Amarkɩ 1

Azã n mõolɩ Nawẽnnɛ yetɔga la yelle

(Amatie 3:1-12, Aluki 3:1-18, Azã 1:19-28)

1Nawẽnnɛ Dayʋa Azezi-krisi kõ-yẽlga n pɔsɛ se'em n wãna: 2La ẽŋɛ wʋ Nawẽnnɛ nõtɔ'ɔsa A'ezayi n yʋʋn põn gʋlsɛ se'em, tɩ Nawẽnnɛ yetɩ:

«Bɩsɛ, mam wʋn tõm m tõntõnna

tɩ a dẽŋɛ fʋ nẽŋa ka malgɛ sore bɔ fɔ.

3La de la sɛka n mõolɩ weem tɔgra ke'enke'em yetɩ:

‹Malgɛ-ya sore sõŋa gu'ura Zuudãana.

Malgɛ-ya sɔa la tɩ ba tɔ tẽntẽesɩ bɔ ẽ.› »

4Bɛla tɩ Azã daan bɔna weem misra nẽrba ko'om pʋam, dee mõola yetɩ: «Teege-ya yɛm basɛ tõon-be'ero, dee botɩ ba mise ya ko'om pʋam, tɩ Nawẽnnɛ basɛ ya tõon-be'ero taalɛ.» 5Tɩ nẽrba zozo'e ze'ele Zude so'olʋm wuu, la Zerizalɛm wuu sẽnna Azã zẽ'am tɔgra ba tõon-be'ero pa'ala ẽ. Tɩ Azã misra ba kʋlaa yʋ'ʋrɛ n de Zʋrdẽ pʋam.

6Azã daan yɛ la fuugo n de yʋgma kõbrɔ, dee dɩkɛ sagãnnɛ lʋ a sɩa. A daan diti la seero la saniiro.

7A daan mõolɩ yetɩ: «Nẽra n boe mam poorʋm sẽna, ẽŋa tarɩ pãŋa gãnna mam mɛ. Mam ka masɛ tɩ m dõbrɛ a nẽŋam pirge a tagra. 8Mam misri ya la ko'om pʋam, la ẽŋa wʋn mise ya la Nawẽnnɛ Sɩa.»

Azezi ko'om misga, la Asũtãana n makɛ ẽ bɩsɛ

(Amatie 3:13—4:11, Aluki 3:21-22;4:1-13)

9Wakat-ẽŋa Azezi ze'ele la Nazarɛtɩ n boe Galile so'olʋm wa'am Azã zẽ'am, tɩ a mise ẽ Zʋrdẽ ko'om na pʋam. 10Tɩ Azezi ze'ele ko'om na pʋam dɔɔra, yẽ tɩ saazuum darɛ yo'oge, tɩ Nawẽnnɛ Sɩa ãna wʋ na'adawenne na sige a zuo, 11tɩ kõa ze'ele Nawẽnnɛ yire yetɩ: «Fõn de la mam Dayʋa tɩ mam nõŋɛ la m sũure wuu, fʋ paagɛ la mam yɛm.»

12Bilam mẽŋa tɩ Nawẽnnɛ Sɩa botɩ Azezi sẽŋɛ weem. 13A daan boe weem na dabsa pinaasɩ, tɩ Asũtãana wa'am wa makɛ ẽ bɩsɛ. A daan boe la we-dũnsi lɛ, tɩ Nawẽnnɛ malɛkadõma sõŋra ẽ.

Azezi wi nẽrba banaasɩ tɩ ba dɔla ẽ

(Amatie 4:12-22, Aluki 4:14-15;5:1-11)

14Ba daan yõkɛ Azã yʋ la yʋ'a deego pʋam. Bɛla poorʋm tɩ Azezi sẽŋɛ Galile ka mõola Nawẽnnɛ kõ-yẽlga yetɩ: 15«Wakatɛ paagɛ mɛ, Nawẽnnɛ so'olʋm lɛm mɛ. Teege-ya yɛm basɛ tõon-be'ero dee sakɛ kõ-yẽlga la.»

