MATIU 15
15
A lengagi nora tangaloi tau tuei
1Siu ira Varise ko ira huhui lavasigi talo Leo hora noi Mosis ram vonai den Jerusalem lobei Jisas, ram huie vena: 2“?Huri hava gineu ira nomu rorongtagi ram vai utu na lengagi noi retubure? Ingere rahe qaqaga tea vurugegi lune ingere ram gagani.” 3I Jisas mo duvi vena, “?Huri hava gineu gimiu vage nem vai utu na Leo hora noi God huri ve nen huri na nomiu lengagi sibomiu? 4Huri God u hora vena, ‘Gon ladomavagi tamamu tona retahimu,’ ko ‘Tare ve ihine tea mo veve asiesigi tamana sige retahine nge vin mate.’ 5Nge igimiu nem huhui vena tare ve ihine a nona hako gineu lune nge vin bului lei tamana sige retahine ginie, nge mo veve vena, ‘Nge ngaha a hogogi lawe God,’ 6nge vin he ladomavagi tamana tea. Gimiu nem vai hivohivogi na leo noi God huri ve nein huri na nomiu lengagi. 7Gimiu ira kaligoro! I Aesaea u veve rarai tatarise huri gimiu lo nona revereve: 8‘God mo veve vena, nge a lolora u vagahao denieu. A sinobu ngaha ram ladomavagieu gena singora, 9Ram huduhudu vurogi laweau, a vevenagi ram huhui na lengagi nora tangaloi mwere huri ve a Leo hora noi God!’ ”
A gineu hi ram vai soloragi na tangaloi
10Siu i Jisas mo ware na sinobu vonai lobena ko mo veve lawera vena: “Gimiu nen rong hurieu ko nein ilo vurugegi! 11Hatie hava gineu tau varea vena ahu lolo wuwai tangaloi ve vin vei soloraginie lai; nge a gineu mo mwalue dena wuwai tangaloi mo vai soloraginie.” 12Siu ira rorongtagi ram vonai lobena ram veve vena, “?Gu ilo vena ira Varise ram taturegi gena nomu leo?” 13I Jisas mo duvi lawera vena: “Vataha rivurivu ngerehi Tamaku eulu he rivure tea rain hevu vohogi. 14Nen sireginire! Ingere ira tomtomuegi a matara u dodo; lune a tangaloi matadodo mo tomuegi na matadodo tuegi, ingere vunu roin soi lolo walu.” 15I Bita mo duvi vena, “Gon matamwasaragi na gato tavalu hi lawe gamai.” 16I Jisas mo veve lawera vena: “?Wa gimiu vage nehe iloe tea vurugeginie tea vage? 17Nehe iloe tea ve a gineu mo ahu lolo wuwai tangaloi mo hivo lolo tinaena ko mo avu turu dena betugi. 18Nge a gineu mo mwalue dena wuwai tangaloi mo vonai dena lolo lolona; ngehi mo vai soloraginie. 19Huri dena lolo loloi tangaloi a domiana u esi ram mwalue ve vin vei na gineu esi ingere ngaha: a ue tangaloi, a vagasile lo vavine, a balubelu, a uenagavono ko a veve huri. 20Ngere ngaha a gineu ram vai soloragi na tangaloi. Nge tare ve a tangaloi mo gagani he qaqaga tea, vin he vai soloraginie tea.”
A vavine haroharo mo ladohogogi Jisas
21Siu i Jisas mo mwalue dena ute hi ko nge mo vano lo togagi venue kakarani Taea ko Saedon. 22A vavine ta Kenan nge mo toga lo vanue hi mo ulo mo veve vena, “Huqe Netui Devet, gon hagavieu! I netuku a vavine a vui esi lune mo sege.” 23Tau i Jisas he duvi goroe tea. Ira nona rorongtagi ram vonai lobei Jisas ram navu denie vena hora vohoginie, huri nge mo ulo mo hurire. 24I Jisas mo duvi goroe mo veve vena, “U horau hogosie huri na sibsib a duvi Israel rau sala tau.” 25A vavine mo vonai mo sisiqeu hivo lolo karune mo veve vena, “Huqe, gon buluieu!” 26Nge i Jisas mo duvi vena, “He garea tea vena lai na hinaga gara maresu ko na tulie lawe na wiriu. 27A vavine mo duvi vena, “Io, Huqe. Nge a wiriu ram gani na mavurigi hi ram soi dena tevo noi nora huqegi goro.” 28Siu i Jisas mo duvi lawea vena, “Vavine, nom ladohogo u lawua. Vin eno lawego mwere gom tarani.” Ko i netune mo mwaso lo mahoi rani hi.
I Jisas mo vagamwasoi na sinobu sao
29I Jisas mo siregi na vanue hi mo vano lo mwararai Wai ta Kalili. Nge mo kalo lo vusi ko mo toga hivo aie. 30Ko a sinobu sao ram vonai lobena, ram vonai lai meire hi ram sigori, ram luku, ira matadodo, ira bao, ko ira segeana wagiwegineu vage, ram taure lo vavai karui Jisas ko nge mo vagamwasoire. 31A sinobu ram garigi liu huri ram lehi na bao ram laqa, ira lukuluku ram mwaso, ira sigori ram dige, ko a matadodo ram leo; ko ingere ram waregareagi God hi a nora duvi Israel.
I Jisas mo vangani na tangaloi teri vagavesi
32I Jisas mo ware vonai ira nona rorongtagi mo veve lawera vena, “Nam hahagavi huri na sinobu ngaha, a vevenagi rau toga meieu beno huri rani gaitolu, ko siserigi ngaha hatie hinaga ve rain geni. Nahe tarani tea ve nain horara rain mule mwaruruhi, vaiteu ram mate huri gara lo turegi.” 33Ira rorongtagi ram huie vena, “?Dain haqe na hinaga logo u tatarise huri na sinobu ngaha lo vanue vurogi?” 34Ko i Jisas mo huire vena, “?A bereti gaivihe mei gimiu?” Ko ram veve vena, “Gaibitu, ko a ige wuwerigi lavasigi vage.” 35Ko nge mo hora na sinobu ve ran toga hivo lo tano. 36Siu nge mo lai na bereti gaibitu mena ige, mo vevegareagi God hurie, mo vise vurivuri na bereti, mo laire lawe na nona rorongtagi, ko ira rorongtagi ram bete lawera sinobu. 37Ngere doluegi rau geni rau guqe. Siu ira rorongtagi rau vile bulutegi na maututugi, a gete gaibitu rau horo. 38A tovoi mwera hogosie rau geni ingere teri vagavesi, nge a vavine ko a maresu ra he valure tea. 39Siu i Jisas mo hora mulegi na sinobu, ko mo kalo lo aka ko mo vano lo togagi venue ta Makadan.
Obecnie wybrane:
MATIU 15: HNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific, 2013
