Mat 17

Yesu oyaluka mu mawonekelo ŵake

(Mk 9:2-13; Lk 9:28-36)

1Pepepita masiku asanu na imo, Yesu etola Petulo, Yakobe na Yohane mkwawo wa Yakobe, nokwela nawo pa lupili itali kwa ŵeka. 2Akali kwamene kwala, mawonekelo ŵa Yesu eyaluka, ŵeve ololesha. Cinso cake cengʼanimila ngani zuŵa, nipo vovwala vake vetuŵa ngani nyale. 3Pamene apo asambili ŵala ewona Mose na Eliya olaŵila naye.

4Petulo ewuzya Yesu kuti, “Asikulu, ni ciweme kuti tili pano. Keno mupangwa, nimange misasa itatu, uyakine wanu, uyakine wa Mose na uyakine wa Eliya.”

5Peenze akalulaŵila tetyo, kwiwela mkumbi noŵavwinikila, nipo mwifuma lizu yakuti, “Uyu ni Mwana wangu. Numutemwa ngako. Muwomumvwila.”

6Asambili ŵala pecimvwa ivi, ewisha vinso vawo nipo ecita wowa. 7Koma Yesu ewela noŵakata noŵawuzya kuti, “Panamani, nipo osacita wowa.” 8Peciyimya menso ŵawo, ewona kuti Yesu enzepo yeka penzeve munthu muyakine.

9Penzoseluka lupili, Yesu eŵalamulila kuti, “Osawuzya aliyense vamwawona mpaka Mwana wa Munthu akawuke kwa akufwa.”

10Asambili emukonsha kuti, “Nga asambizyi olaŵililanji kuti Eliya owamila kutangulila kuza?”

11Yeve eyasuka kuti, “Ni cendi Eliya akatangulile kuza, nipo akawamye vinthu vonse. 12Koma nukuwuzyani kuti Eliya ewela kale, nipo aliyomuziŵe, koma ecita naye vilivonse venzopangwa. Naye soti Mwana wa Munthu akatamanishiwe mu manja mwawo.” 13Asambili emvwishisha kuti enzoŵawuzya va Yohane Mbatizi.

Yesu opozya mulumbwana wokatiwa na ciŵanda

(Mk 9:14-29; Lk 9:37-43)

14Pecifwika kwala kwenze winji wa ŵanthu, munthu muyakine ecizofukamila Yesu, 15nolaŵila kuti, “Mucitileni lusungu mwana wangu. Ali na njili–njili, nipo otamana ngako. Pakuti kanyinji oponela pa mulilo na mu manzi. 16Nenze namuleta kwa asambili ŵanu, koma aliyomupozye.”

17Yesu elaŵila kuti, “Nimwe luko iyipa iliye cicetekelo! Niŵe namwe kufwika nsita yotyani? Mukalungame nsita yanji, na kuti nipilile mpaka lini? Muleteni kuno mwana uyo.” 18Yesu ecimula ciŵanda cala, nipo cefuma. Tetyo mulumbwana wala epola pamene apo.

19Asambili ewela kwa Yesu mofisama nolaŵila kuti, “Takangiwa tyani kufumya ciŵanda cala?”

20Yesu eŵayasuka kuti, “Cikomo ca cicetekelo canu citontho. Pakuti nukuwuzyani vyendi kuti, keno muli na cicetekelo ngani ca kambuto katontho ngako, mukawuzye lupili kuti, ‘Fumapo apa, wakuya apo,’ nipo ikofumapo. Nipo paliye citicikokukangani. [ 21Koma ciŵanda coteti, mungatweshelini kucifumya keno muliyolombe nolilesha kulya.]”

Yesu olaŵila soti va kufwa na kuwuka kwake

(Mk 9:30-32; Lk 9:43-45)

22Nsiku iyakine asambili peciwunjikana wonse ku Galileya, Yesu eŵawuzya kuti, “Mwana wa Munthu ali pafupi kutwaliwa mu manja mwa ŵanthu, 23nipo akamupaye, nipo soti akawuke pa nsiku ya citatu.” Asambili pecimvwa ecita citinthi.

Yesu osonkha msonkho

24Pecifwika ku Kapilinamu, wosonkhesha msonkho eluta kwa Petulo nomukonsha kuti, “Kansi Asambizyi ŵanu olipilalini msonkho wa ku Ngʼanda ya Mulungu?”

25Petulo elaŵila kuti, “Eee.”

Pecifwika mu ngʼanda, Yesu emulaŵizya kuti, “Ulingilila vinji Simoni? Ni kwa ŵani kwakutwala msonkho mafumu ŵa pano pansi? Ku ŵanthu ŵa mtundu wawo, keno kwa alwendo?”

26Petulo eyasuka kuti, “Kwa alwendo.”

Yesu emuwuzya kuti, “Tetyo, ŵanthu ŵa mtundu wawo opangwikalini kulipila msonkho. 27Koma mosaŵakumbulwisha, nkhoya ku cimmana nopoza mezo, nipo utole saŵi yotatika. Ukavula kamwa yake ufwanemo ndalama. Uyitole ndalama yala uŵape wosonkhesha msonkho uŵe msonkho wangu na wako.”

Obecnie wybrane:

Mat 17: GMN

Podkreślenie

Udostępnij

Kopiuj