16Azezi daan dolɩ la Galile mõgrɛ la nõorʋm, yẽ Asimõ la a yɩbga A'ãndre n boe mĩ lɔbra yʋka mõgrɛ la pʋam, ba daan de la zũn-yõgrɩba. 17Tɩ a yele ba yetɩ: «Dɔla-ya mam, tɩ mam wʋn botɩ ya ɛɛra nẽrba tɩ ba dɔla mam wʋ yãma n yõgrɩ zũma se'em na.» 18Tɩ ba basɛ ba yʋgsɩ la bilam mẽŋa, dee dɔla ẽ.

19Tɩ a sẽŋɛ fẽe yẽ Azebede dayɔɔsɩ Azakɩ la a yɩbga Azã n boe õorŋɔ pʋam malgra ba yʋgsɩ. 20Tɩ a darɛ wi ba, tɩ ba basɛ ba sɔ Azebede la a tõntõnɩba õorŋɔ la pʋam, dee dɔla ẽ.

Kʋlkã'arga n tarɩ bʋraa tɩ Azezi botɩ a yese

(Aluki 4:31-37)

21Tɩ Azezi la a karẽnbiisi sẽŋɛ Kapɛrnaʋm. Tɩ Zifdõma vo'osgo daarɛ paagɛ, tɩ Azezi kẽ ba wẽndeem zãsna nẽrba. 22La zãsŋɔ la di'ige nẽrba la mɛ, se'ere n soe la, a zãsŋɔ la daan tarɩ la pãŋa, la ka ãn wʋ lɔɔ karẽnsãandõma n zãsnɩ se'em na.

23Tɩ bʋraa daan bɔna wẽndeem na tɩ kʋlkã'arga tara ẽ, tɩ bʋraa la kaasɛ yetɩ: 24«Azezi n de Nazarɛtɩ nẽra, fõn bẽm yelle n boe la tõma? Fõn wa'am tɩ fʋ sã'am na tõma? Mam mi fõn de sɛka. Fõn de la pʋpeelem dãana n ze'ele Nawẽnnɛ zẽ'am.»

25Tɩ Azezi tãsɛ kʋlkã'arga la yetɩ: «Go'oge, yese dee basɛ ẽ.» 26Tɩ kʋlkã'arga la bigse bʋraa la tɩ a gõgra, dee kaasɛ tagurga yese dee basɛ ẽ. 27Tɩ ba wuu zɛ yɛrɩ, sɔkra taaba yetɩ: «Wãna de la bẽm? La de la zãsŋɔ paalga n tarɩ pãŋa. A tɔgrɩ la kʋlkã'arsɩ, tɩ ba sakra a nõorɛ.» 28Tɩ Azezi yʋ'ʋrɛ darɛ saagɛ Galile so'olʋm zẽ'a woo.

Azezi botɩ bã'adõma yẽ ĩmã'asʋm

(Amatie 8:14-17, Aluki 4:38-41)

29Tɩ Azezi la a nẽrba daan yese Zifdõma wẽndeem na, tɩ Azakɩ la Azã doose ba, tɩ ba sẽŋɛ ka kẽ Asimõ la A'ãndre dõma yire. 30Tɩ Asimõ dɛɛm-pɔka ĩyã ba tʋlgɛ, tɩ a gã. Tɩ Azezi paagɛ, tɩ ba darɛ tɔgɛ pɔka la yelle bɔ ẽ. 31Tɩ Azezi sẽŋɛ lɛm ẽ, gʋrɛ a nu'ugo botɩ a isge. Tɩ bã'a la basɛ ẽ, tɩ a ẽŋɛ ba sãanɔ.

