Matiu 18
18
Ihei vi Vora Tomuai?
(Mak 9.33-37; Luk 9.46-48)
1Lol mahavana gea ira roron̄tai ram mai aben Jisas, ram hudalinia be, “Ihei vi vora lavoa lol Ute Lavoa atamare?”
2Haḡe Jisas mwa uloi naturigi vwate vai abena, i mwa daria lol davolara, 3mwa bevea be, “Nam bev mwasigi lalai kimiu be gisav haroro te dum lol Ute Lavoa atamare, be gisav leahi tehe ba bora kun ira naturigi. 4Wani be mwa binihi bahivoinia i mwa lin̄ maḡemuinia kun naturigi uhu, kea vi vora tomuai abera lol Ute atamare. 5Be ihei tehe mwa lai ḡoḡo naturigi kungeki lol ihaku, mwa lai ḡoḡoau.
Kalkaliana be mwa Lol Atatu Ram Daturai
(Mak 9.42-48; Luk 17.1-2)
6“Be ihei vi lol vwate ninira naturirigi geki be nora binihimwasigi garagusi vi van dagai niniau, nu tavuha be vi vauhiana na vatu marahi la mwagorona ba bohainia lol tahi roro gim mwinu kaburai. 7Hahagavi maragai huri ureure, bwatuna kalkaliana abena mwa lol atatu nora binihimwasigi garagusi ram hovi! Kalkaliana kunia vi loli tagaro take hahagavi lalai wani gabe mwa lol atatu ram daturai!
8“Be limwamwa sage bwalagemwa mwa loligo nom binihimwasigi garagusi mwa hovi, tai n̄adua ba bohai kaburainia! Nu tavuha be gov haroro lol rahuana mai limwamwa sage bwalagemwa gaituvwa n̄an ninia be ras tu saraḡo i vi vohai kaburainigo vai lol gabin ron̄ḡagarasi vai tuai. 9Sa be matamwa mwa loligo nom binihimwasigi garagusi mwa hovi, lai dagainia ba bohai kaburainia! Nu tavuha be gov haroro lol rahuana mai mata gaituvwa n̄an ninia be ras tu saraḡo i vi vohai kaburainigo vai lol gabin ron̄ḡagarasi.
Avoan Dalogai huri Sipsip Nu Sala
(Luk 15.3-7)
10“Giv gitaḡoro be gisav vev te kaburai ihei ninira naturirigi kera geki. Nam bev mwasigi lalai kimiu be nora enjel amare ram du tagaro lolmatan Tamaḡu lol ute atamare. 11(Bwatuna inau, Nitun Atatu, nam mai be namen varahura be ram sala.)
12“Gim binihi haninia? Wani bilan sipsip vudolua vi lol havanau mahavana bilan sipsip vwate mwa sala? Mwa du be vi lin̄ira n̄avul gaisivo domwan gaisivo hurin vusi i vi hiḡe gaituvwa be nu sala. 13Nam bev mwasigi lalai kimiu be, mahavana be mwa habwea, mwa samsamwara maragai huri sipsip gaituvwa gea nin sipsip n̄avul gaisivo domwan gaisivo be ram hav sala tehe. 14Kunia mulei, Tamamiu lol ute atamare mwa hav doron tehe be vwate ninira naturirigi geki vi sala.
Hano Gov Lolia Lalai Tuamwa be vi Vuroga Lalainigo
15“Be tuamwa mwa buroga lalainigo, goi van abena ba seserai non vahalana. Itake gov lol dahulinia, mahavana kimiru gahemiru. Be vi ron̄ogo, kunia gom lai mulei tuamwa. 16Ta be mwa hav ron̄ogo tehe, gov lai atatu gaituvwa sa gairua maigo, be rav tura nom avoana. Geki kun Ravrava Sabuga mwa bevea be ‘Avoan ivwalui duluai rav tu gin avoana non nom atat gaitura gairua sage gaitolu.’ 17Ta be mwa hav ron̄ora te radu, kadogaha vi seseraiana lalai Uloilua. Ataguna gea, be mwa hav ron̄ te Uloilua, gov lolia kun gabe kea len̄len̄aga sage harahara homu.
