MATIU 14
14
A leo huri na mateana noi Jon Garuhigogona
1Lo tarogi ngehi i Herot a ratahigi ta Kalili u rongo huri na roroi Jisas, 2ko nge mo veve lawera nona tangaloi vena, “Jisas hi Jon Garuhigogona nge u maraga taligu dena mateana; ko a vevenagi hi a managi ingere ngaha ram lalakogi meie.” 3A vevenagi i Herot u lei Jon u veuhie, u teue lolo valei vauveu. I Herot mo vai mwerehi a vevenagi Herodias. I Herodias hi u legi mei Vilib, tuei Herot, nge i Herot u lei na vavine hi, i gahorai tuana, u legi meie. 4Huri Jon Garuhigogona u veve vena, “He vovohoi tea huri ve gom lagi meie.” 5I Herot u tarani ve vin vagamatea, tau nge mo matagu gena sinobu, huri ingere rau ladohogo ginie vei nge a tangaloi veve rarai. 6Lo rani hi a rani voraana noi Herot, a taqalugu netui Herodias mo wetu lo nagora sinobu ko i Herot mo lehe garea mo wetu. 7Giniehi, nge mo lai na varatau mo haharigi lawea huri ve vin bete lawea a hava gineu nge vin tarani. 8I retahine mo garoginie ko a taqalugu mo veve vena, “Gon bete laweau tangaha a qatui Jon Garuhigogona lolo laha.” 9A ratahigi nge mo hahagavi, tau, a vevenagi huri a nona haharigi lo nagora nona buluana nge mo tau na leo ve vin bete lawea. 10Nge mo hora na tangaloi vuro vena nen tai utuhi na qatui Jon Garuhigogona lolo valei vauveu. 11Ko mo haloe mo vonai meie lolo laha mo betea lawe na taqalugu hi ko ingeie mo betea lawe retahine. 12Ira rorongtagi noi Jon ram vonai, ram lai na betune ko ram tuleginie; ko ram vonai ram laqagi hurie lawe Jisas.
I Jisas mo vangani na tangaloi teri vagalime
13Lune i Jisas mo rongo huri na gineu ngaha, nge mo siregi na ute ngaha, mo vano lo aka sulo vanue vurogi. Tau a sinobu ram rongoe ram siregi na vanuara ko ram hurie lo tano. 14Lune i Jisas mo rovo hage varea, mo lehi na sinobu u sao, mo hagavire, ko mo vagamwasoire rau sege. 15Lune mo revirevi, ira nona rorongtagi ram vonai lobena ram veve vena, “Mo tauvuigi mo dodo, ko a tangaloi rahe toga tea lo mahoi ute ngaha. Gon hora mulegi na sinobu huri ve rain vano lategi lolo qatui venue, ran voli gara hinaga sibora.” 16I Jisas mo veve lawera vena, “Hatie gineu mwerehi ve rain mule. Nge nen bete tea hinaga lawera ran gani.” 17Ingere ram duvi lawea vena, “Gamai hatie gineu mei gamai hogosie a bereti gailime ko a ige gairue.” 18I Jisas mo veve vena, “Gimiu nen laire vonai laweau.” 19Ko nge mo hora lawera sinobu vena ingere ran toga hivo lolo duvu; siu nge mo lai na bereti gailime ko a ige gairue, mo dada sueulu, mo vevegareagi God hurie. Vunu mo vise vurivuri na bereti hi, mo laie lawe na nona rorongtagi, ko ira rorongtagi ram betea lawe na sinobu. 20Ko ingere doluegi rau geni rau guqe. Siu a nona rorongtagi rau vile bulutegi na maututugi ram eno radu a gete hangavulu domwagi gairue rau horo. 21A tovoi mwera hogosie rau geni ingere teri vagalime, ko a vavine ko a maresu ra he valure tea.
I Jisas mo dige lo ului wei
22Ko siserigi i Jisas mo hora ira nona rorongtagi huri ve ran kalo lo aka ko ran vano tomue denie lo tavului wei, lune nge mo hora mulegi na sinobu. 23Lune nge u hora muleginire, nge mo hage lo vusi gahea vena tataro. Lolo revirevi i Jisas nge aie hi gahea. 24Lo tarogi hi a aka nge lolo livugei wei beno, a navo mo wehie, a vevenagi a langi mo susunie. 25Lune lolo ulu ului reni nge mo vonai lobera mo dige lo ului wei. 26Lune ira rorongtagi ram lehie mo dige lo ului wei, ingere ram matagu garagara, ram veve vena, “Ingeie a tamate!” ko ingere ram ngara gena matagute. 27Nge siserigi i Jisas mo laqa meire mo veve vena, “Nen toga surigi! Ineu ngaha. Nen mese matagu!” 28I Bita mo duvi lawea vena, “Huqe, tare ve iniko hogo, gon veve ve nain vonatu lobemu lo ului wei.” 29Ko nge mo veve vena, “vonai!” I Bita mo hivo dena aka ko mo tauvuigi mo dige lo ului wei mo vano lobei Jisas. 30Nge lune nge mo lehi na langi u huire nge mo matagu, ko mo tauvuigi mo dono. Ko mo ngara ware Jisas vena, “Huqe, gon vagamwasoieu!” 31Siserigi i Jisas mo haga hurie ko mo wiri bibie mo veve vena, “?Iniko a nom ladohogo u biti, huri hava gineu gom ladosavi?” 32Ngere rom kalo lolo aka, ko a langi mo mautu. 33Ko ingere lolo aka ram sisiqeu goro Jisas, ko ram veve vena, “A hogo, iniko i Netui God!”
I Jisas u vagamwasoire segesege lo vanue Kenesaret
34Rau gao utuhi na wai hi ram dadari lo vanue Kenesaret, 35ko a sinobu taie ram leo hogosie vagatagale ve i Jisas. Ram hora lategi sulo vanue dalibulu ko ram laire segesege vonai lobena. 36Ko ingere ram navu denie ve ira segesege rain sikeli lei na gologolo luqana; ko irahine ram sikelie ram mwaso.
Obecnie wybrane:
MATIU 14: HNT
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Bible Society of the South Pacific, 2013