32Tɩ wẽnnɛ wa lui sobe, tɩ ba tarɩ bã'adõma wuu, la sɛba tɩ kʋlkã'arsɩ tarɩ ba wa'am Azezi zẽ'am. 33Tɩ tẽŋa la nẽrba wuu lagsɛ taaba yire la zanõrʋm. 34Tɩ Azezi botɩ nẽrba zozo'e tɩ bã'asɩ to'oto'ore tarɩ ba yẽ ĩmã'asʋm, dee dige kʋlkã'arsɩ zozo'e, tɩ ba yese. La a ka sakɛ tɩ kʋlkã'arsɩ la tɔgɛ, se'ere n soe la, ba põn mina ẽ mɛ.

Azezi mõolɛ Nawẽnnɛ kõ-yẽlga Galile

(Aluki 4:42-44)

35Azezi daan isge la bulika yʋ'ʋŋɔ yʋ'ʋŋɔ yese tẽŋa la pʋam sẽŋɛ zẽ'a tɩ nẽrba ka boe, tɩ a ka pʋ'ʋsɛ. 36Tɩ Asimõ la nẽr-sɛba n daan boe la ẽ na yese ɛɛra ẽ. 37La ba daan yẽ ẽ mɛ, yele ẽ yetɩ: «Nẽrba wuu eerɩ fʋ mɛ.» 38Tɩ Azezi lerge ba yetɩ: «Basɛ-ya tɩ tɩ sẽŋɛ tẽn-sɛba n lɛm na tɩ m ka mõolɛ kõ-yẽlga la bilam mẽ, tɩ la de la bɛla ĩyã tɩ mam wa'am.» 39Tɩ a kaagɛ Galile so'olʋm wuu mõolɛ kõ-yẽlga la Zifdõma wẽndeto pʋam, dee dige kʋlkã'arsɩ tɩ ba yese dee basɛ nẽrba.

Azezi botɩ kõnkonne yẽ ĩmã'asʋm

(Amatie 8:1-4, Aluki 5:12-16)

40Bʋraa ayɩla n de kõnkonne n wa'am Azezi zẽ'am wa ka dũma tẽŋa a nẽŋam sose ẽ yetɩ: «Fʋ sãn bɔɔra, fʋ tã wʋn basɛ tɩ m yẽ ĩmã'asʋm mɛ le ãna sõŋa.» 41Tɩ a ninbãalga yõkɛ Azezi, tɩ a tẽegɛ a nu'ugo kalʋm ẽ yetɩ: «Mam bɔɔra, yẽ ĩmã'asʋm le ãna sõŋa.» 42Tɩ bã'a la basɛ ẽ bilam mẽŋa, tɩ a le ãna sõŋa. 43Tɩ Azezi yele ẽ yetɩ a fõrgɛ, dee kã'an ẽ yetɩ: 44«Da kãn yele nẽra nẽra, la sẽŋɛ Nawẽnnɛ kãabgɔ kẽema zẽ'am ka pa'alɛ ẽ fɔ mẽŋa tɩ a bɩsɛ, dee bɔ ẽ bõn-sɛba tɩ Amoyisi yʋʋn gʋlsɛ yetɩ ba bɔ la, tɩ la pa'alɛ ba tɩ fʋ sɩrɩ yẽ ĩmã'asʋm.» 45La bʋraa la fõrgɛ mɛ ka dɩkɛ yelle la mõolɛ pa'alɛ la ẽŋɛ se'em. Bɛla tɩ Azezi daan ka le tãna wʋn kẽ tẽŋa pʋam, sãn dagna tɩ a li'ise mɛ kẽ. A daan boe la zẽ'e-sɛba tɩ nẽrba ka boe mĩ na, tɩ nẽrba daan zɛ'ɛta zẽ'a woo sẽnna a zẽ'am.

Obecnie wybrane:

Amarkɩ 1: gurDBL

Podkreślenie

Udostępnij

Kopiuj