Ɨ̀fàʼà 12

Pɨ chi nkẅìʼnə̀ ŋŋâ ngəʼə̀ ambo ɨ̀zùŋə̀ ndzùmə̀ Kristù

1A lə̀ pə tyìʼə̀ nkwùə̀ ghu, ɨ̀fò Heròdə̀ a kootə̀ pɨ̀tse ɨ̀zùŋə̀ ndzùmə̀ Kristù, ntàʼà a nɨ ŋâ a ghobə nɨ ngəʼə̀. 2À lə̀ zhwuutə̀ a Jemə̀ ntsàambyə̀ Jònə nɨ mɨnẅuə ntsòo. 3À lə̀ zəənə̀ lo ànwùə̀ ghu a pòŋə̀ pɨ̀Jew, ntyiʼə̀ ndàŋə̀ nɨ mbyə̀ nkɨ nkô a Pità. (Ànwùə̀ zə̀ a lə̀ lòo alyiʼə la nkwùə̀ Nɨ̀ghaʼà Àlàŋə̀ Mmyàʼtə̀.) 4À lə̀ kô a Pità la, nchyâ e a ndâ ɨ̀tsaŋə̀, nnùŋə̀ pɨ̀soyì ɨ̀kẅìrə nɨ̀kwàa lo pobə̂ mə mbyabə̀ e, ntiinə à lə̀ pənə ntàʼà a nɨ lòo e tô a mbyə̀ pə̀ənə̀ lo pɨ̀ saʼà ɨ̀sàʼa e nkwùə̀ nɨ Nɨ̀ghaʼà Àlàŋə̀ Mmyàʼtə̀ à làŋə̀nə. 5Lenəla, pɨ lə̀ chyâ Pità a ndâ ɨ̀tsaŋə̀, ɨ̀poonə̀ pɨ Kristù tyiʼə̀ mbə a ndzùmə̀ ntə̂ àtwuə̀ nchàʼtə̀ a Nẅùə̀ aŋunə ze tɨ kaanə̀.

Angèrə̀ a fuukə̀ Pità a ndâ ɨ̀tsaŋə̀

6A lə̀ pə nɨ ɨ̀twuʼə̀ nɨ njyə̂ ɨ̌ laanə̀ lo Heròdə̀ â lòo Pità ntô a mbyə̀ pə̀ənə̀ lo saʼà ɨ̀sàʼa e la, Pità à lə̀ pə ndyə̂ a tɨ̀tɨ̀rə̀ pɨ̀soyì pɨpaa, pɨ korə̀ e nɨ mɨ̀tsaŋə̀ mɨmbaa. Pɨ̀soyì pɨ̀tse pɨpaa lə̀ kɨ mbə a ntswùə̀ nkaʼà ɨ̀tsaŋə̀ ghu mmə mbyabə̀. 7Angèrə̀ Nẅùə̀ à lə̀ zùŋə̀ ntəəmə̀ a ndâ ɨ̀tsaŋə̀ gha, ɨlyiʼə laanə̀ nɨ ẅirə. Lenəla, nnə̀ʼə̀ Pità aŋunə nɨ̀ghə̌ nshwəŋə̀ ambo ze lo, “Faʼa ndòo a ɨ̀shyə̂!”Mɨ̀tsaŋə̀ ma zùŋə̀ nkyàatə̀ a mbô ze nkẅìnə̀ a ɨ̀shyə̂. 8Angèrə̀ wa a tyiʼə̀ nshwəŋə̀ ambo ze lo, “Korə̀ ɨ̀kòbə̀ o ngẅî ɨtabə ɨ̀pô.” A ghɨ̀rə̀ a lenə. Angèrə̀ wa a chi nshwəŋə̀ lo, “Ẅî atsəʼə ndzùŋə̀ mə̀.” 9Pità à lə̀ zùŋə̀ a angèrə̀ wa nfurə̀ a àpyìinə ka zhyə̂ e lo ànwùə̀ nɨ a lòonə alyiʼə lə a nkǔŋə nkuŋə, mmə nkwàŋə̀ àze pə lo ndzə̀əmə̀ ɨ̀ làŋə̀ a ɨ̀myə̂ ze. 10Pobə lə̀ làŋə̀ a ntsàambyə̀ soyì nɨ à lə̀ mənə mbyabə̀ ntswùə̀ àpùʼù àtɨ̀ŋnə nɨ ɨ lə̀ furə̀nə ndèrə̀ amwuə àlaʼà. Ntswùə̀ àpùʼù wə̀ nyaʼkə̀ ẅèrə nɨ ẅèrə ŋŋâ àlàŋə pobə làŋə̀ nfurə̀, ntyiʼə̀ mmə ngyìinə̀ nshwuʼə̀ àlàŋə, angèrə̀ wa a wùutə̀ mmyàʼtə̀ a Pità.

