Amarkɩ 2

Azezi botɩ kɔɔrŋɔ yẽ ĩmã'asʋm

(Amatie 9:1-8, Aluki 5:17-26)

1Bɛla poorʋm, dabsa fẽe n tole, tɩ Azezi lebe Kapɛrnaʋm. Tɩ nẽrba wõm tɩ a boe yire, 2lagsɛ halɩ zozo'e tɩ zẽ'a ka bɔna, baa deego la nõorʋm. Tɩ a tɔgra Nawẽnnɛ yetɔga bɔ'ɔra ba. 3Tɩ nẽrba banaasɩ zɛ kɔɔrŋɔ wa'am Azezi zẽ'am. 4La nẽrba la n zo'oge la, ba ka tã wʋn zɛ ẽ paagɛ Azezi zẽ'am, tɩ ba zom gɔsgɔ ka lakɛ gɔsgɔ la bɔbrɛ ayɩla, doose bilam sike kɔɔrŋɔ la, la a bõn-gã'ala deego la pʋam Azezi nẽŋam. 5Tɩ Azezi yẽ ban bɔ ẽŋa sɩra se'em na, yele kɔɔrŋɔ la yetɩ: «M bia, fʋ tõon-be'ero taalɛ ka le bɔna fʋ zuo.» 6La lɔɔ karẽnsãandõma basɛba n daan boe mĩ, daan zẽa tẽ'esra ba sũurum yetɩ: 7«Bẽm tɩ ẽna tɔgra bɛla? A tɔgrɩ pɔ'ɔra la Nawẽnnɛ. Ãn tã wʋn basɛ tõon-be'ero taalɛ, sãn dagna Nawẽnnɛ mã'a?» 8Tɩ Azezi bãŋɛ a pʋtẽ'erʋm ban tẽ'esrɩ se'em ba sũurum na, yele ba yetɩ: «Bẽm tɩ ya tẽ'esra wãna ya sũurum? 9Bẽm n de nãana gãnna, mam sãn yele kɔɔrŋɔ la yetɩ, a tõon-be'ero taalɛ ka le bɔna a zuo, bɩɩ mam sãn yele ẽ yetɩ, a isge dɩkɛ a bõn-gã'ala sẽnna n de nãana? 10Bɛla m wʋn botɩ ya bãŋɛ tɩ Nẽrsaala Dayʋa la tarɩ pãŋa dũnia wã zuo mɛ, wʋn basɛ tõon-be'ero taalɛ.» Azezi yele bɛla, dee yele kɔɔrŋɔ la yetɩ: 11«Isge dɩkɛ fʋ bõn-gã'ala kule.» 12Tɩ kɔɔrŋɔ la isge kalam dɩkɛ a bõn-gã'ala la ba wuu nifum yese. Tɩ ba wuu zɛ yɛrɩ, pẽgra Nawẽnnɛ yetɩ: «Tõma nãn ka yẽ wãna.»

Azezi wi Alevi tɩ a dɔla ẽ

(Amatie 9:9-13, Aluki 5:27-32)

13Azezi le sẽŋɛ la mõgrɛ la nõorʋm, tɩ nẽrba zozo'e sẽna a zẽ'am, tɩ a zãsna ba. 14La Azezi sẽnnɩ tɔlla mɛ yẽ Alfe dayʋa Alevi tɩ a zĩ lampo to'osgo deem tɔ'ɔsra lampo, tɩ a yele ẽ yetɩ: «Dɔla mam.» Tɩ a isge dɔla ẽ.

15Tɩ Azezi sẽŋɛ ka zẽa Alevi yire dita, tɩ lampo-tɔ'ɔsrɩba la tõon-be'ero dõma zozo'e lagɩm na Azezi la a karẽnbiisi la dita, se'ere n soe la, nẽr-bãma buuri n daan zo'oge dɔla ẽ. 16Tɩ lɔɔ karẽnsãandõma n de Farisi dõma la yẽ Azezi n diti la lampo-tɔ'ɔsrɩba, la tõon-be'ero dõma la, tɩ ba soke a karẽnbiisi la yetɩ: «Bẽm tɩ a lagɩm na lampo-tɔ'ɔsrɩba, la tõon-be'ero dõma dita?» 17Tɩ Azezi wõm bɛla, yele ba yetɩ: «Sɛba n tarɩ ĩmã'asʋm ka eerɩ tɩba, sɛba n bẽ'erɩ n eerɩ tɩba. Mam ka wa'am tɩ m wi sɛba dõma n yetɩ bãma masɛ mɛ na, mam wa'am na tõon-be'ero dõma ĩyã.»

