Ɨ̀fàʼà 14

Pàolò pobə Barnabas lèrə̀ a Ikonẅùmə̀

1Ànwùə̀ nɨ a lə̀ ghɨ̀rə̀nə a Antyòkə̀ a lə̀ kɨ ngɨ̀rə̀ a Ikonẅùmə̀. Pàolò pobə Barnabas lə̀ ghə̀ nkwuunə̀ amwuə ndâ àshwatə̀ pɨ̀Jew nshwəŋə̀ ànwùə̀ Nẅùə̀. Pànə̀ pɨ̀noʼnə nɨ ka pobə lə̀ pə ghobə pɨ̀Jew pobə pɨ̀Jew lə̀ pyiimə̀ a Nẅùə̀. 2La pɨ̀Jew nɨ ka pobə lə̀ pyiimə̀ a ghobə lə̀ pə̀ŋə̀ mɨ̀ntɨŋmə̀ mɨ pànə̀ pyə̀ nɨ ka pobə pə ghobə pɨ̀Jew lo pobə tyiʼə̀ mbàanə̀ Pàolò pobə Barnabas. 3Ngàŋə ntwuumə̀ Nẅùə̀ zə̀ lə̀ ghoŋə̀ ghu aŋunə ntyə̌ sàa, nchwìitə̀ ntwuumə̀ Ndòʼnə̀mbyə̂ tɨ àkẅàrə̀. Lenəla, Ndòʼnə̀mbyə̂ à lə̀ ŋâ ghobə nɨ ɨ̀tɨ̀ŋnə̀ a nɨ ghɨ̀rə̀ mɨ̀nwùə̀ mɨ yerə̀nə yerə̀nə pobə mɨ kə̀ʼnə̀nə, a nɨ nèrə̀ lo ntwuumə̀ ghu mbə̀ʼə àpòŋə̀ ntɨŋmə̀ e a nkǔŋə nkuŋə; 4La ka pànə̀ pɨ mbòmpə àlaʼà ghu lə̀ pə a ghobə ntswùə̀ moʼo, pɨ̀tse lə̀ zùŋə̀ a ghobə pə ànwùə̀ nɨ pɨ̀Jew lə̀ shwəŋə̀nə; pɨ̀tse mmə ndzùŋə̀ pə ànwùə̀ nɨ ngàŋə ntwuumə̀ Yěsû lə̀ shwəŋə̀nə. 5Lenəla pànə̀ nɨ ka pɨ pə ghobə pɨ̀Jew nɨ pɨ̀Jew, farə ɨ̀twuə̀ ɨ̀laʼà lə̀ pyiimə̀ a nɨ ŋâ ngəʼə̀ ambo ngàŋə ntwuumə̀ Yěsû nkɨ ntumpə̀ a ghobə nɨ mɨ̀ghòorə. 6Nkwùə̀ nɨ Pàolò pobə Barnabas lə̀ zuʼnə ànwùə̀ zə̀, pobə lə̀ kɨ̀ɨrə̀ ndèrə̀ a Lystra pobə Derbe amwuə Lycaonia, pobə pɨ̀tse ɨlyiʼə a mbwùnə, 7ntyiʼə̀ nchwìitə̀ ntwuumə̀ ghù ɨ̀shìʼnə̀ wə̀ ghu.