11Nkwùə̀ nɨ angèrə̀ à lə̀ myàʼtə̀nə a Pità la, àtwuə̀ e a lə̀ laanə̀ a shwəŋə̀ lo, “Ǹzhyə̂ nkǔŋə nkuŋə tɨ̀tsòŋə̀ lo, Ndòʼnə̀mbyə̂ à tə ntwuumə̀ angèrə̀ e a tô nkẅiirə̀ mə̀ amwuə mbô mɨ Heròdə̀, nfuukə̀ mə̀ amwuə ngəʼə̀ nɨ pɨ̀Jew lə̀ mənə ntàʼà ŋâ ambo mɨ̀ŋə̀.” 12Tsaʼnə Pità à lə̀ zhyə̂nə ànwùə̀ nɨ a lə̀ ghɨ̀rə̀nə la, à lə̀ lèrə̀ a ndâ Màriyà mǎ pɨ Jònə ẅùə̀ nɨ pɨ lə̀ mənə nfuŋə̀ e mbyàʼtə̀ nɨ Mark. Pànə̀ pɨ̀noʼnə lə̀ shwatə̀ ghu mmə nchàʼtə̀ a Nẅùə̀. 13Lenəla, Pità a tsòotə̀ ntswùə̀ àpùʼù, mômə̀ngyə̌ nɨ à lə̀ mənə nfàʼà a ɨmwuə alyiʼə ghu pɨ mə nfuŋə̀ e nɨ Rodà a tô ngẅùʼə̀. 14Nkwùə̀ nɨ à lə̀ zuʼnə ngyə̀ Pità, nɨ̀ghaʼà à lə̀ lẅenə̀ ntɨŋmə̀ e, a kẅirə̀ nkɨ̀ɨrə̀ nkwuunə̀ amwuə ndâ nshwəŋə̀ lo Pità à wə̀ ntəəmə̀ a ntswùə̀ àpùʼù. 15Pobə zuʼù nshwəŋə̀ ambo ze lo, “Wə̀ paarə̀.” A chi nshwəŋə̀ tyìʼə̀ nɨ ɨ̀tɨ̀ŋnə̀ lo, “A nkǔŋə nkuŋə, a ze.” Pobə shwəŋə̀ lo, “A angèrə̀ e.” 16Tsaʼnə pobə lə̀ mənə nshwəŋə̀ la, Pità a pə a àpyìinə mmə ntsòotə̀ ntswùə̀ ndâ. Pobə ẅùʼə̀ ndzəənə̀ a pə ze, ànwùə̀ ghu a kə̀ʼnə̀ a ghobə. 17Pità a ŋaŋə̀ àpô e nnèrə̀ àchyə̌chyə̂ lo pobə zhwemnə̀, ntyiʼə̀ ntiitə̀ a ghobə tsaʼnə Ndòʼnə̀mbyə̂ à lə̀ tsàanə a angèrə̀ a tô fuukə̀ e a ndâ ɨ̀tsaŋə̀ gha. A lə̀ shwəŋə̀ ambo pobə lo, “Nɨ̀ tyiʼə̀ ngə̀ shwəŋə̀ ambo Jemə̀ pobə pyə̀ pɨ̀lɨ̀ŋmə̂,” lenəla ntyiʼə̀ mmyàʼtə̀ a ghobə ndèrə̀ e alyiʼə nyaanə.

