Matiu 13
13
Avoan Dalogai huri Atatu mwa Ḡaburai Biri
(Mak 4.1-9; Luk 8.4-8)
1Lol gubwen̄ n̄an kea Jisas mwa bwihavare, mwa ban vai la balsin numbu, i aia mwa do mahuri, mwa bagahi. 2Sinombu ivusi maragai ram ḡoḡo dalisia. Bwatuna kera ivusi, Jisas mwa ḡalo la waḡa mwa do mahuri, i sinombu ram du aute. 3Mwa bev ginau ivusi lalainira gin avoan dalogai.
Mwa bevea be, “Atatu vwate mwa bano be men gaburai biri lolo ara. 4La mahavana be mwa ḡaburainia, rituai ram hovi la hala i manu ram mai, ram ḡan bebegainia. 5I rituai ram hovi lol tanogin vatu, gabe tano tirigi aia. Haḡe mwa sisiu hae, take tano nu manevnevi. 6Kunia mahavana alo mwa hahavwani, mwa ḡoru darihou, bwatuna be garona mwa hav hiv te hivhivo. 7Rituai ram hovi lol ḡauli. I ḡauli mwa bivihi haravuinira. 8Take biri rituai ram hovi lol mwasin tano, ram bwaevwae. Rituai mwa bwavwae vwaina vudolua, rituai n̄avul gaiono, i rituai n̄avul gaitolu.”
9Haḡe Jisas mwa bevea be, “Be ihei bwerona abena, na ron̄oe.”
Bwatuna Hano Avoan Dalogai
(Mak 4.10-12; Luk 8.9-10)
10Haḡe roron̄tai non Jisas ram mai, ram hudalinia be, “Huri hano gom avo tagaro lalainira gin avoan dalogai?”
11Haḡe kea mwa avkorora be, “Mwa hogoi lalai kimiu be gimen ilo ginau ririhai huri Ute Lavoa atamare, take mwa hav hogoi tehe lalainira. 12Ihei non ginau abena huba, vi lai lalainia amare liu nin non doroniva. Take ihei nona sigai, vi lai dagai havanau tirigi gabe nona huba. 13Bwatuna higea nam avo gin avoan dalogai lalainira, huri be ram ḡitae, ta ram hav gita te batoia, ram ron̄oe, ta ram hav ron̄ te batoia. 14Haḡe kunia avoan vevsera non Aesaia mwa bisirai alura:
‘Giv roron̄tai ba roron̄tai, take gisav ron̄ te batoia;
giv gitae ba ḡitae, take gisav gita te batoia,
15bwatuna binihira mwa bwatoa,
i bwerora nu vono,
i ran bul matara.
Bere ram ḡita dum gin matara,
i ram ron̄ dum gin bwerora,
bereva ram ḡita batoia,
i ram garere huriau, God mwa bevea,
i nav varahura.’
16Take huri kimiu, gim ron̄ mwandavuha! Bwatuna matamiu mwa ḡita batoia, i bweromiu mwa ron̄ batoia! 17Nam bev mwasigi lalai kimiu be ira atatun vevsera i ira atat vavtutu ivusi ran doron maragai be rav gita ginau be gim ḡitae, take ram hav gitae tehe, be rav ron̄ hano gim ron̄oe, take ram hav ron̄oe tehe.
Jisas mwa Seserai Binihiva huri Avoan Dalogai huri Wani mwa Ḡaburai Biri
(Mak 4.13-20; Luk 8.11-15)
18“Giv roron̄tai tavuha binihiva huri avoan dalogai huri wani gabe mwa ḡaburai biri. 19Kera gabe ram ron̄ avoana huri be God vi vora Ratahigi lavoa ḡoro atatu duluai, take ram hav ilo te binihiva huria, ram ḡun biri be nu hovi la hala. Vui hantai vi mai, vi rais dagai hano nu gaburaiana alolora. 20Take biri gabe mwa hovi lol tanogin vatu gabe tano tirigi aluna, mwa du hurira hei ram lai avoana gin samsamwara lol mahavana be ram ron̄oe. 21Take avoana mwa hav garoga tehe alolora. Ram davuha mahavana vwelvwele. I la mahavana be ram habwe kalkaliana sa mwa lol bonogainira bwatuna avoana, ram hovi darihou. 22Biri gabe mwa hovi lol ḡauli, nu ḡun atatu gabe mwa ron̄ avoana, take kalkalianan ureure i doroniva non rosomiu mwa haravui avoana tavuha be nu ron̄oe, i mwa hav vwae tehe. 23Biri gabe mwa hovi lol mwasin tano, mwa du huri irahei gabe ram ron̄ batoia. Ram bwaevwae, rituai mwasina vudolua, rituai n̄avul gaiono, i rituai n̄avul gaitolu.”