Ànwùə̀ nɨ Pàolò pobə Barnabas lə̀ ghɨ̀rə̀nə a Lystra pobə Derbe

8Ŋònə̀ ɨ̀tse a lə̀ pə a Lystra mbə kòŋə̀ ɨ̀shyə̂ a nɨ furə̀ tsaʼnə pɨ lə̀ pyə̂nə e. 9Ŋònə̀ ghu a lə̀ nwuunə̀ mmə nzhwiʼtə̀ ànwùə̀ nɨ Pàolò a lə̀ mənə nshwəŋə̀. Lenəla, Pàolò a naŋə̀ e ndzəənə̀ lo à wə̀ nɨ àpyiimə̀ ntɨŋmə̀ nɨ mbə̀ʼə pɨ parə̀ e, 10ndzùŋə̀ nshwəŋə̀ ambo ze nɨ ɨ̀tɨ̀ŋnə̀ lo, “Lòo a ɨ̀shyə̂ ntəəmə̀ aŋunə mɨ̀kwùə̀ ɨ̀mô!”Ŋònə̀ ghu a zùŋə̀ nkànə̀ mbìʼnə̀ a nɨ yìinə̀. 11Nkwùə̀ nɨ pànə̀ pɨ̀ghu lə̀ zəənə̀nə ànwùə̀ nɨ Pàolò a lə̀ ghɨ̀rə̀nə, pobə lə̀ kyiinə̀ nshwəŋə̀ amwuə àshwəŋnə̀ Lycaonia lo, “Pɨ̀nẅùə̀ pə̀ŋə̀ ntyiʼə̀ tsaʼa pə̀ənə̀ nshwuʼə̀ ntô ambo pə̀ənə̀!” 12Pobə lə̀ tyiʼə̀ ŋŋâ nɨ̀linə̀ nɨ Barnabas lo Zeus, nkɨ ŋŋâ tsɨ̀ Pàolò lo Hermes, ntiinə a lə̀ pə nshwəŋnə̀ ze. 13Ɨ̀fò màʼà nẅùə̀ Zeus, nɨ ndâ nẅùə̀ e ɨ̀ lə̀ pənə e tyìʼə̀ a nɨ̀pwùnə ntswùə̀ àpùʼù, à lə̀ lòo pɨ̀lwuumə̀ pɨnyàamə̀ pobə pɨ̀tǒŋtǒŋə ntô a ntswùə̀ àpùʼù ntiinə pobə pɨ pànə̀ pɨ àlaʼà ghu lə̀ pə ntàʼà a nɨ lòo mmàʼà ngàŋə ntwuumə̀ Yěsû zə̀ ghu tsaʼa pɨ̀nẅùə̀ ɨ̀pobə.

14Nkwùə̀ nɨ Pàolò pobə Barnabas lə̀ zuʼnə ànwùə̀ ghu, pobə lə̀ sìitə̀ ɨtsəʼə ɨ̀pobə nkɨ̀ɨrə̀ nkwuunə̀ a tɨ̀tɨ̀rə̀ pànə̀ pɨ̀ghu ntyiʼə̀ nkyiinə̀ nshwəŋə̀ lo, 15“A ghɨ̀rə̀ àkə ngɨ̀rə̀ a wɨghə lo nɨ̀ ghɨ̀rə̀ a zə̀ mbuurə̀ ànwùə̀? Ka pəə pə wəə la pɨ̀nẅùə̀, pəə kɨ mbə àzəə pànə̀ tsaʼa pɨghə. Pəə tô nɨ ntwuumə̀ ghù ɨ̀shìʼnə̀ ambo pɨghə lo nɨ̀ myàʼtə̀ ɨ̀fǐfǐ pɨ̀tɨtoo pə mbə̀ŋə̀ ntô ambo Nẅùə̀ nɨ a lə̀ tsùŋə̀nə nɨ̀pwuurə̀ pobə ɨ̀shyə̂ farə nchyə̂ ghu nɨŋnə̀nə nɨ àzwuumə̀ àtsùmə̀ nɨ a pənə amwuə. 16A lə̀ pə nkwùə̀ ntsàambyə̀ mmyàʼtə̀ pànə̀ lo pobə ghɨ̀rə̀ mɨ̀nwùə̀ ɨ̀mobə tsaʼnə pobə kòŋə̀nə. 17La, a wa nèrə̀ lo a wa ghu aŋunə mɨ̀nwùə̀ ɨ̀me nɨ a ghɨ̀rə̀nə. La a tsàa ze ntsàa mbə̀ŋə̀, nkɨ ngɨ̀rə̀ mɨ̀zɨghə̀ ɨ̀mɨghə pòŋə̀ a atwurə; a wa ŋŋâ a wɨghə nɨ mɨ̀zɨghə̀ mɨ zɨghə̀nə, nkɨ ndẅenə̀ mɨ̀ntɨŋmə̀ ɨ̀mɨghə nɨ nɨ̀ghaʼà,” 18Ngàŋə ntwuumə̀ Yěsû zə̀ lə̀ patə nshwəŋə̀ pə a lenə la, a lə̀ tɨ̀ŋnə̀ ambo pobə a nɨ zòŋə̀ lo kò pànə̀ pɨ̀ghu màʼà a ghobə a nẅùə̀ ɨ̀ghobə tsaʼnə pobə lə̀ kwàrə̀nə.

