya ŋmanà wòlì, ò èŋgànɛ̀lɛ̀ imba na ò ika ema ò kànèyà wòlì wò ndɛnɛ. Kpèeyà ònò i rzòmbìrzɛ̀ mɔ̀nyɛ̀ŋgì mò ami.’ 24È mɔ̀ ema à mà ŋgbààhwà ikòlì jɔ̀kɔ ja wòlì, mɔ̀ hvɛ à mà jà rzìi a òhwa nanù ema, ‘Rzàŋgò, na hwi ema ò ambirzɛnɛ, ò rzaŋga mbòtà ò hwe èki ema ò rza ònɛ, ndèŋgànɛ̀lɛ̀ ò rzaŋga mbòta ò èki ema ò rza mùŋgùlɛ̀ tɔ̀ hvɔ̀ŋgɔ̀. 25O èŋgànɛ̀lɛ̀ nà mà òka wɔ̀ŋgɔ̀ nà mà uta ikòlì ja aŋgɔ̀ ja wòlì ò mɔ̀nyɛ̀. Ɔ̀ŋgɔ tɛ, wòwa mamɛ e hwèlì e ya aŋgɔ̀.’
26“Rzàŋgò wa eni wa èwòlò rzìi a mò alàhwɛ̀ nanù ema, ‘Ò wà è mògbèèlì wa ekɔni na rziŋga! O èŋgànɛ̀lɛ̀ rzɔ ò wa ò hwi ema na rzaŋga mbòtà ò èki ema na rza ònɛ, ndèŋgànɛ̀lɛ̀ na rzaŋga mbòta ò èki ema na rza mùŋgùlɛ̀ tɔ̀ hvɔ̀ŋgɔ̀ e? 27Òole, òma ò ma ika wòlì wò ami ò ndawò ya lùùtà, aŋga nanù òma ò hwetimbelì hwe ami, mònò yàlɛlɛ jùùmɛ̀.’ 28Aŋga ndi òŋgò mòtò a òhweyà hwàgbèelì hwa eni nanù ema, ‘È mò wòwane wòŋgò wòlì, e wò ŋgbè e mɔ̀ ema a òhvi lìyòmɛ̀ la hwekòlì hwe wòlì. 29Tɔ̀ njɛnɛ ema a òhvì yòmà, Lohwɛ̀ a ò mò hwàteyà hvɛ, rzìi òma à mà lùwà hveyii, ndi e mòtò ema a rza òhvɛ yòmà, tɔ̀ e tenyi ema a òhvì Lohwɛ̀ a ò mò wòwànà e yɔ. 30Lì hvòmɛ̀nɛ̀ ònò mògbèèlì hwa èèti, e mò hvume e mò hvake ɔ̀nɛyi ewòka ò tenì yà jìtìtì, aŋga ema a eeya na lì kɔ̀kɔ̀ mehvehve.’”
Hwèkàyirzèlì hwe lìrzùkù
31“Ndi e hvònda ema è Ŋmanà wà è Mòtò wà Hwènàmà a ò jɛ̀ɛ̀ nàa Kiŋgɛ, na i aŋgèlì ja arzɛ ja ama Lohwà a ò lìya ndi ò kònda ya eni ya lìkànèyà là èluhwe ò lì kàyìrzɛ̀ hwatò. 32Hwatò hwa arzɛ ò hwèkòmè hwe arzɛ hwe ene rze ya mɔ̀nyɛ̀ hwa ò arzàŋganɛ ò wòrzò wa eni. Rzìi mɔ̀ à ò hwa kakòwa mòòŋgò mahwakɛ nà òma e mɔ̀ɔŋgelì wa hwèembè a kakòwà mɛ̀ɛlɛ̀ŋgù ò ì mbòlì. 33Nànù ndi e Kiŋgɛ a ò ika hwatò ema hwa hwèlì ehve-ehve ò lìya la eni la mòme hwanɛyi hvɛ ema hwa rza enje ehve-ehve ò lìya la eni la ŋmalì. 34È Kiŋgɛ a òhweyà e hwaa lìya la mòme nanù ema, ‘È jèe inyɔ ema e nàmìrzɛ̀hwɛ̀yi na e Tatɛ̀ wa ami! È jèe e wòwe mònàmɛ̀ mò lìkànèyà la ama Lohwɛ̀ ema mò ma màa lì e rzekahwɛlɛ natɛ̀ɛ na e hvònda ema mɔ̀ à mà wèkè e rze. 35Inyɔ e luwa mònò mònàmɛ̀ èhwanja e hvònda ema nà mà òhve e njàwò e ma nò ŋgba mòlelì, e hvònda ema nà mà hwèya e nyìrzɛ̀ ema mà nò ŋgba malìhwà mà lì nyɔ, nà mà ja ŋmɛ̀ni ò mba anyu rzìi e nò karzɛ. 36È hvònda ema na rza òhvɛ màatù ma lì wɔ̀tɔ̀, e ma nò ŋgba màatù ò lì wɔ̀tɔ̀, nà mà ɔ̀kirzɛ̀ rzìi e ja ò lì nò ɔŋgeya, nà mà hwɛ ò hwèwòwà rzìi e ja lì nò hvɛhvɛ.’ 37Rzìi hwaŋga hwa ehve-ehve hwa ò mò alàhwɛ̀ nanù ema, ‘Ìi Rzàŋgò, ima hvònda ima ò ɛnɛ na e njàwò rzìi jò ò lìrzɛ e? Tɔ̀ nyìrzɛ̀ ya malìhwa rzìi jò ò nyìrzɛ̀ e? 38Ima hvònda i ma ò ɛnɛ nàa ŋmɛ̀ni rzìi jò ò karzɛ e? Tɔ̀ lì ò ŋgba màatù ema ò rza òhvɛ lìhwatu mà lì wɔ̀tɔ̀ e? 39Ima hvònda i ma ò ɛnɛ ò nyàmbɛ tɔ̀ ò hwèwòwà rzìi i ja lì ò hvɛhvɛ e?’ 40Ndi e Kiŋgɛ̀ e hwa alàhwɛ̀ nanù ema, ‘O tɛ̀ɛ̀tɛ̀ɛ na e òhweyà ema tɔ̀ mamɛ ema e ma gbèeyà mɔ̀kɔ wa hwanù wònyanyàŋgò wa ami ema hwa rza òhvɛ hwe tɛmelì, imba ndi ema gbèeyà.’
41“Ndi e Kiŋgɛ̀ e ò ayèŋgòwɛ̀lɛ̀lɛ̀ hwaŋga ema hwa ò hwɛ ò lìya la eni la ŋmalì rzìi a hwa òhweyà nanù ema, ‘È nò anjiya anu inyɔ ema e jemahwi na Lohwɛ̀! È ɛndɛ e kpèeyà ò ehvɔ̀ndi ya mùnya ema Lohwɛ̀ à mà rzekeya Mòkarzɛ̀ na i aŋgèlì ja eni. 42Lìrzàkò ema nà mà hwèye e njàwò, e rzi nò lìrzɛ, nà mà hwèya e nyìrzɛ ya malìhwa ndi e rzi nò nyìrzɛ. 43Nà ma hwɛ ŋmɛ̀ni ndi e rzi nò kàrzɛ ò màndawò ma anyu, na rza òhve lìhwatu la lì wɔ̀tɔ̀ e rzi nò wɔ̀tìrzɛ, nà mà ɔ̀kirzɛ̀ rzìi na hwɛ hvɛ ò hwèwòwà e rzìi jèe lì nò ɔŋgeya.’ 44Ndi wɔ̀ hvɛ hwà mà mò timbirzɛlɛ nanù ema, ‘Ìi Rzàŋgò, ima hvònda ema i mò ɛnɛnɛ e njàwò, tɔ̀ nyìrzɛ̀ ya malìhwa, tɔ̀ nàa ŋmɛ̀nì, tɔ̀ ema ò rza òhvɛ lìhwatu, tɔ̀ na nyàmbɛ tɔ̀ ò hwèwòwà rzìi i rzi ò òŋgòwane e?’ 45Ndi eŋge Kiŋgɛ e hwa alàhwɛ̀ nanù ema, ‘Nà e òhweyà na e jɔ̀kɛ̀ ema, tɔ̀ ima lìrzakò ema e ma rzɔ̀rzè ò lì gbeyà hwanù wònyànyàŋgò wa ami ema hwa rza òhvɛ hwe tɛmelì, imba ndi e ma rzɔ̀rze lì gbèeyà nanù.’ 46Hwanù hwa arzɛ hwa ò òmahwa ndi ò e kɔ̀kìrzɛ̀ ya gbìndèyà, ndi e wɔ̀ hwa ehve-ehve hvɛ hwa ò ɛndɛ ndi ò lòŋgɛ la gbìndèyà.”
Obecnie wybrane:
Matiyò 25: bri
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, CABTAL