Tataro be Ram Bulu Aluna
18“Nam bev mwasigi lalai kimiu, ginau gabe giv visigai ginia lol ureure geki, vi visigai ginia mulei lol ute atamare. I ginau gabe giv mahin̄ainia lol ureure, vi mahin̄ainia mulei lol ute atamare.
19“Nam bevea mulei lalai kimiu be atatu gairua abemiu lol ureure ramuru binihi haragaituvwa huri havanau ramuru navohi huria, Tamaḡu lol ute atamare vi laia lalainira. 20Bwatuna atatu gairua sa gaitolu ram ḡoḡo lol ihaku, inau nam dogo bul maira.”
Avoan Dalogai huri Atatun Rovoga ba mwa Hav Vinihi te Kaburai Vuron non Buluana
21Pita mwa mai aben Jisas, mwa hudalinia be, “Ratahigi, be tuaku mwa buroga maiau tagaro, mwa du lalaiau be nai vinihi kaburai vurona vaviha? Vabitu?”
22Jisas mwa bevea be, “Sigai, mwa hav vora te gaibitu, take vabitu van̄avul gaibitu. 23Bwatuna be ute Lavoa atamare kun geki. Lavoa vwate mwa doron be vi gita bugun non atatun rovoga. 24Mahavana mwa si vavora mwa dau bwatuna, ram lai atatun rovoga vwate vai abena gabe nu vuroga gin vatu tari ivusi. 25Take si hav lol te dum buguna. Kunia, non ratahigi mwa hora be vi salei atatun rovoga gea mai tasalana i ira nituna, rav lol rovoga vuroi, tavwe sigai, i mulei vi salei non viloḡoana duluai, huri buguna. 26Atatun rovoga gea mwa sisiabwau ḡoro non ratahigi, mwa hudalinia be, ‘Gov ron̄ mwan̄avaiau, vava nav lol kaburai buguku lalainigo.’ 27I kunia, lavoa geki mwa hagavia, haḡe mwa binihi kaburai buguna duluai gea, mwa lin̄ia mwa bano.
28“Ataguna gea, wani gea mwa bano mwa habwe non buluana vwate, buguna vatu gaiviha n̄an, mwa haḡo batugehia, mwa ḡumḡum mwagorona, mwa bevea be, ‘Gov lol kaburai bugumwa aluku!’ 29Haḡe non buluana mwa sisiabwau ḡoroe, mwa bevea be, ‘Gov ron̄ mwan̄avaiau, vava nav lol kaburai buguku lalainigo.’ 30Take mwa siehia, mwa laia, mwa daua lol imwa vauvauhi vai votu be vi lol kaburai buguna duluai. 31Mahavana be atatun rovoga rituai ram ḡita havanau be mwa loli, lolora mwa hantai, ram bevea lalai nora ratahigi huri havanau duluai be nu loli. 32Ratahigi gea mwa uloi mulei non turin rovoga, mwa bevea be, ‘Giḡo atat hantai! Nan vinihi kaburai vuromwa duluai, bwatuna gon navohiau huria. 33Huri hano gom hav hagav te nom buluana kunia gabe nan hagavigo?’ 34Lolon lavoa mwa horo maragai, kunia mwa hora non atatun rovoga gea vai lol imwa vauvauhi be vi togo aia vai votu be vi lol nogonogoi buguna duluai.”
35Haḡe Jisas mwa bevea be, “Kunia Tamaḡu lol ute atamare vi lolia mulei lalai kimiu be gisav vinihi te kaburai vuron ira tuamiu lol lolomiu.”
Obecnie wybrane:
Matiu 18: HNB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific
