Fuɗɗoode 42
42
No Yaakuuba neliri ɓiɓɓe muuɗum Misira
1Nde Yaakuuba maatunoo nguurey ina heɓee leydi Misira fu, wi'i ɓiɓɓe muuɗum:
— Ko waɗi de oɗon njooɗii oɗon ndaarondira?
2O wi'i:
— Mi nanii nguurey ina woni Misira. Njehee, coodanowee en nguurey heɓa mbuuren, taa maayen rafo.
3Sakiraaɓe Yuusufi sappo ɓeen njehi Misira faa coodowa neema. 4Ammaa Yaakuuba accaay Benjamin, minyoo Yuusufi oon yaadi e maɓɓe. Sabo o wi'i ina hasii si oon yehii fu, masiiba hewtan ɗum. 5Ɓiɓɓe Israa'iila ngardi e woɓɓe warɓe faa cooda, sabo rafo waɗii ley leydi Kanaana ndiin fuu.
Jiidal Yuusufi e sakiraaɓe muuɗum
6Yuusufi laatii hooreejo leydi Misira, wo kam sonnirta yimɓe leydi ndiin fuu nguurey. Sakiraaɓe makko ɓeen ngari cujidani mo.
7Nde Yuusufi yi'unoo mawniraaɓe muuɗum ɓeen fu, annditi ɗum'en, ammaa o waɗi hono o anndaa ɓe. O wi'i ɓe:
— Toy ƴuuruɗon?
Ɓe njaabii mo, ɓe mbi'i:
— Leydi Kanaana min ƴuwi. Min ngarii faa min cooda nguurey.
8Yuusufi annditi sakiraaɓe muuɗum, ammaa ɓeen annditaay mo. 9Ndeen Yuusufi miccitii koyɗi ɗi hoyɗunoo dow maɓɓe ɗiin, de wi'i ɓe:
— Onon, wo on horooɓe leydi, on ngarii faa ndaaron lokkaaku leydi ndi.
10Ɓe njaabii, ɓe mbi'i:
— Joomii amin, wanaa noon! Maccuɓe maa wo ngaru faa cooda nyaamri. 11Min fuu, wo min baaba gooto, miɗen koolnii. Minen maccuɓe maa, min nganaa horooɓe leydi.
12O jaabii ɓe, o wi'i:
— A'aa, on penan! Wo horude lokkaaku leydi ndi ngaranɗon.
13Ɓe njaabii, ɓe mbi'i:
— Minen maccuɓe maaɗa ɓeen, wo min sakiraaɓe sappo e ɗiɗo ɓe baaba gooto. Baaba amin na woni ley leydi Kanaana. Koddaajo amin oon ina toon hannden to baaba amin de gooto amin du heddaaki.
14Yuusufi jaabii, wi'i:
— Ɗuum saabii de mbi'umi wo on horooɓe. 15Inan no ndaartindortoomi on: Mi hunorake yonki Fira'awna, on njaltataa ɗo si koddaajo mooɗon oon waraay. 16Nelee gooto mooɗon yaha waddowa mo. Onon heddiiɓe ɓeen, on uddete ley kasu faa nde laaɓowi haalaaji mon ɗiin wo goonga. Si on ngaɗaay noon fu, mi hunorake yonki Fira'awna wo on horooɓe.
17O watti ɓe, ɓe fuu ley kasu faa waɗi balɗe tati.
18Nyannde tataɓerde ndeen, Yuusufi wi'i ɓe:
— Inan no ngaɗoton de mbuuron, sabo miin wo mi kuloowo Laamɗo. 19Si on goongalaaɓe fu, gooto mon heddoo ley kasu ɗoo. Heddiiɓe ɓeen njaarana yimɓe mon yolbuɓe ɓeen nyaamri. 20Ngaddanowee kam minyii on oon, faa ngoonɗinon haalaaji mon ɗiin de kison maayde.
