Fuɗɗoode 34
34
Haala ko hewtii Dina
1Dina ɓii Leya debbo mo rimani Yaakuuba oon, yalti faa ndaara ɓiɓɓe rewɓe leydi ndiin. 2Sikem ɓii Hamor Hewinke laamiiɗo leydi ndiin yi'i mo, nanngi mo, fukkodii e makko e semmbe, tuunni mo, semtini mo. 3Sikem yiɗi Dina ɓii Yaakuuba debbo oon sanne. O yiɗi ɗum, o haaldi ɗum haalaaji belɗi. 4Sikem wi'i bammum Hamor:
— Ɗaɓɓanam suka debbo oon faa mi ɓaŋa.
5Yaakuuba nani Sikem tuuninii Dina ɓiyum debbo oon, tawi ɓiɓɓe muuɗum worɓe ndurowi dammuuli muuɗum. Yaakuuba deƴƴinii faa ɓe ngarti. 6Hamor baaba Sikem yehi to Yaakuuba faa haalda e muuɗum. 7Nde ɓiɓɓe Yaakuuba njaanyunoo fu, nani haala kaan. Ɗum metti ɓe, ɗum haɓɓi ɓe ko'e sanne. Sabo Sikem fukkodake e ɓii Yaakuuba debbo, waɗii ko semtinii Israa'iila, ko haanaa waɗeede. 8Hamor wi'i ɓe:
— Sikem ɓiyam gorko ina yiɗi suka mon oon sanne. Miɗo nyaagoo on kokkon mo o, o dewla. 9Ngaɗen dewle hakkunde men, kokkon min ɓiɓɓe mon rewɓe, onon du kooƴon ɓiɓɓe amin rewɓe. 10Njooɗodoɗon e amin, leydi ndii laatanoo on ngeɗu. Ngonon ley mayri, njuloɗon e mayri, keɓon du ngeɗu mayri.
11Sikem wi'i mawniraaɓe Dina e baaba muuɗum:
— Njardanee kam. Ko mbiiɗon fuu, mi hokkan on. 12Ƴamee kam futte e dokke keewɗe. Mi hokkan on ɗum fuu hono no mbiiruɗon noon, de kokkon kam suka debbo oon, mi dewla.
13Ɓiɓɓe Yaakuuba njaaborii Sikem e bammum Hamor hiila, sabo o tuuninii Dina, sakiike maɓɓe debbo oon. 14Ɓe mbi'i mo:
— Min mbaawaa hokkude sakiike amin debbo gorko mo taadaaki, sabo ɗum semtinan min. 15Ammaa miɗen mbaawi yardanaade on si on ngaɗii huunde wootere ndee: worɓe mon fuu taadee hono amin ni. 16Ndeen min kokkan on ɓiɓɓe amin rewɓe, minen du, min ɓaŋa ɓiɓɓe mooɗon rewɓe, min njooɗodoo e mooɗon, laatoɗen suudu baaba wooturu. 17Si on njaɓaay taadaade hono no min mbiiri on noon fu, min kooƴan sakiike amin debbo, min ndilla.
18Haala maɓɓe weli Hamor e ɓiyum Sikem. 19Ɓooyaay fey, suka jokolle oon waɗi ko wi'aa ɗuum, sabo imo yiɗi ɓii Yaakuuba debbo oon sanne. Tawi o tedduɗo sanne e ley suudu baabiiko. 20Hamor e ɓiyum gorko Sikem njehi faa dammbugal huɓeere muɓɓen, kaaldi e worɓe huɓeere ndeen, mbi'i:
21— Yimɓe ɓeen na ngoodi jam. Accen ɓe njooɗoo e leydi men, ɓe njuloo e mayri. Leydi ndii ina yaaji, ina heƴa en fuu. Ɓaŋen ɓiɓɓe maɓɓe rewɓe, enen du, kokken ɓe ɓiɓɓe men rewɓe. 22Ammaa ɓe njaɓataa njooɗodoɗen faa laatoɗen gootum si wanaa worɓe men fuu taadoo hono no ɓe taadorii noon. 23Si en ngaɗii noon, wanaa dammuuli maɓɓe e na'i maɓɓe e jawdi maɓɓe fuu laatoto halal meeɗen? En njaɓa ko ɓe mbi'i, ɓe njooɗodoto e men.
24Yimɓe tawaaɓe e dammbugal huɓeere ɓeen fuu njaɓi haala Hamor e ɓiyum gorko Sikem. Worɓe tawaaɓe toon ɓeen fuu taadii.
25Balɗe tati caggal ɗuum, iɓe keddii iɓe naawee saabe taadagol ngool. Nyannde ndeen, ɓiɓɓe Yaakuuba ɗiɗo, Simeyon e Lewi, mawniraaɓe Dina, kooƴi kaafaaje muɓɓen, naati huɓeere ndeen, kippii nde ley cuccukka de mbari worɓe ɓeen fuu. 26Hamor e ɓiyum Sikem du mbardaa kaafaahi. Ɓe adi Dina ley suudu Sikem, ɓe ndilli. 27Caggal ɗuum, ɓiɓɓe Yaakuuba fuu caami e nawnaaɓe ɓeen, ɓe koni huɓeere ndeen, ɓe njomnitii ko sakiike maɓɓe debbo tuuninaa ɗuum. 28Ɓe kooƴi huunde fuu ko huɓeere ndeen woodi, dammuuli e na'i e araaji e ko tawaa ley gese fuu. 29Ɓe adi jawdi e sukaaɓe e rewɓe e ko woni ley cuuɗi fuu.
30Yaakuuba wi'i Simeyon e Lewi:
— On torrii kam, on ngaddanii kam wanyeede ley Kanaaninkooɓe e Perisinkooɓe ɓeen. Miin yimɓe seeɗa tan njogiimi. Si ɓe kawritii, ɓe ummanake kam, ɓe kippake kam fu, mi halkan miin e ɓaade am fuu.
31Simeyon e Lewi njaabii, mbi'i:
— Yalla sakiike amin debbo ina jeyi ndaardeede hono woykuuru naa?
Obecnie wybrane:
Fuɗɗoode 34: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