Ba soke Azezi nõorlʋa yelle

(Amatie 9:14-17, Aluki 5:33-39)

18Azã karẽnbiisi, la Farisi dõma daan lʋtɩ la nõorɛ. Tɩ ba wa'am wa soke Azezi yetɩ: «Bẽm tɩ Azã karẽnbiisi, la Farisi dõma karẽnbiisi la lʋta nõorɛ dee tɩ fõn karẽnbiisi la ka lʋta nõorɛ?» 19Tɩ Azezi yele ba yetɩ: «Nẽra sãn ẽŋɛ pɔgdire kibsa wi a sɩrdõma tɩ ba wa'am, ba tã wʋn lʋ nõorɛ mɛ wakat-sɛka tɩ pɔgdita la ken bɔna ba zẽ'am na bɩɩ? Ayɛɩ, pɔgdita la sãn ken bɔna ba zẽ'am, ba kãn tã'agɛ lʋ nõorɛ. 20Wakatɛ sẽm mɛ tɩ ba wʋn yese pɔgdita la ba zẽ'am, wakat-ẽŋa tɩ ba yãŋa wʋn lʋ nõorɛ.

21Nẽra kãn dɩkɛ tãn-paalɛ lige fu-kɛka. A sãn ẽŋɛ bɛla, tãn-paalga la wʋn botɩ fu-kɛka la ãagɛ mɛ gãnna kʋrʋm na. 22La nẽra mẽ kãn dɩkɛ dã-paalga sũm wɔ-kɛgsɩ pʋam. A sãn ẽŋɛ bɛla, dã-paalga la sãn kɛlla, ba wʋn botɩ wɔɔsɩ la tãsɛ mɛ, tɩ dãam na, la wɔɔsɩ la wuu sã'am. La masɛ tɩ ba dɩkɛ dã-paalga sũm na wɔ-paalsɩ pʋam.»

Vo'osgo daarɛ yelle

(Amatie 12:1-8, Aluki 6:1-5)

23Zifdõma vo'osgo daarɛ ayɩla tɩ Azezi la a karẽnbiisi daan dɔla vatɔ pʋam tɔlla, tɩ a karẽnbiisi la kɔ si wẽena ɔbra. 24Tɩ Farisi dõma yele ẽ yetɩ: «Bɩsɛ, bẽm tɩ ba ɩta sɛla n sisri vo'osgo daarɛ?» 25Tɩ Azezi lerge ba yetɩ: «Yãma nãn ka karẽŋɛ Adavidi la a nẽrba la kɔm n yʋʋn dõnnɩ tɩ ba bɔɔra dia tɩ ba di, tɩ Adavidi yʋʋn ẽŋɛ se'em, 26wakat-sɛka tɩ Abiata de Nawẽnnɛ kãabgɔ kẽma nẽŋadãana la? A yʋʋn kẽ la Nawẽnnɛ deego la pʋam dɩkɛ borborɩ sɛba tɩ ba bĩŋe bɔ Nawẽnnɛ na obe. La sisri mɛ, nẽra nẽra ka obrɩ ba, sãn dagna Nawẽnnɛ kãabgɔ kẽma mã'a. La Adavidi yʋʋn obe ba mɛ, dee bɔ nẽr-sɛba n boe a zẽ'am na.» 27Azezi yele bɛla dee le yele ba yetɩ: «La de la nẽrsaala ĩyã tɩ Nawẽnnɛ ẽŋɛ vo'osgo daarɛ, a ka ẽŋɛ nẽrsaala vo'osgo daarɛ ĩyã. 28Bɛla, Nẽrsaala Dayʋa la n soe sɛla woo, baa la vo'osgo daarɛ.»

Obecnie wybrane:

Amarkɩ 2: gurDBL

Podkreślenie

Udostępnij

Kopiuj