Fuɗɗoode 41
41
Haala koyɗi Fira'awna
1Duuɓi ɗiɗi caggal majjum, Fira'awna hoyɗi ina darii hunnduko maayo manngo wi'eteengo Nil. 2De inan na'i jeɗɗi payɗi, belɗi ndaarude njalti ley maayo ngoon. Iɗi ndura daande maayo. 3Caggal ɗuum na'i jeɗɗi goɗɗi, ɗi mbelaa ndaarude, pooƴuɗi, njalti ley maayo ngoon, ngari ndarii ɗakkol majji. 4Na'i jeɗɗi ɗi mbelaa ndaarude, pooƴuɗi ɗiin, nyaami na'i jeɗɗi belɗi ndaaruude, payɗi ɗiin. Ndeen Fira'awna finti. 5Caggal ɗuum, o ɗaantii, o hoyɗi katin, inan ƴommbal gootal saawti butaali jeɗɗi ɓutti lobbi. 6De caggal majji du butaali jeɗɗi cewɗi, ɗi henndu lettugal ɗaylini, njalti. 7Butaali cewɗi ɗiin moɗi butaali jeɗɗi ɓutti lobbi ɗiin. Ndeen Fira'awna finti, tawi wo ɗum koyɗol. 8Subaka majjum Fira'awna fini ina wemmbaa. O yamiri daggadaaɓe e jom'en hakkillo Misira fuu noddee. O fillanii ɓe koyɗi makko ɗiin de fay gooto waawaay fiirtande mo ɗi.
9Ndeen kokkoowo njaram oon wi'i Fira'awna:
— Hannden kaa mi haaltan boofi am. 10Joomam Fira'awna, a tikkaniino maccuɓe maa, miin e mawɗo defooɓe neema oon, de nannguɗaa min, ngattuɗaa ley suudu hooreejo kasu. 11Jemma gomma min ɗiɗo fuu, min koyɗi, mono fuu koyɗol mum e maanaa muuɗum. 12Miɗen ngondunoo toon e suka jokkolle Ibraninkeejo, maccuɗo hooreejo kasu oon. Min kaalani mo koyɗi amin de o fiirtani min ɗi, mono fuu fodde koyɗol mum. 13De no o fiirtiri ɗi fu, wo noon jaati ɗi laatorii: miin, mi soƴƴinaama nokku am, gooto oon du, jorfaa faa maayi.
14Nden Fira'awna wi'i Yuusufi noddowee. Ɓe njehi law ɓe mburtini mo ley kasu toon. O femmbaa, o ɓoornii kaddule kese, de o yehi yeeso Fira'awna.
15Oon wi'i mo:
— Mi hoyɗii koyɗol ammaa yimɓe fuu ndonki fiirtude ngol. De mi nanii aan kaa si a fillanaama koyɗol fu, aɗa waawi fiirtude ngol.
16Yuusufi jaabii Fira'awna, wi'i:
— Miin, mi waawaa, ammaa Laamɗo ina waawi humpitinde ma ɗum faa hakkillo maa fukkoo.
17Ndeen Fira'awna wi'i Yuusufi:
— Mi hoyɗii miɗo darii hunnduko maayo Nil. 18Ndeen na'i jeɗɗi payɗi, belɗi ndaarude njalti ley maayo ngoon, iɗi ndura ɗakkol maggo. 19Caggal ɗuum na'i jeɗɗi goɗɗi njalti. Wo ɗi pooƴuɗi, bonɗi alhaali sanne, ɗi mbelaa ndaarude, abada mi yi'aay hono majji bonde alhaali ley leydi Misira. 20Na'i pooƴuɗi, bonɗi alhaali ɗiin nyaami na'i jeɗɗi payɗi arandeeji ɗiin. 21Nde ɗi nyaamunoo ɗiin ndeen, nanndaay yalla fay huunde ina woni ley deedi majji sabo ɗi keddake iɗi pooƴi. Ndeen pinumi. 22Nji'umi katin ley koyɗol ƴommbal gootal saawti butaali jeɗɗi ɓutti, lobbi. 23Caggal majji butaali jeɗɗi joorɗi, cewɗi, ɗi henndu lettugal ɗaylini, njalti. 24Butaali joorɗi ɗiin moɗi butaali jeɗɗi lobbi ɗiin. Mi fillanake ɗum daggadaaɓe de fay gooto waawaay fiirtande kam ɗum.
25Yuusufi jaabii Fira'awna, wi'i:
— Koyɗi ɗi Fira'awna hoyɗi ɗiin wo huunde wootere. Laamɗo humpitii Fira'awna ko waroyta. 26Na'i jeɗɗi lobbi ɗiin wo duuɓi jeɗɗi. Butaali jeɗɗi ɗiin du wo duuɓi jeɗɗi, wo ɗum koyɗol gootol. 27Na'i jeɗɗi pooƴuɗi, bonɗi alhaali cakitiiɗi njalti ɗiin, e butaali jeɗɗi cewɗi ɗi henndu lettugal ɗaylini ɗiin wo duubi jeɗɗi. Ɗiɗum ɗuum fuu maanaa majjum woni rafo duuɓi jeɗɗi. 28Fira'awna kaananke, hono no mbiirumaami wo Laamɗo ɓanginani ma ko waɗata. 29Duuɓi jeɗɗi haarannde mawnde waɗan ley leydi Misira fuu. 30Caggal ɗuum duuɓi jeɗɗi ɗi rafo njokkan faa yeggitee ko leydi Misira haariino. Rafo torran leydi ndiin, 31faa haarannde waɗunoonde ndeen yeggitee saabe no rafo ngoon sattirta. 32Ko koyɗol ngool wari to Fira'awna kile ɗiɗi ɗuum, ɗum hollii Laamɗo siinii waɗude ko fodii ɗuum. Laamɗo waɗan ɗum law. 33Joonin le, Fira'awna ndaar neɗɗo jom hakkillo e faamu, ardinaa ɗum leydi Misira. 34Ina haani Fira'awna suɓoo woɓɓe faa ardina ɗum'en leydi ndi faa ɓe njaɓa haɓɓere gawri wootere ley kaɓɓe joy fuu. Ɓe ngaɗiraa noon e leydi Misira ndiin ley duuɓi haarannde jeɗɗi ɗiin. 35Fira'awna hawjoo ɓe, ɓe kawrondira nguurey ley duuɓi jeɗɗi garooji, ɓe ngaɗa beembe alkama. Ɗum laatoo nguurey desaaɗo ley kuɓeeje. 36Nguurey oon laatanoo leydi Misira ndesaari ley duuɓi rafo jeɗɗi ɗiin, taa rafo ngoon timmina leydi ndiin.
No Yuusufi laatorii hooreejo ley leydi Misira
37Haala kaan weli Fira'awna e gollooɓe muuɗum fuu.
38Fira'awna wi'i:
— Yalla en keɓan neɗɗo mo Ruuhu Laamɗo woni e muuɗum hono gorko o naa?
39Fira'awna haali katin wi'i Yuusufi:
— Saabe ko Laamɗo anndini ma ɗuum, walaa fuu goɗɗo gooduɗo hakkillo e faamu hono ma. 40Wo aan dawranta ɓaade am. Yimɓe am fuu ɗowtanto ko njamirɗaa. Si wanaa jooɗorgal laamu am du walaa fu ko ɓurdumaami.
41Fira'awna wi'i Yuusufi katin:
— Inan mi ardinii ma dow leydi Misira fuu.
42O itti hootonnde makko, o ɓoorni Yuusufi. O ɓoorni ɗum kaddule leppi ɗaatuɗi de o ɓorni ɗum koɗol kaŋŋe.
43Caggal ɗuum o waɗɗini ɗum torkooru makko ɗiɗaɓurdu. Yimɓe ina ƴeewnoo yeeso muuɗum, ina mbi'a:
— Ndikkinee!
Noon Fira'awna waɗiri mo hooreejo dow leydi Misira fuu.
44O wi'i Yuusufi:
— Miin woni Fira'awna. Neɗɗo fuu gollataa fay huunde ley leydi Misira si wanaa aan hokki joomum laawol.
45Ndeen Fira'awna noddiri Yuusufi Safnata-Paneya. O ɓaŋani ɗum Asanata ɓii Potifera, almaami huɓeere Ona. Noon laamu Yuusufi tabitiri ley leydi Misira fuu. 46Yuusufi na tawraa duuɓi 30 nde fuɗɗannoo gollande Fira'awna, kaananke Misira ndeen. O dilli yeeso muuɗum o yiiltowii ley leydi Misira fuu. 47Ley duuɓi haarannde jeɗɗi ɗiin, leydi ndiin waɗi barke sanne. 48O hawrondini nguurey fuu ko duuɓi jeɗɗi ɗiin fuu ley kuɓeeje nder leydi Misira toon, wuro fuu nguurey keɓaaɗo ɗakkol muuɗum. 49Yuusufi hawrondini nguurey faa heewi hono njaareendi maayo, faa seli limude sabo waawaa limeede. 50Fadde hitaande rafo ndeen warude, Asanata, ɓii Potifera almaami Ona oon, rimani Yuusufi ɓiɓɓe worɓe ɗiɗo.
51O inndiri afo oon Manasa (ɗum na fiirta «imo waɗa faa mi yeggita»). O wi'i:
— Laamɗo yeggintinii kam tampiri kewtiindi kam ley suudu baaba am ndiin fuu.
52Minyiiwo oon, o inndiri ɗum Efrayim (ɗum na fiirta «ɓeyngu»). O wi'i:
— Laamɗo hokkii kam ɓeyngu ley leydi ndi torraami e muuɗum. 53Duuɓi haarannde leydi Misira jeɗɗi ɗiin kiɓɓi. 54Ndeen duuɓi rafo ɗiin puɗɗi hono no Yuusufi sapporinoo noon. Rafo ngoon waɗi ley leyɗe ɗeen fuu, ammaa ley leydi Misira fuu ko nyaametee ina woodi.
55Nde rafo ngoon sattunoo ley leydi Misira fu, yimɓe ɓeen fuu mbullitii Fira'awna ko nyaama. O jaabii Misirankooɓe fuu, o wi'i:
— Njehee to Yuusufi, ngaɗon ko wi'i on fuu.
56Ndelle, nde rafo ngoon hewtunoo leydi fuu ndeen, Yuusufi omti beembe mahanooɗe ɗeen fuu, ina soottira Misirankooɓe nguurey. Sabo rafo ngoon sattii ley leydi Misira. 57Yimɓe leyɗe goɗɗe fuu ina ngara Misira faa cooda nguurey e junngo Yuusufi, sabo rafo ngoon sattii ley adunaaru fuu.
Obecnie wybrane:
Fuɗɗoode 41: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
