Fuɗɗoode 31
31
No Yaakuuba doggiri to Laban
1Yaakuuba nani ɓiɓɓe Laban ina mbi'a:
— Yaakuuba teetii ko baaba meeɗen jeyi fuu. Wo ley jawdi baabii en o heɓiri jawdi ndii fuu.
2Yaakuuba taykii ko Laban waylitake, wanaa no worrunoo e muuɗum noon.
3Joomiraaɗo wi'i Yaakuuba:
— Yecca kootaa leydi maamiraaɓe maa, wuro baaba maa. Mi wondan e maaɗa.
4Yaakuuba neli noddanee Rahiina e Leya, ngara durdude baali muuɗum ley ladde toon.
5Yaakuuba wi'i ɓe:
— Mi yi'i baabii on waylitake, wanaa nii worrunoo e am. Ammaa Laamɗo baaba am ina wondi e am. 6Oɗon anndi mi golliranii baammon haddu semmbe am fuu. 7Baaba mooɗon jambake kam, waylitii njobdi am kile sappo. Ammaa Laamɗo jaɓaay o torra kam. 8Nde o wi'unoo nyaawi laatoto njobdi am ndeen, dammuuli ɗiin fuu ndimi nyaawi. Nde o wi'unoo toddi laatoto njobdi am ndeen du, dammuuli ɗiin fuu ndimi toddi. 9Nii Laamɗo teetiri baabii on dammuuli muuɗum, de hokki kam.
10Wakkati tummbugol dammuuli, mi yi'ii e koyɗol, kalahali kubooji dammuuli ɗiin wo nyaawi e pantooji e toddi. 11Maleyka Laamɗo wi'i kam e ley koyɗol: «Yaakuuba!» Nootiimi.
12O wi'i: «ɓantu gite maa, ndaaraa! Kalahali be'i kubooji dammuuli ɗiin fuu wo nyaawi e pantooji e toddi. Sabo mi yi'ii ko Laban waɗi maa fuu. 13Miin woni Laamɗo ɓanganɗo ma Baytila, nokkuure ɗo ndarnuɗaa hayre miccinoore de njooruɗaa ɗum nebbam ndeen. Nokku ɗo kunaniɗaa kam ɗoon. Joonin, umma yaltu leydi ndi, njeccoɗaa leydi bammaa.»
14Rahiina e Leya njaabii, mbi'i:
— Yalla miɗen keddorii ngeɗu naa ndongu ley suudu baaba amin katin naa? 15Wanaa o ndaardii min hono jananɓe naa? Sabo o sonnii min, katin du o nyaamii ceede amin. 16Jawdi ndi Laamɗo teeti baaba amin ndiin fuu, enen e ɓiɓɓe men njeyi. Joonin, waɗu ko Laamɗo wi'i maa fuu.
17Ndeen Yaakuuba ummii, waɗɗini ɓiɓɓe muuɗum e rewɓe muuɗum geelooɗi. 18O soggi dammuuli makko fuu e ko o mari, ko o heɓi ley Padan-Aram fuu. O fonndii leydi Kanaana to baabiiko Isiyaaka. 19Tawi Laban yehi hesoyde baali muuɗum. Nde ɓe ndillannoo ndeen, Rahiina wujji tooruuji bammum.
20Noon Yaakuuba hiiliri Laban Aramanke, sabo o humpitaay ɗum o dillan. 21Yaakuuba hooƴi ko jeyi fuu, de doggi. O ummii o feƴƴiti maayo Efrat, o fonndii waamnde Galaad.
No Laban taayniri Yaakuuba
22Ley nyalooma tataɓo Laban humpitaa ko Yaakuuba doggii. 23Laban ummodii e sakiraaɓe muuɗum, ɓe taayniti mo. Ɓe njehiri balɗe jeɗɗi, de ɓe kewtii mo dow waamnde Galaad.
24Laamɗo ɓangani Laban Aramanke oon jemma ley koyɗol, wi'i ɗum:
— Tinna, taa mbi'aa Yaakuuba fay huunde, yalla ko wooɗi naa ko wooɗaa!
25Laban hewtii Yaakuuba, tawi Yaakuuba darnii hukum muuɗum dow waamnde ndeen. Laban e sakiraaɓe muuɗum du ndarni hukum muɓɓen dow waamnde Galaad toon.
26Laban wi'i Yaakuuba:
— Ɗume woni ko ngaɗuɗaa ɗuum? A jambake kam, a eggidii ɓiɓɓe am rewɓe hono wo kaafaahi konirɗaa de nannguɗaa ɓe. 27Ko waɗi ndoggirɗaa cuccukka, njambiɗaa kam, a humpitaay kam? Si a humpitinno kam, mi ɗowtirteno e seyo e jimi e tummbuɗe e kolli. 28A accaay kam fay mucciimi taaniraaɓe am worɓe e ɓiɓɓe am rewɓe faa mi waynoo ɗum'en. Joonin, a waɗii puuyndam. 29Miɗo waawi torrude on. Ammaa Laamɗo baabii on haaldii e am hankin, wi'i mi tinnoo taa mi wi'a Yaakuuba fay huunde, yalla ko wooɗi naa ko wooɗaa. 30Joonin, aan a dillii sabo a muuyii yeccaade suudu bammaa sanne. De ko saabii mbujjuɗaa tooruuji am?
31Yaakuuba jaabii Laban, wi'i:
— Mi hulu taa teetaa kam ɓiɓɓe maa rewɓe. 32Joonin mo tawruɗaa tooruuji maa ɗiin fuu wo bareteeɗo. Inan sakiraaɓe men ceedoo, fila ley gineeji amin ko njeyɗaa fuu, kooƴaa.
Tawi Yaakuuba anndaa ko Rahiina wujjii tooruuji Laban ɗiin. 33Laban naati hukum Yaakuuba e hukum Leya e hukum horɓe ɗiɗo ɓeen. O tawaay fay huunde toon. O yalti hukum Leya, o naati hukum Rahiina. 34Tawi Rahiina kam hooƴunoo tooruuji ɗiin, watti ley kirke ngeelooba de jooɗii dow majji. Laban filii ley hukum oon fuu, de yi'aay fay huunde.
35Rahiina wi'i bammum:
— Taa joomam tikka, ko mi waawaa ummaade mi daroo yeeso muuɗum ɗuum, wo saabe al'aada rewɓe ina woni e am.
Noon Laban filorii tooruuji ɗiin de yi'aay ɗi. 36Wakkati oon Yaakuuba mettaa de haɓi e Laban. Yaakuuba wi'i mo:
— Ɗume ngaɗumi? Hakke oye ngaɗumi de ɓernuɗaa, tannyuɗaa kam? 37A ndaarii ley gineeji am fuu, gineeji suudu maa ɗiye tawɗaa toon? Wurtin ɗi yeeso yimɓe am e yimɓe maa, faa ɓe caroo hakkunde meeɗen, enen ɗiɗo. 38Joonin, duuɓi noogay miɗo wondi e maa. Mbaala maa naa mbeewa maa fuu ɗalaay. Mi nyaamaay njawdiri maa fay ngootiri. 39Mi wartiranaay ma fuu ko kulle ladde mbari. Si ɗum waɗii du, wo miin yoɓata. Jemma e nyalooma fuu a horii kam yalla won ko wujjaa faa njomnoɗaa kam. 40Nyannde fuu, nguli na torra kam, jemma du wo jaangol. Ɗoyngol dilli e gite am. 41Joonin duuɓi noogay ngonumi ley suudu maa. Mi gollanii ma duuɓi 14 saabe ɓiɓɓe maa rewɓe ɗiɗo ɓe. Mi gollanii ma duuɓi jeegom saabe dammuuli maa. Wooɗi du, a waylitii njobdi am kile sappo. 42Si wanaa Laamɗo wondunoo e am, joonin a yoppanno kam junngo ɓolo. Kanko woni Laamɗo baaba am, Laamɗo Ibrahiima, Laamɗo mo Isiyaaka hulannoo oon. Laamɗo ƴeewii torra am e tampiri am de walli kam jemma hankin.
Aadi hakkunde Yaakuuba e Laban
43Laban jaabii Yaakuuba, wi'i:
— Ɓiɓɓe rewɓe ɓeen wo ɓiɓɓe am, ɓiɓɓe maɓɓe du wo taaniraaɓe am. Daabaaji ɗiin wo daabaaji am. Ko nji'uɗaa ɗoon fuu, wo miin jeyi. Ɗume mbaawumi waɗude ɓiɓɓe am rewɓe ɓeen e ɓiɓɓe muɓɓen? 44Wooɗi joonin, war faa ngadden aadi enen ɗiɗo, ndarnen seedee hakkunde men.
45Yaakuuba hooƴi hayre, darni nde faa nde laatoo maande miccinoore.
46Yaakuuba wi'i koreeji muuɗum:
— Kawrondinee kaaƴe.
Ɓe kawrondini kaaƴe faa waɗi joorde de ɓe nyaami dow majje.
47Laban inndiri nokku oon Yegar-Sahaduta, Yaakuuba du inndiri ɗum Galet#31:47 Maanaa inɗe ɗiɗi ɗeen woni «Joowre seedaaku»..
48Laban wi'i:
— Joorde kaaƴe ndee seedoo hakkunde men hannden.
Ɗum waɗi de nokku oon inndiraa Galet. 49Ɓe inndiri ɗoon katin Mispa#31:49 Maanaa Mispa e Ibraninkoore woni haybirde., sabo Laban wi'i:
— Joomiraaɗo haybu hakkunde men, enen ɗiɗo, nde ceeduɗen fuu. 50Si a torrii ɓiɓɓe am rewɓe ɓe, naa a nawlirii ɓe, fay si fay gooto yi'ataa ma, anndu, Laamɗo wo seedee hakkunde men.
51Laban wi'i Yaakuuba:
— Ndaar joorde kaaƴe ndee, ndaar hayre miccinoore nde ndarnumi hakkunde men, enen ɗiɗo. 52Joorde kaaƴe ndee e haayre miccinoore ndee fuu wo seede. Mi faltataako joorde ndee faa mi waddane torra, aan du a faltataako joorde ndee e maande miccinoore ndeen faa ngaddanaa kam torra. 53Laamɗo Ibrahiima e Laamɗo Nahor e Laamɗo baabiiɓe saroo hakkunde men.
Yaakuuba hunorii innde Laamɗo mo bammum Isiyaaka hulata oon. 54Ndeen Yaakuuba hirsani Laamɗo kirsamaari dow waamnde ndeen. O noddi sakiraaɓe makko faa ɓe nyaama. Ɓe nyaami, ɓe mbaali dow waamnde toon.
Obecnie wybrane:
Fuɗɗoode 31: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
