TEALIAN 9
9
Mian Bisa naperjanjian tukon Nuh
1 #
Tea. 1:28
Ko Mian Bisa balakaatiyo Nuh tukon nalabuk-labuk maka bantile, “Pomosuungokai pau tumbu mobadaang, sulano kopoo katulunan nadungoliyo posaapon kodunia. 2Sasaibino kotomisi tukon ikan maka iyayon bailon naikon matakutene ikoo. Yanila sasaibino daano doi mukuasa lalomo. 3Sasaibinodoo moola teali ikoo kaane, buno koidan kolobo motubo modaano kobukuno tukon saono; sasaibino doiya Yaku beekonggon sulano nateali mukinaan. 4#Basam. 7:26-27, 17:10-14, 19:26; Kua. 12:16, 23, 15:23 Komemeengo moaki namoola komuyu kaane doiyamo sail modaano kosauno, sabab doansaangoo daano doi saudoo lalomo. 5Sasamba komian tukon iyayon momangakate bangkapi naikon Yaku inukum mate. 6#Tea. 1:26; Tob. 20:13 Kobangkapi pinasitaka buno Yaku; tobikon doiya, indee komiano komo mangakate bangkapi, yana susuungo naikon bangkapi akateyo koidan.
7 #
Tea. 1:28
Oode, komiu sio pomosuung pau tumbu mobadaang sulano komu katulunan nadungoliyo posaapon kodunia.”
8Ko Mian Bisa bantile doi Nuh tukon nalabuk-labuk, 9“Diabudodoo Yaku mokubai perjanjian doikomiu tukon mukatulunan, 10tukon sasaibino komahluk motubo, doiyamo tomisi-tomisi tukon sasaibino koiyayon lipu, oode sasaibino komo tobuat luwedoi kapaloo polaing-laing tukon komiu. 11Naiyamo Daku perjanjian tukon komiu: Yaku paladandi baikon sasaibino komahluk motubo akimo naikon koidan nainakate tukon eaba. Akiyono naikon koidan koeaba momanase nadunia nia. 12Salaku paloosan perjanjian posidutukon, Yaku mokubaiyo tukon komiu tukon sasaibino komahluk motubo, 13maka kuabese Daku tandalo doi bunom buno pokakana Kupaloosan doi Kuperjanjian tukon dunia. 14Sasamba lunggon, kalu Yaku sunggupiyomo kotimbu tukon bunom, maka dotandalodoo tokitamo, 15Yaku naikon neneeke Daku perjanjian doikoo tukon doi sasaibino komahluk motubo, doiyamo baikon koeaba akimo naikon koidan naakateyo sasaibino komo tubo. 16Kalukai dotandalodoo tokitamo doi bunong, Yaku naikon kitayo tukon neneeke koperjanjian posidutukonoo antara Yaku tukon sasaibino komahluk motubo doi dunia. 17Doiyamo Daku perjanjian paloosano Yaku mobeekene doi sasaibino komahluk motubo doi dunia.”
Nuh tukon nalabuk-labuk
18Nuh nalabuk-labuk motobuat luwedoi kapaloo doiyamo Sem, Yafet tukon Ham. (Ham doiyamo Kanaan tamano.) 19Nuh napau motoluiladoo doiyamo sasaibino komian doi dunia nia naluwean.
20Nuh meeng komian mobatani, tukon yanamo kotumbe-tumbeno komo mokubai anggur asino. 21Salataa lapa Nuh inume kona anggur, yana teali malangu. Yana liate sasaibino konapakean maka yana moolo balalau doi nasandung lalomo. 22Salataa Ham, doiyamo Kanaan tamano, kitayo baikon kotamano motalalau, yana tobuat tukon popitoikene dolanggedoo doi utuso lua. 23Doibundu Sem tukon Yafet mangala meeng kojubah tukon sambekene doi yanila bengeno. Yanila ampakon batotonggulung usok doi sandungoo tukon yanila nggulosikene kotamano dojubahdoo. Yanila mbalenggene kodudusoila sulano naaki nakitayo dotamanoiladoo motalalau. 24Salataa Nuh toiyo kolipu luwedoi namalanguan tukon toiyo oila konapau pioto nakinubai doi yana butongo, 25yana bantile,
“Bobuntuso Kanaan!
Yana naikon teali ata mohina doi utus-utuso.
26Nggaale ko Temeneno, Sem na Mian Bisa!
Kanaan naikon teali Sem naata.
27Boliisi ko Mian Bisa nasuungiyo kobalakaat doi Yafet
tukon kabasale kona lipu dungolan.
Boliisi kona katulunan napodungoli tukon Sem nakatulunan.
Kanaan naikon teali Yafet naata.”
28Salataa lapa doeabadoo, Nuh daano motubo 350 kotaun, koidan. 29Yana mate kona umur 950 kotaun.
Obecnie wybrane:
TEALIAN 9: LAIBGZ
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
