Mat 18
18
Mkulu ni ŵani?
(Mk 9:33-37; Lk 9:46-48)
1Pa nsita iyi asambili ecizomukonsha Yesu kuti, “Kansi mu Ufumu wa Kululu, mkulu wopula wonse ni ŵani?”
2Yesu eyita mwana, nomupanamika pakati pawo. 3Elaŵila kuti, “Nukuwuzyani vyendi kuti keno muyalukalini ngani ŵana, mukaloŵelini mu Ufumu wa Kululu. 4Aliyense wolicefya, ngani mwana uyu, niye mkulu mu Ufumu wa Kululu. 5Nipo aliyense opokela luweme mwana ngani uyu cikomo ca newo, niye kuti opokela luweme newo wamene. 6Koma aliyense opangisha aliyense mwa aŵa ŵana ocetekela newo kutaya cicetekelo cawo, ni ciweme kumumangilila mphelo mu mukosi mwake nomupoza pansi pa cimmana.”
Votayisha cicetekelo
(Mk 9:42-48; Lk 17:1-2)
7“Shamu ku calo pa votayisha cicetekelo! Pakuti ivi vikawele, koma shamu kwa wala wavuwelela! 8Kwanja keno kwendo yukutayisha cicetekelo, uyitende noyitaya. Ni ciweme kuloŵa mu Ufumu wa Kululu wolemala, kupula kuloŵa na manja na mendo aŵili nopozewa mu mulilo wosasila. 9Keno linso yako yukutayisha cicetekelo, uyikolowole noyitaya. Ni ciweme kuti ukaloŵe mu moyo uli na linso imo yeka, kupula kuti ukapozewe ku mulilo wa Gehena uli na menso aŵili.”
Linganizyo ya mbelele yotayika
(Lk 15:3-7)
10“Wonesheshani kuti mutafulilalini cukanga yumo wa aŵa ŵana. Pakuti nukuwuzyani kuti Kululu angelo ŵawo nsita zonse owona cinso ca Atata ali Kululu. 11[Pakuti Mwana wa munthu ewela kuzopulumusha ŵala etayika.]
12“Mulingililanji? Keno munthu ali na mbelele makumi kumi (100), nipo imo yasoŵa, osiyalini mbelele zala zinyinji mu lupili na kuyosakila yala imo yasoŵa? 13Nipo akayifwana nukuwuzyani vyendi kuti osangalala kupula mwangasangalalile na zala makumi asanu na anayi na mphuzyo zisanu na zinayi (99) ziliyosowe. 14Tetyo, ni kupangwalini kwa Atata ali Kululu kuti yumo wa aŵa ŵana akacenekeke.”
Munekwanu akakuyifyila
(Lk 17:3)
15“Munekwanu akakuyifyila, ukomuwuzya cawayifya, pa mweka mwe aŵili. Keno wakumvwila, niye kuti wamuyavya munekwanu. 16 Koma keno okumvwilalini, utoleko muyako yumo keno aŵili, kuti, ‘vonse visimikizyike na mboni zala ziŵili.’ 17Keno okana kuŵamvwila, muwuzye mpingo. Nipo keno okana kumvwila cukanga mpingo, mutoleni kuŵa wa kunja na wosonkhesha msonkho.
18“Nukuwuzyani vyendi kuti ciliconse cawamanga pano pansi cikomangiwa Kululu, nipo ciliconse cawamangulula pano pansi cikomangululiwa Kululu.
19“Nukuwuzyani soti kuti keno aŵili akatizyana pano pansi, pa ciliconse cakupangwa, Atata ŵa Kululu aŵacitile. 20Pakuti pakumana aŵili keno atatu mu zina yangu, newo nili nawo pamo.”
Linganizyo ya nyanchito wosalekelela muyake
(Lk 17:4)
21Pamene apo Petulo ecizomukonsha kuti, “Asikulu, nimulekelele kangananji munekwasu akaniyifyila? Kansi ni kasanu na kaŵili?”
22Yesu eyasuka kuti, “Kasanu na kaŵili tyala yayi, koma makumi asanu na aŵili noŵapasha kasanu na kaŵili (70 x 7).
23“Ufumu wa Kululu tingawulinganizye na mfumu yenzopangwa kuwamya nkhongole ku anyanchito ŵake. 24Pecitatika, yumo ewela enze na nkhongole zinyinji. 25Nipo aliyotweshe kuwezya, asikulu wake elamulila kuti asitishiwe yeve, mkazi wake, ŵana ŵake, na vonse veenze navo kuti alipile nkhongole. 26Koma nyanchito wala efukama nomusenga kuti, ‘Nilezyeleni mtima, nikulipileni nkhongole zonse.’ 27Mfumu emucitila lusungu, asikulu ŵake emumangulula, nomulekelela nkhongole zake.
28“Koma wala nyanchito pecifuma panja, efwana nyanchito muyake enze na nkhongole yake itontho, emukata nipo etatika kumukata pa mukosi nolaŵila kuti, ‘Nipe nkhongole yangu.’
29“Nyanchito muyake wala efukama nomusenga kuti, ‘Nilezyele mtima nikulipile.’ 30Wala nyanchito aliyowumvwe, mpaka kuyomupoza mu jele mpaka patiakalipilile nkhongole.
31“Anyanchito ayake peciwona vecitika ecita citinthi, nipo eciyotanikila kwa asikulu wawo vonse vecitika. 32Asikulu wawo emuyita nyanchito wala nomuwuzya kuti, ‘Wewo nyanchito muyipa mtima! Newo nakulekelela nkhongole zako zonse pakuti wanipapatila. 33Nga walekelanji kumucitila lusungu muyako, ngani mwanakucitila newo?’ 34Tetyo, mwa ukali asikulu ŵake emutwala ku omanga kuti amumange mpaka patiakalipile nkhongole.
35“Niye mwatiakacitile Atata ŵa Kululu kwa aliyense wa mwewo, keno olekelelalini munekwawo kufuma pansi pa mtima.”
Obecnie wybrane:
Mat 18: GMN
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Nsenga New Testament © The Bible Society of Zambia, 2015.