18Njyə̂ ɨ̀ lə̀ laanə̀ ɨ̀twuə̀ pɨ̀soyì tsànkə̀ pobə tyiʼə̀ mbyiitə̀ lo Pità wa à lèrə̀ lə ɨghə? 19Heròdə̀ a shwəŋə̀ lo pɨ tàʼà a Pità, la pɨ tàʼà ka zəənə̀ e a ye. Lenəla à lə̀ ghɨ̀rə̀ pɨ zhwuutə̀ a ghobə pɨ̀tsùmə̀.

Tsaʼnə ànwùə̀ zèrə zə̀ a lə̀ làŋə̀nə la, Heròdə̀ à lə̀ shwuʼə̀ ndèrə̀ a Kàsaryà ngə̀ mbə ghu aŋunə nkwùə̀ ɨ̀tse.

Tsaʼnə Heròdə̀ à lə̀ kwɨghə̀nə

20Ntɨŋmə̀ Heròdə̀ ɨ lə̀ pə ndzaŋə̀ mbə̀ʼə pànə̀ pɨ Tayə̀ ghobə Sidònə̀, lenəla pobə tyiʼə̀ nshwatə̀ lo ghə̀ zəənə̀ e. Pobə lə̀ zàamə̀ mbə̀ŋə̀ àtwuə̀ Blastus nɨ à lə̀ pənə ntsɨ̀ntoʼò ngẅùunə ambo Heròdə̀ lo â tyiʼə̀ nkòŋə̀ a ghobə. Pobə lə̀ tyiʼə̀ ndèrə̀ ambo ɨ̀fò Heròdə̀ mbuʼù mbô lo pobə pɨ pobə nwuunə̀ nɨ àporə̀porə̀ ntiinə mɨ̀zɨghə̀ ɨ̀mobə lə̀ furə̀nə la àlaʼà ze.

21Pobə lə̀ tyiʼə̀ nkàʼà njyə̂ ɨ̀tse nɨ ɨ̀fò Heròdə̀ à ẅînə ɨtsəʼə nɨ̀fò ɨ̀pe ŋŋaanə̀ aŋunə aləŋə nɨ̀fò e mmə nshwəŋnə̀ ambo pə̀ənə̀ ɨ̀pe. 22Tsaʼnə à lə̀ mənə nshwəŋnə̀ la, pobə lə̀ chə̀pə̀ àshwəŋnə̀ e nkyiinə̀ nɨ ɨ̀tɨ̀ŋnə̀ lo, “Ka lə pə e ngyə̀ ŋwùə̀ mɨsoŋə, a ngyə̀ nẅùə̀ ɨ̀tse.” 23Angèrə̀ Nẅùə̀ a zùŋə̀ mbòrə̀ e mmàʼà a ɨ̀shyə̂, ntiinə ka à lə̀ ŋâ e àghuʼtə̀ ambo Nẅùə̀. Pɨ̀mənẅaŋnə tyiʼə̀ nkwuunə̀ a mbɨ̀ŋmə̀ ze nkwurə̀ e a kwɨghə̀.

24Àshwəŋnə̀ Nẅùə̀ a lə̀ kẅùə̀ nsìimə̀. 25Barnabas pobə Saul lə̀ myàanə̀ àfàʼà àzobə ntyiʼə̀ ndòo Jònə Mark pobə furə̀ a Yèrusalèmə̀ nkwə̂ a ghobə.

Obecnie wybrane:

Ɨ̀fàʼà 12: pny

Podkreślenie

Udostępnij

Kopiuj