KIIMWEBI JAQSHAM 1
1
1Lungwii Kongti we Theophilas: Ngi raq awaiqha apha shaqshaq lakdap na, ngi raq Jesuq jaqsham manphan ka, apaiq raq ajaqsham phaho ranaiq maq süpha wan lata, 2apaiq ka ramungtan na, Shiikeawe raq shea wantaq akhing ranaiq na saüli liipan na, apaiq raq ümtinkhan wa jaqsham wantaq kra, nai traho bom chongkuq wantaq jaqsham manphan thun kra, waiq kang. Apaiq ka ramungtan na mishea wan shaq na, Asii Wenyi ningkun maq, apaiq raq akiimwetiim ma nguta tsea wantaq thun kiima tsii ka aheawiq maq chongkuqto. 3Apaiq ka amaa wa dong wan jai min, raroqblai na saüli akiimwetiim rai jang pahea, tsangshiq tsan na tiitsangdada maq, asham ka tiichhi kuq wan lili raüta, tsangshiq rai riihumto. Kiimaq, tsangshiq raq, apaiq rai sham riichhito. Krai mren, apaiq ka atra dea nguta, tsangshiq ka tsan sangli chhaq miishe sito. Kiimaq, apaiq raq tsangshiq ma, Shiikeawe Mungtan ka saüho tlo she nguta chongkuqto. 4Kiimaq, apaiq ka tsangshiq rai adam na asi bala shon na, apaiq raq ara aming ara tsangshiq ma akha kuqto, “Namshiq ka Jerusalem wa ahin na naqkiho rongkiq. Shatmaq kiimaq kheshat miili si ronglaq. I We raq namshiq ma kongphiq mikuqha nguta kiqkham kuqto she, nguta bom ka ngi raq namshiq ma chongkuq kang ihata. Riita ümchaü ka kriishe miku wan. Kra miitu ümchaü namshiq ka kheshat miili she sichang. 5Kiimaq, Johan raq namshiq ma kham lamkuq wantaq irka, kham lamlam miili lamkuq wanto. Shatmaq, ümchaü ka, heashi sijai niili she, Shiikeawe raq namshiq ma, Asii Wenyi miishe kham ka milam kuq wan,” nguta aming kuqto.
Jesuq Ramungtan Na Wawanto
6Krai mren, kiimwebi ka Jesuq rai adam riitam nga tlaq akhing na, tsangshiq raq apaiq ma, “Tatiwe, riita, ümniiraq Israilnok ma mung ahinti khuthaq na hokham jaqsham wan arang ka ümchaü jaqlo miili she shea mikuq haü?” nguta waito.
7Kiijiishe, Jesuq raq tsangshiq bom ka akha treto, “Israilnok ma munglang wan mungtu jaqsham kewan kriika, ümtincho na kewan chang wa, kra akhing rahiq jipi ka, i We apaiq riili saptlo. Kriika namshiq raq brorii kai chang ka riimak. Kriika, apaiq raq thapthi chang li. 8Shatmaq, ümtiikiiwa Asii Wenyi ka namshiq khum niishe saüki tlaq, kra akhing na, namshiq ka Asii Wenyi raq kunli arom mir wan. Krai mren, namshiq raq ningkun jonghea milap han. Kiimaq, kra ningkun lü miishetiq, namshiq ka i hakhi ma mija lot han. Lanta, namshiq raq Jerusalem na, Judia wang tlotli na, kiimaq Samaria wang na, kiimaq ra takiq na mangjong hiq sitlaq kriithun tlotli na, namshiq raq ngi rai jamkho mang riisap wan lan, kra hakhi she michong kuq han.” 9Apaiq raq ara bom chongke lot ri li she, tsangshiq maklii rashra niili, apaiq ka ramungtan na shea wanto. Kiimaq ra wa phumda ashi raq, apaiq ka pang wan saqli pang wanto.
10Tsangshiq raq apaiq ka ra na wawan kra liirea liipan niili, tiidong chhaq miili, khealü miirii samraqraq, maiq wenai ka kiijaq saüki saq raüta tsangshiq khaki na chapsaq chapkito. 11Kiimaq, kra wenai raq tsangshiq ma, “Gelilinok lei, namshiq ka ajaq chap lanta, ra nü na liilanta jam nguta chapphaq sea wa? Ara Jesuq ara, ümchaü namshiq phong wa jamkho ramungtan na shea wantaq, kiikhiisii hali, ara mangjong hiq na mijangki nong,” nguta tsangshiq ma chongkuqto.
Judas Laiti Matthias Tseato
12Kra miishe, kiimwebi ka Olip Pero Hiqlam maq, Jerusalem chela na hali jang wan nongto. Kra hiqlam kriika, Jerusalem chela maq meng shi tin riito. 13Tsangshiq ka Jerusalem na jang wanto. Raüta, tsangshiq jap chang jam na rathong khokti kiina riitam ngato. 14Tsangshiq ka akhing khing na adam na achu jaü, jechakre re rai kiimaq Jesuq ma anyung Meriq nai anotiim thun kra riito riitamtlo.
15Kiitincho ji na kamasham maiqsetiim ka adam na rintii thungngato. Tsangshiq ka wiitarü shishi ri roqnai tin khan riito. Kiimaq kiitiikaq Petar ka chap raüta akongtibi kiima akha chongto, 16“Phunainotiim le, Asii bomtsi na Asii Wenyi raq Dawit lümaq Judas Iskariot miitu jamlai bom wa tiithaitaq kriika, ümchaü riikhaqli she kuwato. Judas ka siwe ma ja raüta, Jesuq ka tlapto. 17Judas Iskariot ka nashiq rai kongshi maq, shamshi kaishi maq siwan miitu atsea wan. Shatmaq, apaiq ka sho lam wai lam phanho raüta mowanto.”
18(Judas raq sho tsiiq siqtaq kriimaq, hiq phu bashi rito. Kiijaq apaiq miisaq ka tiithum wanto. Apaiq ka apuk aji jea lili phok rai raüta tsaito. 19Ara tsütsa arka, Jerusalem chela na siti maiqse angu tarü raq ataiwi siisaq. Kriikha maq, tsangshiq nok bom maq, kra shochiim ba kriika Akeldama nguta mangto. Kra liichum ka, “Tiijai Raü Chang Hiq Ba,” nguta ngo riito.)
20“Riita ara chongtlaq bomtsi arka, Shomshi lak na akha waiqthü je dongdii riito,
‘Apaiq jam ka jammii she miriim kilaq;
maiq asiti jumin ahü she mirlaq.’
Kiimahali, Shomshi lakdap bashi na,
‘Apaiq jaqsham ka
maiq ahinti riishetiq
misham laq,’ nguta waiq thüto.
21-22“Riita, ara chongtlaq arai mren, maiq weshi, nashiq rai Tati Jesuq ka amaa wa dong wanto she dea nguta, hakhi kewan dam miitu tsea chang she rakito. Apaiq ka khamlamketi we Johan raq, ngarai tiidii wan khamlamke tsütsa chongkuqtaq kra akhing maq pha wan raüta, Tati Jesuq raq, nashiq phong na khum raüta, traho wantaq, kiijaq lom damti we riichang. Raüta, Jesuq ka ramungtan na shea wantaq ranaiq na saüli, nashiq rai kongshi maq sidamti we riichang.”
23Kra riichongtaq krai mren, tsangshiq raq maiq wenai mang shiikapto. Tsangnai wenai mang ka ara: Weshi mang ka Joseph. Apaiq ka Barsabas ngutiimin ngutlo. (Apaiq mang ka Jastas ngutiimin ngutlo). Kiimaq weshi mang ka Matthias. 24Kra raütiishe, tsangshiq raq tsangnai wenai mang na ton raütiishe, akha achu jaüto, “Tatiwe le, ümniiriiri maiqse angu tiima tsantsii ka wiita asap haü siisaq. Riita, ümchaü min, ara tsangnai wenai arwa, ümriiti wa ümniiraq tsea wan laü, kriiwe ka naishiq ma tiichhikuq laq. 25Apaiq ka Judas, sho na kaiho chang dongdii kha maq, sho na kihotaq kra changkhü song miitu she tsea laq. Laüta, apaiq ka ümkiim we miishe shong laq.” 26Kra achu jaü lot raütiishe, tsangshiq raq maiq wenai mang na, lang liito. Krai mren, lang raq Matthias mang na thaüto. Krai mren, tsangshiq raq Matthias ka Jesuq kiimwe miishe tseato. Kra ranaiq miiphat she, Matthias ka Jesuq Khristo kiimwebi roqshi ri weshi krai kongshi she jawanto.
Obecnie wybrane:
KIIMWEBI JAQSHAM 1: TANGSBSI
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
