Luka 22

Vajudha va ngu hunga gikungo nya gusonge Jesu

(Matewu 26:1-5,14-16; Marko 14:1-2,10-11; Johane 11:45-53)

1Wu di gu hidzimela buzo nya Sibaba nyambana mela, wu ranwago buzo nya Phasika. 2Vakhongolo nya vaphasi nya mhamba ni vahevbudzi nya Nayo va di vbweta lipindru nya gusonge Jesu, aholu va di gu thava gidzemo. 3Sathane a di bela khu ga Judha, a ranwago Sikarioti, a nga bani ari moyo nya vale nya likhumi na vavili. 4A diya ganela ni vaphasi, gumogo ni dzindruna va hevbula mano nya guningele khayo Jesu. 5Avo va di nengela, va gu mu thembisa gu mu ninga dzitsapawu. 6Judha a di bonga, a gu vbweta gikhati nya gyadi nya gu mu ningele khigyo, nyamba tidwa khu gidzemo.

Gudongisedwa nya gilalelo nya guhegise

(Matewu 26:17-25; Marko 14:12-21; Johane 13:21-30)

7 # Wona gambe: Eks 12:1-27. Na li vbohide litshigu nya sibaba nyambana mela, a nga bani ari litshigu nya gusongwe ginvutana. 8A di ruma Pedro ni Johane, khuye: “Indrani muya hi dongisela iso si vbwetegago gasi hi hodze Phasika.” 9Va di mu wudzisa, khavo: “Wa guvbweta khuwe hiya dongisela hayi?” 10A di va hakha, khuye: “Gikhati mu na belago dhoropani, mu na tshangana ni mwama nari ni kanvu nya mati. Mu landreni kala ndrangani a na belago, 11muya embela mune ndranga, khenu: Pfhumu a hi rumide guta gu wudzisa: Khu yevbini nyumba nyi na hodzelago umo nvutana nya Phasika ni vapizane vangu? 12A na mi yeyedzani nyumba nya yikhongolo yi gomo gitezi, umo mu na guya manago na gu ladzidwe. Dongiselani umo.” 13Va di hongola, vaya mana satshavbo kha nga idzo a nga va embelago khidzo. Va diya dongisela umo Phasika.

Gilalelo nya guhegise

(Matewu 26:26-30; Marko 14:22-26; 1 Vakorinto 11:23-25)

14Na gi vbohide gikhati, Jesu a diya khala vbamezatunu gumogo ni vapostoli, 15a gu va embela, khuye: “Nyi dogorede ngudzu gu hodza nanu Phasika yeyi na nyi si gu saniseki, 16kholu nyi ngu mi embelani, kheni: Kha nyi na yi hodza gambe, kala yi tadzisega Mufumoni wa Ndzadzini.” 17Na dzegide gikombe, a di bonga, khuye: “Dzegani, mu tshiyelana mwatshavbo. 18Kholu nyi ngu mi embelani nya gukheni kha nyi na sela gambe wadwa nya dziuvha kala wu vboha Mufumo wa Nungungulu.” 19Khavbo avbo, a di dzega gibaba, na gu bonga, a di gi kabanisa, a va ninga, khuye: “Egi givili gyangu, gi na ningedwago khu kotani yanu; girani esi khu gialakanyo gyangu.” 20#Wona gambe: Eks 24:6-8; Jer 31:31-34. [Hwane nya gilalelo, a di dzega gikombe, a gira idzosaye, khuye: “Gikombe gegi khya gidzumeledzwano nya giphya gi tiyiswago khu novba wangu, wu na vbaladzedwago enu.] 21Aholu, dzitini nya gukhenu uye a vbwetago gu nyi ningela nyi naye vbamezatunu vbavba! 22#Wona gambe: Dzind 41:9. A gu nari Mwamana wa Muthu, a na landrisa esi si hungidwego khu Nungungulu. Aholu libango li na ni wule a na mu ningelago!” 23Va di phela gu wudzisana, khavo: “Khu mani a vbwetago gu gira isoso?”

Khu wevbi a gu khongolo Mufumoni wa Ndzadzini

24 # Wona gambe: Mat 18:1; Mark 9:34; Luk 9:46. Vapizane va di phela gu ganedzisana, na va vbweta guti khu mani a gu khongolo vbakari gwawe. 25Jesu a di va embela, khuye: “Vafumeli nya mayigo va gu ma khozisa khu tshivba gambe avo va fumago khu gukhozisa va gu ranwa vafumeli nya wuhindzi.” 26Gasi vbakari gwanu gu nga giregi kharato; uye a gu khongolo a na khale kha nga mahegisela; ni uye a rumago kha nga uye a thumelago vakwawe. 27#Wona gambe: Joh 13:12-15; Mat 20:24-28; Mark 10:41-45. Gasi khu mani a gu khongolo: Uye a khalago vbamezatunu mwendro khuye a ningago guhodza, gani? Khu lisine khongolo khu wule a khalago vbamezatunu! Gani olu eni nyi womo vbakari gwanu kha nga wule a mi thumelago.

