Broă 11

Pier rê wơl hơ Jerusalem

1Tŭ hơ̆, ală cau gơnoar bơto dờng bal mơ ală oh mi ơm tòm Jude kơno yal lah làng bol bơdìh kung neh dòp jơnau Yàng Tom Trồ dê. 2Tòm tŭ Pier neh guh hơ Jerusalem, ală cau dòn Yàng neh kong siat gơltau lah pơrhơng khai lah: 3“Ồng neh mut tòm hìu cau ò kong siat gơltau, mơ sào bal mơ bol khai!” 4Mơya Pier sơntòm yal loh ală bơta hơ̆ bol khai in jat be broă neh gơlik gơs bơh sơnròp, 5be tơnơ̆ do: “Añ ơm hòi dan tòm ƀòn dờng Jôppe, gen añ gơlơh jơngo sup tòm dơngoh, añ gŏ bơta gơtơnggŏ: Gơs phan be dô blah ồi dờng kơt di poan mum bơh đang trồ gơtơmù tus di añ. 6Añ sền nền, mơ gŏ tòm dơlam hơ̆ gơs ală jơi phan poan jơng tòm ù, ală phan tòm brê, phan wìn nsròng mơ ală sềm hơđang trồ. 7Gen añ kơno jơnau đơs lah: ‘Ơ Pier, guh tĕ, lơh poac mơ sa.’ 8Añ ho lah: ‘Ơ Yàng, ò di behơ̆ ò, bơh ală phan ƀơ̆ ƀơl hala ò goh ò gơs tŭ lơi gơmut tòm bơr añ.’ 9Mơya jơnau bơh đang trồ đơs mơ añ dơ̆ bàr lah: ‘Bañ sền phan lơi Yàng Tom Trồ neh lơh goh rau la ƀơ̆ ƀơl.’ 10Bơta hơ̆ đơs wơl tòm pe dơ̆, lồc behơ̆ jơh ală bơta hơ̆ gơtơngguh wơl hơđang trồ. 11Tŭ hơ̆ mo, pe nă cau bơh ƀòn dờng Sesare geh sồr lòt hơ añ, kung neh tus di bơr mpồng hìu bol hi#11:11 Gơs dô êt sră cih lah: añ. ơm.

12Yàng Hwềng sồr añ pal lòt bal mơ pe nă cau hơ̆, bañ pin. Prau nă cau do kung lòt bal mơ añ sơl, mơ bol hi mut bal tòm hìu Kornai dê. 13Cau hơ̆ yal wơl mơ bol hi lah mbe lơi khai neh gŏ cau gơnrơh ntào tòm hìu khai mơ đơs lah: ‘Sồr tĕ cau lòt tus hơ ƀòn dờng Jôppe, jà Simôn sơnđan la Pier. 14Khai rơp yal mê in ală jơnau nàng kơnòm tềng hơ̆ mê mơ jơh hìu nhă mê rơp geh dong klàs.’ 15Tòm tŭ añ sơntòm đơs, gen Yàng Hwềng Goh mù hơđang bol hơ̆, kung be neh mù hơđang bol he bơh sơnròp sơl. 16#Broă 1:5.Gen añ kah wơl jơnau Yàng neh đơs lah: ‘Jang neh lơh ƀaptem mơ dà, mơya bol mê rơp gơs ƀaptem mơ Yàng Hwềng Goh.’ 17Behơ̆, dilah Yàng Tom Trồ neh ai bol khai in dô bơta ai gòi be neh ai bol hi in tòm tŭ bol hi dòn Yàng la Yàng Jesu Krist; gen añ la ñcau mơ khin kơryan Yàng Tom Trồ taih?” 18Dơ̆ bol khai kơno jơnau hơ̆, gen ơm mŏ mŏ, lồc behơ̆ jòng ro Yàng Tom Trồ lah: “Behơ̆, Yàng Tom Trồ kung neh ai bơta gơjrañ sang glài làng bol bơdìh in tồ bol khai geh bơta kis.”

Hìu Jum Goh tòm Antiôt

19 # Broă 8:1-4. Tŭ hơ̆, ală cau neh nrah nring bơh bơta kup kơryan neh gơlik gơs tơnơ̆ mơ broă Etien, lòt tus hơ Phenesi, bồt pơlào Ciprus mơ Antiôt, bol khai mìng bơto yal jơnau Yàng cau Juda in lơm. 20Bulah behơ̆, tòm mpồl ală cau hơ̆ gơs cau ƀà ơm tòm Ciprus mơ Siren lòt tus hơ Antiôt, kung bơto Jơnau Niam cau Grek#11:20 Gơs dô êt sră cih tê cih lah: cau Juda đơs jơnau Grek. in sơl, mơ bơto yal bơh Yàng la Yàng Jesu bol khai in. 21Gơnap gơnoar Yàng ơm mơ bol khai, gen tàng gơs oă ngan cau dòn mơ rê wơl mơ Yàng.

22Kơno jơnau hơ̆, Hìu Jum Goh tòm Jerusalem sồr Banaba lòt tus hơ Antiôt. 23Tòm tŭ tus tềng hơ̆ mơ gŏ bơta nđàc Yàng Tom Trồ dê gen khai hòn chò, mơ bơto tơngkah jơh tơl nă cau hơ̆ kư̆ kơ̆ nùs dòn song mơ Yàng; 24bơh Banaba la cau lơbơn niam, gơs bềng lìu Yàng Hwềng Goh mơ bơta dòn. Mơ gal ngan cau dòn jat Yàng. 25Tơnơ̆ hơ̆, Banaba lòt hơ Tarsơ nàng jòi Sol, 26mơ tòm tŭ neh jòi bàn rau, gen jun khai tus hơ Antiôt. Bàr nă bol khai pơjum bal mơ Hìu Jum Goh mơ bơto sồr oă cau tơl dô nam. Hơ̆ la tòm Antiôt cau rơp sơntòm sơnđan ală cau dòn la Cau Krist.

27Tòm ală ngai hơ̆ gơs ală cau gơnoar hwơr bơh Jerusalem mù hơ Antiôt. 28#Broă 21:10.Tòm mpồl hơ̆ gơs dô nă cau sơnđan la Agabus geh Yàng Hwềng yal lài, gen khai ntào mơ đơs hwơr lah rơp gơs bơta jơgloh rung dờng tòm làm ù; bơta jơgloh rung hơ̆ gơlik gơs tòm rài bơtau Klaudius. 29Ală cau bơtê lơh nền, kòp nă jat be pràn is he, mơ pơyoa phan dong kòl oh mi in tòm Jude. 30Bol khai lơh broă hơ̆, mơ pơyoa phan pà gòi ală cau kwang kra in kơnòm di Banaba mơ Sol.

Obecnie wybrane:

Broă 11: KPM2018

Podkreślenie

Udostępnij

Kopiuj