JOHAN 14
14
Jesuh Tu Pa Hnenah Fehhnak Lampui
1Jesuh in a hnuahlunte hnenah, “Thin har le vansang in um mah ih. Pathian sang tu ilai kaimah khai i sang tu ih.#14:1 Greek pong umdan ah ‘Ning in Pathian sang tlang ai kaimah khai i sang i si,’ ti khai i thai i 2I Pa inn ah innkhan tampui um ai ning caah umhnak remm tuhin feh tuh ing. Ciatihin ihlah selai hetihin ning rel tuh lo ing. 3Cen, kaimah feh ai ning umhnak tuh i rem ben fangin kawi leh tuh ing; ciatihin i umhnak ah um tlang tuh ve i si. 4Ning in i feh tuh hmun lampui tu ling tlang i si,” tiin ti i.
5Thomas in, “Bawipa, akonah feh tuh isi ti na ling lo i ing; ciamanin akontih in na feh hmun lampui tu ling thil tuh i ing?” tiin zawt i.
6Jesuh in, “Kai tu lampui le thutak le, nunhnak ing. Kaimah hnenin siarlo aisu khai Pa hnenah hleng thil lo i. 7Tun tu aisu ing, ti i ling zo ai i Pa khai ling tlang tuh i si; tunai panin ani tu ning in ling tlang ai a hmu khai hmu tlang zo i si,” tiin ti i
8Philip in Jesuh hnenah, “Bawipa, na Pa kin hmuh tu; cen lung kin khim tuh i,” ti i.
9Jesuh in, “Ning hnenah can raipui um zo napui tun tian i ling lai lo isim, Philip? Aisu khai kaimah i hmutu in i Pa hmu zo i. Akontih in ‘Na pa kin hmuh tu,’ tiin i zawt lai isi. 10Philip, kaimah heh i Pa songah um ai i Pa khai kaimah songah um i, ti heh sang lo isim? Ning hnenai i ponghnak heh kaimah lungsuak in ponghnak ilo i; i songai a umtu i Pa ai naperhnak in i. 11Kai tu i Pa songah um ai i Pa khai kaimah songah um ve i, tiin i tihnak tu sang tu ih. Ciami ning sang thil lo inkhai thil i bawnhnak man tal in i sang tu ih. 12Thutak ning rel ing: kaimah i sangtu in i bawnhnak heh bawn tuh ve i; i, i Pa hnenah kaimah feh tuh manin he tahin thil mak sawn rin bawn tuh i. 13Cen i Pa ai songlawihnak tu Fapa songin a larhnak tuhin i hming in ning ngenhnak hmuahhmuah ning bawn sah tuh ing. 14I hming in ning ngenhnak hmuahhmuah bawn tuh ing,” tiin ti i.
Rauhla Thianghlim Thukhamhnak
15Jesuh in, “Kaimah i it le i sikhaw i thupehnakte hlun tuh i si. 16Kaimah in Pa hnenah ngen tuhai ning hnenah kumzangza in a umtu tuh Bawmtu#14:16 Bawmtu tihnak tu ṭanpuitu ti inkhai let thil i. dang ning pe tuh ing. 17Ani tu Pathian thutak a larruaitu Rauhla i. Lailung in amah tu hmu thil lo ai ling thil lawnsi lo manin pom thil lo i. Ikhalselai ning incen ling i si, zaimantifangin ani tu ning hnenah um ai ning songah tang tuh i.
18I feh fangin ningmah lek niu ning zam tuh lo ing; ning hnenah kawi leh tuh ing. 19A rai hlanah lailung mi in i hmu thil tuh nawn lo i; cen kai tu a nungmi imanin ning khai ning nung tuh ve i. 20Cia nia a hleng fangin kaimah ning songah i um bangin i Pa songah um ing ti le ning khai kaimah songah um ve i si, ti khiah ling tuh i si.
21Aisu khai ituseh i thupehnakte pom ai a hluntu heh i ittu i. Kaimah i ittu hmuahhmuah i Pa in it tuh i; kaimah inkhai it tuhai a hnenah lar tuh ing,” tiin ti i.
22Judas Iskariot lo a samdang Judah in, “Bawipa, akontih in lailung mi hnenah ilo in kin hnen sawn ah lar dun tuh isi?” tiin zawt i.
23Jesuh in, “Aisu khai kaimah i ittu in i thuzirhhnak hlun tuh i. I Pa in it tuhai i Pa le kaimah kawi kawm tuhai a hnenah um kawm tuh i ing. 24Kaimah i it lotu in i thuzirhhnak khai hlun lo i. Cen i thuzirhhnak ning linghnakte heh kaimah ai thusuak ilo i, i hlattu i Pa hnenin a hlenghnak i.
25Ning hnenah i um laiah he thu ning rel zo ing. 26I hming in i Pa ai hlat tuhhnak Bawmtu Rauhla Thianghlim in zaizongza ning zirh tuhai kaimah in ning relciahnak hmuahhmuah khai ning hihruai tuh ing.
27Ning hnenah daphnak ning hlup zo ing. Kaimah ai daphnak ning pe ing. Lailung mi in pehnak bangin ning pe lo ing, Donhar le vansang in um mah ih; ning thin khai lau mah ih. 28Ning hnenah, ‘Feh tuh ing, ikhalselai let tuh ing,’ tiin i tihnak ling tlang i si. I it ngaingai le i sikhaw Pa hnenah i feh tuh heh ning ang tuh i; zaimantifangin Ani tu kaimah tahin lian sawn i. 29I relhnak bangin a cang peupeu fangin ning sang thil tuhin tun a cang hlanah ning rel cia ing. 30Ning hnenah a raipui thu rel thil tuh nawn lo ing; zaimantifangin he lailung uktu pa hleng zo i. I vumah thunaihnak zaikhai nai lo i, 31ikhalselai kaimah in i Pa it ing ti khiah lailung mi in ling kul i; ciatihin a ling thil tuhin Amah in thu i pehnak hmuahhmuah bawn sio ing.
Kawi tu ih, he hmun in feh tlang ngasing,” tiin ti i.
Obecnie wybrane:
JOHAN 14: RZB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Zanniat Bible © Bible Society of Myanmar, 2018.
