Fuɗɗoode 23
23
No Ibrahiima soodiri saabeere Saaratu
1Saaratu wuuri duuɓi 127. 2O maayi Kiriyat-Arba, ɗum woni Heberon, ley leydi Kanaana. Ibrahiima woyi mo. 3Ibrahiima ummii dilli to maayɗo muuɗum oon, yehi haaldowi e Hittiyankooɓe wi'i ɗum'en:
4— Mi janano hakkunde mooɗon, wo mi beero Coonniree kam saabeere ley nokkuure mon faa mi mooɓa maayɗo am.
5Hittiyankooɓe ɓeen njaabii Ibrahiima, mbi'i:
6— Joomii amin, hettindana min. Wo a neɗɗo Laamɗo tedduɗo hakkunde amin. Mooɓu maayɗo maa ɗo ɓuri wooɗude ley caabeeje amin ɗee fuu. Fay gooto amin haɗataa ma mooɓude maayɗo maaɗa ley caabeeje muuɗum.
7Ibrahiima ummii, hippii yeeso Hittiyankooɓe, jeyaaɓe e leydi ɓeen. 8O haaldi e muɓɓen, o wi'i:
— Si on njaɓii mi mooɓa maayɗo am fu, nanee ko ŋaarotoomi on. Kaaldanee kam e Eforon, ɓii Sohar oon. 9Mbi'on ɗum soonnira kam loho muuɗum mo waamnde Makpela. Loho koon na woni keerol ngesa makko toon. Mi yoɓan ceede makko fuu yeeso mooɗon, ko laatanoo kam nokku caabeeje mo njeymi.
10Tawi Eforon Hittiyanke oon na tawaa hakkunde sakiraaɓe muuɗum jooɗiiɓe ɗoon. O ɓanti daande makko o jaabii Ibrahiima faa Hittiyankooɓe tawaaɓe dammbugal huɓeere ndeen fuu nani. O wi'i:
11— Wanaa noon, Joomam! Hettindanam! Ngesa ngaan, mi hokkii ma ngaa yeeso yimɓe am. Loho wonko e magga koon du, mi hokkii ma ɗum. Mooɓu maayɗo maa!
12Ibrahiima hippii yeeso yimɓe laamorde ndeen katin, 13haaldi e Eforon faa yimɓe laamorde ndeen fuu nani. O wi'i:
— Si a jaɓii fu, kettindanoɗaa kam. Mi hokkete coggu ngesa ngaan. Njaɓaa ɗum e junngo am tafon de mi mooɓa maayɗo am.
14Eforon jaabii Ibrahiima, wi'i:
15— Joomam, hettindanam! Ceede leydi ndiin na hewta buuɗi cardi 400, ammaa ɗuum wanaa faa'e hakkunde am e maaɗa? Ndelle mooɓu maayɗo maa oon.
16Ibrahiima faamri e Eforon. O hiisanii ɗum ceede ɗe wi'i ɗeen yeeso Hittiyankooɓe fuu: buuɗi 400, ko hawrata e fonndirde luumotooɓe. 17Ibrahiima soodi ngesa Eforon goonga ɗakkol Makpela, lettugal Mamre ngaan, kanga e loho wonko e magga koon, e leɗɗe gonɗe ley ngesa ngaan, e gonɗe faro keerol magga ɗeen fuu. 18Ibrahiima soodi ɗum fuu yeeso Hittiyankooɓe e yeeso yimɓe tawaaɓe dammbugal huɓeere ndeen.
19Caggal ɗuum, Ibrahiima mooɓi Saaratu deekum oon ley loho ngesa Makpela lettugal Mamre, ɗum woni Heberon, ley leydi Kanaana. 20Ngesa ngaan e loho tawaako e magga koon fuu coodaama e juuɗe Hittiyankooɓe, ɗum laatii caabeeje ɗe Ibrahiima jeyi, faa heɓa ɗo mooɓa maayɓe muuɗum.
Obecnie wybrane:
Fuɗɗoode 23: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
