TEALIAN 8
8
Eaba natadean
1Ko Mian Bisa aki natoliminggene Nuh tukon sasaibino koiyayon modaano mopolaing yana doi kapaloo lalomo. Mian Bisa kubaiyo puul kombombuul, tobikon dopaisudoo tambuuno momooti. 2Sasaibino kopaisu matano doi dunia taambikon doi bilit tukon sasaibino kopaisu tataapono doi timbu yana tutupemo. Koudan tade, 3tukon kopaisu polokon mooti. Sala lapa 150 kooloyo kopaisu akinduungo naatean koidan. 4Doi tanggal songulo pitu bituwon kopituno, keolo kapaldoo doi meeng kobunggul bunggono doi bunggul-bunggul Ararat. 5Paisu banggadudul mooti tukon doi tanggal meeng bituwon kosongulono tambuuno tokita, kobunggul-bunggul bunggulo.
6Lapa sangkapolono kooloyo, Nuh bukayo kokapal lolombongo meeng, 7tukon sodiiyo komeeng kotomisi gagak. Dotomisidoo akimo naabali doi kapal bai banggadudul benga dombalaa doisumai polong doeabadoo lapamo mooti tuuno. 8Lapa doiya, Nuh mosodii meeng kotomisi lapatiing sulano natingoniiyo oilakai dopaisudoo bisa molapamo mooti. 9Bai sabab kopaisu daano motutupiyo sasaibino kodunia bunggono, tomisi lapatiingoo aki namoposuunggon tampat sulano nasake. Maka dotomisidoo abali doi kapaloo; Nuh ulule kolimano maka babayo usok. 10Nuh totiili pitu kooloyo koidan, maka nasodiiyo dotomidoo lapatiing. 11Doi nakinobianan abalimo dotomisidoo doi yana makanggi meeng kozaitun lendeno doi suungo. Dia budodoo Nuh toiyomo baikon dopaisudoo lapamo mooti. 12Lapa totiili pitu kooloyo koidan, yana sodiiyo dolapatiingoo koidan; tukon doiya kosinggato dotomisidoo akimo naabali doi yana.
13Doi tempo Nuh naumur 601 kotaun, doi tanggal meeng bituwon komeengo, paisu lapamo mooti tuuno. Nuh bukayo kapaldoo atono, tukon kitayo potikunggon. Yana kitayo baikon kobuta bunggono lapamo motuul. 14Doi tanggal luakolono pitu bituwon koluano, dunia motuulo.
15Maka ko Mian Bisa bantile doi Nuh, 16“Tobuato luwedoi kapaloo polaing-laing tukon muboloki, mulabuk-labuk tukon napoo bolo-boloki. 17Kanggiyomo sasaibino kotomisi tukon iyayon bailon, babasal mau mopoipoisik, sulano napoo tosuungi badaang tukon nasasabul doi posaapon kobuta.” 18Maka Nuh tobuat doi kapaloo polaing-laing tukon naboloki, nalabuk-labuk tukon napoo bolo-boloki. 19Sasaibino kotomisi tukon iyayon doi lipu tobuat luwedoi kapaloo, suwe-suwele kokaliangano polaing pototongi.
Nuh sosubakene kona sosubakon
20Nuh mokubai meeng kobalabaan tuuk Temeneno. Yana alayo luwe memeeng kotomisi kaliangano tukon iyayon bailon mominoolakon, maka sosubakene buno sosubakon mosinua doi balabaanoo bunggono. 21Dososubakonoo boono mobabangi sanaanggene ko Temeneno noano, tukon yana bantile doi noano lalomo, “Yaku akimo naikon kukutukiyo koidan nadunia nia sabab bangkapi nakokubai; Yaku toiyo baikon salataa napaumalanean kobangkapi napikilanoo lokis. Yaku akimo naikon koidan kusilakayo sasaibino komahluk motubo buno domo sosodoan nia Yaku mokubai. 22Kalu nadunia nia daanoon, sidutu naikon daano kotempo pidokan tukon tempo abasan, tempo tolopot tukon tempo pital, tempo keas tukon tempo udan, oloyo tukon popook.”
Obecnie wybrane:
TEALIAN 8: LAIBGZ
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
