Matiyò 15
15
Hwèyòkòlelì hwe ama hwa mbambɛ
(Mak 7.1-13)
1O mburza hvònda, lòŋgò la Ihvalìrzàyì na lòŋgò la Hwà-òkòlèlì hwa mbenda hwa mà uhwɛlɛlɛ ò Jèrurzalɛ̀mù rzìi hwa jà lì ijòwa Yerzù ema, 2“Mamɛ ndeŋgatɛ Hwà-òkòwèlì hwa aŋgɔ̀ hwa rza òŋgama hwèyòkòlèlì ema hwe jò ŋgbààhwi na i mbamba ja arzu e? Hwa rza tutɛ màà mà awu ndèŋgàna hwa e laa!” 3Yerzù rzìi a hwa alàhwɛ̀ nanù ema, “Mamɛ ndeŋgatɛ inyɔ e rza òŋgama màmɛ ema imbenda ja ama Lohwɛ̀ jò òhwa e? È òŋgama ndi hwèyòkòlèlì hwe ama imbamba ja anyu. 4Èhwanja Lohwà a òhwi nanù ema, ‘Ŋgba rzaŋgò wa aŋgɔ̀ na nyàŋgò wà aŋgɔ̀ èluhwe, tɔ̀ ima mɔ̀ hvɛ ema a òhwa eyà ya wòhwe lì hvòmɛ̀nɛ̀ rzàŋgò wà eni na e nyàŋgò yà eni a àŋgàmɛ̀nɛ̀ lì òŋwahwa.’ 5Ndi inyɔ e òkòlɛ̀ nanù ema mòtò a hwɛnì tɛ yòma ema a tànɛyi lì gbeyàna lì òŋgòwàna nyàŋgɛ tɔ̀ e rzaŋgò ya eni, ndi à òhwa ama, ‘Ene e hwɛnɛhwi ndi na Lohwɛ̀,’ 6a rza àŋgàmɛ̀nɛ̀ lì ŋgba rzaŋgò wa eni èluhwe. Nànù ndi e ndinda hwèyòkòlèlì hwe ama Lohwà ò lì òŋgama hwèyòkòlèlì hwe anyu. 7Inyɔ hwatò hwa mèhvìlì! È Mòòhwèlì wa Èlìŋgɛ̀ Àyìrzayà à mà hvòmɛ̀nɛ̀ lìrzàkò ema à mà òhwe ò èlìŋgɛ̀ lì e hvòmɛ̀nɛ̀ nanù ema,
8‘Hwanù hwatò hwa nò ŋgbàànà ndi èluhwe ò iwàna ja awu,
ndi mèèmà me awu me rzɔ̀lɛ̀nɛ̀yi na imba.
9È rza enje tɔ̀ wòlìtò ò wɔ̀ ò lì nò kanɛ̀ imba,
èhwanja wɔ̀ hwa òkòlɛ̀ ndi imbenda ema hwatò hwa tɛ̀yirzɛ̀, nàa ò à ɛnɛ òma i hwèlì ndi imbenda ja ami!’”
Hweya ema hwe gbeyà mòtò a rza hwɛ wòrzàŋgi ò wòrzò wò ama Lohwɛ̀
(Mak 7.14-23)
10Yerzù rzìi à hwɛlɛ e ŋgìndì ò lì mò jèeyà rzìi a hwa òhweyà nanù ema, “Inyɔ̀ hwa arzɛ e nò òkànèyà, e rzɔ̀ŋgìtɛ̀nɛ̀ hvɛ kɔ̀yi-kɔ̀yi! 11Rzeketɛ e yɔ ema e kpèeyà ò tenì ya e wàna ya mòtò ndi e mò gbeyà a hwɛ ŋmiŋgò ò ma Lohwɛ̀, ndi mamɛ ema e wurza mòtò ò wàna ya eni yɔ̀ ndi e mò gbeyà ema a rza hwɛ wòrzàŋgì, ò wòrzò wò ama Lohwɛ̀.” 12Hwà-òkòwèlì hwa eni rzìi hwa mò ijòwà nanù ema, “O hwi nanù ema hwèyòhwèlì hwe aŋgɔ̀ hwe tàtìrzɛ̀ Ihvàlìrzàyì mèèmà me awu e?” 13Yerzù rzìi a hwa alàhwɛ̀ nanù ema, “Tɔ̀ ima gbee ema Tatɛ̀ wa ami wà e ŋmanyu yà lohwà a rza ònɛyi, e ò wùŋguwàhwà wàrzɛ̀wàrzɛ̀. 14È rza atàkìrzɛ̀ ò nyòla ya awu! Hwa hwèlì ndi hwàtìmbèlì hwa ndima; mòtò wa ndìma a timbì tɛ òhvɛhvɛ mòtò wà ndìma, hwahwàkɛ hwa undà ò tenì yà èhvɔ̀ndì.” 15Pètrò rzìi a òhwa nanù ema, “O jò òhweyà jànda ja mònò ŋmàna,” 16Yerzù rzìi a hwa òhwàna nanù ema, “Nàtɛ̀ɛ na naŋgɛ inyɔ hvɛ e rza rzɔ̀ŋgìtɛ̀nɛ̀ e? 17È rza rzɔ̀ŋgìtɛ̀nɛ̀ e? Tɔ̀ ima yòma e ma e kpèelì ò wàna ya mòtò, e ɔ̀ndɔ̀ ò lùùŋga la eni, rzìi e wurza ò nyò ya eni. 18Ndi hweyà ema hwe wurza ò wàna ya mòtò hwe uwɛ̀lɛ̀lɛ̀yi ndi ò ŋmèma mò eni, hweŋge hweyà ndi hwe gbeyà mòtò a rza hwɛ wòrzàŋgi ò wòrzò wò ama Lohwɛ̀. 19O ŋmèma mò eni ɔ̀ndi màlùtèyà ma wòhwe ema mà mò lìyɛ̀lɛ̀ ò lì òŋwa, lì gbeyà mòrzònje mò ndawò ya lìhwa, na lì gbeyà hvɛ la hwehvɛhvɛ hweyà hwe hwèŋgòmba. Manù màlùtèyà hvɛ ndi ma gbeyà a ihwa, ò lì tɛ̀mɛ̀ mbòŋgi ja mòlàŋgà na lì indà hwahvɛhvɛ hwatò. 20Hwenè hweyà ndi hwe gbeyà e mòtò ema a rza hwɛ wòrzàŋgi ò wòrzò wò ama Lohwɛ̀. Ndi ò lì laa na màa ema mà rza tùtɛ̀hwɛ̀, e rza tanɛ lì gbeyà mòtò a hwɛ ŋmìŋgò na òma wɔ̀ hwa òhwa.”
È mòlanà wa Kana ema à mà lòkɛ̀ Yerzù
(Mak 7.24-30)
21O mburza hvònda, Yerzù à mà anjiya ò èŋge èki rzìi a ɛ̀ndɛ ò hweŋge hwèrzòòkà ema hwe kòmbɛ̀nɛ̀ imbowà ndɛnɛ ja Tàyi na Rzidònì 22Mòlanà mɔ̀kɔ ema à mà hwɛ lì lìya ò erzòòkà ya Kenà à mà jèeyà Yerzù rzìi a mò eyeya nanù ema, “Ìi è Ŋmanà wà e nyɔ̀ŋgɔ̀nì ya ama Dàhwitì, ò nò òkeya ììlì! È ŋmanà wa ami wa mòlanà a òhvi èlìŋgɛ̀ ya wòhwe ò nyò ya eni a hwèlì ò hwehwɛ̀ɛlì hwe wòhwe.” 23Ndi Yerzù a rzi mò timbirzɛlɛlɛ tɔ̀ eyà. Rzìi Hwà-òkòwèlì hwa jà, hwa rzòrzòmeya Yerzù ema, “O òhweyà ònò mòlanà ema a ɛ̀ndɛ èhwanja a jò òŋgama, a gbeyà hvɛ mɔ̀tɔ̀wù.” 24Yerzù rzìi a hwa timbirzɛlɛlɛ ama, “Lohwɛ̀ a nò òmi ndi ò lì òŋgòwàna hwatò hwa Irzàyɛ̀lì ema hwa hwèlì ndi nàa mɛ̀ɛlɛ̀ŋgù ema me wɔ̀wu.” 25Nà òma òŋgò ŋmanà mòlanà à mà hweye nanù, rzìi a kpèeyà Yerzù ò matàŋgà ma eni rzìi a mò rzòrzòmeya nanù ema, “Rzàŋgo ò nò òŋgòwane!” 26Yerzù rzìi a mò alàhwɛ̀ nanù ema, “O rza lɔ̀ɔ lì wòwà mòlelì mò hwàna rzìi ò mò aŋgbeyà iŋgba.” 27Oŋgò mòlanà rzìi a mò alàhwɛ̀ nanù ema, “Mamɛ ò òhwi e hwèlì ndi e jɔ̀kɛ̀ ndi tɔ̀ iŋgba jò ɔhvɛ i làa ì mbumbu ja mèlelì ema ja unda ò tehwèlì ya ama e rzàŋgò ya awu.” 28Yerzù rzìi a mò alàhwɛ̀ nanù ema, “O hwèlì ndi mòlanà a òhvi lìlòkɛ̀ lì òlò! Mamɛ ò arza e ò gbèyɛnɛ.” Liwòkimɛnɛ e ŋmanà wa eni wa mòlanà à mà wɔ̀wɔ̀.
Yerzù à mà wɔ̀wìrzɛ̀ rzayi-rzayi ja hwatò
29Yerzù à mà anjiya ò eŋge èki rzìi a ɛ̀ndeya ò rzàawà lì aka yùlu ya Galìlì. À mà agba ò mbehve yà mòòlì rzìi a lìya ò rze. 30Ŋgindi ndɛnɛ e mà mò jèeyà, hwà mà mò jàneyà hwatò hwa kperzòhwa, e wɔ̀ hwa ndima, imbòkò, imbùke na hwahvɛhvɛ hwatò ema hwà mà òhva ihvɛ-hvɛ nyàmbɛ. Hwà mà naŋgɛlɛ hwaŋga hwatò ò meende me ama Yerzù, rzìi a hwa wɔ̀wìrzɛ̀ hwa arzɛ. 31Hwàŋga hwatò hwà mà jeja rzayi na òma hwà mà ɛnɛ nɛ imbùke jò òhwa, imbòkò i wɔ̀wìrzɛ̀wɛ̀yi, hwaŋga ema hwà mà kperzòhwa hwà ma ɛ̀ndɛ gbamù, na òma indima hvɛ i ma ɛ̀nɛ, rzìi hwa eka Lòohwà la hwatò hwa Irzàyɛ̀lì.
Yerzù a lìrzɛ hwekòlì hweni hwe hwatò
(Mak 8.1-10)
32Yerzù rzìi a hwɛlɛ Hwà-òkòwèlì hwa eni ò nyò, rzìi a hwa òhweyà nanù ema, “Nà òkeya hwanù hwatò ììlì, èhwanja hwà mà hwɛ na imba lì uka mèènyà meyawò, ò naŋgɛ nanù, hwa rza òhvi tɔ̀ yòma ya lì làa. Nà rza arza lì hwa òhweyà ema hwa ɛ̀ndɛ e rzi hwɛ lì hwa ŋgbà yòma ya lì làa èhwanja hwa tànɛ̀yi lì rzòòwà ò njiya.” 33Hwà-òkòwèlì hwa eni rzìi hwa mò ijòwa nanù ema, “One i tànɛ̀yi ò lì lùwa mòlelì ema mò kòki ò lì lìrzɛ hwanu hwatò anù mòrzanjɛ̀ e?” 34Yerzù rzìi a ijòwa nanù ema, “Hwehvòòtò hweti inyɔ e òhvi e?” Hwà-òkòwèlì hwa eni rzìi hwa mò alàhwɛ̀ nanù ema, “Lìrzàmbà la hwèhvòòtò, na ŋgurzu ja hwàànà hwa nyàmà ja malìhwa.” 35Yerzù rzìi à òhweyà è ŋgìndì nanù ema hwa lìya ò rze. 36Rzìi à wòwa lìŋgi lìrzàmbà la hwèhvòòtò na iŋgi nyàmà, a ŋgba Lohwɛ̀ jeka, a ji kɛrzɛ, rzìi a ji ŋgba Hwà-òkòwèlì hwa eni Hwà-òkòwèlì hwa eni rzìi hwa ji kahweyà hwatò. 37Hwàŋga hwatò hwa arzɛ hwà mà làa, natɛ̀ɛ hwà mà uja. Hwà-òkòwèlì hwa eni rzìi hwa rzaŋga lìrzàmbà la ŋgata ja mbumbu ja hwehvetelɛ. 38Mɔ̀rzɔ̀ŋgi mò wunyanà ema mò mà làa mò mà hwɛ hwèkòlì hweni e rzi hwɛ lì aŋga hwààlanà na hwàànà. 39Yerzù rzìi a akpanɛ hwaŋga hwatò ema hwa timbe ò màndawò ma awu. Nà òma à mà hwa òhweyà nanù, a kpèeyà ò wɔ̀lɔ̀ rzìi a ɛ̀ndɛ ò erzòòkà ya Magadani.
Obecnie wybrane:
Matiyò 15: bri
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, CABTAL
