Matiu 15
15
Silo Vagahi non ira Bwatmetua ata Tuai
(Mak 7.1-13)
1Ira Varise maira vagahin Silo rituai ram mai nin Jerusalem vai aben Jisas ram hudalinia be, 2“Huri hano nom roron̄tai ram lol salil silo, mwa huriana nin ira sibida mwa mai tuai? Huri be ras bwaga limara vuvuri ram siv gan ginau.”
3Jisas mwa bwaliura be, “Matu ke huri hano be gim daha leo non God, i gim huri nomiu silo vagahi hurin binihimiu sibomiu? 4Bwatuna God mwa bevea be, ‘Gov tabe tamamwa i ratahimwa,’ i ‘Ihei mwa av hantai lalai tamana i ratahina mwa du be vi vevegi bamatea.’ 5Take gim bagahi be atatu si bului tamana i ratahina gin havanau be nona abena, take mwa bevea be, ‘Geki non God,’ 6kunia mwa hav tu tehe be mwa dabe tamana. Geki haḡea mwa seserainia be gim barihai leo horai non God be gimen huri nomiu silo sibomiu. 7Kimiu ira hoḡoiḡoro! Aesaia atatun vevsera nu vev daua mwasigi mahaḡea huri kimiu be:
8‘God mwa bevea be, “Kera sinombu geki ram ḡogonaiau gin nora avoana n̄an,
take lolora hautu niniau.
9Ram ḡogonai bonogaiau,
bwatuna be ram bevea be nora silo vagahi kea barabe avoana non God,
take avoana non atatu n̄ano.” ’
Ginau be mwa Lol Atatu mwa Bibili Lolmatan God
(Mak 7.14-23)
10Jisas mwa uloi sinombu vai abena mwa bevea be, “Giv roron̄tai i giv ron̄ batoia! 11Ginau be atatu mwa ḡania mwa hav lol te bibilinia. Sigai len̄len̄a. Take ginau be mwa mwalue nin lolvwan atatu mwa lol bibilinia.”
12Haḡe ira roron̄tai ram mai abena ram bevea be, “Gom iloe be ira Varise ram ron̄ mwahantai gin avoana be gon vevea?”
13Jisas mwa bevea be, “Ririvuana gabe Tamaḡu lol atamare nu hav rivua tehe vi dan̄ kaburainira. 14Gisav vinihira te gea! Kera tomuai take ram matagaraga. Mahavana be matagara mwa domuai matagara vwate kera saraḡo raru vi hovi lol lulu.”
15Pita mwa bevea be, “Goi vev lua sinen avoan dalogai geki lalai kamai.”
16Jisas mwa bwaliua be, “Kun hanigi kimiu mulei gim hav ron̄ te batoi ginau geki kunira rituai? 17Kimiu gim hav iloe tehe be ginau be atatu mwa ḡania la bwan̄ona mwa hivo alolon tabwan̄ina, mwa mwalue kaburai. 18Take ginau be atatu mwa bev luae nin bwan̄ona, mwa mwalue nin lolona. Ginau haḡea kera geki ram lol bibili dum atatu. 19Bwatuna be nin lolon atatu binihiv hahantai kera geki ram mwalue, wehi bonogai, vuro mai atat lagi, vuro mai atatu dagai nin lagiana, surasura, tenteneana, i tul bonogai. 20Ginau kera geki ram lol atatu ram bibili. Take hano ram bevea gov bwagabwaga vuvuri gom siv gan ginau, mwa hav lol te atatu be men bibili.”
Binihimwasigi Garagusi non Vavine
(Mak 7.24-30)
21Jisas mwa derai ute gea, mwa bano vai la vanua rituai dalis bwatutun vanua Taea mai Saidon. 22Haḡe vavine vwate ata Kenan, kea vavin len̄len̄aga, mwa dogo lol vanua gea, mwa mai abena, mwa bevea be, “Nitun Deved, gov hagaviau! Nituku vavine mwa haro maragai gin vui hantai.”
23Take Jisas mwa hav vwaliu te ḡoroe gin avoana vwate. Haḡe non roron̄tai ram mai abena, ram bevea be, “Gov hora dagainia, bwatuna be kea mwa huri gida mwa sosobwero.”
24Jisas mwa bwaliura be, “God mwa horau n̄ano huri ira Jius gabe ram sala kun sipsip gabe radaiḡoro sigai.”
25Mahavana Jisas mwa bevea kunia, vavine geki mwa mai, mwa hovi lol bwalagena, mwa bevea be, “Ratahigi, gov buluiau!”
26Jisas mwa bwaliua be, “Nu hav tavuha tehe be men lai ginau gan naturirigi ba bohainia lalai vwiriu.”
27Take vavine mwa bwaliua be, “Kea mwasigi, Ratahigi. Take vwiriu ram ḡan dum mamarahan ginau mwa hovi nin tebol non vuigira.”
28Jisas mwa bevea lalainia be, “Vavine, nom binihimwasigi garagusi gaivua maragai! Havanau be gom doronia vi dumwi lalainigo.” Haḡe lol mahavana gea nituna mwa rahu darihou.
Jisas mwa Lol Barahu Ira Harova Ivusi
29Jisas mwa derai ute gea mwa lago mwa bano hurin numbu gaivua ata Kalili. Mwa hae la vusi, mwa do mahuri aia. 30Sinombu ivusi ram mai abena maira mai bwalage hantai, luḡu, matagara, kera gabe ram hav avo te dum, i lalan̄an harova ivusi kunia ram daura, aben bwalagen Jisas. Haḡe mwa lol barahura. 31Sinombu ram dan̄an̄a maragai batena ram ḡitae be kera gabe ram hav avo te dum ram avo, ira luḡu ram lago mulei, i kera bwalagera nu hantai ram davuha mulei, i matagara ram ḡita ute. Haḡe sinombu ram uloi roron God nora ira Jius.
Jisas mwa Ban̄anira Vasan̄vul Vavasi
(Mak 8.1-10)
32Jisas mwa uloinira non roron̄tai vai abena, mwa bevea be, “Nam ron̄ mwahantai gin sinombu kera geki, bwatuna ram dogo maiau huri gubwen̄ gaitolu huba ta kekadogaha ginaganiana mwa sigai hurira. Nam hav doron tehe be nav hora muleinira vai la vanuara be ram hav gan te ginau, bereva matara gim meto gin marogagasi ḡoro hala.”
33Ira roron̄tai ram hudalinia be, “Matu ke tav habwe dum hanigi ginaganiana la vanua vuroi geki ba ban̄an sinombu uhu?”
34Jisas mwa hudalinira be, “Bereti gaiviha abemiu?”
Haḡe ram bevea be, “Bereti gaibitu, i ige kokolo rituai mulei.”
35Jisas mwa bevea lalai sinombu be rav to mahuri. 36Haḡe kea mwa haḡo bereti gaibitu mai ige, mwa avkari God, mwa biha borara, i mwa laira lalainira roron̄tai, haḡe ira roron̄tai ram betera lalai sinombu. 37Sinombu duluai ram ḡania ram ḡubwa. Haḡe ira roron̄tai ram hogon bamasiri gete gaibitu gin mamarahana gabe ran gan dorea. 38Kera duluai gabe ran gania, atamwani vasan̄vul vavasi, ran hav vului te vavine mai naturirigi.
39Ataguna gea, Jisas mwa hora mulei sinombu vai la vanuara, mwa ḡalo la botu i mwa bano vai la vanua Makadan.
Obecnie wybrane:
Matiu 15: HNB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific
