Ɨ̀fàʼà 11

Pità a tiitə̀ ànwùə̀ Kònelyùsə̀ ambo ɨ̀poonə̀ pɨ Kristù a Yèrusalèmə̀

1Ngàŋə ntwuumə̀ Kristù pobə pɨlyimə ɨ̀pobə nɨ lə̀ pənə Judyà lə̀ zuʼù lo pànə̀ nɨ ka pobə pə ghobə pɨ̀Jew lə̀ kɨ mbyiimə̀ a Nẅùə̀. 2Nkwùə̀ nɨ Pità à lə̀ koʼnə ndèrə̀ a Yèrusalèmə̀, pànə̀ nɨ pɨ lə̀ zə̀ərə̀nə a ghobə lə̀ ẅìimə̀ e nɨ ɨ̀sàʼa, 3nshwəŋə̀ lo, “Wə̀ kwuunə̀ amwuə ndâ pànə̀ nɨ ka pɨ zə̀ərə̀ e a ghobə ndzɨghə̀ pɨghə pɨ pobə.” 4Pità a pìʼnə̀ ntiitə̀ ànwùə̀ àtsùmə̀ a nɨ̀yèrə nɨ̀yèrə tsaʼnə a lə̀ furə̀nə: 5“Ndə̀ mə nchàʼtə̀ a Nẅùə̀ a àlaʼà Jopà, ndzə̀əmə̀ ɨ̀ làŋə̀ a ɨ̀myə̂ mɨ̀ŋə̀, ǹdzəənə̀ àzwuumə̀ àtse a pə tsaʼa àpô atsəʼə yè ẅùunə nɨ a furə̀nə a nɨ̀pwuurə̀, pɨ ẅìimə̀ a zèrə aŋunə mɨ̀lẅuə̀ nɨ̀kwàa nshwuʼkə̀ a mbyə̀ mɨ̀ŋə̀, 6ǹkɨ nnaŋə̀ ndzəənə̀ mbuurə̀ mɨ̀nyàamə̀ mɨ̀kwùə̀ nɨ̀kwàa mɨ̀tsùmə̀ a àtwuə̀ ɨ̀shyə̂, nɨ mɨ̀nyàamə̀ mɨ mɨpaʼa mɨ̀tsùmə̀, pobə mɨ̀nyàamə̀ nɨ àləəmə̀ àzobə a za nfî pobə pɨ̀sɨ̀ŋə nɨ pèrə pa tàarə̀ a àtɨ̀ghə.

7“Ǹchi ndzuʼù ngyə̀ ŋwùə̀ ɨ̀ shwəŋə̀ ambo mɨ̀ŋə̀ lo, ‘Pità, lòo a ɨ̀shyə̂ nzhwuutə̀ nkwurə̀.’ 8La ǹkẅùə̀ ambo ze lo, ‘Ngaŋə mbǎ Ndòʼnə̀mbyə̂, ndə̀ pirə̀ mə mə̀ tɨ kwurə̀ ɨ̀pwuumə̀ pɨ fînə tsaʼa pèrə pə nɨ ka pèrə laanə̀ e.’ 9Ngyə̀ za ɨ̀ lə̀ chi nkẅirə̀ nfurə̀ a nɨ̀pwuurə̀ nshwəŋə̀ lo, ‘Àzwuumə̀ nɨ Nẅùə̀ a ghɨ̀rə̀nə a laanə̀, kò wə̀ shwəŋə̀ o lo ka a laanə̀ e.’ 10Ànwùə̀ zə̀ a lə̀ ghɨ̀rə̀ mbyàa nkwùə̀ ɨtarə, pɨ tyiʼə̀ ndòo àpàa atsəʼə ghu nkẅirə̀ nkoʼò a nɨ̀pwuurə̀. 11Tyìʼə̀ nkwùə̀ ghu, pɨ tsàa pànə̀ pɨtarə pɨ furə̀ a Kàsaryà ntô ntsirə̀ mə̀ amwuə ndâ nɨ ndə̀ pənə nchyə̂ amwuə la. 12Àzhwùə̀ Nẅùə̀ a lə̀ shwəŋə̀ ambo mɨ̀ŋə̀ lo kò ǹtsə̀ŋə̀ mə̀ nkwùə̀ a nɨ zəənə̀ a ghobə. Pɨlyimə pə ntuurə̀ lə̀ kɨ ndèrə̀ pəə pɨ pobə ngə̀ nkwuunə̀ a ndâ ghu a Kàsaryà. 13A tiitə̀ a wəə tsaʼnə angèrə̀ ɨ̀tse à lə̀ tônə nshwəŋə̀ ambo ze lo, ‘Ghɨ̀rə̀ pɨ ghə̀ nfuŋə̀ a Shimùnə̀ ɨ̀tse nɨ à wa nchyə̂ a Jopà pɨ kɨ mmə nfuŋə̀ e nɨ Pità. 14Ǎ tô tiitə̀ o nɨ ntwuumə̀ ɨ̀tse nɨ ɨ ghɨ̀rə̀ pɨghə pɨ pə̀ənə̀ ɨ̀pô pɨ̀tsùmə̀ nfurə̀ amwuə ngəʼə̀.’ 15Tsaʼnə ndə̀ pìʼnə̀nə a nɨ shwəŋnə̀, Àzhwùə̀ Nẅùə̀ a shwuʼə̀ aŋunə pobə tsaʼnə a lə̀ kɨnə shwuʼə̀ aŋunə pə̀ənə̀. 16Lenəla, ǹkẅempə̀ àshwəŋnə̀ nɨ Ndòʼnə̀mbyə̂ à lə̀ shwəŋə̀nə ambo pə̀ənə̀ lo; ‘Jònə a lə̀ ŋâ àkẅiirə̀ nchyə ambo pə̀ənə̀ nɨ nchyə, la nɨ̀ ghǎ tyiʼə̀ kẅiirə̀ àzɨghə pə nɨ Àzhwùə̀ Nẅùə̀.’ 17Nẅùə̀ à tə pəla ndə̀ ŋâ a ghobə nɨ àzwuumə̀ nɨ à lə̀ kɨnə ŋŋâ ambo pə̀ənə̀ nkwùə̀ wa nɨ pə̀ənə̀ lə̀ nùŋə̀nə mɨ̀ntɨŋmə̀ ɨ̀məənə̀ aŋunə Ndòʼnə̀mbyə̂ Yěsû Kristù, ǹtyiʼə̀ mbə ɨ̀wə̌ a nɨ nàanə̀ a Nẅùə̀ lo kò a ghɨ̀rə̀ e ànwùə̀ nɨ à kòŋə̀nə?”

18Tsaʼnə pobə lə̀ zuʼnə ànwùə̀ zə la, ka chi pə a ghobə nɨ ànwùə̀ àtse a nɨ shwəŋə̀ ntyiʼə̀ nguʼtə̀ a Nẅùə̀ nshwəŋə̀ lo, “Pobə̂ pə̀ŋə̀ mɨ̀ntɨŋmə̀ ɨ̀mobə nfurə̀ amwuə tɨ̀pòŋə̀ ɨghobə mbə nɨ nɨ̀chyə̂mbyə̂.”

Ɨ̀poonə̀ pɨ Kristù nɨ pɨ lə̀ pənə a Antyòkə̀

19Ɨ̀poonə̀ pɨ Kristù lə̀ kɨ̀ɨrə̀ nsìimə̀ amwuə ɨ̀laʼà pɨ̀nyaanə mbə̀ʼə mbuurə̀ ngəʼə̀ nɨ pànə̀ nɨ pɨ lə̀ zhwuutə̀nə a Stifə̀nə̀ lə̀ ŋânə ambo pobə. Pɨ̀tse ghə̀ mbyàa a Cyprùsə̀, pɨ̀tse ghə̀ nkɨ mbyàa Antyòkə̀. Tsaʼnə pobə lə̀ pənə ngyìinə̀ ndèrə̀ la, pobə lə̀ kɨ nchwìitə̀ a ghobə ntwuumə̀ Nẅùə̀ pə ambo pɨ̀Jew. 20La pànə̀ pɨ̀tse amwuə pobə nɨ pobə lə̀ furə̀nə a Cyprùsə̀ ghobə Sìrenə̀ lə̀ pìʼnə̀ a nɨ mmə nchwìitə̀ ntwuumə̀ ghù ɨ̀shìʼnə̀ mbə̀ʼə Ndòʼnə̀mbyə̂ Yěsû ambo pɨ̀Greek, nkwùə̀ nɨ pobə lə̀ lèrə̀nə a Antyòkə̀. 21Ndòʼnə̀mbyə̂ a lə̀ pə pobə pɨ pobə, pànə̀ pɨ̀noʼnə kɨ mbyiimə̀, mbə̀ŋə̀ mɨ̀ntɨŋmə̀ ɨ̀mobə ntô a mbyə̀ ze.

