MATIU 7
7
A vevegi
1“Nen mese vevegi, huri ve God vin he vevegi gimiu tea. 2Mwere nem vevegi hine tea, vin vevegi gimiu mwerehi, ko mwere nem dovo lawe hine tea, vin dovo taligu lawe gimiu mwerehi. 3Huri hava gineu gom lehi na mavusi gei lolo matai tuemu, ne go he lado na welehi tea lolo matamu sibomu? 4Huri hava gineu gom veve lawe i tuemu vena, ‘Siregi laweau nan lai vohogi na mavusi gei dena matamu,’ nge a welehi mo eno lolo matamu sibomu. 5I kaligoro, gitomue gon lai vohogi na welehi dena matamu sibomu, siu goin leo vurugegi ve gon lai vohogi na mavusi gei dena matai tuemu.”
6“Nen mese bete na gineu gogona lawe na wiriu, vate vai ram tu dori ram heve gimiu; nen mese tuli na nomiu matai gineu lo nagora boe, vate vai ram vavarahire.
Navu, hike, dingdingi
7“Nen navu, ko vin lei lawe gimiu; nen hike, ko nein haqe; nen dingdingi ko vin roa na matai vale lawe gimiu. 8Huri vataha hine mo navu, vin lei lawea; ko vataha hine mo hike, vin haqe; ko vin roa na matai vale lawe vataha hine mo dingdingi. 9?Ihine tea mei gimiu vin lei na vatu lawe netune, lune nge mo navu na bereti? 10?Sige vin lei na mwata lawea, lune nge mo navu na ige? 11Igimiu, ira galegaleasi, nem ilo ve nen bete na gineu garea lawe re netumiu. ?Nge tau i Tamamiu eulu vin he bete na gineu garea tea vena liu lawera hine ram navu denie?
12“Vataha gineu nem tarani ve a tangaloi rain vei lawe gimiu, nen vai nomiu mwerehi lawera: huri ngaha a domiana talo Leo hora noi Mosis ko a leo huhui nora tangaloi ligoligogi.
A matai ara biti
13“Nen ahu turu na matai ara biti, huri a matai ara u tatavola ko a turegi u matamwasara mo vano lolo mateana radu, ko ingere rau sao ram vano lune. 14Nge a matai ara u biti ko a turegi u gona mo vano lolo mwasoana radu, ko ingere te gaivihe ram haqea.
A gai ko a mwasine
15“Nein matagoro huri ira tangaloi ligoligogi kalikeli; ram vonai lobemiu mwere na sibsib lo tarabesire, nge lolo lolora rau mwere na wiriu turu. 16Nein ilora lo dorire. A garo kau vin he wai lei na mwasi duduele tea, ko a moli gehu vin he wai lei na mwasi duledule tea. 17A gai garea vin wei na mwasigi u garea, ko a gai esi vin wei na mwasigi tea hi u esi. 18A gai garea vin he wai lei na mwasigi tea hi u esi, ko a gai esi vin he wai lei tea na mwasigi u garea. 19Vataha gai he wai tea mwasigi u garea vin teie ko vin tulie talolo avi. 20Mwerehi nein ilora tangaloi ligoligogi kalikeli lo doridorire.
Na he ilo gimiu tea tamwere
21“Hatie vataha tangaloi mo wareau vena ‘Huqe, Huqe,’ ve vin ehu lolo mwasoana garaqa God mo ratahigi lolona, nge ingere hogosie ram vai na taraniana noi Tamaku eulu. 22Lune a rani hingei vin vonai, ingere rau sao rain veve laweau vena, ‘Huqe, Huqe! Lo henamu gamai gau veve leo ligoligogi, lo henamu gamai gau vuro lue na vui esi, lo henamu gamai gau vei na managi u sao!’ 23Siu nain veve lawera vena, ‘Na he ilo gimiu tea vohogi. Nen vano denieu, gimiu ira tangaloi galegaleasi asi!
A tangaloi hako vale gairue
24“Vataha hine mo rongo na noku leo ingere ngaha ko mo hurire nge vin mwere na tangaloi mataisao, mo hakovi na valena lo vatu. 25Ko a uhe mo uhe, ko a wai mo hale, ko a langi mo here, ko ram susuni na vale hi, nge he soi lai tea, a vevenagi nge mo labe lo vatu. 26Nge vataha hine mo rongo na noku leo ngere ngaha ko he hurire tea nge vin mwere na tangaloi reragi, mo hakovi na valena lolo one. 27A uhe mo uhe, a wai mo hale, a langi mo here, ko ram susuni na vale hi mo soi ko mo tuli talatalae.”
A managi noi Jisas
28I Jisas u veve na gineu ingere ngaha u rovo, ko a sinobu ram awogi huri nona lengai huhui. 29Huri ingeie mo huhuire gena managi, nge hatie mwere na nora huhui sibora talo Leo hora noi Mosis.
Obecnie wybrane:
MATIU 7: HNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific, 2013