Avoan Dalogai huri Urute
24Jisas mwa bev avoan dalogai vwate mulei, mwa bevea be, “Hala huri Ute Lavoa atamare vi kun geki. Atatu vwate mwa riv biri tavuha lol bilan ute lolo ara. 25Lol mahavana vwate bon̄i atatu n̄oto ram maturu, non ivwalu vwate mwa mai mwa ḡaburai birin urute alolon koni, haḡe mwa romaragai. 26Mahavana be birin koni mwa databwahu, mwa n̄an̄ava, vava mwa mwasiga, ram ḡitae take birin urute mwa databwahu, mwa mauri bultai mai koni. 27Haḡe non atatun rovoga ram mai abena, ram bevea lalainia be, ‘Ratahigi, gon riv biri tavuha lol bilam ute lolo ara. Take urute ram mai behe?’ 28Haḡe mwa bwaliura be, ‘Noḡu ivwalu mwa lol ute kunia lalaiau.’ Haḡe non atatun rovoga ram bevea lalainia be, ‘Kun hanigi? Gom mahin̄a be gamen van be lua kaburai urute?’ 29Take mwa bwaliura be, ‘Awi sigai. Bwatuna be, bereva gim dan̄ koni mulei huri be ramuru mauri bulu huba. 30Giv lin̄ koni mai urute raru vi mauri haragaituvwa vai votu harahara vi mai. Haḡe nai vevea lalai atatun rovoga baten harahara be rav hara urute amua ba bohainia utegaituvwa huri be vi vohaiana lol gabi. Vuvuri rav n̄ari koni vai utegaituvwa ba daura lolon imwa.’ ”
Avoan Dalogai huri Birin Ramute
(Mak 4.30-32; Luk 13.18-19)
31Jisas mwa bev avoan dalogai vwate mulei lalainira sinombu be, “Ute Lavoa atamare kun geki. Atatu vwate mwa lai birin ramute i mwa ḡaburainia lol bilan umwa. 32Take mahavana be mwa mauri, mwa ḡaivuaga liu nin vataha gai duluai, i manu ram mai ram dau inogira alun rarana.”
Avoan Dalogai huri Is
(Luk 13.20-21)
33Haḡe Jisas mwa bev avoan dalogai vwate mulei, mwa bevea be, “Ute Lavoa atamare kun geki. Vavine vwate mwa lai is i mwa haḡo roiroia mai vulaoa lol dis gaivua. Haḡe is gea mwa lol vulaoa mwa buge.”
Jisas mwa Avo N̄an Gin Avoan Dalogai
(Mak 4.33-34)
34Mahavana Jisas mwa avo alun ginau duluai geki lalai sinombu, mwa avo gin avoan dalogai. Si hav avo te dagai nin avoan dalogai lalainira. 35Ginau geki mwa lol seserai avoana non atatun vevsera be nu vevea tuai be:
“God nu vevea kungeki be, ‘Nav avo n̄an gin avoan dalogai lalainira.
Nai vev lua ginau dahuligi ata la bwatun tauva.’ ”
Jisas mwa Seserai Binihiva huri Avoan Dalogai huri Urute
36Haḡe Jisas mwa derai sinombu, mwa dalin̄oro lol imwa vwate. Haḡe non roron̄tai ram mai abena, ram bevea be, “Gam doron maragai be goi vev binihiva ata lol avoan dalogai huri urute.”
