Matiyò 14
14
È kpelì ya ama Yòwanìrzɛ̀ e Mòlùhwìrzèlì
(Mak 6.14-29; Luk 9.7-9)
1O eŋge hvònda mɛnɛ Hɛ̀rɔ̀dì ema mɔ̀ ndi à mà hwɛ e mòkànèlì hwa èkòmè ya Gàlìlì, à mà hwèya lì hvòmɛ̀nɛ̀ hweyà ema Yerzù à mà hwɛ lì gbeyà. 2Rzìi à òhweyà hwàgbèelì hwa eni nanù ema, “Onò mòtò Yerzù a hwèlì ndi Yòwanìrzɛ̀ è Mòlùhwìrzèlì ema à mà hvùmùwɛ̀. Ɔ̀ndeŋgàtɛ̀ a òhvi ene ŋginyà ya lì gbeyà manù mànyakà ma hweyà.” 3Hɛ̀rɔ̀dì à ma òhwa ndi nanù èhwanja mɔ̀ à mà òma hwatò ema hwa lɛ̀mbɛ̀ Yòwanìrzɛ̀, hwa ma mò kake e ŋgɔ̀kɔ̀hwi rzìi a mò aŋgɛ ò hwèwòwà. A ma gbeyà ndi nanù lì hvòmɛ̀nɛ̀ e jòjìyɛ̀ ya eni Hɛ̀ròdìyàrzì, ema à mà lòma lì hwɛ e jòjìyɛ̀ ya ama ŋmanyàŋgò wa enì Hvìlìpì. 4Hɛ̀rɔ̀dì à mà aŋgɛ Yòwanìrzɛ̀ e Mòlùwìrzèlì ò hwèwòwà èhwanja mɔ̀ à mà mò òhweyà nanù ema, “È rza hvòmɛ̀nɛ̀ nanù ema ò hwaa Hɛ̀ròdìyàrzì e jòjìyɛ̀ ya ama ŋmanyàŋgò wa aŋgɔ̀.” 5Hɛ̀rɔ̀dì à mà arza lì mò òŋwa ndi à mà òka wònyà Yudà wɔ̀ŋgɔ̀, èhwanja hwa ma lòkɛ̀ nanù ema Yòwanìrzɛ̀ a hwèlì ndi mòòhwèlì wa èlìŋgɛ̀. 6O wùnyà wò lì ɔ̀ŋgɛ̀lɛ̀ wùùnya wò hwèŋyàyèlì hwe ama Hɛ̀rɔ̀dì wò ma ùke, Hɛ̀rɔ̀dìyàrzì e ŋmanà wa eni wa mòlanà à mà rza ŋgɔ̀mɔ̀ ò wòrzò wò hwatò hwa arzɛ ema hwa ma yòhwɛ̀hwɛ̀. Hɛ̀rɔ̀dì à mà òka mɔ̀nyɛ̀ŋgì rzayì-rzayì. 7Ene eyà ema mà mò gbeyà à mà kàkɛ̀nɛ̀ òŋgò ŋmanà ŋgɔ̀ndɔ̀ nanù ema, “Nà àtɛ̀ɛ̀ ema na ò ŋgbà tɔ̀ mamɛ ema ò arza.” 8È nyàŋgò ya ama òŋgò ŋmanà wa ŋgɔ̀ndɔ̀ rzi e mò kòna ò lì òhwa nanù ema, “O nò ŋgbe anu ò naŋgɛ mòòhvò mò ama Yòwanìrzɛ̀ è Mòlùhwìrzèlì, ò tandami!” 9Hɛ̀rɔ̀dì à mà ònda na ndùtù ò ŋmèma, ndi èhwanja à mà hwɛ à mà ààtɛ̀ à mà a mò ŋgbà tɔ̀ mamɛ ema a arza ò wòrzò wò hwatò hwa arzɛ, à mà akɛlɛ lìlò ema hwa jàne mòòhvò mò ama Yòwanìrzɛ̀ è mòlùhwìrzèlì hwa mò ŋgbe òŋgò ŋmanà ŋgɔ̀ndɔ̀. 10O èŋgànɛ̀lɛ̀ à mà òma hwatò ò hwèwòwà ema hwa rzenjòwe Yòwanìrzɛ̀ mòòhvò mò eni. 11Hwà mà jànà mòòhvò mò ama Yòwanìrzɛ̀ ò tandami rzìi hwa mò tɛtirzɛ òŋgò ŋmanà wa ŋgɔ̀ndɔ̀, rzìi a mò ɛ̀ndɛneya nyàŋgò wa eni. 12O mburza hwene hwègbèèlì hwe arzɛ, hwà-òkòwèlì hwa ama Yòwanìrzɛ̀ hwà mà ɛndɛ ò ndawò ya hwèwòwà, rzìi hwa wòwa èèmbè ya eni, hwa ɛ̀ndɛ ò lì e imeya. Nà òma hwà mà kulɛ ò lì mò imeya, rzìi hwa ɛ̀ndɛ lì òhweyà Yerzù mamɛ ya arzɛ ema e ma gbèyɛ̀nɛ.
Yerzù à mà lìrzɛ hwekòlì hweta hwe hwatò
(Mak 6.30-44; Luk 9.10-17; Yòw 6.1-14)
13È hvònda ema Yerzù à mà hwèye mamɛ ema è mà gbèyɛ̀nɛ̀ Yòwanìrzɛ̀, à mà kpèeyà ò wɔ̀lɔ̀, rzìi à anjiya ò eŋge èki, à ɛ̀ndɛ ò lì lìya èki ema à mà lìya mɔ̀ ŋmìti. Nà òma hwatò hwa mà hwèye ema Yerzù à mà kpèeyà ò wɔ̀lɔ̀, hwa mà anjiya ò màmbòwà mà awu nà màtaŋga ò lì mò nɔ̀ŋgɔ. 14È hvònda Yerzù à mà rzihwe ò wɔ̀lɔ̀, rzìi à ɛnɛ ŋgìndì ndɛ̀nɛ̀ yà hwatò. À mà hwa kpèeyà ììlì rzìi à wɔ̀wìrzɛ̀ hwaŋga ema hwa mà ɔ̀kirzɛ̀. 15Nà òmà e ŋgòmbe ya Lohwà e ma ùke, rzìi hwà-òkòwèlì hwa eni hwa mò jèeyà, hwà mà òhweyà nanù ema, “Wùùnyà wò mà ahva, ene èki yɔ̀hvɛ e awutɛyi, òhweyà hwanù hwatò hwa ɛ̀ndɛ ò manù màmbòwà marzàlì ò lì arzelɛ yòòmà yà lì làa.” 16Yerzù rzìi a hwa alàhwɛ̀ nanù ema, “Hwa rza hwɛnì lì anjiya anù, inyɔ e hwa ŋgbe yòma yà lì làa,” 17rzìi hwa mò alàhwɛ̀ nanù ema, “Hwehvòòtò hwèta nà nyàmà jà malìhwa ihwàkɛ mɛnɛ ndi ji òhvi anù.” 18Yerzù rzìi à hwa òhweyà nanù ema, “È nò jàneyà hweŋge hwèhvòòtò na iŋgi nyàmà ja malìhwa.” 19Nà òma hwà-òkòwèlì hwa eni hwa mà hwe jànè, rzìi Yerzù à òhweyà hwaŋga hwatò ama hwa lìya ò mòkòòkò rzìi à wòwà hwèŋge hwèhvòòtò hwe atanɛ̀ nà iŋgi nyàmà jà malìhwa jà ahwakɛ, à ɔ̀ŋgɔ ò ŋmanyu yà lohwà, à ŋgba Lohwɛ̀ jeka rzìi à kɛrzɛ hweŋge hwèhvòòtò nà màà mà eni. Nà òma à mà hwe kɛ̀rzɛ, à ŋgba hwà-òkòwèlì hwa eni ò lì hwe kahweyà eŋge ŋgindi. 20Hwàŋga hwatò hwa arzɛ hwà mà làa natɛ̀ɛ hwà mà ujà, rzìi hwà-òkòwèlì hwa ama Yerzù hwa rzàŋga lìyòmɛ̀ la ŋgàta na ihwàkɛ ò mamɛ yà arzɛ ema è mà tɛ̀ɛ̀nɛ̀. 21Mɔ̀rzɔ̀ŋgi mò wunyànà ema mò mà làa mòŋgò mòlelì mò mà hwɛ hwekòlì hweta e rzìi hwɛ lì aŋga hwààlanà nà hwàànà.
Yerzù à mà ɛndɛ̀nɛ̀ matàŋgà ò malìhwa
(Mak 6.45-52; Yòw 6.15-21)
22Yerzù rzìi à òhweyà hwà-òkòwèlì hwa eni ema hwa kpèeyà ò wɔ̀lɔ̀ hwa ɛ̀ndɛ ò wòrzò ò ɛnɛyi èhvarzù yà yùlu, rzìi à òhweyà eŋge ŋgindi ò lì timba ò màndawò mà awu. 23Ò mburza hvònda ema tɔ̀ ima mòtò à mà ɛ̀ndɛ, rzìi à agba ò mòòlì ò lì kanɛ̀. È hvònda wùùnyà wò mà ahve, Yerzù à mà hwɛ ndi àŋga mɔ̀ ŋmìti. 24O ene hvònda nanù ò ma hwà-òkòwèlì hwa eni hwà mà rzɔ̀ɔ̀nɔ̀ wɔ̀ɔ̀lɔ̀ ɔ̀nɛyi tenì ya yùlù. Hwèmùnɛ̀ hwe ma hwɛ lì neŋgirzɛ wɔ̀ɔ̀lɔ̀, èhwanja e mbɛ̀hvɛ̀nì e ma hwa teŋgɛ̀nɛ̀.
25O ekpa ya arzɛ, Yerzù à mà ɛ̀ndɛnɛ matàŋgà ma eni ò malìhwa ò lì ùŋmànɛ̀lɛ̀ hwà-òkòlèlì hwa eni. 26È hvònda hwà-òkòwèlì hwa eni hwa mà mò ɛnɛ nà òma à làalà yɔ̀ndɔ̀ ò ŋmanyu yà malìhwa, è mà hwa tuhwìrzɛ̀ mòkambiya. Rzìi hwa wòteya lì tɛ̀ɛ̀ nà wɔ̀ŋgɔ̀ nanù ema, “Mùù òŋgò!” 27Yerzù rzìi à hwa òhweyà lìwòkimɛnɛ nanù ema, “È àyètìrzɛ̀ mèèmà! Imba Yerzù e rzi òka wɔ̀ŋgɔ̀.” 28Rzìi Pètrò a mò òhweyà ama, “Ìi Rzàŋgò! È hwèlì tɛ e jɔ̀kɛ̀ nanù ema ò wa ò nò kànèyà ema na ɛndɛ ò ŋmanyu malìhwa na jèe na ò ùŋmanɛlɛ.” 29Yerzù rzìi a mò òhweyà nanù ema, “Jà!” Rzìi Pètrò a rzihwa ò wɔ̀lɔ̀, a wòteya lì ɛ̀ndɛ̀nɛ̀ matàŋgà ò ŋmanyu ya malìhwa ò lì ɛ̀ndɛ lì ùŋmanɛlɛ Yerzù. 30Ndi na òma à mà ɛnɛ e mbɛ̀hvɛ̀nì nɛ e aka, à mà òka wɔ̀ŋgɔ̀ rzìi a wòteya lì inda ò rze ya malìhwa rzìi a tɛ ò ŋmanyu nanù ema, “Ìi Rzàŋgò, ò nò rzuŋge.” 31Yerzù a òma lìya la eni lìwòkimɛnɛ rzìi a mò nyàŋgà, rzìi a mò òhweyà nanù ema, “Ìi ò wa mòtò ema òhvi lìlòkɛ̀ lì rzàlì! Mamɛ ndèŋgàtɛ̀ ŋmèemà mò aŋgɔ̀ mò tumeya nanù e?” 32Wɔ̀ hwàahwàkɛ̀ hwà mà kpèeyà ò tenì ya wɔ̀lɔ̀ rzi e mbɛ̀hvɛ̀nì e ɔ̀ndɔ̀meyà. 33Nà òma ene eyà e ma gbèyɛnɛ nanù, hwanɛyi Hwà-òkòwèlì ema hwà mà hwɛ ò tenì ya wɔ̀lɔ̀ rzìi hwa kànɛ Yerzù. Rzìi hwa òhwa nanù ema, “Ò jɔ̀kɛ̀-jɔ̀kɛ̀ ò hwèlì ndi è Ŋmanà wà mùnyanà hwa ama Lohwɛ̀.”
Yerzù a wɔ̀wìrzɛ̀ hwà-òkèlì ò Gɛ̀nàrzàlɛ̀tì
(Mak 6.53-56)
34Hwà mà aka ɔ̀nɛyi ehvarzù ya eŋge yùlu rzìi hwa uka ò erzòòkà ya Gɛ̀nàrzàrɛ̀tì. 35Nà òma hwaŋga hwatò hwa eŋge mbòwà hwà mà embe Yerzù, rzìi hwa òmɛnɛ ŋmɛ̀ndì ema hwatò hwa jànè hwaŋga ema hwa ɔ̀kirzɛ̀ ò manɛyi màmbòwà ma arzɛ ma kòmbɛ̀nɛ̀. Rzìi hwa jàneyà Yerzù hwaŋga hwà-òkèlì. 36Rzìi hwa mò rzòrzòmeya ema hwaŋga hwà-òkèlì hwa tɔ̀te lìrzukù la eni la mòŋgòmbè mò eni na màà mà awu mɛnɛ, hwaŋga hwa arzɛ ema hwà mà tɔ̀tɔ̀ lìrzukù là mòŋgò mòŋgòmbè mò eni na màà mà awu hwà mà wɔ̀wɔ̀.
Obecnie wybrane:
Matiyò 14: bri
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, CABTAL