19Pɨ̀Jew pɨ̀tse lə̀ furə̀ a Antyòkə̀ amwuə Pìsidyà farə a Ikonẅùmə̀ ntô mbə̀ŋə̀ ɨ̀twuə̀ pànə̀ pɨ̀ghu lo pobə pɨ pobə pwuutə̀ mbàanə̀ ngàŋə ntwuumə̀ Nẅùə̀ yɨ̀ghu. Lenəla, pobə lə̀ tumpə̀ a Pàolò nɨ mɨ̀ghòorə, nsùŋə̀ e nfurə̀ amwuə àlaʼà ngwaʼà, mmə nkwàŋə̀ lo a kwɨghə̀. 20La nkwùə̀ nɨ ɨ̀poonə̀ pɨ Kristù lə̀ tônə nkamnə̀ e, à lə̀ lòo a ɨ̀shyə̂ nkẅirə̀ nkwuunə̀ amwuə àlaʼà ghu. Njyə̂ ɨ̀ laanə̀, pobə Barnabas furə̀ ndèrə̀ àlaʼà Derbe.

Pàolò pobə Barnabas kẅirə̀ nkwə̂ a Antyòkə̀ nɨ à pənə amwuə àlaʼà Siryà

21Pàolò pobə Barnabas lə̀ chwìitə̀ ntwuumə̀ ghù ɨ̀shìʼnə̀ a Derbe, nkootə̀ ɨ̀zùŋə̀ ndzùmə̀ Kristù pɨ̀noʼnə. Ntyiʼə̀ nfurə̀ nkẅirə̀ nkwə̂ a Lystra, nɨ Ikonẅùmə̀, farə Antyòkə̀ amwuə àlaʼà Pìsidyà. 22Pobə lə̀ təətə̀, ŋŋâ ɨ̀tɨ̀ŋnə̀ ambo ɨ̀poonə̀ pɨ Kristù nɨ pɨ lə̀ pənə ghu lo pobə ẅìimə̀ àpyiimə̀ ntɨŋmə̀ àzobə ngoŋə̀ nɨ zèrə, nshwəŋə̀ lo, “A pòŋə̀ lo pə̀ənə̀ làŋə̀ amwuə mɨ̀ngəʼə̀ mɨ̀noʼnə mbòŋə̀ nkwuunə̀ amwuə ànwùə̀ Nɨ̀fò Nẅùə̀.”

23Nkwùə̀ nɨ pobə kwuunə̀nə amwuə ɨ̀shwatə̀ ɨ̀poonə̀ pɨ Kristù ɨ̀tsùmə̀, pobə lə̀ tsoʼò ɨ̀twuə̀ Ɨ̀shwatə̀ ɨ̀poonə̀ pɨ Kristù pɨ̀ghu, ntyiʼə̀ nnwuunə̀ tɨ zɨghə̀ nchyâ a ghobə amwuə àchàʼtə̀ Nẅùə̀ ambo Ndòʼnə̀mbyə̂ ẅùə̀ wa nɨ pobə nùŋə̀nə àpyiimə̀ ntɨŋmə̀ àzobə aŋunə la. 24Tsaʼnə pobə lə̀ làŋə̀nə ɨlyiʼə ɨ̀tsùmə̀ amwuə àlaʼà Pìsidyà, pobə lə̀ kwuunə̀ amwuə àlaʼà Pàmfilyà, 25ntyiʼə̀ nchwìitə̀ ntwuumə̀ Nẅùə̀ amwuə Pegà, nfurə̀ ghu nshwuʼə̀ ndèrə̀ a Attalia. 26Nkwùə̀ nɨ pobə lə̀ myàanə̀nə a Attalia, pobə lə̀ kwuunə̀ amwuə àkànwuʼə nkẅirə̀ ndèrə̀ a Antyòkə̀, alyiʼə gha nɨ pɨ lə̀ ŋânə a ghobə ambo Nẅùə̀ lo a pyamnə̀ a ghobə aŋunə àfàʼà zhyə̀ nɨ pobə myàanə̀nə lə̀. 27Nkwùə̀ nɨ pobə lə̀ pyàanə a Antyòkə̀, pobə lə̀ shwatə̀ a ŋwùə̀ Àshwatə̀ ɨ̀poonə̀ pɨ Kristù ntsùmə̀ a taʼà alyiʼə, ntyiʼə̀ ntiitə̀ a ghobə nɨ mɨ̀nwùə̀ ma mɨ̀tsùmə̀ nɨ Nẅùə̀ a ghɨ̀rə̀nə ndàŋə̀ a ndzùmə̀ pobə, nkɨ ntiitə̀ farə tsaʼnə a nyaʼkə̀nə àlàŋə ambo pànə̀ nɨ ka pobə pə ghobə pɨ̀Jew lo pobə pyiimə̀ e. 28Lenəla, ntyiʼə̀ nchyə̂ ghu pobə pɨ pobə aŋunə ntyə̌ sàa.

Obecnie wybrane:

Ɨ̀fàʼà 14: pny

Podkreślenie

Udostępnij

Kopiuj