Ɓe ngaɗiri noon. 21Ɓe mbi'ondiri:
— Kaari! Junuuba yowake dow men saabe minyii en mo ngattunoɗen e torra oon. Imo ŋaaronoo en njurmoɗen o ammaa en kettindanaaki o. Wo ɗuum saabii de torra o hewtii en.
22Ruben wi'i ɓe:
— Wanaa mi wi'iino on taa ngaɗon suka oon ko boni naa? De on njaɓaay. Ndelle joonin, ƴiiƴam makko ina woni dow meeɗen.
23Ɓe paamaay Yuusufi ina nana ko ɓe kaalata ɗuum, sabo nantinoowo wonnoo hakkunde maɓɓe. 24Yuusufi dilli woɗɗii ɓe faa woya.
Caggal ɗuum o warti, o haaldi e maɓɓe. O nanngi Simeyon, o haɓɓi ɗum yeeso maɓɓe.
Haala yeccagol sakiraaɓe Yuusufi Kanaana
25Caggal ɗuum, Yuusufi yamiri gooto maɓɓe fuu bootooru muuɗum hebbinee nguurey de ceede muuɗum ngattee ley toon. Wooɗi du ɓe kokkee njooɓaari. Noon o waɗani ɓe. 26Ndeen ɓe ndimndi alkama oon dow araaji maɓɓe, ɓe ndilli. 27To ɓe mbaalowi toon, gooto maɓɓe omti bootooru muuɗum faa nyaamna araawa mum. Wakkati oon, o yi'i ceede makko e hunnduko bootooru nduun. 28O wi'i sakiraaɓe makko:
— Ceede am njeccinaama ley bootooru am. Inani ɗe!
Ɓerɗe maɓɓe taƴi. Ɓe kuli, ɓe ƴamondiri:
«Ɗume woni ko Laamɗo waɗi en ɗuum?»
29Ɓe njottii leydi Kanaana to baabiiɓe Yaakuuba, ɓe pillanii ɗum ko hewtii ɓe ɗuum fuu. Ɓe mbi'i:
30— Gorko laamiiɗo leydi oon sattinanii min sanne. O ndaardii min hono wo min horooɓe leydi ndiin. 31Min mbi'i o wo min yimɓe hoolniiɓe. Min mbi'i min nganaa horooɓe. 32Min mbi'i wo min sappo e ɗiɗo hawtuɓe baaba gooto, ammaa gooto amin heddaaki, wooɗi koddaajo amin du ina heddodii e baaba amin ley leydi Kanaana. 33Ndeen gorko laamiiɗo leydi oon wi'i min: «Inan no paamirammi wo on hoolniiɓe: njoppanee kam gooto mooɗon, kooƴanon yimɓe mon yolbuɓe ɓeen nguurey, de kooton». 34Ngaddonon kam minyii on oon, ndeen mi faaman on nganaa horooɓe, wo on hoolniiɓe. Ndeen mi hokkitan on sakiike mon oon, de kumton haajuuji mon ley leydi ndi.
35Ɓe puɗɗi yuppude bootooji maɓɓe. Wakkati ɓe njuppannoo ɗi, mono fuu tawi ceede ley bootooru muuɗum! Nde kamɓe e baabiiɓe njiinoo ceede ɗeen fu, ɓe kuli. 36Baabiiɓe Yaakuuba wi'i ɓe:
— On mursinii kam ɓiɓɓe am! Yuusufi heddaaki, Simeyon du heddaaki, de joonin on teetan kam Benjamin du. Wo dow hoore am ɗum fuu ɗum saami.
37Ndeen Ruben wi'i bammum:
— Si mi wartiranaay ma mo fu, mbaraa ɓiɓɓe am ɗiɗo ɓeen. Wattu o e junngo am, mi wartirante o.
38Oon jaabii, wi'i:
— Ɓiyam oon yaadataa e mooɗon. Sabo mawniiko maayii, kanko tan heddii. Si won torra kewtiiɗo mo e laawol ngool fu, ɗum waɗan faa miin jom hoore raneere oo, mi maayda e mettorgal ɓernde.
Obecnie wybrane:
Fuɗɗoode 42: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