28Enu khenu mu nga nyi bangaladzani gikhati gyatshavbo gulingwani gwangu. 29Khu kharato, nyi na mi ningani mufumo kha nga Babe a nga nyi ningago neni, 30#Wona gambe: Mat 19:28. gasi mu hodze ni gu sela vbamezatunu nya buzo wangu. Mu na khalani vbasikhalotunu nya wufumu, mu lamula mahundzu yatshavbo ya Israyeli, nya likhumi na mavili.

Jesu a ngu tivisa Pedro khuye a na mu danga

(Matewu 26:31-35; Marko 14:27-31; Johane 13:36-38)

31Pfhumu a di embela gambe Simoni, khuye: “Simoni, Simoni, dziti nya gukhuwe Sathane a mi lombideni gasi gu mi vbevbera kha nga mavbila. 32Aholu eni nyi di lombelela khu uwe ga Nungungulu gasi gukhodwa gwago gusi rereki. Gani olu, gikhati u na vbindrugedzago uwe, u na tiyisa vandriyago.”

33Uye Simoni a di khuye: “Pfhumu, avba nyi guromo nyi sambanyide guya nago pasoni, ni gufani.” 34Jesu a di mu hakha, khuye: “Nyi ngu gu embela, Pedro: Kha na emba khonge muhuno nu si gu nyi dangi nyondro tharu.”

Gikhati nya gudwane

35 # Wona gambe: Mat 10:9-10; Mark 6:8-9; Luk 9:3; 10:4. Jesu a di engedza gambe, khuye: “Gikhati nyi nga mi rumelani nyambana gipatsi, nyambana rava, nyambana silato, gyomo gi nga mi kenelelago, gani?” Vapostoli va di hakha, khavo: “Gi mwalo gi hi keneledego.” 36A di engedza gambe, khuye: “Gasi olu, uye a gu ni gipatsi a na phare; nuye a gu ni rava a na phare nuye. Uye a gu mwalo litshari, a na rengise libhadzi gasi gu renga litshari limwedo. 37#Wona gambe: Isa 53:12.Kholu lisine nyi mi embelago kheli: Gu vbwetega si girege gwangu iso si ganedwago khu milowo, nya gupwani: ‘Sayedwe vbakari nya sighohi.’ Khu lisine, iso si nyi lindredego si ngu vbweta gu girega.” 38Va di khavo: “Pfhumu, khu ma woni matshari mavili aya.” Gasi uye a di va hakha, khuye: “Basi.”

Gusala ga Jesu Getsemani

(Matewu 26:36-46; Marko 14:32-42)

39Kha nga giolovedzo gyaye, a di duga a gu hongola gigomoni nya Miolivha. Vapizane va di hongola naye. 40Na va vbohide, a di va embela, khuye: “Lombelelani, gasi mu si beli gusengwani.” 41Khavbo avbo, a di leya vbadugwana, aya lombelela, khuye: 42“Baba, wa gu dzina nyi leyisele gikombe gegi nya wuvi. Ambari ulo, gu nga giregi guhaladza gwangu; aholu, ugo gwago.” 43Khavbo avbo, yi dita ngilozi khu Ndzadzini, gasi guta mu tiyisa. 44[Na gu tshaniseka ngudzu, a di simama gu lombelela, khu tshivba, na gu ruta lithonga nya nga madona nya makhongolo nya novba, ma gu thegela mafuni.]

45Na vbedzide gu lombelela, a di yela vapizane, a va mana na va lade khu madidikhana ni gu garadzega. 46#Wona gambe: Mat 26:47-56; Mark 14:43-50; Joh 18:1-11. A di va wudzisa, khuye: “Khu ginani mu lalago? Wugani, mu lombelela, gasi mu si beli gusengwani.”

Gumodwa ga Jesu

(Matewu 26:47-56; Marko 14:43-50; Johane 18:3-11)

47Jesu na nga guganela li di vboha lidhuma nya vathu, na li gu thangedwa khu moyo nya vale nya likhumi na vavili, nya gupwani khu Judha, a nga hidzimelago ga Jesu gasi guya mu bhejari. 48Khavbo avbo, Jesu a di mu wudzisa, khuye: “Judha, ina u ngu tiya gu ningela Mwamana wa Muthu khu gu mu bhejari, uwe?”

