MATIU 8
8
I Jisas mo vagamwasaragi na tangaloi vohavono lune
1I Jisas mo himei dena vusi, ko a sinobu u sao ram hurie. 2A tangaloi a vohavono mo vonai lobena, mo sisiqeu goroe, mo veve vena, “Huqe, tare ve gom tarani, gon vaieu ve nan mwasara.” 3I Jisas mo vugeri na limana mo tango vano lune, mo veve vena, “Nam tarani, gon mwasara!” Ko siserigi ingeie mo mwasara dena vohavono. 4Ko I Jisas mo veve lawea vena, “Gon rongo, go mese veve lategi lawe hine tea beno, nge gon vano tuturedu lobei rugurugu na lehigo tomue. Ko gon bete nomu hogogi mwere a Leo hora noi Mosis u veve, a gigilegi lawera ve gu mwasara.”
I Jisas mo Vagamwasoi na mwalakelo nona leogoro soldia vudolue ta Rom
5Lune i Jisas mo ahu vano a Kabeniam, a leogoro soldia vudolue mo vonai lobena, mo navuhie vena, 6“Huqe a noku mwalakelo mo eno lo vale u luku, mo gagarasi u liu.” 7I Jisas mo veve lawea vena, “Nain vano, nain vagamwasoie.”
8A leogoro mo duvi vena, “Mese, Huqe. Na he tatarise tea ve goin ehu lolo valeku. Nge gon hora na leomu hogosie, ko a noku mwalakelo vin mwaso. 9Huri ineu vage nam toga lo vavara tangaloi ram hako huireana goroau, ko ineu nam hako huireana gorora noku soldia; nam horae gatagale denire vena, ‘Gon vano!’ ko mo vano; ko nam horae tuegi vena, ‘Gon vonai!’ ko mo vonai; ko nam hora na noku tangaloi tabanagi vena, ‘Gon vaie ngaha!’ ko mo vaie.
10Lune i Jisas mo rono mwerehi, nge mo garigi huri, mo veve lawe rahine ram hurie vena: “A hogo, nam veve lawe gimiu vena, na he haqe ihine tea a Israel mena ladohogo u lawua mwere ngaha. 11Nam veve lawe gimiu vena, ingere rau sao rain vonai dena vui matainaho ko dena matainaho roro, rain toga hivo mei Ebraham ko i Aesak ko i Jekob lo mwasoana garaqa God mo ratahigi lolona. 12Nge ira lai hougi na mwasoana garaqa vin tuli vohoginire lolo dodogi varea, rain tangi ko rain gasigesigi livora aie.” 13Ko i Jisas mo veve lawe na leogoro vena, “Gon vano, ko huri a nomu ladohogo vin vei mwerehi lawego.” Ko a mwalakelo hi mo mwaso taligu lo mahoi rani hi.
I Jisas u vagamwasoire tangaloi rau sao
14I Jisas u ehu lolo valei Bita, mo lehi tubui qeligana mo eno gina mahagite. 15Nge mo hako lo limana, ko a mahagite hi mo rovo denie. Siu mo maraga, mo vai rarai gana hinaga.
16Mo revirevi, a sinobu ram lai na tangaloi a vui esi lure lawe Jisas, ko nge mo vuro lue na vui esi gina leona, ko mo vagamwasoire segesege doluegi. 17Nge mo vai mwere ngaha huri ve vin vagahorongi na leo gina singoi Aesaea a tangaloi veve rarai vena, Ingeie sibona mo lai vohogi na noda segeana, ko mo wali na noda gagarasi.
Ngere ram veve ve ram tarani ve ran huri Jisas
18I Jisas mo lehi na sinobu ram sone dalie, nge mo hora ira nona rorongtagi ve ran vano lo tavului wei. 19A huhui gatagale talo Leo hora noi Mosis mo vonai lobena, mo veve vena, “Huhui, nain hurigo vataha ute goin vano aie.”
20I Jisas mo duvi lawea vena, “A wiriu turu a malangara lure, ko a manu namawe a mwagunire lure, nge i Netui Tangaloi hate tanoi niana.”
21A tangaloi tuegi, a rorongtagi, mo veve lawea vena, “Huqe, gon siregieu ve nan vano tomue na tulegi tamaku.” 22I Jisas mo duvi vena, “Gon hurieu, gon sireginire hi rau mate beno ran tulegi na nora mateana sibora.”
I Jisas mo vai tamwatagi na rebu
23I Jisas mo kalo sulolo aka ko ira nona rorongtagi ram, hurie. 24Ko a rebu lawua mo maraga lolo wai, giniehi, a navo mo luluwegi na aka. Nge i Jisas mo maturu. 25Ira rorongtagi ram vano lobena, ram vagaradasie, ram veve vena, “Huqe, gon vagamwasoi gide! Dam mate!” 26I Jisas mo duvi lawera vena, “?Huri hava gineu nem matagu, gimiu ira ladohogo biti?” Siu nge mo maraga, mo gato goro na langi mena rebu, ko a wai mo taro dali bulu.
27Ingere doluegi ram garigi, ram veve vena, “?Hava tangaloi naha? Huri a langi ko a rebu rom rongo hurie!”
I Jisas mo vuro lue na vui esi dena tangaloi gairue ta Kadara
28I Jisas mo dadari lo tavului wei ta Kalili lolo loloi venue ta Kadara, ko a tangaloi gairue rom haqea rom bei mwelue dena malanga vatu ram tau rahine rau mate lolona. A tangaloi hi a vui esi lure, ko rom muramuraga; giniehi, ihine tea he vano lai tea lo turegi hi. 29Rom ulo siaga vena, “?Netui God, gom tarani na hava gineu mei gamaru? ?Vaiteu gom vonai ve gon vai garasi gamaru, huri a tarogi hatie tau?”
30He vagahao tea a buri boe sao ram huhue. 31A vui esi hi rom hui siaga den Jisas vena, “Tare ve goin vuro lue gamaru, gon hora gamaru lawe na boe.” 32I Jisas mo veve lawera vena, “Nero vano.” Ko a vui esi hi rom mwalue dena tangaloi gairue hi, rom ahu lolo boe. Ko a buri boe doluegi ram toa ram hivo lo bahai wei, ram qale talolo wai, ram dono aie hi.
33A tangaloi hi rau leo goro na boe ram toa vano, ram dadari lo qatui venue lawua hi, ram veve lategi na gineu ingere ngaha doluegi ko a hava gineu u vei lawe na tangaloi hi a vui esi lure. 34Ngere doluegi talo qatui venue hi ram vonai ram vui haqe mei Jisas; lune ram lehie, ram veve siaga vena vano dena vanuara.
Obecnie wybrane:
MATIU 8: HNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific, 2013
