Matiu 17
17
Rebehin Jisas mwa Dori
(Mak 9.2-8; Luk 9.28-36)
1Atagun gubwen̄ gaiono Jisas mwa lai Pita mai huhugaituvwa, Semes i Jon, ram hae vai la vusi holomare vwate gahera. 2La mahavana be ram dol ḡarere, ram dol ḡitae be rebehin Jisas mwa dori. Lolmatana mwa legiga kun alo, i gaisagana ram abwaga kun be dodo maita. 3Haḡe ram dol ḡita Moses mai Elaija be ramuru avo mai Jisas. 4Haḡe Pita mwa av lua lalai Jisas be, “Ratahigi, nu tavuha be tav togo teti. Be gos doron, gas lol vale gaitolu, vwate hurigo, vwate huri Moses, i vwate huri Elaija.”
5La mahavana be mwa avo radu na Pita, tenlan̄ gigita mwa haravuinira. Haḡe ram ron̄ avoana lol ten lan̄i gea mwa bevea be, “Geki haḡea Nituku gabe nam dabea i nam ron̄ mwandavuha ginia. Giv ron̄oe.”
6Batena non roron̄tai ram ron̄ avoana gea, ram hov bahudui lol tano, bwatuna ram matagu maragai. 7Haḡe Jisas mwa mai, mwa dau limana alura, mwa bevea be, “Gin tu amare, gisav matagu tehe!” 8Haḡe ram dol ḡarere vai amare, ram dol hav gita te ihei mulei, ta Jisas n̄ano.
Avoan Hudaligi huri Elaija
(Mak 9.9-13)
9Batena ram hivo nin vusi, Jisas mwa bev wasinia lalainira be, “Gitol si hav vevuri te aben ihei huri ginau hueri uhu be gitol gitae, vai votu gabe inau Nitun Atatu nav tomare mulei nin mateana.”
10Haḡe non roron̄tai ram hudalinia be, “Huri hano be ira vagahin Silo ram bevea be Elaija vi mai amua?”
11Haḡe Jisas mwa bwaliura be, “Mwasigi mahaḡea be Elaija vi mai amua, huri be vi lol dau ginau duluai. 12Ta nam bevea lalai kimiu be Elaija nu mai huba, take atatu ram hav iloe te radu, i ram lol ginau aluna kun ram doron. Kunia mulei rav lol ginau hantai aluku, inau Nitun Atatu.”
13Haḡe non roron̄tai ram siv lai dum binihiva be Jisas mwa avo huri Jon Garuhisabuga lalainira.
Jisas mwa Hora Lua Vui Hantai nin Naturigi Vwate
(Mak 9.14-29; Luk 9.37-43a)
14Batena ram dabagilu vai aben sinombu, atatu vwate mwa mai aben Jisas, mwa hivbwaubwau abena, 15mwa bevea be, “Ratahigi, gov hagav nituku, huri be tagaro mwa matmateivula, vaivusi mwa mate bwahiri, i mwa ron̄ mwahantai maragai. Vaivusi be mwa hovi lol gabi i lol wai. 16I nam laia vai aben nom roron̄tai, take ram hav varahu te dumwia.”
17Haḡe Jisas mwa bwaliua be, “O kimiu ata garigi nomiu binihimwasigi sigai, i gim bahala maragai! Nav togo mai kimiu vain̄ava kun hanigi? Nav haḡo mai kimiu vaiviha mulei? Gin lai naturigi gea vai abeku.” 18Haḡe Jisas mwa av wasi lalai vui hantai be vi mwalue nin naturigi, i mwa mwalue. Haḡe naturigi mwa rahu darihou.
19Ataguna gea roron̄tai non Jisas ram mai abena la mahavana be mwa do gahena, ram hudalinia be, “Huri hano be kamai gam hav hora te lua dum vui hantai gea?”
20Haḡe Jisas mwa bwaliura be, “Huri be nomiu binihimwasigi garagusi nu hav dadariha tehe. Nam bev mwasigi lalai kimiu, be si vora nomiu binihimwasigi garagusi abena kun birin ramute, be kolo n̄an, gis vev dumwia lalai vusi geki be, ‘Vis dagai nin ute geki, ba ban ba du kahaḡa,’ haḡe vusi vi vis dagai. Giv lol dum hano tehe. 21(Take tataro mai garagara vwavwa n̄an vi hora lua dum ginau kungeki.)”
Jisas mwa Avo Mulei huri Mateanana i non Tomarean Mulei
(Mak 9.30-32; Luk 9.43b-45)
22Mahavana be ira roron̄tai ram ḡoḡo bulbulu Kalili, Jisas mwa bevea lalainira be, “Mwa abena be vi lin̄iau, Nitun Atatu vai la limara atatu, 23i rav wehiau. Take atagun gubwen̄ gaitolu nav tomare mulei.”
Non roron̄tai ram lolovono maragai huria.
Jisas mwa Bol Takis huri Imwa Tataro non God
24Mahavana Jisas maira non roron̄tai ram mai Kapanium, atatun harahara homu huri Imwa tataro non God ram mai aben Pita, ram hudaligi be, “Nomiu vagahi mwa bol takis huri imwan God sa sigai?”
25Pita mwa bwaliua be, “Uwe.”
Haḡe mahavana Pita mwa haroro alolon imwa, Jisas mwa av lua darihou, mwa bevea be, “Saemon, gom binihi haninia? Ira lavoa ata lol ureure geki ram lai takis nin irahei? Nin sinombun vanua sage nin ira tausala?”
26Pita mwa bwaliua be, “Nin ira tausala.”
Haḡe Jisas mwa bevea be, “Kunia, ira sinombun vanua mwa hav tu tehe be rai vol nora takis. 27Take gida tasav lol te atatu gabe ram hara homu be rav taturai aluda. I gov hivo vai lol numbu gaivua ba bohai mata. Muan ige be gov ravae, gov havan̄ bwan̄ona, i gov habwe mwane vi dadariha be taru vi vol n̄oto nonda takis ginia. Gov laia ba bolia.”
Obecnie wybrane:
Matiu 17: HNB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific
