Fuɗɗoode 22
22
No Laamɗo ndaartindorii Ibrahiima
1Caggal ɗuum, Laamɗo ndaartindii Ibrahiima, wi'i ɗum:
— Ibrahiima!
O jaabii, wi'i:
— Inani kam!
2Joomiraaɗo wi'i o:
— Adu Isiyaaka, ɓiya korsuɗo mo njiɗɗaa sanne oon, njahaa leydi Moriya, ngaɗaa mo sadaka buleteeɗo dow waamnde mawnde nde kollanmaami ndeen.
3Ibrahiima dawi gilla subaka kecco, seeli leɗɗe duppirteeɗe sadaka, rimndi araawa muuɗum de yaadi e gollooɓe muuɗum ɗiɗo e Isiyaaka ɓiyum oon. O yehi nokku to Laamɗo sifanii o oon. 4Nyalooma tatoɓo, Ibrahiima ɓanti gite muuɗum de yi'i nokkuure ndeen to woɗɗi. 5Ibrahiima haaldi e gollooɓe muuɗum ɓeen, wi'i:
— Keddee ɗoo, onon e araawa ngaan. Miin e suka o, min ƴeeŋan faa dow toon, min cujidana Laamɗo, de min ngarta.
6Ibrahiima hooƴi leɗɗe sadaka ɗeen, ronndini Isiyaaka ɓiyum oon. Imo tiigii e junngo makko yiite e laɓi iɓe njaha kamɓe ɗiɗo. 7Ndeen Isiyaaka haaldi e bammum Ibrahiima, wi'i ɗum:
— Abba!
O jaabii:
— Inani kam, suka am.
O wi'i:
— Inan yiite e leɗɗe, de toy jawgel buleteengel ngeel le woni?
8Ibrahiima jaabii, wi'i:
— Suka am, Laamɗo hokkan jawgel duppeteengel ngeel.
Ɓe njokki laawol maɓɓe iɓe njaha. 9Nde ɓe njottinoo nokku ɗo Laamɗo sifanii o ɗoon fu, Ibrahiima nyiɓi sakkirde. O hawrondini leɗɗe ɗeen. O haɓɓi Isiyaaka ɓiyiiko oon, o yowi ɗum dow leɗɗe sakkirde ndeen. 10Ibrahiima foorti junngo muuɗum, hooƴi laɓi faa hirsa ɓiyum oon. 11Ammaa wakkati oon, Maleyka Joomiraaɗo ƴeewnii illa dow kammuuli, noddi mo wi'i:
— Ibrahiima! Ibrahiima!
O jaabii, o wi'i:
— Inani kam!
12Joomiraaɗo wi'i:
— Taa junngo maa yottoo suka oon! Taa ngaɗaa mo fay gootum, sabo joonin kaa, mi annditii wo a kuloowo Laamɗo. A salanaaki kam ɓiya korsuɗo gooto mo njogiɗaa oon.
13Ibrahiima ɓanti gite muuɗum de yi'i njawdiri, luwe muuɗum na ngadii e wuumoore. O yehi o nanngowi ndi, o waɗani Joomiraaɗo sadaka buleteeɗo, lunnde ɓiyiiko oon. 14Ibrahiima inndiri nokkuure ndeen «Joomiraaɗo hokkan». Faa hannden nokku oon noon inndirtee «Dow waamnde nde Joomiraaɗo hokkata.»
15Katin Maleyka Joomiraaɗo noddi Ibrahiima illa dow kammuuli.
16O wi'i:
— Inan konngol Joomiraaɗo: «Mi hunorake e innde am, saabe ko ngaɗuɗaa ɗuum, a salanaaki kam ɓiya gooto korsuɗo mo njogiɗaa oon, 17mi barkinte, mi ɗuuɗinan ƴuwdi maa hono koode kammu, hono gabbe njaareendi daande maayo. Ƴuwdi maa ronan galluuje wayɓe muuɗum. 18E ƴuwdi maaɗa lenyi duuniyaaru fuu keɓirta barke, sabo a ɗowtanake konngol am.»
19Ibrahiima yeccii to gollooɓe muuɗum toon. Ɓe ummii, ɓe kooti Beerseba sabo toon Ibrahiima jooɗinoo.
Haala ƴuwdi Nahor
20Caggal ɗuum, Ibrahiima humpitaa, wi'aa:
Inan Milka du rimanii Nahor minya gorko oon ɓiɓɓe worɓe: 21Us afo makko e Buus minyum, e Kemuwel baaba Aram. 22O rimanii oon katin Keset, e Hajo, e Pildas, e Yidilaf, e Betuwel.
23Betuwel du rimi Rebeka. Ɓe njeetato Milka rimani Nahor minyoo Ibrahiima. 24Korɗo naattaaɗo Nahor bi'eteeɗo Reyuma oon du rimani ɗum Teeba e Gaham e Tahas e Maaka.
Obecnie wybrane:
Fuɗɗoode 22: FBF
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© SIM International 2012, 2022