49Vapizane va nga bani va mu randrede, na va wone iso si nga bani si vbweta gu dugelela, va di mu wudzisa, khavo: “Pfhumu, hi dwana navo khu matshari, gani?” 50Moyo wawe a di bayisa githumi gya khongolo nya vaphasi nya mhamba a gu gi pila ndzeve ya nyamudye. 51Aholu Jesu a di va kawuka, khuye: “Basi! Va digeni.” A di phara ndzeve nya githumi a gi hawulugisa.

52Khavbo avbo, Jesu a di embela lidhuma latshavbo li nga yago gasi guya mu mola: Vakhongolo nya vaphasi, vathangeli nya Nyumba ya Nungungulu ni madhota, khuye: “Mu di donga matshari ni sighomba khwatshi mwa guta mola gighevenga! 53#Wona gambe: Luk 19:47; 21:37. Matshigu yatshavbo nyi diri nanu Nyumbani ga Nungungulu, kha mwa nyi mola! Gasi egi khigyo gikhati gyanu, a gu mufumo nya gidema.”

Gudanga ga Pedro

(Matewu 26:57-58,69-75; Marko 14:53-54,66-72; Johane 18:12-18,25-27)

54Khu vbale, va di dzega Jesu va gu hongola naye ndrangani ga khongolo nya muphasi nya mhamba. Pedro a di gu landra khu hwindzo. 55Kha nga ulo va nga bani va khondriside nilo vbakari nya ndranga, va wora, Pedro a diya khala nuye vbakari gwawe. 56Githumi gimwegyo nya nyamayi, na gi mu wone na khade na gu wora nilo, gi di mu khedza gwadi, khigyo: “Oyu nuye a diri naye.” 57Aholu Pedro a di danga, khuye: “Nyamayi, eni kha nyi muti.” 58Khadukhadu, mumbe gambe a di khuye: “Uwe nuwe u moyo wawe.” Gasi Pedro a di khuye: “Amasawu, kha nyi muti.” 59Na gu vbindride gipimo nya wora, mumbe gambe a dita temarisa, a ganela, khuye: “Khu lisine, oyu nuye a diri naye, gambe Mugalilewu nuye.” 60Pedro a di khuye: “Amasawu, kha nyi siti niso u ganelago.”

Gikhati gyogyo, na ngu gu ganela, wu di emba khonge. 61Pfhumu, na yi thendregedzide yi mu khedza mahoni, Pedro a di dundruga magana ya Pfhumu, gikhati yi nga mu embelago, khiyo: “Wu si gu embi khonge, u na nyi danga guraru.” 62A di duga vbavbandze aya lila khu wuvi waye watshavbo.

Jesu a ngu phela guvadwa

(Matewu 26:67-68; Marko 14:65)

63Gasi vale va nga bani va gu mu ghadha, va di mu vala ni gu mu sanisa. 64Va di mu tshika maho na va mu wudzisa, khavo: “Nga tumba! Khu mani a nga gu veta?” 65Va di mu vala khu simbe nya gutale.

Jesu a ngu lamudwa khu khongolo nya vaphasi nya mhamba

(Matewu 26:59-66; Marko 14:55-64; Johane 18:19-24)

66Na gugide, wu di girwa tshangano nya madhota, vakhongolo nya vaphasi nya mhamba, ni vahevbudzi nya Nayo. Va di dzega Jesu vaya naye phathani gwawe. 67Va di mu embela, khavo: “Hi embele lisine. Ina kamwe uwe khuwe Kristo, gani?” Uye a di va hakha, khuye: “Nya gu mi embelani, kha mu na khodwa; 68nya gu mi gira giwudziso, kha mu na nyi phindrula. 69Aholu Mwamana wa Muthu, gukhugela olu, a na khala nyamudye ga Nungungulu.” 70Vatshavbo va di mu wudzisa, khavo: “Sa gu yeyedza gupwani uwe u Mwamana wa Nungungulu, gani?” A di va hakha, khuye: “Mu ngu ganela, khenu kheni.” 71Khavbo avbo, va di khavo: “Hi na dzi garadzela gambe ginani khu gu vbweta dzifakazi? Hi mu pwide hatshavbo na gu ganela abune.”

Obecnie wybrane:

Luka 22: BGE2014

Podkreślenie

Udostępnij

Kopiuj