Luka 23
23
Jesu mahoni ga Pilato
(Matewu 27:1-2,11-14; Marko 15:1-5; Johane 18:28-38)
1Vatshavbo va di khuga, va mu yisa ga Pilato. 2Va di phela gu mu ketsari, khavo: “Hi mane oyu mwama na gu kutsedzela vathu gu wugela mufumo, khuye: Mu nga livbini khupho ga Sezari, ni gukhuye uye kamwe khuye mufumeli Kristo.” 3Pilato a di mu wudzisa, khuye: “Ina kamwe uwe khuwe Mufumeli wa Vajudha, gani?” Jesu a di mu hakha, khuye: “Khidzo uwe u ganelago.” 4Khavbo avbo, Pilato a di embela vakhongolo nya vaphasi ni gidzemo, khuye: “Gimwalo gihoso nyi gi manago ga muthu yoyu.” 5Aholu avo va di simamisa, khavo: “Uye a ngu kutsedzela vathu Judheya gwatshavbo khiso a hevbudzago gukhugela Galileya kala omu.” 6Na pwide esi, Pilato a di va wudzisa, khuye: “Khandri Mugalilewu muthu yoyu, gani?” 7Na dzitide nya gukhuye a gu dugela tigoni ga Herodhi, a di mu rumela ga Herodhi, a nga bani a romo nuye Jerusalema matshigu yale.
Jesu mahoni ga Herodhi
8Herodhi, na wonide Jesu, a di tala khu gutsaka, kholu matshigu nya gulaphe na guvbweta gu mu wona, khu kotani nya ndruma a nga yipwago. A di khuye mwendro a na gira giliwugiso nya gukari mahoni gwaye. 9A di mu wudzisela silo nya singi, aholu Jesu kha nga mu phindrula gilo. 10Vakhongolo nya vaphasi nya mhamba ni vahevbudzi nya Nayo va nga bani va romo avbovbo, va di simamisa gu mu ketsari. 11Herodhi ni masotshwa yaye, na mu kasuwaride ni gu mu hembulula, a di ruma gu mu bweledza ga Pilato na ambagisidwe libhadzi nya gumbure ngudzu. 12Litshigu lolo, Herodhi ni Pilato va di khala va na pari ni pari, kholu va di si pwanani.
Nyaluphye mahoni ga Pilato
(Matewu 27:15-26; Marko 15:6-15; Johane 18:39—19:16)
13Pilato a di tshanganisa vakhongolo nya vaphasi nya mhamba, vafumeli ni vathu vatshavbo, a va embela, khuye: 14“Mu nyi resede muthu yoyu kha nga moyo a gimbilago a kutsedzela vathu. Nyi mu wudziside mbeli gwanu, kha nya mana gwaye ni gihoso gimwegyo mu gukhenu giride. 15Herodhi nuye, kha mu mana ni gihoso, kha nga olu a mu bweledzidego avba. Kha nga mu wonago, uye mwalo nandru nya guyele gu songwa. 16Khu kharato, nyi na mu tsayisa, nyi mu diga a hongola.” 17[Myaga yatshavbo khu gikhati nya Phasika, Pilato a diri ni giolovedzo nya gu va tshulele gibotshwa gimwegyo.] 18Vatshavbo va di gulumela, khavo: “Songa mwama yoyo, u hi tshulele Bharabhasi!” 19Bharabhasi yoyu, a di khothedwe khu litunga a nga wusago dhoropani, ni kotani a nga songa muthu. 20Pilato a di ganela navo nyaluphye, na gu zama gu vbanyisa Jesu. 21Aholu avo va di gulumela, khavo: “Mu khokhothele! Mu khokhothele!” 22Pilato a di va wudzisa nya wuraru, khuye: “Gighoho muni a gu nagyo? Gi mwalo nyi gi manidego gwaye gi lombago gu a songwe. Khu kharato, nyi na mu tsayisa, nyi mu diga a hongola.” 23Aholu avo va di simamisa gu lomba, na va gulumela, khavo: “A na khokhothedwe!” Ligwaha lawe li diya na li gu engedzelana khu tshivba ni tshivba. 24Khavbo avbo, Pilato a di ruma khuye gu girege gugola gwawe. 25Kha nga gu lomba gwawe, a di tshula wule a nga bani a khothedwe khu mayunga ni wughevenga, a va ningedza Jesu va gira gugola gwawe khu uye.
Gukhokhothedwa ga Jesu
(Matewu 27:32-44; Marko 15:21-32; Johane 19:17-27)
26Na va gu hongola naye, va di gurumedza mwama moyo nya gupwani khu Simoni wa Sirene, a nga bani a gu wuya khu gundze, va mu rwega gihambano, a gu landra khu hwane ga Jesu. 27A di landrwa khu mwandra nya vathu ni vanyamayi nya gukari va nga bani va gu lila khu gu mu pwela wusiwana. 28Jesu a di thendregedza, a va embela, khuye: “Sagadzyana sa Jerusalema, mu nga lilini khu kotani yangu; dzi lileleni wutumbu wanu ni gu lilela sanana sanu; 29kholu ma nguta matshigu va na gu ganelago, khavo: Va kategide vanyamayi va ngamba velega sanana, ni vale va ngamba mamisa. 30#Wona gambe: Gutu 6:16. Gikhati gyogyo va na embela sigomo, khavo: ‘Hi thegeleni.’ Va na embela sigomwana, khavo: ‘Hi sihaledzeni!’ 31Kholu, ambari nya gukhuwe simbo nya gunagane va wu girago kharati, a hati uwo nya gubange wu na girwa kharini?”
32Va di gu yisa niso sighevenga sivili, gasi guya songwa naye. 33Na va vbohide wulanga wu ranwago wulanga nya girwarwa, va di mu khokhothela vbagihambanotunu uye ni sighevenga sile sa sivili, gimwegyo khu nyamudye, gimbe khu nyambade. 34#Wona gambe: Dzind 22:18. Jesu a di khuye: “Baba, va tsetselele, kholu kha va giti igyo va girago.” Khavbo avbo, va di kabana dzingandzu dzaye, khu gu gira nyatumbatumbane. 35Vathu va di khala vbale va wona; gasi vakhongolo vakone va di mu vala, khavo: “Vbanyiside vakwawe; a na dzi vbanyise abune, a gu bani ari uye Kristo, Gihathwa gya Nungungulu!” 36Masotshwa nayo ma di mu kasuwari, ma mu yela, gasi guya mu ninga ginageri. 37Ma di khayo: “Wa gu bani uri uwe Mufumeli wa Vajudha, nga dzi vbanyisa wabune!” 38Khu vbatshani gwaye gu di lovidwe milowo khu gigereki ni Gihebheru, pwani: “OYU KHU MUFUMELI WA VAJUDHA.”
39Gimwegyo nya sighevenga sile si nga bani si khokhothedwe naye gi di mu vala, khigyo: “Gasi khandruwe Kristo, uwe, gani? Ina ka, dzi vbanyise wabune, gumogo ni gu hi vbanyisa nethu.” 40Aholu gimbe, na gi khuside lito, gi di mu kawuka, khigyo: “Ina uwe khu thavi Nungungulu. Olu u nga lamuledwa gu songwa naye, gani? 41Nari nya nga ethu, ha gu tshanisekela gilo nya gu giti kholu ha gu hakha tsayiso nya mithumo yathu. Gasi uye gi mwalo gighoho a giridego.” 42A di engedza, khuye: “Jesu, nyi dundruge gikhati u na gu belago mufumoni wago.” 43Uye a di mu hakha, khuye: “Muhuno olu u na bani uri ni eni Ndzadzini.”
Gufa ga Jesu
(Matewu 27:45-56; Marko 15:33-41; Johane 19:28-30)
44Khumo nya midiya, gi di manega gidema tigoni gwatshavbo, kala ni silambo khu 15 wora kholu lidambo li di tshiredzidwe. 45#Wona gambe: Eks 26:31-33. Mwendra nya makhuvi nya Nyumba ya Nungungulu wu di pferuga khu vbakari. 46#Wona gambe: Dzind 31:5. Jesu a di khusedza lito khu tshivba ni tshivba, khuye: “Baba, mandzani gwago nyi ngu ningela hefemulo wangu.” Na ganede esi, a difa.
47Muthangeli nya lizana masotshwa a nga bani a romo vbale, na wonide iso si nga bani si dugelela, a di dhumisa Nungungulu, khuye: “Khu lisine oyu a diri muthu nya gululame!” 48Vathu vatshavbo va nga wonago gusaniseka gwatshavbo ga Jesu, na va wona iso si nga bani si dugelela, va di hongola gaya na va gu dzi laya. 49#Wona gambe: Luk 8:2-3. Vatshavbo vale va nga bani va tivana naye, gumogo ni vanyamayi vale va nga mu landrelago gukhugela Galileya, va di khala khu hwindzo, va khedzisela satshavbo.
Gudzingwa ga Jesu
(Matewu 27:57-61; Marko 15:42-47; Johane 19:38-42)
50A diromo mwama moyo nya gupwani khu Josefe, a nga bani ari moyo nya madhota, a nga bani ari muthu nya ndruda ni gululama. 51Kha nga nengela khiso si nga hungwago ni gu girwa khu vakwawe. Adiri givelegwa gya Arimateya, lidhoropa nya Vajudha, a di gu lindrela Mufumo wa Nungungulu. 52A di hongola ga Pilato aya lomba girumbi gya Jesu; 53na gi tsheside khu vbagihambanotunu, a di gi fumbela khu mwendra, a gi dzinga thowoni li nga bani li kedwe giwindrini, umo gu nga bani gu si gu dzingwi muthu. 54Gu diri litshigu nya gudongisele, ni wutshigu wakone nya gupile Sabhadho.
55Vanyamayi va nga bani va dzude ni Jesu khu Galileya va di landrisela Josefe, va guti lithowo ni gu wona idzo gi nga bani gi ladzisidwe khidzo girumbi gyaye. 56#Wona gambe: Eks 20:10; Dhet 5:15. Na va wide gaya, va dita dongisela mafura. Khu Sabhadho va di hefemula, kha nga guruma nya Nayo.
Obecnie wybrane:
Luka 23: BGE2014
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
A Bíblia em Gitonga © Bible Society in Mozambique, 2014.