22Ɨ̀poonə̀ pɨ Kristù a Yèrusalèmə̀ zuʼù ntwuumə̀ ghu, ntsàa Barnabas a Antyòkə̀. 23Barnabas à lə̀ pyàa ghu ndzəənə̀ mɨ̀nwùə̀ mɨ ɨ̀shìʼnə̀ nɨ Nẅùə̀ à ghɨ̀rə̀nə ambo pobə ntyiʼə̀ mbə nɨ nɨ̀ghaʼà, ŋŋâ a ghobə nɨ àtəətə̀ lo pobə̂ nùŋə̀ mɨ̀ntɨŋmə̀ ɨ̀mobə aŋunə Ndòʼnə̀mbyə̂, ngoŋə̀ pobə pɨ pobə nɨ nkuŋə. 24Barnabas à lə̀ pə ŋònə̀ ɨ̀shìʼnə̀, nnùŋə̀ ntɨŋmə̀ e aŋunə Nẅùə̀, Àzhwùə̀ Nẅùə̀ a kɨ ndẅenə̀ amwuə ze. Lenəla, pànə̀ pɨ̀noʼnə lə̀ tô ambo Ndòʼnə̀mbyə̂.

25Barnabas à lə̀ tyiʼə̀ nfurə̀ ndèrə̀ a Tasùsə̀ a nɨ naŋə̀ a Saul, 26ndòo e pobə ze lèrə̀ a Antyòkə̀. Pobə lə̀ chyə̂ ghu aŋunə taʼà nguʼu nnèrə̀ ntwuumə̀ Kristù ambo pànə̀ pɨ̀noʼnə. Pɨ tyiʼə̀ mbìʼnə̀ la a Antyòkə̀ a nɨ fuŋə̀ ɨ̀zùŋə̀ ndzùmə̀ Yěsû nɨ ɨ̀poonə̀ pɨ Kristù.

27Nkwùə̀ ghu, ngàŋə ntwuumə̀ Nẅùə̀ yɨ̀tse lə̀ furə̀ a Yèrusalèmə̀ nshwuʼə̀ ndèrə̀ a Antyòkə̀. 28Àzhwùə̀ Nẅùə̀ a shwəŋnə̀ ambo taʼà ŋwùə̀ ghobə ghùtse nɨ nɨ̀linə̀ ɨ̀tse lə̀ pənə Agabùsə̀, a tyiʼə̀ ndòo a ɨ̀shyə̂ nshwəŋə̀ lo ndzàŋə̀ ntɨ̀ŋnə̀ ɨ̌ pə amwuə àtwuə̀ ɨ̀shyə̂ àtsùmə̀. (Ànwùə̀ zèrə zə a lə̀ lòo alyiʼə la nkwùə̀ nɨ Kladyùsə̀ à lə̀ pənə ɨ̀fò Romə̀.) 29Lenəla, ɨ̀zùŋə̀ ndzùmə̀ Yěsû lə̀ nwuunə̀ a ɨ̀shyə̂ mbyiimə̀ lo ŋwùə̀ moʼo moʼo â ŋâ amwuə ndwuumə̀ nɨ ɨ̀pwuumə̀ ɨ̀pe nèrə̀nə, njiilo pɨ lòo ngyèmpə̀ pɨlyimə nɨ pɨ pənə a Judyà. 30Tsaʼnə pobə lə̀ pyiimə̀nə a lenə la, pobə lə̀ tyiʼə̀ ntsàa a Barnabas pobə Saul lo pobə̂ ghə̀ ŋŋâ ɨ̀pwuumə̀ pèrə pə ambo pɨ̀lɨ̀ŋmə̂.

Obecnie wybrane:

Ɨ̀fàʼà 11: pny

Podkreślenie

Udostępnij

Kopiuj