37Haḡe Jisas mwa bwaliura be, “Wani gabe mwa riv biri tavuha kea haḡe Nitun Atatu. 38Ute lolo ara kea haḡea sinombu gabe ram dabe God be kea Ratahigi ḡorora. Ta urute kera haḡea atat non Vui Hantai. 39Ivwalu gabe nu riv urute kea haḡea Vui Hantai. Mahavan harahara kea haḡea nogonan gubwen̄, i atatun rovoga be ram hara koni kera ira enjel. 40Kun urute vi haraḡoana i vi vohaiana vai lol gabi, kunia mulei vi loli la nogonan gubwen̄. 41Inau Nitun Atatu nav hora noḡu enjel rav lai luara duluai gabe ram hav tabeau tehe kun nora Ratahigi, kera gabe ram lol atatu ram buroga, i kera gabe ram lalaḡo hantai, 42i rav vohainira lol gabi memea, i aia rav dei i rav gas livora. 43Haḡe vuvuri sinombu non God rav gigita kun alo lol rahuan gara gabe Tamara mwa ratahigi alolona. Be ihei bwerona abena, na ron̄oe.”
Avoan Dalogai huri Ginau mwa Dahuliana Lol Tano
44“Ute Lavoa atamare kun geki. Atatu vwate mwa habwe ginau tavuha gabe nu tahuliana lol tano. Mwa haḡoi ḡoro muleinia, mwa ban dagai gin samsamwara, mwa salei non viloḡoana duluai, mwa dabagilu mulei i mwa bol lua tano gea.”
Avoan Dalogai huri Raumatan Vatu
45“Haḡe mulei, Ute Lavoa atamare kun geki. Atatu mwa hiḡe raumatan vatu be men volira, 46i la mahavana be mwa habwe vwate gabe nu tavuha maragai, mwa dabagilu mulei, mwa salei non viloḡoana duluai, haḡe mwa siv vol raumatan vatu gea.”
Avoan Dalogai huri Gabe
47“I mulei, Ute Lavoa atamare kun geki. Atatun ravrav ige ram dul nora gabe lol numbu gaivua, i ram raraḡo lalan̄an ige. 48La mahavana be gabe mwa masiri gin ige, atatuna ram ravae vai aute, i rav to ataa ba hara bora ige duluai. Lalan̄an ige tavuha rav hogonia lol nora gete, ta rav vohai kaburai ige hahantai. 49I kunia haḡea vi vora kunia la nogonan gubwen̄. Ira enjel rav mwalue, rav lai lua atatu hantai nin atatu tavuha, 50i rai vohai kaburainira vai lol gabi memea. I aia rav dei i rav gan livora.”
Ginau Gara Mwasigi mai Ginau Maleiga Mwasigi
51Haḡe Jisas mwa hudalinira be, “Gim ilo binihiva huri ginau uhu sage sigai?”
Haḡe ram dame be, “Uwe, gam iloe.”
52Haḡe mwa bwaliura be, “Geki gin binihiva be vagahin Silo gabe mwa roron̄tai huri Ute Lavoa atamare, kea kun vuigin imwa mwa lai lua ginau i maleiga nin vwavwan imwana.”
Ram Barihai Jisas Nasaret
(Mak 6.1-6; Luk 4.16-30)
53La mahavana be Jisas mwa bev haraharai avoan dalogai duluai, haḡe mwa derai ute aia vai la mwasin vanuana. 54I aia mwa bagahi lol nora imwa tataro. I kera duluai be ram ron̄oe ram dan̄an̄a maragai, ram bevea be, “Wani uhu mwa lai non mataisao halabehe? I hanigi huri lalaḡova muramura duluai gabe mwa lolira? 55Matu mwa hav vora te kea nitun atatun vohavoha imwa, i ratahina Mere, i ira tuana Semes i Joses, Saemon i Judas? 56I ira hogosina ram dogo n̄an teti? Ke kea mwa lai ginau duluai uhu halabehe?” 57I kera duluai ram daturai lol binihira huria, i ram barihainia.
Haḡe Jisas mwa bevea abera be, “Atatun vevsera mwa binihi marahiana lol ute dodolua, ta la mwasin vanuana i maton ira havana sigai.” 58Huribe kea mwa hav lol te dum lalaḡova muramura ivusi aia, bwatuna nora binihimwasigi garagusi sigai.
Obecnie wybrane:
Matiu 13: HNB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific
